Kapitulo 48
Dagiti Talento
Nangted ti lalaki iti maysa nga adipen iti lima a talento. Intedna iti sabali pay nga adipen ti dua a talento. Intedna iti maikatlo nga adipen ti maysa a talento. Kalpasanna napan ti lalaki iti biahe.
Nagtrabaho a nasayaat ti adipen nga addaan iti lima a talento. Nakaullo isuna iti nayon pay a lima a talento. Addaan itan iti sangapulo a talento.
Nagtrabaho met a nasayaat ti adipen nga addaan iti dua a talento. Nakaullo isuna iti nayon pay a dua a talento. Addaan itan iti uppat a talento.
Inkali ti adipen nga addaan iti maysa a talento daytoy iti daga. Nagbuteng a mapukawna daytoy. Saan a nagtrabaho tapno makaullo iti ad-adu pay a talento.
Idi nagsubli ti lalaki, sinaludsodna dagiti adipen no ania ti inaramidda kadagiti talentoda.
Nangyeg ti umuna nga adipen iti sangapulo a talento kenkuana. Naragsak ti lalaki. Inaramidna ti adipen a maysa a dadaulo iti adu a banag ket imbagana kenkuana nga agragsak.
Nangyeg ti maikadua nga adipen iti uppat a talento iti lalaki. Daytoy met ti nangparagsak iti lalaki. Inaramidna ti maikadua nga adipen a maysa a dadaulo iti adu a banag ken imbagana kenkuana nga agragsak.
Insubli ti maikatlo nga adipen iti lalaki ti talento nga inkalina. Saan a naragsak ti lalaki. Kinunana a nasadut ti adipen. Nasken a nagtrabaho koma a nasayaat tapno nakaullo iti ad-adu pay a talento.
Innala ti lalaki ti talento manipud iti maikatlo nga adipen ket intedna daytoy iti umuna nga adipen. Kalpasanna pinapanawna ti nasadut nga adipen. Maipada ken ni Jesus ti lalaki iti estoria. Maipadatayo kadagiti adipen. Ikeddengto ni Jesus no kasano ti panangusar ti tunggal maysa kadatayo kadagiti sagut a naiteden kadatayo.