“Agosto 14–20. Taga Roma 7–16: ‘Abakem ti Dakes Gapu iti Naimbag’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2023 (2022)
“Agosto 14–20. Taga Roma 7–16,” Umaykayo, Sumurot Kaniak—Para kadagiti Indibidual ken Pamilia: 2023
Agosto 14–20
Taga Roma 7–16
“Abakem ti Dakes gapu iti Naimbag”
Sumagmamano laeng kadagiti pagbatayan ti ebanghelio iti Taga Roma 7–16 ti mabalin a mairaman iti daytoy a balabala, isu a saanmo a limitaran ti bagim no ania ti naagapad ditoy. Ikasom ti inspirasion a maawatmo bayat ti panagadalmo.
Isuratmo dagiti Impresionmo
Bayat ti pananglukatna iti suratna kadagiti taga Roma, kinablaawan ni Pablo dagiti miembro ti Simbaan iti Roma babaen ti panangawagna kadakuada iti “ipatpateg ti Dios” a dagiti “naawagan nga agbalin a santo.” Imbagana a ti “pammatida [ket] nasao iti intero a sibubukel a lubong” (Taga Roma 1:7–8). Nupay binubos ni Pablo ti adu a panawenna iti suratna iti panagatur kadagiti palso a kapanunotan ken pakadillawan a tignay, kasla tinarigagayanna pay nga ipanamnama kadagitoy baro a kumbert a Kristiano a pudnoda a Santo nga ipatpateg ti Dios. Ti napintas a balakadna ti mangbendision amin kadatayo a mangikarikarigatan a makarikna iti ayat ti Dios ken para kenkuana ti panagbalin a Santo mabalin a marikna a saan a maragpat. Addaan iti napakumbaba a pannakipagrikna, nabigbig ni Pablo a nariknana a kas iti maysa a “nakakaasi a tao” no dadduma (Taga Roma 7:24), ngem ti ebanghelio ni Jesucristo ti nangted kenkuana iti bileg a mangparmek iti basol (kitaen iti Patarus ni Joseph Smith, Taga Roma 7:22–27 iti [Pangiwanwan iti Nasantuan a Kasuratan]). Addaan iti dayta a bileg, ti pangsubbot a bileg ti Mangisalakan, mabalintayo nga “abaken ti dakes”—agpada a dakes iti lubong ken dakes iti bagbagitayo—“gapu iti naimbag” (Taga Roma 12:21).
Dagiti Kapanunotan para iti Bukod a Panagadal iti Nasantuan a Kasuratan
Dagiti sumurot iti Espiritu makapagbalinda a “tagapagtawid ken Cristo.”
Uray pay kalpasan ti iseserrek “ti baro a biag” babaen ti ordinansa ti panagbuniag (Taga Roma 6:4, nalabit a nariknam ti sumagmamano nga akin-uneg a riribuk nga inladawan ni Pablo iti Taga Roma 7—ti “panaggubat” iti nagbaetan ti nailubongan a tao ken dagiti nalinteg a tarigagay (Taga Roma 7:23). Ngem nagsarita pay ni Pablo maipapan iti namnama iti Taga Roma 8:23–25. Ania dagiti rason para iti daytoy a namnama a masarakam iti kapitulo 8? Mabalin a makakitaka met kadagiti bendision a sumangbay manipud iti kaadda “ti Espiritu ti Dios a makipagnaed kadakayo” (Taga Roma 8:9). Kasano a masarakam ti naan-anay a panangkadkadua ti Espiritu Santo iti biagmo?
Ti sagut ti agnanayon a gloria ti mangrimbaw kadagiti pannubokko iti daga.
Kalpasan laeng iti sumagmamano a tawen nga insurat ni Pablo daytoy a surat, nagsagaba dagiti Santo iti Roma iti nakaam-ames a pannakaidadanes. Ania ti masarakam iti Taga Roma 8:17–39 a mabalin a nakatulong kadagitoy a Santo idi dumteng ti pannakaidadanes? Kasano a mayaplikar kenka dagitoy a balikas ken dagiti pannubok a sangsanguem iti agdama?
Sapulem dagiti koneksion iti nagbaetan dagitoy a bersikulo ken daytoy a balakad manipud ken ni Sister Linda S. Reeves: “Diak ammo no apay addaantayo kadagiti adu a pannubok, ngem mismo a mariknak nga adda dakkel unay a gunggona, agnanayon ken awan patinggana, nakaragrag-o ken iti labes ti pannakaawattayo nga iti dayta nga aldaw ti pannakagungguna, mabalin a mariknatayo a mangisao iti manangngaasi, managayat nga Amatayo, ‘Dayta kadi ti amin a naidawat a kasapulan?’ Mamatiak a no inaldaw a malagip ken mabigbigtayo ti kauneg dayta nga ayat ti Nailangitan nga Amatayo ken ti Mangisalakantayo para kadatayo, situtuloktayo a mangaramid iti ania man a banag tapno makapagsublitayo manen iti sidongda, a nalikmutan ti ayatda nga awan inggana. Anianto ti napateg … ti sinagabatayo ditoy no, iti udina, dagitoy a pannubok ti mismo a bambanag a mangpaikari kadatayo para iti agnanayon a biag ken pannakaitan-ok iti pagarian ti Dios a kadennatayo ti Ama ken ti Mangisalakantayo?” (“Worthy of Our Promised Blessings,” Liahona, Nob. 2015, 11). Ikeddengmo no anianto ti aramidem nga “inaldaw a manglagip ken mangbigbig” ti ayat ti Dios para kenka.
