Kapitulo 14
Nicodemo
Kameng ni Nicodemo iti maysa a grupo dagiti Judio a maawagan iti Fariseo. Isu pay ti agturay dagiti Judio. Adu a Fariseo ti saan a mamati nga imbaon ti Dios ni Jesucristo. Ngem namati ni Nicodemo gapu kadagiti milagro nga inaramid ni Jesus.
Immay ni Nicodemo tapno makasao ti Mangisalakan iti maysa a rabii. Imbaga ni Jesus kenkuana nga awan ti asino man a makastrek iti pagarian ti Dios a saan a mayanak a mabaliwan.
Saan a naawatan ni Nicodemo. Kasano ti pannakabalin ti tao a mayanak a mabaliwan? Inlawlawag ti Mangisalakan nga isarsaritana maipapan kadagiti naespirituan a banag. Tapno mayanak a mabaliwan, nasken a mabuniagan ti tao iti danum ken awatenna ti Espiritu Santo.
Inlawlawag ni Jesus a naibaon Isuna iti daga tapno tulongannatayo amin nga agsubli iti Nailangitan nga Ama. Kinunana nga agsagabanto para kadagiti basbasoltayo ken matay iti krus tapno maaddaantayo iti biag nga agnanayon.
Kinunana a nasken a mamatitayo Kenkuana ken pilientayo ti rumbeng. No aramidentayo ti rumbeng, agnaedtayonto iti pagarian ti Dios iti agnanayon.