Kapitulo 59
Maammuan ni Saulo ti maipapan ken ni Jesus
Nabuya ni Saulo ti panangpatay dagiti tao ken ni Esteban. Maysa nga aldaw magmagna ni Saulo iti siudad ti Damasco a kakuyogna ti sumagmamano a gagayyemna. Tinarigagayanna nga ipupok iti pagbaludan ti sumagmamano kadagiti disipulo ni Cristo.
Pagammuanen ta linakub isuna ti maysa a naraniag a lawag manipud iti langit. Napasag isuna iti daga. Kalpasanna nakangngeg ni Saulo iti timek ni Jesus nga agsalsaludsod no apay a padpadasenna a dangran dagiti Santo. Nagbuteng ni Saulo. Dinamagna ken ni Jesus no ania ti nasken nga aramidenna. Kinuna ti Mangisalakan a nasken a mapan iti Damasco ni Saulo. Idiay a maibaga ken ni Saulo no ania ti nasken nga aramidenna.
Nagmulagat ni Saulo, ngem saan a makakita. Bulsek isuna. Impan isuna dagiti gagayyemna iti Damasco.
Nagnaed iti Damasco ti maysa a disipulo ni Jesucristo nga agnagan iti Ananias. Iti maysa a parmata, imbaga ni Jesus ken ni Ananias a mapan ken ni Saulo.
Addaan ni Ananias iti kinasaserdote. Impatayna dagiti imana iti ulo ni Saulo ket binendisionanna isuna nga agsubli koma ti panagkita ni Saulo. Kalpasan ti pannakaagasna, nabuniagan ken inawat ni Saulo ti sagut ti Espiritu Santo.
Binaliwan ni Saulo ti naganna iti Pablo. Naawagan isuna nga agbalin a maysa nga Apostol. Nagbalin isuna a misionario para iti Simbaan. Nagsurat isuna iti adu a surat. Napan isuna iti adu a pagilian ket nangisuro iti ebanghelio.