Hulio 17–23

Dagiti Aramid 10–15

“Ti Sao ti Apo Nagtuloy a Rimmang-ay”

Basaen ti Dagiti Aramid 10–15 a siaannad, mangted iti oras nga agparikna ti Espiritu kadagiti kapanunotan ken riknam. Ania dagiti masursurom kadagitoy a kapitulo?

Isuratmo dagiti Impresionmo

Kabayatan ti mortal a panagministrona, masansan a kinarit ni Jesucristo dagiti napaut a maang-angay a tradision ken kannawidan dagiti tao. Saan a nagsardeng daytoy kalpasan ti yuulina idiay langit, bayat a nagtultuyloy a nangtarabay iti Simbaanna babaen ti paltiing. Kas pagarigan, bayat ti panagbiag ni Jesus inkasaba dagiti disipulona ti ebanghelio kadagiti padada laeng a Judio. Ngem nabiit kalpasan a natay ti Mangisalakan ken nagbalin ni Pedro a lider ti Simbaan iti daga, impalgak ni Jesucristo ken ni Pedro a panawenen nga ikasaba ti ebanghelio kadagiti saan a Judio. Ti kapanunotan a panangibinglay ti ebanghelio kadagiti Gentil kadagitoy nga aldaw ket saanen a makapakellaat, isu nga ania ti leksion iti daytoy a pakaammuan a para kadatayo? Nalabit a maysa a leksion ket iti agpada a nagkauna ken agdama a Simbaan, tarabayen ti maysa a managayat a Mangisalakan dagiti napili a dadaulona (kitaen iti Amos 3:7; Doktrina ken Katulagan 1:38). Ti agtultuloy a paltiing ket maysa a napateg a pagilasinan ti pudno ken sibibiag a Simbaan ni Jesucristo. Kas ken ni Pedro, nasken a natallugodtayo nga umawat iti agtultuloy a paltiing ken agbiag “iti isu amin a balikas ti Dios” (Lucas 4:4), agraman ti “amin nga impalgak[na], amin nga ipalpalgakna,” ken “adu pay a naindaklan ken napateg a banag” ti ipalgaknanto “maipapan iti Pagarian ti Dios” (Pagannurotan ti Pammati 1:9).

Dagiti Kapanunotan para iti Bukod a Panagadal iti Nasantuan a Kasuratan

Dagiti Aramid 10

“Ti Dios saan a mangidumduma kadagiti tao.”

Para kadagiti kaputotan, namati dagiti Judio a ti panagbalin a paset “ti bukel ni Abraham,” wenno pudno nga an-annabo ni Abraham, kayatna a sawen a dayta a tao ket inawat ken pinili ti Dios (kitaen ti Lucas 3:8). Imbilangda ti asino man a maysa a “narugit” a Gentil a saan nga inawat ti Dios. Iti Dagiti Aramid 10, ania ti insuro ti Apo ken ni Pedro maipapan iti no siasino “ti maawat kenkuana”? (Dagiti Aramid 10:35). Ania a pakakitaan ti masarakam iti daytoy a kapitulo a ti biag ni Cornelio ket aw-awaten ti Apo? Utobem no ania ti kayat a sawen ti “Ti Dios saan a mangidumduma kadagiti tao” (bersikulo 34; kitaen met iti 1 Nephi 17:35). Apay a napateg kenka a mangammo maipapan daytoy a kinapudno?

Kas kadagiti Hudio a nangtagibassit kadagidiay saan a bukel ni Abraham, naduktalam kadin ti bagim a nagaramid iti saan a nasayaat wenno saan kapkapnekan a panangipapan maipapan iti maysa a tao a maigiddiat kadakayo? Kasano a maparmekmo daytoy a galad? Mabalin a makaay-ayo ti mangpadas iti simple nga aktibidad para iti sumaruno a sumagmamano nga aldaw: Kaano man a nakipulapolka iti maysa a tao, padasem a panunoten ti bagim, “Anak ti Dios daytoy a tao.” No aramidem daytoy, ania dagiti madlawmo a panagbalbaliw ti panagpampanunotmo maipapan ken pannakipulapolmo iti dadduma?

Kitaen met iti 1 Samuel 16:7; 2 Nephi 26:13, 33; Russell M. Nelson, “Let God Prevail,” Liahona, Nob. 2020, 92–95; “Peter’s Revelation to Take the Gospel to the Gentiles” (video), ChurchofJesusChrist.org.

Dagiti Aramid 10; 11:1–18; 15

Isuronak ti Nailangitan nga Ama iti tunggal binatog babaen ti paltiing.

Idi nakita ni Pedro ti parmata a nailadawan iti Dagiti Aramid 10, inkarigatanna idi damo a maawatan daytoy ket “nagduadua iti bagina iti no ania [ti] nasken a sawen daytoy” (bersikulo 17). Ngem inikkan ti Apo ni Pedro iti dakdakkel a pannakaawat kas kinalikaguman ni Pedro daytoy. Bayat ti panangbasam iti Dagiti Aramid 10, 11, ken 15, makitam no kasano nga immuneg ti pannakaawat ni Pedro iti parmatana iti panaglabas ti panawen. Kasano a nagkalikagum ken immawatka iti dakdakkel a pannakaawat manipud iti Dios no addaanka kadagiti saludsod?

