Pakauna

Ti Plano ti Nailangitan nga Amatayo

Nagnaedtayo idiay langit a kadennna ti Nailangitan nga Ama sakbay nga immaytayo iti daga. Datayo dagiti espiritu nga annakna ken addaantayo kadagiti bagi nga espiritu. Nagayattayo Kenkuana ken inayatnatayo.

Teachings of the Prophet Joseph Smith, 354

Sinuruannatayo ti Nailangitan nga Ama maipapan iti planona para kadatayo. Maawagan daytoy iti plano ti pannakaisalakan. No tungpalentayo ti planona, makapagbalintayo a kas iti Nailangitan nga Ama. Planona nga umaytayo iti daga ket maaddaan kadagiti bagi nga addaan iti lasag ken dara. Masuboktayo tapno makita a pilientayo ti agtungpal kadagiti bilin ti Dios.

Abraham 3:24–25

Ti plano ti pannakaisalakan ti mangipaay iti maysa a wagas tapno makapagbiagtayo manen iti denna ti Nailangitan nga Ama. Nasken nga agtungpaltayo kadagiti bilin. Ngem kasapulantayo met ti tulong. Kasapulantayo a maikkat dagiti basoltayo, ken kasapulantayo dagiti nagungar a bagi. Gapu ta ditayo maikkat dagiti bukodtayo a basol wenno mapagungar dagiti bukodtayo a bagi, kasapulantayo ti maysa a Mangisalakan a mangaramid iti daytoy para kadatayo.

2 Nephi 2:5–9

Pinili ti Nailangitan nga Ama ni Jesucristo nga agbalin a Mangisalakantayo. Inayat ni Jesus ti Nailangitan nga Ama. Inayatnatayo met. Immanamong Isuna nga umay iti daga tapno ipakitana kadatayo no kasano ti agbalin a nalinteg. Mangipaay Isuna iti wagas tapno maisalakantayo amin. Immanamong Isuna nga agsagaba para kadagiti basoltayo. Matay ken agungar Isuna tapno agungartayo met.

2 Nephi 2:8–9; Moises 4:1–2

Tinarigagayan met ni Satanas nga agbalin a mangisalakantayo. Ngem saanna nga inayat ti Nailangitan nga Ama. Saannatayo nga inayat. Tinarigagayanna a balbaliwan ti plano ti Nailangitan nga Ama tapno adda kenkuana ti bileg ken gloria ti Nailangitan nga Ama.

Moises 4:1–2

Sumagmamano kadagiti espiritu nga annak ti Nailangitan nga Ama ti nangpili a mangsurot ken ni Satanas. Daytoy ti nagpaliday unay iti Nailangitan nga Ama. Pinapanawna iti langit ni Satanas ken dagiti pasurotna. Ni Satanas ti sairo. Kayatna ken dagiti espiritu a simmurot kenkuana nga agbasoltayo.

Moises 4:3–4

Imbaga ti Nailangitan nga Ama ken ni Jesus nga aramidenna ti daga para kadatayo. Inaramid ni Jesus. Inaramidna ti init, ti bulan, ken dagiti bituen. Nangikabil kadagiti mula ken ayup iti daga. Ita naaddaantayo iti daga nga umayantayo ken pakaaddaantayo kadagiti bagi nga addaan iti lasag ken dara.

Hebreo 1:2; Mosiah 3:8; Abraham 4

Adu a tao ti umay agnaed iti daga. Sumagmamano kadakuada ti nangpili nga agtungpal kadagiti bilin ti Dios; sumagmamano ti saan. Sinuruan dagiti nagkauna a propeta dagiti tao maipapan iti plano ti Nailangitan nga Ama ken maipapan ken ni Jesucristo.

2 Nephi 2:19–21; Jacob 7:10–11; Moises 5:13–15

Kinuna dagiti propeta a ti Nailangitan nga Ama ti agbalinto nga ama ni Jesus. Agbalinto ti inana a maysa a nasayaat unay a babai nga agnagan iti Maria. Mayanakto isuna iti Betlehem.

Isaias 7:14; Micah 5:2; 1 Nephi 11:18–21; Alma 7:10

Kinuna dagiti propeta nga adu a tao ti saanto a mamati a ni Jesus ti Mangisalakan. Kalanglangananto dagiti dadduma a tao ken saan a nabaknang. Adunto a tao ti manggura Kenkuana.

Isaias 53:2–3

Imbaga pay dagiti propeta maipapan ken ni Juan Bautista. Umayto Isuna sakbay ni Jesus tapno mangibaga kadagiti tao maipapan Kenkuana. Buniaganto ni Juan ni Jesus.

Isaias 40:3; Mateo 3:1–3; 1 Nephi 10:7–10; 11:27

Kinuna dagiti propeta a nasingpetto ni Jesus ken agaramid iti adu a milagro. Sakbay a matay ni Jesus, agsagabanto Isuna para iti basbasol ti amin a tao tapno saandanto nga agsagaba no agbabawida.

Mosiah 3:5–8; Doktrina ken Katulagan 19:16–18

Ammo dagiti adu a propeta a mailansanto iti krus ni Jesucristo, ti Mangisalakantayo. Mailansanto Isuna iti kayo a krus ket itedna ti biagna para kadatayo.

Juan 3:14–15; Mosiah 15:7–9

Kalpasan ti tallo nga aldaw, agungarto Isuna. Agsublinto ti espirituna iti bagina. Gapu ta matay ken agungarto ni Jesus, agungartayonto met.

Isaias 25:8; 1 Taga Corinto 15:22; 2 Nephi 2:8; Alma 33:21–22

Ipakita ti Baro a Tulag a pudno dagiti balikas dagiti propeta. Daytoy ti estoria ni Jesucristo ken dagiti Apostolna. Nagnaedda iti Nasantuan a Daga. Maawagan iti Judio ti kaaduan kadagiti tao a nagnaed idiay. Sinakup dagiti Romano ti Nasantuan a Daga, ket inturayanda dagiti Judio.