Ni Pablo iti pagbaludan

Hulio 31–Agosto 6

Dagiti Aramid 22–28

“Maysa a Ministro ken Saksi”

Masansan a dagiti impresion manipud iti Espiritu Santo ket naulimek ken no dadduma ket apagbiit. Ti panangisurat kadagiti impresionmo ti mangipalubos kenka a mangpanunot kadagitoy a naun-uneg. Bayat ti panangbasam iti Dagiti Aramid 22–28, isuratmo dagiti kapanunotan ken rikna a sumangbay kenka, ket mangilatang iti oras a mangutob kadagitoy.

Isuratmo dagiti Impresionmo

“No addatayo iti panangibaon ti Apo” inkari ni Presidente Thomas S. Monson, “maikaritayo iti tulong ti Apo” (“To Learn, to Do, to Be,” Liahona, Nob. 2008, 62). Nupay kasta, saantayo a maikari, iti nalamuyot a kalsada ken iti awan patinggana nga agus dagiti balligi. Para iti pakakitaan iti daytoy, nasken a ditayo yad-adayo ti panagkitatayo ngem ni Pablo nga Apostol. Ti nakaibaonanna manipud iti Mangisalakan ket “ti mangipan iti naganko iti sanguanan dagiti Gentil, ken dagiti ar-ari, ken dagiti annak ti Israel” (Dagiti Aramid 9:15). Kadagiti kapitulo 22–28 ti Dagiti Aramid, makitatayo ni Pablo a mangipatpatungpal iti nakaibaonanna ken panangsangona iti dakkel nga oposision wenno tubeng—dagiti kawar, pannakabalud, pisikal a pannakaabuso, pannakadadael ti bapor, ken uray pay ti pannakaduklos iti uleg. Ngem makitatayo met ni Jesus a “nagtakder iti abayna, ket kinunana kenkuana: Agtalgedka, Pablo” (Dagiti Aramid 23:11). Dagiti padas ni Pablo ti makaparegta a palagip nga aw-awagan ti Apo a “mangipakdaar iti ebanghelio[na] iti timek a mangidirdir-i” ket dumteng nga addaan iti daytoy a kari: “Itag-ayyo ti puspusoyo ket agragsakkayo, ta addaak iti tengngayo” (Doktrina ken Katulagan 29:4–5; kitaen met iti Mateo 28:19–20).

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Dagiti Aramid 22:1–21; 26:1-29

Situtured nga ibinglay dagiti disipulo ni Jesucristo dagiti pammaneknekda.

Idi imburay ni Pablo dagiti nabileg a pammaneknek a naisurat iti Dagiti Aramid 22 ken 26, tiniliw a balud isuna dagiti soldado a Romano. Adda bileg dagiti tao a nakasaritana a mangkondena ti ipapatayna. Ngem situtured a pinilina ti mangiburay iti pammaneknekna maipapan ken ni Jesucristo ken “ti nailangitan a parmata” (Dagiti Aramid 26:19) nga inawatna. Ania ti makaparegta kenka maipapan kadagiti balikasna? Ibilangmo dagiti adda kenka a gundaway a mangibinglay iti pammaneknekmo. Kas pagarigan, ammo kadi dagiti gagayyemmo no kasano ti riknam maipapan ken ni Jesucristo? Wenno kaano ti naudi a gundaway nga imbagam iti pamiliam maipapan iti no kasano a nagun-odmo ti pammaneknekmo maipapan iti ebanghelio?

Idi naumsi ni ubing a Joseph Smith gapu iti panangibagana maipapan iti Umuna a Parmatana, pinaregta ti wagas a nagpaneknek ni Pablo maipapan iti parmata (kitaen iti Joseph Smith—Pakasaritaan 1:24–25). Kasano a gupgopem no ania ti nasursuro ni Joseph Smith manipud ken ni Pablo? Ania ti masursurom manipud kadagitoy dua a saksi ni Jesucristo?

Kitaen met iti Neil L. Andersen, “We Talk of Christ,” Liahona, Nob. 2020, 88–91.

Dagiti Aramid 23:10–11; 27:13–25, 40–44

Tarabayen ti Apo dagiti agpasnek nga agserbi Kenkuana.

Kas iti nalawag nga ipakita ti panagministro ni Pablo, dagiti rigrigat ti panagbiagtayo saan a pagilasinan ti saan a pananganamong ti Dios kadatayo wenno ti trabaho nga ar-aramidentayo. Kinapudnona, no dadduma nga iti panawen dagiti rigattayo a pakariknaantayo ti kapigsaan a suportana. Mabalin a makaay-ayo nga irebyu no ania ti nabasam itay nabiit maipapan iti panagministro ni Pablo ket ilistam ti sumagmamano kadagiti banag nga inibturanna (kitaen, kas pagarigan, iti Dagiti Aramid 14:19–20; 16:19–27; 21:31–34; 23:10–11; 27:13–25, 40–44). Kasano a timmarabay ti Apo kenkuana? Kasano a tinarabaynaka?

Dagiti Aramid 24:24–27; 26:1–3, 24–29; 27

Adda talged ken talna iti panagtungpal kadagiti balikas dagiti katulongan ti Dios.

