nagkauna a Corinto

Corinto, Southern Greece, ti Forum ken Civic Center, ladawan nga impinta ni Balage Balogh/www.ArchaeologyIllustrated.com

Agosto 21–27

1 Taga Corinto 1–7

“Naan-anay Koma ti Panagtitimpuyogyo”

Isuratmo dagiti impresionmo bayat ti panagbasam iti 1 Taga Corinto 1–7. Mabalin nga iraman dagitoy nga impresion dagiti parikna nga agadal iti ad-adu a kapanunotan, tapno ibinglay iti dadduma ti maysa a banag a sursuruem, wenno agaramid kadagiti panagbalbaliw iti biagmo.

Isuratmo dagiti Impresionmo

Kabayatan dagiti bulan a panagnaed ni Pablo iti Corinto, “adu kadagiti taga Corinto a nagdengngeg [kenkuana] ti namati, ket nabautisaranda” (Dagiti Aramid 18:8). Isu a mabalin a makapaladingit para ken ni Pablo a madamag, a kalpasan iti sumagmamano laeng a tawen, adda “panaglalasin” ken “panagririri” kadagiti Santo a taga Corinto ket iti kaawanna nangrugida a tungpalen ti “sirib ti lubong” (1 Taga Corinto 1:10–11, 20). Kas sungbat, insurat ni Pablo ti surat nga aw-awagantayo itan iti 1 Taga Corinto. Napnuan daytoy iti nauneg a doktrina, ket iti dayta met la a gundaway, kasla naupay ni Pablo agsipud ta saan a nakasagana dagidi Santo nga umawat iti amin a doktrina a kayatna nga ited kadakuada. “Siak, kakabsat, diak nabalin ti nakisao kadakayo a kas kadagiti naespirituan,” inluksawna, “ta linalasag kayo pay laeng” (1 Taga Corinto 3:1–3). Bayat ti panagsaganatayo a mangbasa kadagiti balikas ni Pablo, mabalin a makatulong a mangamiris iti bukodtayo a panagsagana nga umawat iti kinapudno—mairaman ti kinatallugodtayo a dumngeg iti Espiritu ken mangikagumaan iti panagkaykaysa iti uneg dagiti pamiliatayo, kadagiti padatayo a Santo, ken iti Dios.

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

1 Taga Corinto 1:10–17; 3:1–11

Nasken nga ikarigatan nga agkaykaysa dagiti miembro ti Simbaan ni Cristo.

Saantayo ammo amin dagiti detalye maipapan iti kinaawan iti panagkaykaysa kadagiti Santo ti Corinto, ngem ammotayo maipapan iti kinaawan ti panagkaykaysa kadagiti bukodtayo a relasion. Mangpanunotka iti relasion iti biagmo a mabalin a pagimbagan manipud iti ad-adda a panagkaykaysa; kalpasanna sarakem no ania ti insuro ni Pablo iti 1 Taga Corinto 1:10–17; 3:1–11 maipapan iti kaawan panagkaykaysa kadagiti Santo iti Corinto. Ania dagiti nauneg a pannakaammo ken pannakaawat a magun-odmo maipapan no kasano ti mangpadur-as iti dakdakkel a panangkaykaysa kadagiti dadduma?

Kiten met iti Mosiah 18:21; 4 Nephi 1:15–17; Doktrina ken Katulagan 38:23–27; 105:1–5; Gospel Topics, “Unity,” topics.ChurchofJesusChrist.org.

1 Taga Corinto 1:17–31; 2

Tapno maipatungpalko ti aramid ti Dios, kasapulak ti sirib ti Dios.

Idinto a nasayaat daytoy—kasta met a naparegta—nga agsapul iti sirib sadino man ti pakasarakantayo (kitaen iti 2 Nephi 9:29; Doktrina ken Katulagan 88:118), nangted ni Pablo iti sumagmamano a napigsa a pammallaag a balikas maipapan iti nadadael a sirib ti tao, nga inawaganna iti “sirib daytoy a lubong.” Bayat ti panangbasam iti 1 Taga Corinto 1:17–25, utobem no ania ti mabalin a kayat a sawen daytoy a ragup ti balikas. Ania iti panagkunam ti kayat a sawen ni Pablo iti “sirib ti Dios”? Apay a kasapulantayo ti sirib ti Dios tapno maipatungpal ti aramid ti Dios?

Kadagiti panagkagumaanmo a mangaramid kadagiti pagrebbengam a mangipatungpal iti aramid ti Dios, napadasam kadin ti “sibubuteng, ken sitatayegteg” a narikna ni Pablo idi sursuruanna dagiti Santo iti Corinto? (1 Taga Corinto 2:3). Ania ti masarakam iti 1 Taga Corinto 2:1–5 a mangted kenka iti tured? Ibilang no kasano a maipakitam nga ad-adda nga agtalekka iti “pannakabalin ti Dios” ngem “ti sirib ti dagiti tao.”

Kitaen met iti Doktrina ken Katulagan 1:17–28.

1 Taga Corinto 2:9–16

Kasapulak ti Espiritu Santo tapno maawatak dagiti banag ti Dios.

