Ecce Homo, ni Antonio Ciseri

Hunio 19–25

Mateo 27; Marcos 15; Lucas 23; Juan 19

“Natungpalen”

Irugim ti panagsagana babaen ti panangbasa iti Mateo 27; Marcos 15; Lucas 23; ken Juan 19. Sikakararag nga agkalikagumka a makaawat kadagiti kasapulan dagiti ubbing.

Yawis ti Panagbibinninglay

Ipaiggem iti tunggal ubing ti ladawan manipud iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia. Bayat ti panangiggemda iti ladawan, mabalin a mangibinglay ti tunggal ubing iti maysa a banag a makitana iti ladawan.

Isuro ti Doktrina: In-inaudi nga Ubbing

Mateo 27:11–66; Lucas 23; Juan 19

Gapu ta natay ni Jesus para kaniak, mabalinko ti agungar.

Mabalin a maupay dagiti babassit nga ubbing kadagiti pakaammuan maipapan ti Pannakailansa iti Krus ni Jesus. “Kapitulo 52: Dagiti Pannakausig ni Jesus” ken “Kapitulo 53: Nailansa iti Krus ni Jesus” (iti Dagiti Estoria iti Baro a Tulag, 133–38, wenno dagiti maitutop a video iti ChurchofJesusChrist.org) ket mangipaay iti nasayaat a pagtuladan para iti no kasano a mabalinmo a siuumno nga ibinglay daytoy nga estoria kadakuada.

Dagiti Mabalin nga Aktibidad

• Ipakitam ti ladawan iti balabala itoy lawas iti Umaykayo, Sumurot Kaniak—Para kadagiti Indibidual ken Pamilia bayat ti panangisaritam maipapan iti pannakausig, pannakailansa iti Krus, ken pannakaitanem ni Jesus (kitaen met iti Libro ti Arte ti Ebanghelio, dagiti num. 57–58). Awisem dagiti ubbing a mangibinglay no ania ti ammoda maipapan kadagitoy a pasamak. Yunay-unay nga iti maikatlo nga aldaw, nagungar ni Jesus. Iti sabali a pannao, nagsubli ti biagna.

• Kiddawem kadagiti ubbing a manginagan iti sumagmamano a banag nga ar-aramiden dagiti nagannakda para kadakuada a saanda a maaramid para iti bagbagida. Ipakitam ti ladawan iti Mangisalakan. Ilawlawag a gapu ken ni Jesus, mabalintayo ti agungar—maysa a banag a saantayo a maaramid iti bagbagitayo.

• Ipakitam ti ladawan ti maysa a tao nga am-ammom a natayen. Ibinglaymo ti pammaneknekmo a gapu ken ni Jesus agbiagto manen dayta a tao.

Ti Pannakaitanem, ni Carl Heinrich Bloch

Mateo 27:26–37; Lucas 23:34

Mabalinko ti mangpakawan kadagiti dadduma kas iti inaramid ni Jesus.

Kasano a matulongamto dagiti ubbing a makaawat no kasano ti mangpakawan kadagiti natangsit, a kas iti inaramid ni Jesus?

Dagiti Mabalin nga Aktibidad

• Iladawam no kasano ti kinatangsit dagiti soldado ken ni Jesus (kitaen iti Mateo 27:26–37), ken kalpasanna basaem ti Lucas 23:34. Ilawlawag a no pakawanentayo dagiti dadduma, saantayon a gumura kadakuada ken mangipakitatayo iti ayat kadakuada.

• Ibinglaymo dagiti pagarigan a pagkunaan wenno pagaramidan ti maysa a tao iti maysa a banag a natangsit. Awisem dagiti ubbing a mangisarita maipapan no kasano a maipakitada ti pammakawan kadagitoy a situasion.

• Agkansion iti maysa a kanta maipapan iti pammakawan, kas iti “Help Me, Dear Father” (Children’s Songbook, 99). Agdamag kadagiti saludsod a masungbatan iti kanta, kas iti “Asino ti nasken a pakawanentayo?” wenno “Asino ti makatulong kadatayo no narigat ti mangpakawan?”