Iti unos ti panagministrona, nangiburay ni Pablo iti nablieg a pammaneknek maipapan ken ni Jesucristo ken ti ebangheliona. Inawat ti adu a tao ti pammaneknekna, ngem saan nga inaramid ti tunggal maysa. Bayat ti panangbasam iti Dagiti Aramid 24:24–27 ken Dagiti Aramid 26:1–3, 24–29, isuratmo dagiti balikas ken ragup ti balikas a mangipakita no kasano ti reaksion dagiti sumaganad nga agturay a Romano iti Juda kadagiti pannursuro ni Pablo:

• Felix

• Festo

• Ari Agrippa

Bayat ti panaglayagna nga agturong iti Roma tapno usigen ni Cesar, impadto ni Pablo a “rigrigat ken adu a pagdaksan” ti mayegto iti bapor ken dagiti pasaherona (Dagiti Aramid 27:10). Basaen ti kapitulo 27 tapno maammuan no kasano ti reaksion dagiti padana a pasahero ni Pablo kadagiti ballaagna. Adda kadi masarakam nga ania man a leksion para iti bagim iti padasda?

Napadasam kadin ti reaksion kas iti asino man kadagitoy a tao idi nangngegam dagiti pannursuro dagiti lider ti Simbaan? Ania dagiti sumagmamano a mabalin a bunga ti ti reaksion kadagitoy a wagas? Ania ti masursurom manipud kadagitoy a pakaammuan maipanggep iti panagtulnog iti balakad ti Apo babaen kadagiti katulonganna?

Kitaen met iti 2 Nephi 33:1–2; D. Todd Christofferson, “The Voice of Warning,” Liahona, Mayo 2017, 108–11; “Follow the Living Prophet,” Teachings of Presidents of the Church: Ezra Taft Benson (2014), 147–55.

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Dagiti Aramid 24:16.Sakbay ti kumbersionna, adda atiddog a pakasaritaan dagiti nagbasolan ni Pablo iti Dios. Ngem gapu ta natallugod isuna nga agbabawi, kinabaelanna nga insao, “Ditoy, ipatpatungpalko ti bagik, tapno kanayon nga addaanak iti konsiensia a dinadael ti basol iti Dios, ken kadagiti tao” (kitaen met iti Doktrina ken Katulagan 135:4–5). Kasano nga ikkatentayo ti pannakakonsensia kadagiti basoltayo iti Dios ken iti dadduma?

Dagiti Aramid 26:16–18.Kadagitoy a bersikulo, ania ti inyawag ti Apo nga aramiden ni Pablo? Ania dagiti gundaway nga adda kadatayo tapno maaramidtayo dagiti kastoy met laeng a banag?

Dagiti Aramid 28:1–9.Adda kadi asino man iti pamiliam nga aggusto kadagiti uleg? Mabalin a kayatmo a saludsoden dayta a tao wenno sabali pay a miembro ti pamilia a mangisarita kadagiti estoria a masarakan iti Dagiti Aramid 28:1–9. Mabalin a magustuan dagiti annakyo nga idrowing ti ladawan dagitoy nga estoria wenno itignay ida. Ania dagiti leksion a masursurotayo manipud kadagitoy a pakaammuan? Mabalin a maysa ti panangipatungpal ti Apo dagiti karina kadagiti katulonganna. Kas pagarigan, mabalinmo nga idilig dagiti kari a naaramid iti Marcos 16:18 iti pannakaipatungpalda kadagiti padas ni Pablo. Mabalin pay a sapulem iti mensahe iti kallabes a sapasap a komperensia ti kari nga inaramid ti maysa kadagiti katulongan ti Apo—nalabit a maysa a napateg iti pamiliam—ket i-display daytoy iti pagtaenganyo. Kasano a maipakitatayo ti pammatitayo a maipatungpalto daytoy a kari?

nagita nga uleg

Sinalakniban ti Dios ni Pablo idi kinagat ti maysa a nagita nga uleg.

Dagiti Aramid 28:22–24.Kas iti Simbaan iti aldaw ni Pablo (maawagan iti “sekta” iti bersikulo 22, masansan a “masupsuppiat” ti Simbaan ita. Idi nagsarita dagiti tao a maisuppiat iti Mangisalakan ken ti Simbaanna, kasano a simmungbat ni Pablo? Ania dagiti masursurotayo manipud iti padas ni Pablo?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a himno: “I Know That My Redeemer Lives,” Hymns, no. 135.

Panangpadur-as iti Panangisurotayo

Ipamaysam dagiti pagbatayan a mangbendisionto iti pamiliam. Bayat ti panangadalmo kadagiti nasantuan a kasuratan, saludsodem ti bagim, “Ania ti masarakak ditoy nga agbalinto a naisangsangayan a napateg iti pamiliak?” (Kitaen iti Panangisuro iti Wagas ti Mangisalakan, 17.)

Ni Pablo iti sango ni Ari Agrippa

Ni Pablo iti sango ni Ari Agrippa. Natured iti Pammaneknek maipapan ken ni Jesucristo, ni Daniel A. Lewis