No kayatmo ti agsursuro iti ad-adu pay maipapan iti maysa a banag a kas iti panagmekaniko iti lugan wenno nagkauna nga arkitektura, kasano koma nga aramidem daytoy? Segun iti 1 Taga Corinto 2:9–16, kasano a ti panagsursuro kadagiti “bambanag ti Dios” ket maigiddiat iti panagsursuro kadagiti “bambanag ti tao”? Apay a nasken nga addaantayo iti Espiritu Santo tapno maawatan dagiti bambanag ti Dios? Kalpasan ti panagbasa kadagitoy a bersikulo, ania ti mariknam a rumbeng nga aramidem tapno ad-adda a maawatam a naan-anay dagiti bambanag a naespirituan? Kasano a makatulong dagiti balikas ni Pablo iti maysa a tao a mangikarkarigatan a maaddaan iti pammaneknekna?

1 Taga Corinto 6:13–20

Sagrado ti bagik.

Narikna ti kaaduan a tattao iti Corinto a maaw-awat ti seksual nga imoralidad ken naaramid dagiti bagida a naisangrat para iti pagragsakan. Iti sabali a pannao, ti Corinto saan a naigiddiat iti lubong iti agdama. Ania ti insuro ni Pablo iti 1 Taga Corinto 6:13–20 a mabalin a mangtulong kenka a mangilawlawag iti dadduma no apay a kayatmo ti agbiag a nadalus?

Kas ken ni Pablo, inallukoy ni Sister Wendy W. Nelson dagiti Santo nga agbalin a natarnaw; kitaen iti mensahena “Love and Marriage” (worldwide devotional for young adults, Ene. 8, 2017, broadcasts.ChurchofJesusChrist.org). Segun ken ni Sister Nelson, ania dagiti bendision nga umay manipud iti panangbiag kadagiti pagrukodan ti Apo maipanggep iti ayat ken intimasia?

1 Taga Corinto 7:29–33

Insuro kadi ni Pablo a nasaysayaat ti saan a nagasawa ngem iti nagasawa?

Sumagmamano a bersikulo iti 1 Taga Corinto 7 kasla mangisingasing nga idinto maaw-awat ti kallaysa, kaykayatda ti agtalinaed nga awanan assawa ken naan-anay nga awanan iti seksual a relasion. Nupay kasta, ti Patarus ni Joseph Smith, 1 Taga Corinto 7:29–33 (iti Pangiwanwan iti Nasantuan a Kasuratan) tulongannatayo a makaawat nga itudtudo ni Pablo dagitay naawagan a kas full-time a misionario, a mangpalpaliiw a kabaelanda ti agserbi a nasaysayaat iti Dios no agtalinaedda nga awanan assawa kabayatan ti misionda. Insuro ti Apo babaen kadagiti katulonganna, agraman ken ni Pablo, a ti kallaysa ti paset ti agnanayon a planona ken kasapulan para iti pannakaitan-ok (kitaen iti 1 Taga Corinto 11:11; Doktrina ken Katulagan 131:1–4).

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

1 Taga Corinto 1:10–17; 3:1–11.Bayat ti panangbasa dagiti miembro ti pamilia kadagitoy a bersikulo, awisem ida a mangsapul iti maysa a nauneg a pannakaammo ken pannakaawat a makatulong kadakuada nga agbalin nga ad-adda a nakaykaysa.

1 Taga Corinto 3:1–2.Mabalinmo a basaen dagitoy a bersikulo kabayatan ti panangurnosmo iti pannanganmo iti gatas ken karne. Mabalin mo nga idilig ti wagas a panagdakkel dagiti maladaga nga agbalin a nataengan iti wagas a panagdakkeltayo a naespirituan.

1 Taga Corinto 3:4–9.Indasig ni Pablo ti panagkagumaanna kas missionario iti panagmula iti bukbukel. Ania ti isuro kadatayo ti panangidasigna maipapan iti panangibinglay iti ebanghelio?

1 Taga Corinto 6:19–20.Ti panangidasig iti bagitayo kadagiti templo, a kas iti inaramid ni Pablo, ket mabalin a nasayaat a wagas iti panangisuro maipapan iti kinasagrado dagiti bagitayo. Mabalinmo nga ipakita dagiti ladawan dagiti templo, kas kadagiti naikadua itoy a balabala. Apay a sagrado dagiti templo? Kasano a maipada dagiti bagitayo kadagiti templo? Ania ti mabalin nga aramidentayo a mangtrato kadagiti bagitayo a kas templo? (Kitaen met iti Agosto 2020 special edition ti Liahona maipapan iti seksualidad.)

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “The Lord Gave Me a Temple,” Children’s Songbook,, 153.

Panangpadur-as iti Bukod a Panagadal

Agan-anuska iti bagim. Insuro ni Pablo nga umun-una ti gatas ngem ti karne no agsursurotayo iti ebanghelio (kitaen iti 1 Taga Corinto 3:1–2). No masarakam a narigat a maawatan ita dagiti sumagmamano a doktrina, agan-anuska. Agtalekka nga umayto dagiti sungbat no adda ti pammatim ken sipapasnekka nga agadal.

uppat a templo

Indasig ni Pablo dagiti bagitayo iti kinasagrado ti templo. Agpakannawan manipud iti akinngato a kanigid: Templo ti Tijuana Mexico, Templo ti Taipei Taiwan, Templo ti Tegucigalpa Honduras,Templo ti Houston Texas