“Hulio 24–30. Dagiti Aramid 16–21: ‘“Inawagannatayo ti Apo a Mangikasaba iti Ebanghelio’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2023 (2022)
“Hulio 24–30. Dagiti Aramid 16–21,” Umaykayo, Sumurot Kaniak—Para kadagiti Indibidual ken Pamilia: 2023
Hulio 24–30
Dagiti Aramid 16–21
“Inawagannatayo ti Apo a Mangikasaba iti Ebanghelio”
Bayat ti panangbasam maipapan iti panagkagumaan ni Pablo a mangikasaba iti ebanghelio, mabalin nga iparikna ti Espiritu kenka dagiti kapanunotan wenno rikna. Isuratmo dagitoy a parikna, ket agaramid kadagiti plano nga agtignay a mayannurot kadagitoy.
Isuratmo dagiti Impresionmo
Maibilang kadagiti maudi a balikas ti Apo kadagiti Apostolna ket ti bilin nga “Inkayo ngarud, ket pagbalinenyo nga ad-adalan dagiti amin a nasion, a bautisaranyo ida iti nagan ni Ama, ken ti Anak, ken ti Espiritu Santo: nga insursuroyo kadakuada a tungpalenda dagiti isu amin a banag nga inbilinko kadakayo” (Mateo 28:19–20). Idinto a di unay naaramid dagiti Apostol daytoy iti amin a pagilian, ipakita ti Dagiti Aramid 16–21 a nakaaramid iti nakaskasdaaw a panagdur-as ni Pablo ken dagiti kaduana ket iti pannakaipasdek ti Simbaan. Nagisuro, nagbautisar, ken intalekda ti sagut ti Espiritu Santo. Nagaramidda kadagiti milagro, uray pay ti panangbangon iti maysa a tao manipud iti natay, ken nagipadto ti Dakkel nga Ikakalilis iti Kinapudno (Dagiti Aramid 20:7–12, 28–31). Ket nagtultuloy iti aramid nga inrugida nga addaan kadagiti sibibiag nga Apostol iti agdama, a kaduada dagiti napasnek a disipulo kas kadakayo, a tumultulong a mangipatungpal iti komision ti Mangisalakan iti wagas a saan a maarapaap ni Pablo iti kaano man. Nalabit nga am-ammom dagiti tao a di makaammo iti Nailangitan nga Amada wenno ti ebangheliona. Nalabit a nariknam a “nariribuk ti nakem[mo]” nga ibinglay kadakuada no ania ti ammom maipapan Kenkuana (Dagiti Aramid 17:16). No surotem ti pagwadan ni Pablo iti kinapakumbaba ken kinatured iti panangibinglay iti ebanghelio, masarakam ti maysa a tao “a ti pusona linuktanen ti Apo” (Dagiti Aramid 16:14).
Dagiti Kapanunotan para iti Bukod a Panagadal iti Nasantuan a Kasuratan
Tarabayennakto ti Espiritu kadagiti panagkagumaanko a mangibinglay iti ebanghelio.
Impakdaar ni Propeta Joseph Smith, “Awan tao a mabalin a mangikasaba iti ebanghelio nga awan ti Espiritu Santo” (Teachings of Presidents of the Church: Joseph Smith [2007], 332). Bayat ti panangbasam iti Juan 16-21, panunotem no apay a pudno ti sao ti Propeta. Ania dagiti pagarigan a tinarabay ti Espiritu ni Pablo ken dagiti kaduana. Ania dagiti bendision a simmangbay idi sinurotda ti Espiritu? Kaano kadi a nariknam ti parikna ti Espiritu kenka iti panagkagumaanmo a mangibinglay ti ebanghelio?
Maipakdaarko ti ebanghelio iti amin a kasasaad.
Ti pannakaipisok iti pagbaludan gapu iti panangikasaba ti ebanghelio mabalin a kasla maysa a maawatan a rason tapno maisardeng ti panagikasaba. Ngem kada Pablo ken Silas, nagbalin daytoy a gundaway a nangpasurot iti maysa a para balud (kitaen iti Dagiti Aramid 16:16–34). Iti unos ti Dagiti Aramid 16–21, sapulem dagiti dadduma pay a pagwadan ni Pablo iti kinatallugodna a mangibinglay iti pammaneknekna iti tunggal maysa. Apay iti panagkunam a natured unay ken awanan iti panagbuteng? Ania dagiti masursurom manipud iti pagwadan ni Pablo?
Ad-adu pay a mensahe maipapan iti panangibinglay ti ebanghelio iti Dagiti Aramid 16–21. No adalem dagitoy a kapitulo, sapulem ti sumagmamano a nangnangruna a mayaplikar kenka.
Kitaen met iti Dieter F. Uchtdorf, “Missionary Work: Sharing What Is in Your Heart,” Liahona, Mayo 2019, 15–18.
Anak ti Dios ti tunggal maysa kadatayo.
“Kaputotannatayo ti Dios.”
