“Hunio 5–11. Juan 14–17: ‘Agtultuloykayo iti Ayatko,’” Umaykayo, Sumurot Kaniak—Para iti Primary: Baro a Tulag 2023 (2022)
“Hunio 5–11. Juan 14–17,” Umaykayo, Sumurot Kaniak—Para iti Primary: 2023
Ti Maudi a Pangrabii, ni William Henry Margetson
Hunio 5–11
Juan 14–17
“Agtultuloykayo iti Ayatko”
Agkararagka tapno maammuam dagiti kasapulan dagiti ubbing a sursuruam bayat ti panangbasam iti Juan 14–17. Ti Umaykayo, Sumurot Kaniak—Para kadagiti Indibidual ken Pamilia ket makatulong a mangsuporta iti panagadalmo, ken mangted daytoy a balabala kadagiti kapanunotam maipapan iti no kasano ti mangisuro kadagiti ubbing iti klasem.
Yawis ti Panagbibinninglay
Tapno matulongan dagiti ubbing a mangibinglay no ania ti nasursuroda iti pagtaengan, pagsisinnublatem ti tunggal ubing a mangiggem iti papel a sinanpuso ken mangibinglay iti maysa a banag nga aramidenna a mangipakita iti ayat para kadagiti dadduma.
Isuro ti Doktrina: In-inaudi nga Ubbing
Ipakitak ti ayatko ken ni Jesucristo babaen iti panagtungpal kadagiti bilinna.
Tulongam dagiti ubbing a makaawat a maipakitada iti Mangisalakan nga ay-ayatenda Isuna babaen ti panagtungpal kadagiti bilinna.
Dagiti Mabalin nga Aktibidad
-
Tulongam dagiti ubbing a mangisao iti Juan 14:15. Idawatmo kadakuada a mangisao iti “No ay-ayatendak” no ingatom ti papel a sinanpuso. Idawatmo kadakuada a mangisao iti “Tungpalenyo dagiti bilinko” no ingatom dagiti nasantuan a kasuratan.
-
Tulongam dagiti ubbing nga agpanunot iti sumagmamano a bilin ni Jesus. Awisem ida a mangisingasing kadagiti wagas a pakapagtungpalanda iti tunggal bilin. Paneknekam a ti panangaramid kadagitoy a banag ti mangipakita iti ayattayo para ken ni Jesucristo.
-
Aggigiddan nga agkansion iti maysa a kanta maipapan kadagiti bilin, kas iti “Keep the Commandments” (Children’s Songbook, 146–47).
-
Ay-ayamen kadagiti ubbing ti ay-ayam iti panid ti aktibidad itoy a lawas.
Juan 14:26–27; 15:26; 16:13–14
Tulongannak ti Espiritu Santo.
Insuro ni Jesus kadagiti disipulona dagiti napapateg a kinapudno maipanggep iti Espiritu Santo. Ibilang no kasano a makatulong dagitoy a kinapudno kadagiti ubbing a sursuruam.
Dagiti Mabalin nga Aktibidad
-
Ipakita ti ladawan Ti Maudi a Pangrabii (Libro ti Arte ti Ebanghelio, num. 54). Ilawlawag kadagiti ubbing nga iti Maudi a Pangrabii, insuro ni Jesus kadagiti disipulona maipapan iti Espiritu Santo. Ibinglaymo ti sumagmamano kadagiti kinapudno nga insurona iti Juan 14:26–27; 15:26; 16:13–14.
LadawanNi Jesus a makisarsarita kadagiti disipuloTi Maudi a Pangrabii, ni Clark Kelley Price
-
Ibinglaymo ti maysa a padas idi liniwliwanaka, inwanwannaka, wenno tinulongannaka a mangammo iti kinapudno ti Espiritu Santo. Paneknekam a matulongan ti Espiritu Santo dagiti ubbing iti kasta met la a wagwagas.
-
Kagiddan dagiti ubbing, agkansion iti maysa a kanta maipapan iti Espiritu Santo, kas iti “The Holy Ghost” (Children’s Songbook, 105). Awisem ida a dumngeg kadagiti banag a nadakamat iti kanta nga aramiden ti Espiritu Santo.
Maam-ammok ti Nailangitan nga Ama ken ni Jesucristo.
Insuro ni Jesucristo a ti “biag nga agnanayon” ket panangammo iti “maymaya a pudno a Dios, ken Jesucristo.” Bayat ti pannakaammo Kadakuada dagiti ubbing a sursuruam, masarakandanto ti naespirituan a pigsa a mangbendisionto kadakuada iti unos ti biagda ken magtulong kadakuada a manggun-od iti biag nga agnanayon.
Dagiti Mabalin nga Aktibidad
-
Basaem ti Juan 17:3, ken kiddawen kadagiti ubbing a dumngeg no ania ti kayat ni Jesus a maammuantayo. Ipakitam ti sumagmamano a ladawan a mangibagi kadagiti wagas a mabalin a maam-ammotayo ti Nailangitan nga Ama ken ni Jesucristo, kas kadagiti ladawan dagiti nasantuan a kasuratan, maysa a pamilia nga aggigiddan nga agsursuro, ken maysa a tao nga agserserbi iti sabali a tao. Paklebem dagiti ladawan, ket awisem dagiti ubbing nga agsisinnublat a manglukat kadagitoy ket ilawlawag no ania ti adda iti ladawan. Kasano a matulongannatayo dagitoy banag a mangam-ammo iti Nailangitan nga Ama ken ni Jesucristo?
