“Hulio 3–9. Dagiti Aramid 1–5: ‘Dakayto ti Saksik’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2023 (2022)
“Hulio 3–9. Dagiti Aramid 1–5,” Umaykayo, Sumurot Kaniak—Para kadagiti Indibidual ken Pamilia: 2023
Aldaw ti Pentecostes, ni Sidney King
Hulio 3–9
Dagiti Aramid 1–5
“Dakayto ti Saksik”
Bayat ti panangadalmo iti Dagiti Aramid 1–5, mabalin a paregtaennaka ti Espiritu Santo nga agsapul kadagiti kinapudno nga adda pakainaiganna para iti biagmo. Isuratmo dagiti bersikulo a makaawis kenka, ket sapulem dagiti gundaway a mangibinglay no ania ti nasursurom.
Isuratmo dagiti Impresionmo
Nasdaawka kadin no ania ti mabalin a pampanunoten ken marikrikna ni Pedro idi isu, kaduana dagiti dadduma pay nga Apostol, “kitkitaenda a sipapasnek ti langit” kabayatan ti ingangato ni Jesus iti Amana? (Dagiti Aramid 1:10). Ti Simbaan a binangon ti Anak ti Dios adda itan iti panangaywan ni Pedro. Ti aramid a mangidaulo iti panagkagumaan nga “adalan dagiti amin a nasion” ket pagrebbenganna itan (Mateo 28:19). Ngem no nariknana ti panagkurang wenno panagbuteng, ditayo masarakan ti ania man a pakakitaan iti dayta a libro ti Dagiti Aramid. No di ket masarakantayo dagiti pagarigan ti natured a pammaneknek ken kumbersion, namilagruan a panangagas, ken naespirituan a parangarang, ken dakkel a panagdur-as para iti Simbaan. Daytoy pay laeng ti Simbaan ti Mangisalakan, nga Isu pay laeng ti mangidaulo. Kinapudnona, ti libro dagiti Aramid dagiti Apostol maawagan pay iti Dagiti Aramid ni Jesucristo babaen dagiti Apostolna. Matarabay babaen ti pannakaibukbok ti Espiritu Santo, saanen ti awan adalna a mangngalap ni Pedro a nasarakan ni Jesus iti igid ti Baybay ti Galilea. Wenno saan kadi nga isu ti lalaki a naburiboran a kadagiti immun-una a lawas nalaus ti panagsangitna gapu ta inlibakna nga am-ammona ni Jesus ti Nazaret.
Iti libro ti Dagiti Aramid, mabasamto dagiti nabileg a palawag maipapan ken ni Jesucristo ken ti ebangheliona. Makitamto pay no kasano a mabalbaliwan ti ebanghelio dagiti tao—a mairamanka—nga agbalin a maingel a disipulo nga ammo ti Dios a pakapagbalinanda.
Dagiti Kapanunotan para iti Bukod a Panagadal iti Nasantuan a Kasuratan
Dagiti Aramid 1:1–8, 15–26; 2:1–42; 4:1–13, 31–33
Iturong ni Jesucristo ti Simbaanna babaen ti Espiritu Santo.
Irekord ti libro Dagiti Aramid dagiti panagkagumaan dagiti Apostol a mangipasdek iti Simbaan ni Jesucristo kalpasan ti Yuuli ti Mangisalakan. Nupay awanen ni Jesucristo ditoy daga, inturongna ti Simbaanna babaen ti paltiing babaen ti Espiritu Santo. Ibilangmo no kasano nga inturong ti Espiritu Santo dagiti baro a lider ti Simbaan ni Cristo bayat ti panangrebyum kadagiti sumaganad a binatog: Dagiti Aramid 1:1–8, 15–26; 2:1–42; 4:1–13, 31–33.
Kas miembro ti Simbaan ni Cristo iti agdama, addaan ti tunggal maysa kadatayo iti pagrebbengan a makiraman iti aramid ti pannakaisalakan ken pannakaitan-ok—agbiag iti ebanghelio ni Jesucristo, mangaywan kadagiti agkasapulan, mangawis iti amin nga umawat iti ebanghelio, ken mamagkaykaysa kadagiti pamilia iti kinaagnanayon (kitaen iti Sapasap a Hanbuk, 1.2). Ania ti masursurom manipud kadagiti padas dagitoy nagkauna nga Apostol maipapan iti no kasano a mabalinmo a pagpannurayan iti Espiritu Santo a mangtarabay kadagiti panagkagumaanmo?
Kitaen met iti Pangiwanwan iti Nasantuan a Kasuratan, “Espiritu Santo.”
Dagiti Aramid 2:36–47; 3:13–21
Matulongannak dagiti pagbatayan ken ordinansa ti ebanghelio nga umasideg ken ni Cristo.
Nariknam kadin a “napaladingitan [ti] pusom,” kas kadagiti Judio iti aldaw ti Pentecostes? (Dagiti Aramid 2:37). Nalabit a nakaaramidka iti maysa a banag a pagbabawyam, wenno nalabit a gagangay a kayatmo ti mangbalbaliw iti biagmo. Ania ti rumbeng nga aramidem no adda kenka dagitoy a rikna? Masarakan dagiti balakad ni Pedro kadagiti Judio iti Dagiti Aramid 2:38. Kitaen no kasano a dagiti umuna a pagbatayan ken ordinansa ti ebanghelio (agraman ti pammati, panagbabawi, panagbuniag, ken ti sagut ti Espiritu Santo—wenno no ania ti dadduma a maitudo a kas ti doktrina ni Cristo) ket inaringanna dagitoy a kumbert, kas nairekord iti Dagiti Aramid 2:37–47.
