Ecce Homo, ni Antonio Ciseri

Hunio 19–25

Mateo 27; Marcos 15; Lucas 23; Juan 19

“Natungpalen”

Mateo 27; Marcos 15; Lucas 23; ken Juan 19 mangiraman kadagiti pannakailadawan dagiti maudi nga oras ti mortal a biag ti Mangisalakan. Ikalikagummo a riknaen ti ayatna para kenka bayat ti panagadalmo ti maipapan iti sakripisio ken ipapatayna.

Isuratmo dagiti Impresionmo

Iti tunggal balikas ken aramid, impagwadan ni Jesucristo ti natarnaw nga ayat—nga inawagan ni Apostol Pablo iti panagayat iti pada a tao (kitaen iti 1 Taga Corinto 13). Awanen ti panawen a nalawlawag pay ngem daytoy bayat dagidi maudi nga oras ti mortal a biag ti Mangisalakan. Ti nadayaw a kinaulimekna iti sanguanan dagiti palso a pammabasol ket nangipakita nga Isu ket “saan a nalaka nga agluksaw” (1 Taga Corinto 13:5). Ti kinatallugodna nga agtulnog iti pannakasaplit, pannakalalais, ken pannakailansana iti krus—bayat ti pananglappedna iti pannakabalinna a mangigibus kadagiti pammarparigat Kenkuana —nangipakita nga Isu ket “managitured” ken “ituredna ti amin” (1 Taga Corinto 13:4,7). Ti kinaasina iti inana ken ti asina kadagiti nangilansa Kenkuana iti krus—uray pay kabayatan ti awan kapadana a panagsagabana—nangipakita nga Isu ket “saan nga agimbubukodan” (1 Taga Corinto 13:5). Kadagiti maudi a kanitona iti daga, inar-aramid ni Jesus no ti ania ti inaramidnan iti unos ti mortal a panagministrona—a nangisursuro babaen ti panangipakitana kadatayo. Kinaagpaysona, ti panagayat iti pada a tao ket isu ti “nadalus nga ayat ni Cristo” (Moroni 7:47).

Dagiti Kapanunotan para iti Bukod a Panagadal iti Nasantuan a Kasuratan

Mateo 27; Marcos 15; Lucas 23; Juan 19

Ti kinatallugod ni Cristo nga agsagaba ti mangipakita iti ayatna para iti Ama ken para kadatayo amin.

Nupay adda pannakabalin ti Mangisalakan a mangayab kadagiti “legion dagiti anghel” (Mateo 26:53), sitatallugod a pinilina ti agibtur kadagiti di nainkalintegan a pannubok, naranggas a pananglalais, ken saan a mailadawan a saem ti bagi. Apay nga inaramidna daytoy? “Gapu iti naayat a panangngaasina,” pinaneknekan ni Nephi, “ken ti naunday a panagituredna nga agpaay kadagiti annak ti tattao” (1 Nephi 19:9).

“Ket rimmuar a sibabaklay iti krusna agingga iti … Golgota” (Juan 19:17).

Mabalinmo a rugian ti panagadalmo kadagiti maudi nga oras ti Mangisalakan babaen ti panangbasam iti 1 Nephi 19:9. Sadino iti Mateo 27; Marcos 15; Lucas 23; ken Juan 19 a masarakam dagiti pagarigan ti tunggal banag a kinuna ni Nephi a sagabaen ni Jesus?

• “Kinedngan[da] isuna a kas maysa a banag nga awan kaes-eskanna”

• “Sinaplitda isuna”

• “Minaloda isuna”

• “Tinupraanda isuna”

Ania kadagitoy a binatog ti mangtulong kenka a mangrikna iti “naayat a panangngaasi” ti Mangisalakan kenka? Ania dagiti dadduma pay a kapanunotan ken rikna nga adda kenka bayat ti panagbasam kadagitoy a pakaammuan? Ibilangmo ti panangisurat kadagitoy wenno panangibinglay kadagitoy iti maysa a tao.

Kitaen met iti “Jesus Is Condemned before Pilate” ken “Jesus Is Scourged and Crucified” (videos), ChurchofJesusChrist.org.

Mateo 27:27–49, 54; Marcos 15:16–32; Lucas 23:11, 35–39; Juan 19:1–5

Ti pannakalalais saan a mangbalbaliw iti kinapudno.

Idinto a naibturan ni Jesus ti pannakalalais iti unos ti panagministrona, ad-adda a kimmaro pay ti panagibturna kabayatan ti pannakasaplit ken Pannakailansana iti Krus. Ngem daytoy a pannakalalais ket saan a makapagbalbaliw ti kinapudno: Ni Jesus ti Anak ti Dios. Bayat ti panangbasam maipapan iti pannakaibabain nga inibturan ni Jesus, panunotem ti maipapan iti oposision ken pananglais a pakaipaspasanguan ti aramidna iti agdama. Ania dagiti nalawag a pannakaammo ken pannakaawat [insights] a magun-odmo maipanggep iti panagandur iti oposision? Ania ti nakaawisan ti riknam maipanggep kadagiti balikas ti centurion iti Mateo 27:54?

Mateo 27:46; Marcos 15:34

Nagsagaba ni Jesucristo nga agmaymaysa isu a nasken a diak agsagaba.

