Kapitulo 54
Nagungaren ni Jesus
Adda iti tanem ti bagi ni Jesus agingga iti bigat ti Domingo. Kalpasanna dimteng ti dua nga anghel ket intulidda ti bato manipud iti tanem.
Mateo 28:1–2 (kitaen iti footnote 2a); Lucas 24:1–4
Maysa a babai nga inagasan ni Jesus nga agnagan iti Maria Magdalena ti napan iti tanem. Nasdaaw a nakakita a naligsayen ti bato. Awan ti bagi ni Jesus iti tanem.
Nagtaray a napan nangibaga kada Pedro ken Juan a maysa a tao ti nangala iti bagi ti Mangisalakan. Saanna nga ammo no sadino ti yanna.
Nagtaray da Pedro ken Juan a napan iti tanem. Nasarakanda ti lupot a nangbungon ken ni Jesus idi naitanem, ngem awan ti bagi ni Jesus idiay. Saan nga ammo da Pedro ken Juan no ania ti aramidenda. Nagawidda.
Nagtalinaed ni Maria Magdalena iti abay ti tanem, nga agsangsangit. Idi kumita manen iti tanem, nakitana ti dua nga anghel.
Dinamagda ken ni Maria Magdalena no apay nga agsangsangit. Kinunana nga adda nangala iti bagi ni Jesus. Saanna nga ammo no sadino ti yanna.
Timmalliaw iti likudanna ket nakitana ti maysa a tao. Impagarupna nga isu ti agay-aywan iti minuyongan. Dinamagna no apay nga agsangsangit. Dinamagna Kenkuana no ammona ti yan ti bagi ni Jesus.
Kalpasanna kinuna ti lalaki, “Maria,” ket ammona a daytoy ni Jesus. Kiniddawna kenkuana nga ibagana kadagiti Apostol a nagungaren Isuna.
Imbaga ni Maria Magdalena ken ti sumagmamano a dadduma pay a babbai kadagiti Apostol a nagungaren ni Jesus. Idi damo saan a mamati kadakuada dagiti Apostol.
Idi agangay, kabayatan ti panagsasarita dagiti Apostol iti tunggal maysa, bimmaba ni Jesus iti siled. Nagbuteng dagiti Apostol. Impagarupda pay laeng a natayen Isuna.
Imbaga ti Mangisalakan kadakuada a sagidenda dagiti ima ken sakana. Nagungaren Isuna—nagtipon manen ti bagi ken espirituna.
Maragsakan dagiti Apostol a makakita Kenkuana. Nagkiddaw kadakuada iti taraon. Nangtedda Kenkuana iti ikan ken diro ti uyokan. Kinnanna daytoy.
Ni Jesucristo ti umuna a tao a napagungar. Adu a dadduma pay ti nagungar kalpasanna ken nakita dagiti tao nga agnanaed iti Jerusalem. Kinuna ni Jesus, “Siak ti panangungar, ken ti biag.” Gapu ta pinarmekna ti patay, mapagungartayonto amin iti maysa nga aldaw.