Dagiti Linaonna
Dagiti Nagadawan
Sumagmamano nga impormasion iti daytoy a libro ti naala kadagiti pagadawan a saan a nasantuan a kasuratan a nadakamat iti baba.
Bible Dictionary iti Latter-day Saint edition ti King James Version ti Biblia (1979)
James E. Talmage, Jesus the Christ, 3rd edition (1916)
Teachings of the Prophet Joseph Smith, sel. Joseph Fielding Smith (1976)
Iti Agbasbasa
Dagiti Estoria iti Baro a Tulag naisangsangayan a naisurat para kenka. Naala dagitoy nga estoria manipud iti maysa a libro a sagrado. No basaem dagitoy nga estoria, laglagipem a maipapanda iti pudno a tattao a nagbiag a nabayagen a panawen ti napalabas.
Ulit-ulitem a basaen dagiti estoria agingga a maammuam a nasayaat dagitoy. Mabalin a kayatmo pay a basaen dagitoy manipud iti Biblia. Iti baba ti kaaduan dagiti ladawan, makitamto dagiti reperensia a mangibaga kenka no sadino ti pakasarakam iti estoria iti Biblia wenno dadduma pay a libro. Agpatulongka iti amam, inam, mannursurom, wenno gayyemmo a mangsapul iti estoria kadagiti nasantuan a kasuratan.
No saanmo nga ammo ti kayat a sawen ti maysa a balikas, kitaem daytoy iti benneg a “Dagiti Balikas nga Ammuen” iti likudan ti libro. No kayatmo nga ammuen ti ad-adu pay maipapan iti lugar, kitaem daytoy iti benneg a “Dagiti Lugar nga Ammuen.” No saanmo nga ammo no asino ti tao, kitaem daytoy iti benneg a “Dagiti Tao nga Ammuen.” Addaan pay daytoy a libro iti maysa a benneg nga addaan kadagiti ladawan ti luglugar iti Nasantuan a Daga ken ti linia ti panawen iti Baro a Tulag.
Kadagiti Nagannak ken Mannursuro
Makatulong kadakayo daytoy a libro a mangisuro kadagiti nasantuan a kasuratan. Usarenyo dagiti benneg a “Dagiti Balikas nga Ammuen,” “Dagiti Lugar nga Ammuen,” ken “Dagiti Tao nga Ammuen” tapno makatulong kadagiti ubbing nga agbalin a pamiliar kadagiti balikas, tattao, ken luglugar iti daytoy a libro. Mairaman kadagiti dadduma pay a pangtulong iti daytoy a libro dagiti mapa, ladawan, ken linia ti panawen.
Bayat ti panangisuroyo, iburayyo ti pammaneknekyo maipapan iti Biblia. Allukoyenyo dagiti sursuruanyo a sikakararag a kalikagumanda a gun-oden dagiti bukodda a pammaneknek maipapan kadagiti nasantuan a kasuratan ken maipapan iti Mangisalakan, ni Jesucristo. Dumur-asto ti pannakaawat dagiti tao a sursuruanyo bayat ti panangibasayo kadakuada dagiti paggugustoda nga estoria manipud iti Biblia mismo.