Agosto 28–Septiembre 3

1 Taga Corinto 8–13

“Dakayo ti Bagi ni Cristo”

Bayat ti sikakararag a panangbasam iti 1 Taga Corinto 8–13, mabalin nga agsao ti Espiritu Santo kenka iti naalumamay a wagwagas (kitaen iti 1 Ar-Ari 19:11–12). Ti panangisurat kadagitoy nga impresion matulongannakanto a manglagip kadagiti riknam ken kapanunotam kabayatan ti panagadalmo.

Isuratmo dagiti Impresionmo

Iti panawen ni Pablo, nabaknang a sentro ti paglakuan ti Corinto nga addaan kadagiti residente manipud iti intero nga Imperio ti Roma. Addaan iti adu nga agduduma a kultura ken relihion iti siudad, narigatan dagiti miembro ti Simbaan iti Corinto a mangpatalinaed iti panagkaykaysa, isu a kinalikaguman ni Pablo a mangtulong kadakuada a mangsapul iti panagkaykaysa iti pammatida ken ni Cristo. Nagbalin daytoy a panagkaykaysa nga ad-adda pay ngem iti nakappia a panagkakadua iti biag; saan nga indawat ni Pablo kadakuada a mangpabus-oy iti pagdudumaan ti tunggal maysa. Ketdi, insurona a no kumappengka iti Simbaan ni Jesucristo, “nabuniaganka iti maymaysa a bagi,” ket kasapulan ti tunggal paset ti bagi (1 Taga Corinto 12:13). No mapukaw ti maysa a miembro, kasla mapukawan iti maysa a gurong, ket agkapsut ti bagi kas bungana. No agsagaba ti maysa a miembro, nasken a mariknatayo amin daytoy ket aramidentayo ti pasettayo a mangpagin-awa iti daytoy. Iti daytoy a kita ti panagkaykaysa, ti paggigidiatan saan laeng a nabigbig ngem naipateg, gapu ta no awan dagiti miembro nga addaan kadagiti nadumaduma a sagut ken kabaelan, agbalin a limitado ti bagi. Mariknam man a kasla addaka kanayon iti pagtaengan iti Simbaan wenno nakitam ti bagim a masmasdaawan no pudno a maibilangka, mensahe ni Pablo kenka ti saan a panagpapada ti panagkaykaysa. Kasapulam dagiti padam a Santo, ken kasapulandaka dagiti padam a Santo.

Dagiti Kapanunotan para iti Bukod a Panagadal iti Nasantuan a Kasuratan

1 Taga Corinto 10:1–13

Mangted ti Dios iti maysa a wagas tapno maliklikan ti sulisog.

Dagiti naespirituan a padas, nga uray dagitoy namilagruan, ket saan a ditay mairaman manipud kadagiti sulisog a dagitoy ket “gagangay iti tao” (1 Taga Corinto 10:13). Mabalin a dayta ti maysa a gapu nga insurat ni Pablo no kasano a nagkarigatan dagiti Israelita iti sulisog iti aldaw ni Moises, nupay nasaksianda dagiti nabileg a milagro (kitaen iti Exodo 13:21; 14:13–31). Bayat ti panangbasam iti 1 Taga Corinto 10:1–13, ania dagiti ballaag kadagiti padas dagiti Israelita a kasla mayaplikar kenka? Ania a kita ti “panaglibas” manipud iti sulisog ti impaay ti Nailangitan nga Ama para kenka? (kitaen iti Alma 13:27–30; 3 Nephi 18:18–19).

1 Taga Corinto 10:16–17; 11:16–30

Ti sakramento ti mamagkaykaysa kadatayo kas miembro ti Simbaan ni Cristo.

Nupay iraman ti sakramento ti bukod a panagkumit iti nagbaetanyo iti Apo, maysa pay daytoy a padas nga ibinglaymo iti dadduma. Dumani kanayon nga aggigiddantayo a makiranud iti sakramento, kas maysa a bagi dagiti Santo. Basaem no ania ti insuro ni Pablo maipapan iti sakramento, ket panunotem maipapan iti no kasano a makatulong daytoy sagrado nga ordinansa iti “adu” nga agbalin a “maymaysa” ken ni Cristo (1 Taga Corinto 10:17). Kasano a tulongannaka ti pannakiranud iti sakramento a makarikna nga as-asidegka ken ni Cristo ken ti dadduma a namati? Kasano nga impluensiaan dagitoy a kapitulo ti riknam maipapan iti sakramento ken ti wagas a panagsaganam para iti daytoy?

1 Taga Corinto 11:11

Iti plano ti Dios, kasapulan ti tunggal maysa dagiti lallaki ken babbai.

Iti 1 Taga Corinto 11:4–15, intudo ni Pablo dagiti kannawidan iti kultura a ditayo sursuroten iti agdama. Nupay kasta, insuro pay ni Pablo ti napateg a kinapudno a mayaplikar iti agnanayon, a masarakan iti bersikulo 11. Ania iti panagkunam a kayat a sawen daytoy a bersikulo, ken apay a napateg daytoy? Insuro ni Elder David A. Bednar, “Naisangrat ti lalaki ken ti babai a masursuruan, mangpapigsa, mangbendision, iti tunggal maysa” (“We Believe in Being Chaste,” Liahona, Mayo 2013, 42). Kasano koma nga impluensiaan daytoy a kinapudno iti maysa a kallaysa? Kasano koma nga aringan daytoy ti wagas a panagserbitayo iti Simbaan?