• Sukisokem ti nabiit pay nga isyu ti Friend tapno sapulem ti estoria maipapan ti maysa nga ubing a nangpakawan iti maysa a tao. Ibinglay daytoy nga estoria kadagiti ubbing.

Lucas 23:32–33, 39–43

Gapu ta nagsagaba ken natay ni Jesus para kaniak, makapagbabawi ken mapakawannak.

Nupay awan pay ti sungsungbatan dagiti ubbing nga agtawen iti nabababa ngem walo, napateg a rugianda ti agsursuro itan no kasano ti agbabawi kadagiti biddut a pili nga aramidenda.

Dagiti Mabalin nga Aktibidad

• Gupgopem ti Lucas 23:32–33, 39–43, ket tulongam dagiti ubbing a mangsapul iti dua a mannanakaw iti ladawan 57 iti Libro ti Arte ti Ebanghelio. Ilawlawag nga idi inang-angaw ti umuna a mannanakaw ni Jesus, inako ti maikadua a mannanakawaw a nakaaramid iti maysa a banag a biddut—narugianna ti agbabawi.

• Ibasam ti Doktrina ken Katulagan 19:16 kadagiti ubbing. Apay nga nagsagaba ni Jesus para kadatayo?

• Ipabuyam ti video a “The Shiny Bicycle” (ChurchofJesusChrist.org). Ilawlawag a makapagkararagtayo iti Nailangitan nga Ama ken matulongannatayo a mangatur kadagiti basol ken bidduttayo ken umawat iti pannakapakawan.

• Pagsuratem dagiti ubbing kadagiti marka ti tisa iti pisarra tapno mangibagi kadagiti biddut a pili. Kalpasanna kiddawem kadakuada a mangpugas iti pisarra tapno mangibagi iti panagbabawi. Ipakitam ti ladawan ti Mangisalakan, ket ipaneknek a mabalintayo ti agbabawi gapu Kenkuana.

Isuro ti Doktrina: In-inauna nga Ubbing

Mateo 27:11–66; Lucas 23; Juan 19

Natay ni Jesus para kaniak gapu ta ay-ayatennak.

Apay nga agyamanka gapu ta natay ni Jesucristo para kenka? Ibilang no kasano a matulongam dagiti ubbing a makaawat iti kinapateg ti sakripisio ti Mangisalakan para kadakuada.

Dagiti Mabalin nga Aktibidad

• Ilistam dagiti kangrunaan a pasamak iti Mateo 27:11–66 iti nagsisina a panid ti papel (para iti tulong iti panangaramid iti daytoy, kitaen iti “Kapitulo 52: Dagiti Pannakausig ni Jesus” ken “Kapitulo 53: Nailansa iti Krus ni Jesus,” iti Dagiti Estoria iti Baro a Tulag, 133–38, wenno iti maitutop a video iti ChurchofJesusChrist.org). Awisem dagiti ubbing nga agadal kadagitoy a bersikulo ken pagsasaganaden dagiti pasamak iti husto nga urnos.

• Kiddawem iti maysa nga ubing a mangbasa iti Mateo 27:54, ken awisem dagiti ubbing a mangibinglay kadagiti banag maipapan ken ni Jesus a makatulong kadakuada a mangammo nga Isu ti Anak ti Dios.

• Kiddawem kadagiti ubbing no ania ti masursuroda maipapan iti Pannakailansa iti Krus manipud ti “Behold the Great Redeemer Die” (Hymns, no.191, wenno sabali pay a himno ti sakramento. Ania ti natallugod a sinagaba ni Jesus para kadatayo? (kitaen iti Doktrina ken Katulagan 18:10–11; 19:16).

Mateo 27:26–37; Lucas 23:34

Mabalinko ti mangpakawan iti dadduma kas iti inaramid ni Jesus.

Mabalin a narigat ti mangpakawan iti dadduma. Mabendisionanto dagiti ubbing a sursuruam bayat ti panangsurotda iti pagwadan ti Mangisalakan ken panangsursuroda ti mamakawan.

