“Hulio 10–16. Dagiti Aramid 6–9: ‘Ania ti Kayatmo a Rebbengko nga Aramidek’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2023 (2022)
“Hulio 10–16. Dagiti Aramid 6–9,” Umaykayo, Sumurot Kaniak—Para kadagiti Indibidual ken Pamilia: 2023
Ti Kumbersion iti Dalan nga Agturong iti Damasco, ni Michelangelo Merisi da Caravaggio
Hulio 10–16
Dagiti Aramid 6–9
“Ania ti Kayatmo a Rebbengko nga Aramidek?”
Irugi babaen iti panagbasa iti Dagiti Aramid 6–9. Dagiti singasing iti daytoy a balabala ket matulongannaka a mangilasin iti sumagmamano a napapateg a pagbatayan kadagitoy a kapitulo, nupay masarakam dagiti dadduma iti bukodmo a panagadal.
Isuratmo dagiti Impresionmo
No asino man ti kasla saan a sierto a kandidato para iti kumbersion wenno panagbalbaliw, nalabit a ni Saul—maysa a Fariseo nga addaan iti reputasion a mangparparigat kadagiti Kristiano. Isu nga idi imbaga ti Apo iti maysa a disipulo nga agnagan ti Ananias a mangbirok ken ni Saul ken mangidiaya kenkuana iti bendision, maawatan a nagkedked ni Ananias. “Apo,” kinunana, “Nangngegko kadagiti adu maipapan itoy a tao, no kasano ti kinaadu a ranggas ti inaramidna kadagiti sasantom” (Dagiti Aramid 9:13). Ngem ammo ti Apo ti puso ken potensial ni Saul, ket adda napanunotna a mision para ken ni Saul: “Isu ti baso a napili a maipaay kaniak, a mangipan iti naganko iti sanguanan dagiti Gentil, ken dagiti ari, ken dagiti annak ti Israel” (Dagiti Aramid 9:15). Nagtungpal ni Ananias, ket idi nabirokanna daytoy sigud a mangidaddadanes, inawaganna iti “Kabsat a Saul” (Dagiti Aramid 9:17). No naan-anay a makapagbalbaliw ni Saul ken siwawaya ni Ananias a mangpasangbay kenkuana, ngarud nasken kadi nga ibilangtayo ti tunggal maysa a saan a sierto a kandidato ti panagbalbaliw—agraman ti bagbagitayo?
Dagiti Kapanunotan para iti Bukod a Panagadal iti Nasantuan a Kasuratan
Ti pusok nasken a “nasayaat iti imatang ti Dios.”
Ti dumakdakkel a simbaan kaipapananna ti dumakdakkel a pagkasapulan dagiti disipulo nga agserbi iti pagarian. Segun iti Dagiti Aramid 6:1–15, ania dagiti kababalin a sapsapulen dagiti Sangapulo-ket-dua nga Apostol kadagiti makipagserbi kadakuada? Bayat ti panangbasam iti Dagiti Aramid 6–8, kitaem no kasano a naipakita dagitoy a kababalin ken dadduma pay, kadagiti tao a kas kada Esteban ken Felipe. Ania ti kurang ken ni Simon, ken ania ti masursurotayo manipud kenkuana maipapan iti panagbalin a siaayat nga agbalbaliw?
Adda kadi ania man a mariknam a naparegta nga agbalbaliw tapno masigurado a “nasayaat iti imatang ti Dios” ti pusom? (Dagiti Aramid 8:21–22). Kasano a ti panangaramid iti daytoy a panagbalbaliw ket mangbendision kenka bayat iti panagserbim iti Apo?
Ti panangkedked iti Espiritu Santo ket makaiturong iti saan a panangawat iti Mangisalakan ken dagiti katulonganna.
Akinrebbeng dagiti lider a Judio iti panangisagana kadagiti tao iti yaay ti Mesias. Ngem napaayda a mangbigbig iti Mesias ket dida inawat Isuna. Kasano a napasamak daytoy? Paset ti sungbat ti masarakan kadagiti balikas ni Esteban: ““Kanayonyo a supringen ti Espiritu Santo” (Dagiti Aramid 7:51). Ania ti panagkunam a kaipapanan ti panangsupring iti Espiritu Santo? Apay a ti panangsupring iti Espiritu Santo ti mangiturong iti saan a panangawat iti Mangisalakan ken dagiti katulonganna?
Bayat ti panangbasam iti Dagiti Aramid 6–7, sapulem dagiti dadduma pay a mensahe nga insuro ni Esteban kadagiti Judio. Ania dagiti galad nga imballaagna a maibusor? Adda kadi dagiti madlawmo a maipada a galad iti bagim? Ania ti isuro dagitoy a balikas ni Esteban kenka maipanggep kadagiti bunga ti panagsupring iti Espiritu Santo? Kasano a mapagbalinka nga ad-adda a managrikna ken managresponde kadagiti parikna ti Espiritu Santo iti biagmo?
Kitaen met iti “The Martyrdom of Stephen” (video), ChurchofJesusChrist.org.
Tulongannakto ti Espiritu Santo a mangiwanwan kadagiti dadduma ken ni Jesucristo.
Ania ti masursurom maipapan iti panangibinglay iti ebanghelio a naisurat manipud iti Dagiti Aramid 8:26–39? Kasano a tinulongan ti Espiritu Santo ni Felipe? Kasano a ti panangibinglay iti ebanghelio iti dadduma ket kas iti panagbalinmo a maysa a pangiwanwan? (kitaen iti Dagiti Aramid 8:31).