Ania ti kayat a sawen ni Pablo iti “dinutokan idin,” “pinili,” ken “naammuan a sigud”?
Inusar ni Pablo dagiti termino a “dinutokan idin,” “pinili,” ken “naammuan a sigud” tapno isuro a sakbay daytoy a biag, pinili ti Dios ti sumagmamano kadagiti annakna nga agbalin a paset ti Israel, dagiti natulagan a taona. Kayat a sawen daytoy nga awatendanto dagiti naisangsangayan a bendision ken pagrebbengan tapno mabendisonanda ti amin a tao ti lubong (kitaen iti Pangiwanwan iti Nasantuan a Kasuratan, “Panagpili,” scriptures.ChurchofJesusChrist.org). Nupay kasta,inyunay-unay ni Pablo iti Taga Roma 9–11 nga amin nga annak ti Dios agbalin a natulagan a taona, ket awatentayo amin ti agnanayon a biag iti isu met la a wagas—babaen iti pammati ken ni Jesucristo ken panagtungpal kadagiti bilinna.
Kitaen met iti Taga Efeso 1:3–4; 1 Pedro 1:2; Alma 13:1–5; Gospel Topics, “Foreordination,” topics.ChurchofJesusChrist.org.
Awisennak ni Pablo nga agbalin a pudno a Santo ken pasurot ni Jesucristo.
Naglaon ti maudi a lima a kapitulo ti Taga Roma ti dinosdosena a nalawag a pangiturong maipapan iti panagbiag kas Santo. Maysa a wagas a panagadal kadagitoy a pangiturong ket panagsapul kadagiti topiko a maulit-ulit. Kasano ti pananggupugopmo iti balakad ni Pablo?
Mabalin a saanmo a kabaelan a yaplikar a dagus ti amin daytoy a balakad, ngem matulongannaka ti Espiritu a mangsapul iti maysa wenno dua a prinsipio a mabalinmo a rugian nga itrabaho ita nga aldaw. Ibinglaymo dagiti tarigagaymo iti Nailangitan nga Amam iti kararag, ket dumawatka iti tulongna.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Taga Roma 8:31–39.Ania ti masarakantayo iti Taga Roma 8:31–39 a mangisuro no kasano ti marikna ti Nailangitan nga Ama ken ni Jesus maipapan kadatayo? Kaano a nariknatayo ti parabur ti Dios?
Tapno maipakita dagiti bersikulo 38–39, mabalin a sapulen dagiti miembro ti pamilia dagiti pagarigan dagiti banag a, kas kadatayo ken ti ayat ti Dios, saan a mabalin nga agsina.
Insuro ni Elder Wilford W. Andersen, “Ti musika ti ebanghelio ti [maysa] a narag-o a naespirituan a rikna.”
-
Taga Roma 9:31–32.Ti mensahe ni Elder Wilford W. Andersen “The Music of the Gospel” (Liahona, Mayo 2015, 54–56; kitaen met iti video iti ChurchofJesusChrist.org) ket makatulong a mangiladawan no ania ti isuro ni Pablo maipapan kadagiti paglintegan, aramid, ken pammati. Kalpasan a mapaglilinnawagan ti bitlana, mabalin a padasen ti pamiliam ti agsala nga adda ken awan ti musika. Kasano a matulongannatayo ti pammati a mangpadas iti rag-o ti ebanghelio?
-
Taga Roma 10:17.Markaam ti sumagmamano a baso ti danum kadagiti pakasarakantayo iti balikas ti Dios (kas kadagiti nasantuan a kasuratan, bukod a paltiing, ken sapasap a komperensia). Paglilinnawagan no kasano a mangnayon iti pammatitayo ti balikas ti Dios bayat ti panangibukbokmo iti tunggal baso iti container a namarkaan iti “Pammati.”
-
Taga Roma 12.Ania ti kayat na a sawen ti mangaramid iti bagbagitayo a kas “daton a sibibiag, nasantoan, ken makaay-ayo iti Dios”? (bersikulo 1).
-
Taga Roma 14:13–21.Nalabit a maisagut ti pamiliam manipud iti panagadal iti balakad ni Pablo maipapan iti panaghusga ken pannakisuppiat maipapan kadagiti bukod a panagpili. Nalabit mabalinyo a paglilinnawagan dagiti maitutop a wagas nga agresponde no dagiti pili dagiti dadduma a tao, agraman dagiti miembro ti pamilia ket maigiddiat manipud iti pilim. Kasano a mabalintayo a “suroten dagiti banag a mamagkappia”? (bersikulo 19).
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “I Feel My Savior’s Love,” Children’s Songbook, 74–75.
Panangpadur-as iti Panangisurotayo
Palugodam dagiti ubbing a mangipeksa iti kinamanagpartuatda. “No awisem dagiti ubbing a mangpartuat iti maysa a banag a mainaig iti pagbatayan ti ebanghelio, tulongam ida a makaawat nga ad-adda iti prinsipio. … Palubosam ida nga agbukel, agdrowing, agkolor, agsurat, ken agpartuat” (Panangisuro iti Wagas ti Mangisalakan, 25).
Agtalinaedkayo Kaniak,, ni Del Parson