Dagiti Mabalin nga Aktibidad

• Awisem dagiti ubbing nga agsisinnublatda iti panangbasa maipapan kadagiti soldado a natangsit ken ni Jesus iti Mateo 27:26–37 ken ti panangpakawan ni Jesus kadakuada iti Lucas 23:34. (Kitaen iti nalawag a pannakammo ken pannakaawat a naited iti Patarus ni Joseph Smith iti Lucas 23:34, footnotec.) Ania ti masursurotayo manipud iti pagwadan ni Jesus?

• Isuratmo iti pisarra ti Ania ti maaramidmo a mangpakawan iti maysa a tao a natangsit kenka? Pagsisinnublatem dagiti ubbing nga agsurat kadagiti kapanunotan iti pisarra, kas iti Agkararag tapno maaddaan iti naasi a rikna iti tao wenno Panunoten ti maysa a banag a nasayaat maipapan iti tao.

Lucas 23:32–33, 39–43

Gapu ta nagsagaba ken natay ni Jesus para kaniak, makapagbabawi ken mapakawannak.

Daytoy nga adalen ti maysa a napintas a gundaway tapno agpaneknek a gapu ken ni Jesucristo, makapagbabawitayo iti basbasoltayo ken mapakawan.

Dagiti Mabalin nga Aktibidad

• Awisem ti maysa nga ubing a mangbasa iti napigsa iti Lucas 23:32–33, 39–43. Ilawlawag a mannanakaw ti dua a tao a nailansa iti krus a kadua ni Jesus. Kasano nga impakita ti maysa kadagiti mannanakaw a mangrurugin isuna nga agbabawi? Ania ti maaramidtayo tapno maipakitatayo nga agbabbabawitayon? (Kitaen iti Pangiwanwan iti Nasantuan a Kasuratan, “Agbabawi, Panagbabawi,” scriptures.ChurchofJesusChrist.org.)

• Isurat ti sumaganad a binatog iti pisarra, a mangibati kadagiti blangko para kadagiti nagiray a balikas: “Mabalinak a mapakawan no agbabawiak gapu iti Pannubbot ni Jesucristo.” Mangted kadagiti ubbing ti pamugtuan tapno makatulong kadakuada a mangsurat kadagiti blangko.

• Paiggamam iti maysa nga ubing ti maysa a supot, ket punnuem daytoy iti babassit a bato bayat ti panangibaga dagiti dadduma pay nga ubbing kadagiti biddut a pili a mabalin nga aramiden ti maysa a tao. Tulongam dagiti ubbing a mangidilig ti supot iti naespirituan a dagensen a baklayentayo no agbasoltayo. Kasano a maipada ti panagbabawi iti panangiruar kadagiti bato iti supot? Mabalinmo a palagipan dagiti ubbing a ti panagbabawi saan a maminsan a pasamak no di ketdi maysa nga inaldaw a proseso.

• Sapulem iti nabiit pay nga isyu ti magasin a Friend ti estoria wenno mensahe maipapan iti panagbabawi, ket ibinglaymo daytoy kadagiti ubbing.

Yallukoy ti Panagsursuro iti Pagtaengan

Allukoyem dagiti ubbing a mangpanunot iti maysa a tao a nasken a pakawanenda ken ikeddengda nga aramiden ti maysa a banag a mangipakita iti dayta a tao a pinakawandan isuna.

Panangpadur-as iti Panangisurotayo

Sursuruem ti mangilasin iti paltiing. Masansan nga umay ti paltiing iti “tunggal binatog” (2 Nephi 28:30), saan nga iti mamimpinsan. Bayat ti panagkararag ken panangutobmo kadagiti nasantuan a kasuratan ken iti daytoy a balabala, maammuamto a mabalin a dumteng dagiti kapanunotan ken impresion iti ania man nga oras ken iti sadino man a lugar—kabayatan ti panagbiahem a mapan iti trabaho, panagaramid kadagiti trabaho iti balay, wenno pannakilangen iti pamilia ken gagayyem.