Kabayatan ti maysa kadagiti kasaeman a kanitona iti krus, ni Jesus, a kanayon a nagpannuray iti nailangitan nga Amana, kellaat a nariknana a nabaybay-an. Iti panagbasa maipapan iti daytoy mabalin a namagpanunot kenka maipapan kadagiti panawen a nariknam nga adayoka iti Dios. Mabalin nga utobem no kasano a ti sakripisio ti Mangisalakan iti krus mangaramid a posible a mangparmek iti dayta a kinaadayo. Kas iti impaneknek ni Elder Jeffrey R. Holland, “Gapu ta pinagna ni Jesus ti kasta nga atiddog, naliday a dana nga agmaymaysa ditayo nasken nga aramiden dayta. … Naitangguyob manipud iti tuktok ti Kalbario ti kinapudno a saantayonto a mabati nga agmaymaysa wenno awanan tulong, uray no dadduma mariknatayo a kastatayo” (“None Were with Him,” Liahona, Mayo 2009, 88). Ibilangmo no kasano a matulongannaka ti Mangisalakan a mangparmek iti panagmaymaysam bayat ti panangbasam iti nabati pay iti mensahe ni Elder Holland.

Lucas 23:34

Ti Mangisalakan ti pagwadantayo iti pannakapakawan.

Kasano ti riknam no basaem dagiti balikas ti Mangisalakan iti Lucas 23:34? (kitaen ti nalawag a pannakaammo ken pannakaawat nga impaay ti Patarus ni Joseph Smith iti footnote c). Mangitudtudo kadagiti balikas ti Mangisalakan, insuro ni Presidente Henry B. Eyring: “Nasken a pakawanentayo ken awan dakes a pananggandattayo kadagiti mangpaspasakit kadatayo. Impakita ti Mangisalakan ti pagwadan manipud iti krus. … Saantayo nga ammo ti puspuso dagiti mangpaspasakit kadatayo” (That We May Be One,” Ensign, Mayo 1998, 68). Kasano a matulongannaka daytoy a bersikulo no mariribukanka a mangpakawan iti maysa a tao?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Mateo 27; Marcos 15; Lucas 23; Juan 19.Tapno matulongan ti pamiliam a masursuruan maipapan dagiti pasamak a nailadawan kadagitoy a kapitulo, mabalinmo nga ibinglay kadakuada ti “Kapitulo 52: Dagiti Pannakausig ni Jesus” ken “Kapitulo 53: Nailansa ni Jesus iti Krus” (iti Dagiti Estoria iti Baro a Tulag, 133–38, wenno dagiti maitutop a video iti ChurchofJesusChrist.org). Wenno mabalinyo nga aggigiddan a buyaen dagiti video a mangiladawan kadagitoy a pasamak: “Jesus Is Condemned before Pilate” ken “Jesus Is Scourged and Crucified” (ChurchofJesusChrist.org). Mabalinmo nga awisen dagiti ubbing a mangulit a mangisarita kadagiti estoria iti bukodda a balikas. Mabalin a mangibinglay dagiti miembro ni pamilia no kasano ti riknada maipapan iti Mangisalakan gapu iti no ania ti sinagabana para kadatayo.

Mateo 27:11–26; Marcos 15:1–15; Lucas 23:12–25; Juan 19:1–16.Apay nga inyawat ni Pilato ni Jesus a mailansa iti krus, uray pay ammona nga awan ti basol ni Jesus? Ania dagiti adalen a masursurotayo manipud iti padas ni Pilato maipanggep iti panangitakder iti no ania ti ammotayo nga umno? Mabalin a makatulong para iti pamiliam ti panangyakem kadagiti buya a mangpalugod kadakuada a mangsanay iti panangitakder iti no ania ti umno.

Mateo 27:46; Lucas 23:34, 43, 46; Juan 19:26–28,30.Nalabit a mabalinmo a tudingan ti tunggal miembro ti pamilia a mangbasa iti maysa wenno ad-adu pay nga insao ti Mangisalakan iti krus, a masarakan kadagitoy a bersikulo. Idawatmo kadakuada a mangibinglay no ania ti masursuroda manipud kadagitoy a sao maipapan iti Mangisalakan ken ti misionna.

Marcos 15:39.Kasano a ti panangbasa maipanggep iti Pannakailansa iti Krus ket nangpatibker iti pammaneknekmo a ni Jesus isu ti “Anak ti Dios”?

Juan 19:25–27.Ania ti masursurotayo manipud kadagitoy a bersikulo maipanggep iti no kasano a maayat ken masuportarantayo dagiti miembro ti pamilia?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a himno: “Upon the Cross of Calvary,” Hymns, no. 184.

Panangpadur-as iti Panangisurotayo

Tuladen ti biag ti Mangisalakan. “Makatulong ti panagadal kadagiti wagas iti panangisuro ti Mangisalakan—dagiti pamay-an nga inusarna ken dagiti banag nga insaona. Ngem ti bileg ti Mangisalakan a mangisuro ken mangparegta kadagiti dadduma ket naggapu iti wagas ti panagbiagna ken ti kita ti kinataona. Ti napaspasnek a panagkagumaanmo nga agbiag a kas ken ni Jesucristo, ad-adda a kabaelamto ti mangisuro a kas Kenkuana” (Panangisuro iti Wagas ti Mangisalakan,13).

Ni Cristo iti Krus, ni Carl Heinrich Bloch