Kapitulo 49
Ti Umuna a Sakramento
Kasapulan ni Jesus ken dagiti Sangapulo-ket-dua nga Apostol ti lugar a panganan iti fiesta ti Paskua. Imbaon ti Mangisalakan da Pedro ken Juan a mangsapul iti siled ken mangkita a nakasaganan ti amin para iti fiesta.
Nakasarakda iti siled ket insaganada ti fiesta.
Adda idiay ni Jesus ken dagiti amin nga Apostolna. Naggigiddanda a nangan iti fiesta ti Paskua.
Inted ni Jesus kadagiti Apostolna ti sakramento iti umuna a gundaway. Innalana ti tinapay kadagiti imana, binendisionanna daytoy, ket kalpasanna pinisina daytoy iti babassit. Imbagana kadagiti Apostol a mangan iti tinapay.
Imbaga ni Jesus kadakuada a panunotenda ti bagina no manganda iti tinapay. Indawatna kadakuada a manglaglagip a matay Isuna para kadakuada.
Imbukbok ni Jesus ti arak iti maysa a tasa. Binendisionanna ti arak ket imbagana kadagiti Apostol nga inumenda daytoy.
Imbaga ni Jesus kadakuada a panunotenda ti darana no inumenda iti arak. Indawatna kadakuada a lagipenda nga agsayasay Isuna iti dara ket agsagaba para kadagiti basol ti amin a tao.
Imbaga pay ni Jesus kadagiti Apostol a patayen Isuna dagiti nadangkes a tao iti kabiitan a panawen. Nagladingit unay ti sangapulo-ket-maysa kadagiti Apostolna. Ay-ayatenda ti Mangisalakan ken saanda a kayat a matay Isuna. Ammo ni Jesus a maysa kadagiti Apostolna ti mangtulongto kadagiti nadangkes a tao. Ni Judas Iscariote ti naganna.