Kapitulo 63
Malpas ni Pablo ti Misionna
Napan ni Pablo iti templo iti Jerusalem. Impagarup ti maysa a grupo dagiti Judio nga innala ni Pablo dagiti tao a saan a Judio iti templo. Daytoy ti namagpungtot kadagiti tao a Judio. Inruarda ni Pablo iti templo ket kinabilda isuna.
Tiniliw dagiti soldado a Romano ni Pablo. Pinagsaritada isuna kadagiti tao a Judio. Pinaneknekan ni Pablo kadagiti tao a nakitana ti lawag manipud iti langit ket nangngeganna ti timek ti Mangisalakan. Kinunana nga imbaga ni Jesus kenkuana nga ikasabana ti ebanghelio.
Saan a namati dagiti tao ken ni Pablo. Tinarigagayanda a patayen isuna. Impupok dagiti soldado ni Pablo iti pagbaludan iti maysa a rabii.
Sinarungkaran ti Mangisalakan ni Pablo iti pagbaludan ket imbagana kenkuana a saan nga agbuteng. Kinunana a mapan ni Pablo iti Roma ket isurona ti ebanghelio sadiay.
Tapno masalakniban ni Pablo, imbaon dagiti taga Roma isuna iti sabali a siudad. Adda sadiay ni Ari Agrippa. Naibaga ken ni Pablo a maysa a Fariseo ni Ari Agrippa ken kagurana dagiti tao a mamati ken ni Jesus. Impapupokna pay ida iti pagbaludan. Kalpasanna nakakita ni Pablo iti lawag manipud iti langit ket nangngeganna ti timek ti Mangisalakan. Ita mamati isuna ken ni Jesus.
Impaneknek ni Pablo ken ni Ari Agrippa a pudno ti ebanghelio. Kinunana a nagungaren ni Jesus. Iti maysa a parmata, imbaga ni Jesucristo ken ni Pablo nga isurona ti ebangheliona. Gapu ta nagtungpal ni Pablo, adu a tao ti gimmura ken ni Pablo.
Kinuna ni Ari Agrippa a dumani napamati ni Pablo isuna ken ni Jesus. Saan a pinanunot ti ari a nasken a mapapatay ni Pablo. Ngem nasken nga ibaonna ni Pablo iti Roma, a pakaipasanguanna iti pannakausig.
Adda ni Pablo iti pagbaludan iti Roma iti uneg ti dua a tawen. Dimteng ti adu a tao a nangkita kenkuana. Insurona kadakuada ti ebanghelio. Nagsurat ni Pablo kadagiti surat kadagiti Santo iti dadduma a pagilian. Sumagmamano kadagitoy a surat, a maawagan iti sursurat, ti adda iti Baro a Tulag.
Ammo ni Pablo a mapapatayto. Saan isuna a mabuteng. Tinungpalna dagiti bilin ti Dios. Insurona ti ebanghelio. Inleppasna ti misionna. Ammo ni Pablo nga ay-ayaten ti Nailangitan nga Ama isuna. Ammona pay a kalpasan ti ipapatayna, agbiagto manen a kadenna ti Nailangitan nga Ama ken ni Jesucristo.