-
Isaritam kadagiti ubbing maipapan kadagiti banag nga aramidenda tapno maam-ammoda a nasaysayaat dagiti gagayyemda. Kasano a maam-ammotayo a nasaysayaat ti Nailangitan nga Ama ken ni Jesucristo? Ibinglaymo dagiti wagas a naaramidmon daytoy.
Isuro ti Doktrina: In-inauna nga Ubbing
Ipakitak ti ayatko ken ni Jesucristo babaen iti panagtungpal kadagiti bilinna.
Bayat ti panangbasam kadagitoy a binatog iti bukodmo a panagadal, panunotem dagiti ubbing a sursuruam. Kasano a mabendisionandanto no maawatanda a ti panagtulnogda iti Mangisalakan ket maysa a tanda ti ayatda para Kenkuana?
Dagiti Mabalin nga Aktibidad
-
Awisem dagiti ubbing a mangibinglay kadagiti wagas a pakapagbalinanda a natulnog iti Nailangitan nga Ama. Ipakitam dagiti ladawan manipud iti biag ti Mangisalakan a makatulong kadakuada (kitaen iti Libro ti Arte ti Ebanghelio, dagiti num. 34–35, 56–57). Kiddawen kadagiti ubbing nga agsarita maipanggep kadagiti panawen a nagtungpalda iti Nailangitan nga Ama.
-
Awisem ti maysa nga ubing a mangbasa iti Juan 14:15. Pagsisinnublatem dagiti ubbing a mangidrowing kadagiti ladawan a mangibagi iti maysa a tao nga agtungtungpal iti maysa a bilin, idinto a pugtuan dagiti dadduma pay nga ubbing no ania ti idrowdrowingna. Para kadagiti pagarigan dagiti bilin, kitaen iti Para iti Pigsa dagiti Agtutubo buklet (2022). Kasano a ti panagtungpal kadagitoy a bilin ket mangipakita iti Mangisalakan nga ay-ayatentayo Isuna?
Ti Espiritu Santo ket mangiwanwan, mangliwliwa, ken mangipaneknek iti kinapudno.
Nakaawat kadin dagiti ubbing a sursuruam iti sagut ti Espiritu Santo? Ania ti ammoda maipapan iti no kasano a matulongan ida ti Espiritu Santo? Ibilang no kasano a matulongamto ida a nasaysayaat a makaawat kadagiti akem ti Espiritu Santo.
Dagiti Mabalin nga Aktibidad
-
Mangted kadagiti ubbing kadagiti sumaganad a bersikulo a basaenda iti sagpaparis: Juan 14:26; 15:26; ken 16:13. Kiddawem kadakuada a mangsapul kadagiti balikas a mangisuro kadakuada no ania ti aramiden ti Espiritu Santo. Isuratmo dagiti balikas iti pisarra.
-
Ibinglaymo ti maysa a padas idi inwanwannaka, liniwliwanaka, binallaagannaka, wenno impaneknekna ti kinapudno kenka ti Espiritu Santo. Awisem dagiti ubbing a mangibinglay kadagiti ania man a napadasanda. Kasano a nabigbigda ti impluensia ti Espiritu Santo?
-
Awisem ti tunggal ubing a mangidrowing iti rupana iti maysa a papel a supot. Pagsilawem ti maysa a flashlight, a mangibagi iti Espiritu Santo, iti uneg ti tunggal supot. Kalpasanna ikabilmo dagiti banag iti uneg dagiti supot a manglapped iti lawag, a kas iti pedaso ti lupot, tapno mangisuro a dagiti biddut a pilitayo ket mangpabassit iti impluensia ti Espiritu Santo iti biagtayo. Paikkat kadagiti ubbing dagiti banag manipud kadagiti supotda a mangibagi iti panagbabawi.
Kayat ti Nailangitan nga Ama ken ni Jesus a maam-ammok Ida.
Mabendisionamto ti biag dagiti ubbing babaen ti panangtulongmo kadakuada a mangam-ammo a nasaysayaat iti Nailangitan nga Ama ken ni Jesucristo.
Dagiti Mabalin nga Aktibidad
-
I-displaymo ti maysa a mula (wenno ladawan ti maysa a mula) bayat ti panagsisinnublat dagiti ubbing nga agbasa kadagiti bersikulo iti Juan 15:1–9. Kasano a mayarig ni Jesus iti maysa a kayo ti ubas? Kasano a mayarigtayo kadagiti sanga? Ania ti maaramidtayo tapno “agtalinaedtayo,” wenno asidegtayo iti Mangisalakan?.
-
Basaem iti napigsa ti Juan 17:3. Saludsodem kadagiti ubbing no ania ti ar-aramidenda tapno maam-ammoda ti Nailangitan nga Ama ken ni Jesucristo. Ibinglaymo no kasano ti panakaam-ammom Kadakuada.
Yallukoy ti Panagsursuro iti Pagtaengan
Awisem dagiti ubbing a mangibinglay kadagiti pamiliada iti maysa a kanta a nabiit pay a nasursuroda iti klase wenno iti oras ti panagkanta.
Panangpadur-as iti Panangisurotayo
Ibagay dagiti aktibidad. No mangisuroka kadagiti in-inaudi nga ubbing, mabalin a makasarakka kadagiti nayon a kapanunotan a maibagaymo para iti klasem iti daytoy a benneg ti balabala para kadagiti in-inauna nga ubbing. Kasta met, a mabalin pay nga ibagay dagiti aktibidad para kadagiti in-inaudi nga ubbing tapno isuro kadagiti in-inauna nga ubbing.