TiDagiti Aramid 10, 11, ken 15 mangisalaysay kadagiti gundaway nga inturong ti Apo dagiti katulonganna babaen ti paltiing. Mabalin a makatulong nga isurat no ania ti masursurom maipapan iti paltiing bayat ti panangbasam kadagitoy a kapitulo. Iti ania a wagwagas a makisarita ti Espiritu kenka?

Kitaen met iti Gospel Topics, “Revelation,” topics.ChurchofJesusChrist.org; Quentin L. Cook, “The Blessing of Continuing Revelation to Prophets and Personal Revelation to Guide Our Lives,” Liahona, Mayo 2020, 96–100; “The Jerusalem Conference” (video), ChurchofJesusChrist.org.

Dagiti Aramid 11:26

Maysaak a Kristiano gapu ta mamatiak ken sumurotak ken ni Jesucristo.

Ania ti napateg maipapan iti maysa a tao a maaw-awagan iti Kristiano? (kitaen iti Dagiti Aramid 11:26). Ania ti kayat na a sawen kenka ti agbalin a maysa a “Kristiano”? Ibilangmo ti kinapateg dagiti nagan. Kas pagarigan, ania ti kaipapanan ti apiliedom kenka? Apay a napateg kenka ti nagan ti Simbaan? (kitaen iti Doktrina ken Katulagan 115:4). Ania ti kayatna a sawen kenka ti panangawat ti bagim ti nagan ni Jesucristo babaen iti katulagan? (kitaen iti Doktrina ken Katulagan 20:77).

Kitaen met iti Mosiah 5:7–15; Alma 46:13–15; 3 Nephi 27:3–8; Russell M. Nelson, “The Correct Name of the Church,” Liahona, Nob. 2018, 87–90.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Dagiti Aramid 10:17, 20.Naaddaantayo kadin kadagiti naespirituan a padas ket idi agangay nagduaduadatayo no ania ti narikna wenno nasursurotayo? Ania a balakad ti maitedtayo iti tunggal maysa a mabalin a makatulong kadatayo a mangparmek iti panagduaduatayo? (Kitaen met iti Neil L. Andersen, “Spiritually Defining Memories,” Liahona, Mayo 2020, 18–22.)

Dagiti Aramid 10:34–35.Kasano a masuruam ti pamiliam a “ti Dios saan a mangidumduma kadagiti tao”? (Dagiti Aramid 10:34). Nalabit a mabalinmo nga i-display dagiti ladawan dagiti tao manipud iti nadumaduma a nagtaudan ken kultura idinto a basaen ti pamiliam dagitoy a bersikulo. Kasano a nasken a mangimpluensia iti tignaytayo dagiti kinapudno kadagitoy a bersikulo? (kitaen, kas pagarigan, iti “I’ll Walk with You” [Children’s Songbook,, 140–41]).

Dagiti Aramid 12:1–17.Mabalin a yakem ti pamiliam ti pakasaritaan ni Pedro iti pannakaipisokna iti pagbaludan ken panaguummong dagiti miembro ti Simbaan ken panagkararagda para kenkuana. Kasano a naparaburantayo babaen ti kararag? Adda kadi maysa a tao a naparegtatayo nga ikararagan kas iti maysa a lider ti Simbaan wenno maysa a mangipatpateg? Ania ti kaipapanan ti “awan sardayna” a panagkararag? (Dagiti Aramid 12:5; kitaen met iti Dagiti Aramid 34:27).

Naisalakan ni Pedro manipud iti Pagbaludan, by A. L. Noakes

Dagiti Aramid 14.Bayat ti agggigiddan a panangbasayo iti daytoy a kapitulo, mabalin dagiti sumagmamano a miembro ti pamilia ti agisurat kadagiti bendision a dimteng kadagiti disipulo ken ti Simbaan. Mabalin nga isurat ti dadduma pay a miembro ti pamilia ti oposision wenno pannubok a napasaran dagiti disipulo. Apay nga ipalubos ti Dios a mapasamak dagiti narigat a banag kadagiti nalinteg a tao?

Dagiti Aramid 15:1–21.Iladawan dagitoy a bersikulo ti saan a panagkikinnaawatan iti Simbaan maipanggep iti no nasken dagiti kumbert ti agtungpal iti linteg ni Moises, agraman iti pannakakugit. Ania ti inaramid dagiti Apostol maipapan iti daytoy saan a panagkikinnaawatan? Ania ti masursurotayo manipud iti daytoy a pagarigan maipapan no kasano nga iturong dagiti lider ti Simbaan ti aramid ti Simbaan?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “I’ll Walk with You,” Children’s Songbook, 140–41.

Panangpadur-as iti Panangisurotayo

Agdrowing iti maysa a ladawan. Makatulong dagiti ladawan kadagiti miembro ti pamilia a mangiladawan iti panunotda kadagiti pannursuro ken estoria iti nasantuan a kasuratan. Mabalinmo nga awisen dagiti miembro ti pamilia a mangidrowing kadagiti ladawan ti nabasayo, kas iti parmata ni Pedro iti Dagiti Aramid 10.

Ipakita dagiti padas da Pedro ken Cornelio a “Ti Dios saan a mangidumduma kadagiti tao” (Dagiti Aramid 10:34).