“Hunio 26–Hulio 2. Mateo 28; Marcos 16; Lucas 24; Juan 20–21: ‘Nagungaren’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2023 (2022)
“Hunio 26–Hulio 2. Mateo 28; Marcos 16; Lucas 24; Juan 20–21,” Umaykayo, Sumurot Kaniak—Para kadagiti Indibidual ken Pamilia: 2023
Pakanem dagiti Karnerok,, ni Kamille Corry
Hunio 26–Hulio 2
Mateo 28; Marcos 16; Lucas 24; Juan 20–21
“Nagungaren”
Nainkararagan a basaem ti Mateo 28; Marcos 16; Lucas 24; ken Juan 20–21, a pampanunotem maipapan iti rag-o nga adda kenka gapu iti Panagungar ni Cristo. Asino ti mabendisionan babaen iti panagdengngeg iti pammaneknekmo kadaytoy a pasamak?
Isuratmo dagiti Impresionmo
Iti adu nga agpalpaliiw, ti ipapatay ni Jesus ti Nazaret ket mabalin a kasla kasupadi ti pagpatinggaan iti nakaskasdaaw a biag. Saan kadi a daytoy a tao ti nangpagungar ken ni Lazaro manipud kadagiti natay? Saanna kadi a nasarkedan dagiti madagdagullit a pammutbuteng a panagpatay dagiti Fariseo? Impakitana ti pannakabalinna a mangagas iti bulsek, agkukutel, ken saan a makagunay. Mismo a dagiti angin ken baybay ti nagtungpal Kenkuana. Ket adtoy Isuna a, nakabitin iti krus, a mangipakpakdaar iti, “Natungpalen” (Juan 19:30). Mabalin nga adda napudno a pannakakasdaaw kadagiti manglalais a balikas “Insalakanna dagiti sabali; ti bagina saanna a mabalin nga isalakan” (Mateo 27:42). Ngem ammotayo a saan a gibus ti estoria ti ipapatay ni Jesus. Ammotayo a saan nga agbayag ti ulimek ti tanem ket mangrugrugi pay laeng ti panangisalakan nga aramid ni Cristo. Masarakan Isuna ita a saan “kadagiti natay” ngem kadagiti sibibiag (Lucas 24:5). Saan a mapaulimek dagiti pannursurona, ta ikasaba dagiti napudno a disipulona ti ebanghelio iti “amin a pagilian,” nga agtaltalek iti karina nga addanto Isuna “[kadakuada] nga agnanayon, agingga iti panungpalan ti lubong” (Mateo 28:19–20).
Dagiti Kapanunotan para iti Bukod a Panagadal iti Nasantuan a Kasuratan
Mateo 28; Marcos 16; Lucas 24; Juan 20
Nagungar ni Jesucristo.
Kadagitoy a binatog, mabasamto ti maipapan iti maysa kadagiti kapatgan a pasamak iti pakasaritaan ti sangkataw-an: ti Panagungar ni Jesucristo. Bayat ti panagbasam, ipapanmo a maysaka kadagiti tao a nangsaksi kadagiti pasamak a nailikmut iti Panagungar. Ania ti masursurom manipud kadagiti padasda?
Kasano ti riknam bayat ti panangbasam maipapan iti Panagungar ti Mangisalakan? Ibilangmo no kasano a naapektuannaka daytoy—ti pannirigam iti biag, dagiti pannakilangenmo, ti pammatim ken ni Cristo, ken ti pammatim iti dadduma pay a kinapudno ti ebanghelio.
Kitaen met iti Pangiwanwan iti Nasantuan a Kasuratan, “Panagungar”; “Resurrection,” topics.ChurchofJesusChrist.org.
Maawisko ti Mangisalakan nga “agtalinaed [kaniak].”
Bayat ti panagbasam iti padas ti dua nga agdaldaliasat a disipulo a simmabat iti nangungar a Mangisalakan, mangsapul iti dua a pangipadaan kadagiti padasyo kas maysa a pasurot ni Cristo. Kasano a makipagnaka Kenkuana ita ken mangawis Kenkuana nga “agbati” iti mabayag pay bassit? (Lucas 24:29). Kasano ti pannakailasinmo iti kaaddana iti biagmo? Iti ania a wagwagas a pinaneknekan ti Espiritu Santo ti kinadios ni Jesucristo kenka?
Kintaen met iti “Abide with Me; ’Tis Eventide,” “Abide with Me!,” Hymns, nos. 165–66.
Ti panagungar ket manayon a panagtipon manen ti espiritu ken ti bagi.
Bayat ti panangisurom kadagiti ubbing maipapan iti Panagungar ni Jesucristo, makatulong kenka a makaawat no ania ti kaipapanan ti mapagungar. Kas pagarigan, ania dagiti kinapudno a masarakam iti Lucas 24:36–43 ken Juan 20 maipapan kadagiti nagungar a bagi? Mabalinmo pay a sukisoken dagiti dadduma pay a nasantuan a kasuratan kas iti: 1 Taga Corinto 15:35–44; Taga Filipos 3:20–21; 3 Nephi 11:13–15; Doktrina ken Katulagan 88:27–31; 110:2–3; 130:1, 22.
