Kapitulo 35
Ti Naimbag a Samaritano
Insarita ni Jesus ti adu nga estoria, wenno pangngarig, a mangtulong kadagiti tao nga agsursuro iti kinapudno.
Maysa nga aldaw sinaludsod ti maysa a pangulo dagiti Judio no ania ti nasken nga aramidenna tapno maaddaan iti agnanayon a biag. Dinamag ti Mangisalakan no ania ti kinuna dagiti nasantuan a kasuratan. Kinuna ti pangulo a nasken nga ayaten ti tao ti Dios ken ayatenna pay ti kaarrubana. Kinuna ni Jesus a husto isuna. Kalpasanna sinaludsod ti pangulo, “Asino ti kaarrubak?”
Insungbat ni Jesus babaen ti panangisaritana iti lalaki iti maysa nga estoria. Maysa nga aldaw magmagna ti maysa a lalaki a Judio iti kalsada a mapan iti siudad ti Jerico. Tinakawan ken kinabkabil dagiti tulisan isuna. Pinanawanda ti lalaki iti kalsada, a ngannganin matay.
Di nagbayag lumabas ti maysa a padi a Judio ket nakitana ti lalaki. Nagna ti padi iti sabali a bangir ti kalsada. Saanna a tinulongan ti lalaki.
Lumabas ti sabali pay a lalaki a Judio nga agtartrabaho iti templo. Nakitana ti nasugatan a lalaki. Ngem saanna a tinulongan ti lalaki ket nagna iti sabali a bangir ti kalsada.
Kalpasanna lumabas ti maysa a lalaki a Samaritano. Saan nga agkatunosan dagiti Judio ken Samaritano. Ngem idi makita ti Samaritano ti lalaki, naasian unay kenkuana. Binedbedanna dagiti sugat ti lalaki ket kinawesanna daytoy.
Lucas 10:33–34; Juan 4:9; Pangiwanwan iti Nasantuan a Kasuratan, “Samaritano.”
Impan ti Samaritano ti lalaki iti pagdagusan ket tinarakenna agingga iti sumaruno nga aldaw. Idi nasken a pumanaw ti Samaritano, inikkanna iti kuarta ti agay-aywan iti pagdagusan ken imbagana kenkuana a taraknenna ti lalaki.
Kalpasan a naisarita ni Jesus daytoy nga estoria, dinamagna iti pangulo a Judio no asino kadagiti tallo a lallaki ti kaarruba ti nasugatan a lalaki.
Kinuna ti pangulo a ti Samaritano ti kaarrubana gapu ta tinulonganna ti lalaki. Imbaga ni Jesus iti pangulo a Judio nga agbalin a kas iti Samaritano.