Kitaen met iti Jean B. Bingham, “United in Accomplishing God’s Work,” Liahona, Mayo 2020, 60–63.

1 Taga Corinto 12–13

Maited dagiti naespirituan a sagut tapno mairanud ti amin nga annak ti Nailangitan nga Ama.

Ti listaan dagiti naespirituan a sagut iti 1 Taga Corinto12–13 saan a makabannog. Ngem nasayaat a lugar a mangirugi bayat nga inka lasinen ken utoben dagiti naespirituan a sagut nga inted kenka ti Nailangitan nga Ama. Ti artikulo a “Spiritual Gifts” iti Gospel Topics (topics.lds.org) mabalin a makatulong kenka tapno maawatam a nasaysayaat dagitoy a sagut. Mabalinmo nga inayon iti listaan ni Pablo dagiti sagut a makitam iti dadduma, iti bagim, wenno iti tao kadagiti nasantuan a kasuratan. No addaanka iti patriarchal blessing, mabalin a madakamat ditoy ti sumagmamano kadagiti naespirituan a sagutmo. Kasano a matulongannaka dagitoy a sagut a mangbendision iti dadduma? Ibilangmo no kasano a masarakam a “sipapasnek dagiti kasayaatan a sagut” (1 Taga Corinto 12:31).

Kitaen met iti 1 Taga Corinto14; Moroni 10:8–21, 30; Doktrina ken Katulagan 46:8–26; Pagannurotan iti Pammati 1:7.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

1 Taga Corinto 9:24–27.Agsipud ta indilig ni Pablo ti panagbiag iti ebanghelio iti lumba ti tinnarayan, adda koma lumba ti pamilia a mangiladawan daytoy a punto. Mangtedka iti gunggona a korona iti tunggal maysa a makaileppas iti lumba, ket paglilinnawagan no kasano a dagiti napasnek a sumursurot ken ni Jesucristo iti daytoy a biag ket mangabakto iti “di agrupsa” a gunggona (1 Taga Corinto 9:25; kitaen met iti 2 Timoteo 4:7–8). Ania ti aramiden ti tumataray tapno agsagana para iti maysa a lumba? Ania ti mabalin nga aramidentayo nga agsagana tapno makasubli iti Nailangitan nga Ama?

Indilig ni Pablo ti ebanghelio iti panagtaray iti maysa a lumba.

1 Taga Corinto 12:1–11.Kalpasan ti aggigiddan a panagbasa kadagitoy a bersikulo, ibilang ti panangted iti papel iti tunggal maysa nga addaan iti nagan ti sabali a miembro ti pamilia iti ngato. Kiddawem iti tunggal maysa a mangilista kadagiti naespirituan a sagut a madlawda nga addan iti dayta a tao. Kalpasanna mabalinmo nga ipasa dagiti papel iti pasirkulo agingga a naaddaan iti gundaway ti tunggal maysa nga isurat maipapan kadagiti sagut ti tunggal miembro ti pamilia.

1 Taga Corinto 12:3.Apay a napateg ti Espiritu Santo tapno magun-od ti pammaneknek ken ni Jesucristo? Ania ti mabalin nga aramidentayo a mangawis ti Espiritu Santo a mangpabileg kadagiti pammaneknektayo Kenkuana?

1 Taga Corinto 12:12–27.Ti analohia ni Pablo iti bagi mabalin a maysa a nakallalagip a wagas tapno paglilinnawagan ti panagkaykaysa ti pamilia. Kas pagarigan, mabalin a padasen dagiti miembro ti pamilia ti agdrowing iti bagi a naaramid laeng iti mata wenno lapayag (kitaen iti bersikulo 17). Ania ti isingasing dagitoy a bersikulo maipapan iti no kasano ti nasken a panangtratotayo iti tunggal maysa kas miembro ti pamilia?

1 Taga Corinto 13:4–8.Ti kaipapanan ti ayat [charity] ken ni Pablo mabalin a makaaramid iti maysa a makaparegta a pagsasao para iti pamiliam. Mabalinmo ti mangdutok iti tunggal miembro ti pamilia a mangadal iti ragup ti balikas kadagiti bersikulo 4–8 ken isurona ti dadduma pay iti pamilia no ania ti kayat a sawen daytoy nga us-usaren dagiti kaipapanan, pagarigan, ken bukod a padpadas. Kasano a maysa a pagwadan ti Mangisalakan dagitoy a kababalin? Mabalinyo pay ti aggigiddan a mangaramid iti poster para iti tunggal maysa kadagitoy a ragup ti balikas ket i-display ida iti intero a balayyo. Agbalinka a managpartuat!

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Love Is Spoken Here,” Children’s Songbook, 190–91.

Panangpadur-as iti Panangisurotayo

Mangi-display iti nasantuan a kasuratan Mangi-display iti maysa a bersikulo a masarakam a napateg iti maysa a lugar a masansan a makitanto dagiti miembro ti pamilia. Awisem dagiti dadduma pay a miembro ti pamilia nga agsisinnublat a mangpili iti maysa a nasantuan a kasuratan tapno i-display.

“Ti tinapay a pisientayo, saan aya nga isu ti pannakairaman ti bagi ni Cristo? Agsipud ta adda maymaysa a tinapay, datayo idinto nga adutayo, maymaysatayo a bagi” (1 Taga Corinto 10:16–17).