Mabalin a nabuniagankan ken naawatmon ti sagut ti Espiritu Santo, isu a kasano nga ituloymo a yaplikar ti doktrina ni Cristo? Ibilangmo dagitoy a balikas manipud ken ni Elder Dale G. Renlund: “Makapagbalintayo a naan-anay babaen iti madagdagullit a … panangaramat iti pammati ken ni [Cristo], panagbabawi, pannakiranud iti sakramento tapno pabaruen dagiti katulagan ken bendision ti panagbuniag, ken panangawat iti Espiritu Santo kas maysa a kanayon a kadkadua iti dakdakkel a tukad. No aramidentayo daytoy, agbalintayo nga ad-adda a kas ken ni Cristo ken makabael nga agibtur agingga iti panungpalan, agraman ti amin a mairaman” (Latter-day Saints Keep on Trying,” Liahona,Mayo 2015, 56).
Ania “dagiti panawen ti bang-ar” ken “dagiti panawen ti pannakaisubli dagiti amin a banag”?
“Dagiti panawen ti bang-ar” ket mangitudo iti Milenium, inton agsubli ni Jesucristo iti daga. “Dagiti panawen ti pannakaisubli dagiti amin a banag” ket mangitudo iti Pannakaisubli ti ebanghelio iti ud-udina nga aldaw, a mangisagana iti lubong para iti Milenium.
Dagiti Aramid 3; 4:1–31; 5:12–42
Maikkan dagiti disipulo ni Jesucristo iti bileg a mangaramid kadagiti milagro iti naganna.
Mangnamnama ti pilay a lalaki nga umawat iti kuarta manipud kadagiti immay iti templo. Ngem ad-adu pay ti idiaya dagiti katulongan ti Apo kenkuana. Bayat ti panangbasam iti Dagiti Aramid 3; 4:1–31 ken 5:12–42; ibilangmo no kasano nga inapektuan ti simmaruno a milagro dagitoy a tao:
-
Ti pilay a lalaki
-
Da Pedro ken Juan
-
Dagiti saksi iti templo
-
Dagiti nangato a saserdote ken agturay
-
Dadduma pay a Santo
Ti Adda Kaniak Isu ti Itdek Kenka, ni Walter Rane
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Dagiti Aramid 1:21–26.Ti panangbasa iti Dagiti Aramid 1:21–26 makatulong iti pamiliam a mangilawlawag kadagiti bendision nga umay manipud iti kaadda dagiti Apostol iti daga iti agdama. Mabalin nga ibinglay dagiti miembro ti pamilia no kasano a nagun-odda ti maysa a saksi nga inawagan ti Dios dagiti apostol ken propeta iti agdama. Apay a napateg ti kaadda daytoy a saksi?
-
Dagiti Aramid 2:37.Ania ti mabalin a kaipapanan ti ragup ti balikas a “napaladingitan ti pusoda”? Kaano a nariknatayo ti kasta met la a banag? Apay a napateg a sawen ti “Anianto ti aramidentayo?” no addaantayo iti kasta a rikna?
-
Dagiti Aramid 3:1–10.Mabalin a magustuan ti pamiliam ti mangyakem iti estoria kadagitoy a bersikulo. Wenno mabalinmo a buyaen ti video “Peter and John Heal a Man Crippled Since Birth” (ChurchofJesusChrist.org). Kasano a nabendisionan ti lalaki iti templo a naiduma iti namnamaenna? Kasano a nakitatayon dagiti bendision ti Nailangitan nga Ama a sumangbay kadatayo iti saan a ninamnama a wagas?
-
Dagiti Aramid 3:12–26; 4:1–21; 5:12–42.Ania ti makaawis riknam maipapan iti kinapudno da Pedro ken Juan? (Kitaen met iti video “Peter Preaches and Is Arrested” iti ChurchofJesusChrist.org). Kasano a makapagbalintayo a natured kadagiti pammaneknektayo maipapan ken ni Jesuscristo? Ibilang ti panangtulong kadagiti inaudi nga ubbing a mangsanay iti panangibinglay kadagiti pammaneknekda.
-
Dagiti Aramid 4:31–5:4.Kasano a matulongantayo ti pamilia, ward ken komunidadtayo nga agbalin nga ad-adda a kas iti nailadawan iti Dagiti Aramid 4:31–37? Ania ti kayat a sawen ti agbalin a “nagmaymaysa iti puso ken iti kararua”? Iti ania a wagas a no dadduma “{idulintayo] ti paset” ti kontribusiontayo? Apay a ti panangaramid iti dayta maipada iti “[panagkusit] iti Dios? (Dagiti Aramid 5:2, 4). Kasano a naespirituan nga apektuannatayo ti kinaulbod?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a himno: “Let the Holy Spirit Guide,” Hymns, no. 143.
Panangpadur-as iti Panangisurotayo
Mangpili iti maysa a topiko. Pagsisinnublatem dagiti miembro ti pamilia a mangpili iti topiko manipud iti Dagiti Aramid 1–5 nga aggigiddan nga adalen.
Ti Yuuli, ni Harry Anderson