Kapitulo 17

Dagiti Makagura a Tao iti Nazaret

Napan ni Jesus iti Nazaret, ti siudad a dimakkelanna.

Lucas 4:16

Napan ni Jesus iti sinagoga, maysa a pasdek a pakimisaan dagiti Judio. Timmakder isuna ket nagbasa manipud kadagiti nasantuan a kasuratan. Binasana dagiti balikas ni propeta Isaias. Kinuna ni Isaias nga umayto ti Mangisalakan iti daga ket tulonganna ti amin a taona.

Lucas 4:16–19

Idi iserrana dagiti nasantuan a kasuratan ket nagtugaw, kimmita ti amin a tattao Kenkuana.

Lucas 4:20

Kinuna ni Jesus a maipapan Kenkuana dagiti balikas ni Isaias—nga Isu ti Mangisalakan. Nasdaaw dagiti tao kadagiti balikasna. Kinunada, “Saan nga isu daytoy ti anak ni Jose?” Saanda a mamati nga Anak ti Dios ni Jesus.

Lucas 4:21–22

Ammo ni Jesus no ania ti pampanunotenda. Kayatda Kenkuana nga agaramid iti milagro. Ngem imbaga ni Jesus kadakuada a saan nga agaramid Isuna iti milagro para kadakuada gapu ta awan ti pammatida Kenkuana.

Lucas 4:23–27

Daytoy ti nangpagura kadagiti tao. Impanda ni Jesus iti tapaw ti maysa a turod ket kayatda nga ipuruak Isuna ditoy.

Lucas 4:28–29

Naglibas ni Jesus manipud kadakuada ket napan iti sabali a siudad.

Lucas 4:30–31