“Nagasat dagiti saan a nakakita, ket namatida.”
No dadduma mariknam kas ken ni Tomas, a nagkuna a, “No diak makita … , diakto mamati” (Juan 20:25). Iti opinionmo, apay a mabalin a bendision ti panamati nga awan pannakakita? (Kitaen iti Juan 20:29). Utobem no kasano a naparaburanka iti panamatim kadagiti banag a saanmo a makita. Ania ti mangtulong kenka a maaddaan iti pammati iti Mangisalakan uray no saanmo a makita Isuna? Kasano a maituloymo a patibkeren ti pammatim kadagiti “bambanag a di makita, ngem pudno”? (Kitaen iti Alma 32:16–21; Ether 12:6). Ibilangmo ti panangisurat iti maysa a journal kadagiti padas a nakatulong kenka a mamati ken ni Jesucristo, wenno ibinglaymo dagitoy iti maysa a tao nga am-ammom.
Inawagannak ti Mangisalakan a mangpakan kadagiti karnerona.
Mabalin a makaay-ayo nga idilig ti pannakipulapol ti Mangisalakan kadagiti Apostolna iti Juan 21 iti umuna a gundaway a binilinna ida nga ibbatanda dagiti pagkalapda nga iket, a naisurat iti Lucas 5:1–11. Ania dagiti pagpapadaan ken paggigidiatan a masarakam? Ania dagiti nalawag a pannakammo ken pannakaawat [insights] maipapan iti kinadisipulo a masarakam?
Ibilangmo no kasano a mayaplikar kenka dagiti balikas ti Mangisalakan ken ni Pedro iti Juan 21:15–17 . Adda kadi ania man a banag a manglapped kenka manipud iti panagserbim kadagiti karnero ti Apo? Ania koma ti sungbatmo no saludsoden ti Apo kenka ti, “Ay-ayatennak kadi?” Utobem no kasano a maipakitam ti ayatmo para iti Apo.
Kitaen met iti 1 Peter 5:2–4, 8; Jeffrey R. Holland, “The First Great Commandment,” Liahona, Nob. 2012, 83-85.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Lucas 24:5–6.Kinuna ni President Thomas S. Monson iti Lucas 24:5–6, “Awan dagiti balikas iti Christendom nga ad-adda ti kaipapananna kaniak” (“He Is Risen!,” Liahona, Mayo 2010, 89). Ania ti kaipapanan dagitoy a balikas kenka ken iti pamiliam?
-
Mateo 28; Marcos 16; Lucas 24; Juan 20–21.Bayat ti panangbasa ti pamiliam kadagitoy a kapitulo, kitaem dagiti tao a nakipulapol ken ni Jesus iti tunggal pakaammuan. Kas pagarigan, ania ti makaawis riknam maipapan kadagiti tao a simmarungkar iti tanem ti Mangisalakan. Ania ti masursurom manipud kadagiti balikas wenno tignay dagiti Apostol wenno dagiti disipulo iti dalan nga agturong ti Emmaus?
Ibilang ti aggigiddan a panangkanta iti “Did Jesus Really Live Again?” (Children’s Songbook,, 64). Isaritam maipapan iti maysa a tao nga am-ammo ti pamiliam a pimmusayen, ket ilawlawag no kasano a mangyeg iti liwliwa dagiti kinapudno iti daytoy a kanta.
Kalsada nga agturong iti Emmaus, ni Wendy Keller
-
Mateo 28:16–20; Marcos 16:14–20; Lucas 24:44–53.Kadagitoy a bersikulo, ania ti indawat ni Jesus nga aramiden dagiti Apostolna? Kasano a makatulongtayo a mangipatungpal iti daytoy nga aramid? Mabalin nga ibinglay dagiti miembro ti pamilia dagiti padasda idi nariknada a “ti Apo tumultulong kadakuada” a mangipatungpal kadagiti panggepna (Marcos 16:20).
-
Juan 21:15–17.Ibilang ti panangbasa kadagitoy a bersikulo bayat ti aggigiddan a pannanganyo. Makainayon daytoy iti sumagmamano a kaipapanan kadagiti balikas ti Mangisalakan a “pakanem dagiti karnerok.” Maibatay iti no ania ti insuro ni Jesus maipapan iti karnero iti Baro a Tulag (kitaen, kas pagarigan, Mateo 9:35–36; 10:5–6; 25:31–46; Lucas 15:4–7; Juan 10:1–16), apay a ti panangpakan kadagiti karnero ket nasayaat a wagas a panangiladawan iti panagserbi kadagiti annak ti Dios? Ania ti isuro daytoy nga analohia maipapan iti no kasano ti marikna ti Nailangitan nga Ama ken ni Jesus maipapan kadatayo?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Did Jesus Really Live Again?,” Children’s Songbook, 64.
Panangpadur-as iti Bukod a Panagadal
Agusar iti musika a mangawis iti Espiritu ken masursuruan iti doktrina. Ti panagdengngeg wenno panagkanta kadagiti himno kas iti “He Is Risen!” (Hymns, no. 199) mabalin a mangawis iti Espiritu ken makatulong kenka nga agsursuro maipapan iti Panagungar ti Mangisalakan.
Ti Nagungar a Cristo, ni Walter Rane