Idiay Atenas, nasarakan ni Pablo dagiti tao nga addaan iti sabasabali a kapanunotan ken pannirigan iti relihion. Kanayon a nagkalkalikagumda “a dumngeg iti sumagmamano a baro a banag,” ket no ania ti nasken nga idiaya ni Pablo ket awan duadua a kabarbaro kadakuada (kitaen iti Dagiti Aramid 17:19–21). Nagdaydayawda kadagiti adu a dios, agraman iti maysa nga inawaganda iti “Dios a di ammo” (Dagiti Aramid 17:23), ngem namatida a dagita a dios ket bileg wenno puwersa, saan a nabiag, personal a parsua, ket sigurado a saan a ti Amatayo. Utobem no ania ti kinuna ni Pablo a matulongannakayo a mangam-ammo ti Dios? Ania ti kayat a sawen kenka ti agbalin a “kaputotan ti Dios”? (Dagiti Aramid 17:29). Iti kapanunotam, kasano ti panagbalin a maysa nga anak ti Dios maigiddiat iti panagbalin a maysa laeng kadagiti pinarsuana? Kasano nga impluensiaan ti pannakaawat iti daytoy a kinapudno no kasano a kitaem ti bagim ken ti dadduma?
No nagtakderka koma iti abay ni Pablo bayat ti panagpaneknekna, ania ti imbagam kadagiti nagkauna a Griego maipapan iti Amatayo a Nailangitan? Adda kadi maysa a tao nga am-ammom a mabalin a mairanud manipud iti panagdengngegna iti pammaneknekmo?
Kitaen met iti Taga Roma 8:16; 1 Juan 5:2; “We Are the Offspring of God” (video), ChurchofJesusChrist.org.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Dagiti Aramid 16–21.Tapno mapauneg ti pannakaawat ti pamiliam iti Dagiti Aramid 16–21, mabalinmo nga adalen ti mapa iti udi daytoy a balabala, a mangsapsapul kadagiti siudad a nagikasabaan ni Pablo iti ebanghelio kadagitoy a kapitulo. Ania dagiti resources nga adda kadatayo ita a mangtulong a mangyeg iti ebanghelio iti amin a pagilian.
Tapno maparegta ti pamiliam a mangibinglay iti ebanghelio, mabalinmo nga ipakita ti maysa wenno ad-adu pay kadagiti video iti “Sharing the Gospel” a benneg ti Gospel Library.
-
Dagiti Aramid 17:10–12; 18:24–28.Kasano nga agbalintayo a kas kadagiti Santo kadagitoy a bersikulo? Ania ti mabalin a kayat a sawen ti “[awaten] ti sao iti amin a kinamanagsagana ti panunot”? (Dagiti Aramid 17:11). Ania ti maaramidtayo tapno agbalin a “nabileg kadagiti nasantuan a kasuratan”? (Dagiti Aramid 18:24).
-
Dagiti Aramid 19:1–7.Makatulong dagitoy a bersikulo iti pamiliam a maaddaan iti panaglilinnawag maipapan iti kinapateg ti pannakabuniag ken pannakakumpirma. Tapno nasaysayaat a maawatan dagiti kinapudno iti Dagiti Aramid 19:1–7, mabalinmo nga ilawlawag ti sumagmamano a banag nga awan pategna no awan ti maysa a banag, kas iti celfon nga awan bateriana. Wenno mabalinmo nga ibinglay daytoy a pannursuro manipud ken ni Propeta Joseph Smith: “Ti panagbuniag babaen iti danum ti kagudua laeng ti panagbuniag, ken awan ti serbina no awan ti sabali pay a kaguduana—a dayta ti, panagbuniag ti Espiritu Santo” (Teachings: Joseph Smith, 95). Apay a ti panagbuniag “awan kaes-eskanna” no awan ti panangawat iti sagut ti Espiritu Santo? (kitaen iti 3 Nephi 27:19–20; Moises 6:59–61).
-
Dagiti Aramid 19:18–20.Bayat ti panangbasam iti Dagiti Aramid 19:18–20, makitam ti pateg dagiti sanikua a sitatallugod nga isuko dagiti tao tapno awatenda ti ebanghelio (kitaen iti bersikulo 19). Adda kadi dagiti nailubongan a sanikua wenno aktibidad a kasapulantayo nga isuko tapno umawat kadagiti nailangitan a bendision?
-
Dagiti Aramid 20:32–35.Kaano a napadasan ti pamiliam ti pannursuro ni Cristo a “nasaysayaat ti mangted ngem ti umawat”? (Dagiti Aramid 20:35). Adda kadi maysa a tao a mabalin a mairanud manipud iti serbisio, panawen, wenno sagut a mabalin nga ited ti pamiliam? Kas maysa a pamilia, paglilinnawagan ti sumagmamano a kapanunotan ket agaramid iti plano nga agserbi iti maysa a tao. Ania ti mariknatayo no agserbitayo kadagiti dadduma? Apay a a nagasgasat ti mangted ngem ti umawat?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “I Am a Child of God,” Children’s Songbook, 2–3.
Panangpadur-as iti Bukod a Panagadal
Isuratmo dagiti impresion. “No isuratmo dagiti naespirituan nga impresion, ipakitam iti Apo nga ipategmo ti panangiturongna, ket bendisionannakanto iti ad-adu pay a masansan a paltiing” (Panangisuro iti Wagas ti Mangisalakan, 12; kitaen met iti 30).
Dagiti panagdaliasat ni Apostol Pablo kas misionario.