Kinuna ni Elder Ulisses Soares a daytoy a pakaammuan “maysa a palagip ti nadiosan a bilin a nasken a kalikagumantayo a sursuruen amin ken isuro iti tunggal maysa ti ebanghelio ni Jesucristo. … No dadduma maipadatayo iti taga Ethiopia—nasken a tulongannatayo ti maysa a napudno ken naparegta a mannursuro; ken no dadduma maipadatayo ken ni Felipe—nasken a suruan ken papigsaentayo ti dadduma iti kumbersionda” (“How Can I Understand?,” Liahona, Mayo 2019, 6). Ibilang ti panangbasa iti nabati pay a mensahe ni Elder Soares ken panangutob no kasano a makatulong kenka ti Espiritu Santo nga agbalinka a maysa a nalalaing nga agad-adal ken mannursuro ti ebanghelio.
No paiturayannak iti pagayatan ti Apo, makapagbalinak a ramit kadagiti Imana.
Apagdarikmat unay ti kumbersion ni Saul; tinallikudanna a dagus manipud iti panagibalud kadagiti Kristiano iti panagikasaba maipapan ken ni Cristo kadagiti sinagoga. Bayat ti panangbasam iti estoria, utobem no apay a natallugod unay nga agbalbaliw. (Tapno mabasa ti panangiladawan ni Saul ti bukodna a pannakapasurot, kitaen ti Dagiti Aramid 22:1–16 ken 26:9–18. Kitaen a kadagitoy a pakaammuan, nagbalin a Pablo ti nagan ni Saul [kitaen iti Dagiti Aramid 13:9].)
Idinto a pudno a karkarna dagiti padas ni Saul —para iti kaaduan a tao, amang nga at-atiddog a proseso ti kumbersion—adda kadi ania man a banag a masursurom manipud ken ni Saul maipapan iti kumbersion? Ania ti masursurom manipud iti wagas a panagtignay ni Ananias ken dagiti dadduma a disipulo iti kumbersion ni Saul? Ania ti aramidem tapno mayaplikar dagitoy a leksion iti biagmo? Mabalinmo nga irugi babaen iti panagdamag iti kararag, a kas iti inaramid ni Saul, “Ania ti kayatmo a rebbengko nga aramidek?”
Bayat ti panagbasam iti Dagiti Aramid 9:36–42, ibilangmo no kasano a nagbalin a ramit ni Tabita kadagiti ima ti Dios. Ania ti mangparegta kenka maipapan iti pagwadanna?
Kitaen met iti Dieter F. Uchtdorf, “Waiting on the Road to Damascus,” Liahona, Mayo 2011, 70–77; “The Road to Damascus” (video), ChurchofJesusChrist.org.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Dagiti Aramid 6:8; 7:51–60.Idilig dagiti pakaammuan ni Esteban iti Dagiti Aramid 6:8 ken Dagiti Aramid 7:51–60 kadagiti pakaammuan ti Mangisalakan iti Lucas 23:1–46. Kasano a sinurot ni Esteban ti pagwadan ti Mangisalakan?
-
Dagiti Aramid 7:51–60.Kasano a binendisionan ti Espiritu Santo ni Esteban idi naparparigatda isuna? Kaano a naawattayo ti pigsa manipud iti Espiritu Santo kabayatan dagiti narigat a panawen?
-
Dagiti Aramid 9:5.Ti tirad ket maysa a natadem a duyok a mangpapanaw kadagiti ayup. Masansan a kumugtar dagiti animal no maduyok, a pakaigapuan ti pika nga umun-uneg iti lasag ti ayup. Kasano a mayaplikar kadatayo daytoy nga analohia? Ania ti maaramidtayo tapno nasaysayaat a maawat ti pannakaatur manipud iti Apo?
Tabita Bumangonka, ni Sandy Freckleton Gagon
-
Dagiti Aramid 9:32–43.Ibilangyo ti panangawis kadagiti miembro ti pamilia a mangidrowing kadagiti ladawan ti estoria iti Dagiti Aramid 9:32–43. Ania ti masursurotayo maipapan kadagiti pudno a kinadisipulo manipud kadagitoy nga estoria? Kasano a ti maysa a tao nga “addaan kadagiti naimbag nga aramid,” kas ken ni Tabita, ket makatulong idi dadduma a mamati iti Apo? (kitaen iti Dagiti Aramid 9:36; “Kapitulo 60: Isubli ni Pedro ti Biag ni Tabita” (iti Dagiti Estoria iti Baro a Tulag, 156–57, wenno ti maitutop a video iti ChurchofJesusChrist.org).
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a himno: “I’ll Go Where You Want Me to Go,” Hymns, no. 270.
Panangpadur-as iti Bukod a Panagadal
Yarigmo dagiti nasantuan a kasuratan iti biagmo. Bayat ti panagbasam, ibilangmo no kasano a maaramat dagiti estoria ken pannursuro kadagiti nasantuan a kasuratan iti biagmo. Kas pagarigan, ania dagiti gundaway nga adda kenka tapno agserbi iti dadduma, kas iti inaramid ni Tabita iti Dagiti Aramid 9:36–39?
“Ket inuborda ni Esteban, nga umaw-awag iti Dios ken kunkunana, Apo Jesus, awatem toy kararuak” (Patarus ni Joseph Smith, Dagiti Aramid 7:59 [iti Dagiti Aramid 7:59, footnote c]).