Ti Kakaywan iti Getsemani, ni Derek Hegsted

Hunio 12–18

Lucas 22; Juan 18

“Saan a ti Pagayatak ti Maaramid, No Di ket ti Pagayatam”

Ti panagsursuro manipud iti Lucas 22 ken Juan 18 kadagiti ubbing ket maysa a gundaway a mangtulong kadakauda a mangpauneg iti ayatda para ken ni Jesucristo ken iti pammatida Kenkuana. Sikakararag nga ibilangmo no kasano nga aramidemto daytoy.

Yawis ti Panagbibinninglay

Ipakitam dagiti ladawan dagiti pasamak kadagitoy a kapitulo, kas iti Ni Cristo iti Getsemani (Libro ti Arte ti Ebanghelio, num. 56) ken dagiti ladawan iti Umaykayo, Sumurot Kaniak—Para kadagiti Indibidual ken Pamilia. Awisem dagiti ubbing a mangibaga no ania ti mapaspasamak kadagiti ladawan.

Isuro ti Doktrina: In-inaudi nga Ubbing

Lucas 22:39–46

Nagsagaba ni Jesus para kaniak gapu ta ay-ayatennak.

Ibilangmo no kasano a matulongam dagiti ubbing a makarikna iti ayat ni Jesus para kadakuada bayat ti panangilawlawagmo iti pakaammuan maipapan ti panagsagabana iti Getsemani.

Dagiti Mabalin nga Aktibidad

• Isaritam ti estoria ti Lucas 22:39–46 kadagiti ubbing, nalabit a babaen ti panangusar iti “Kapitulo 51: Agsagaba ni Jesus iti Minuyongan ti Getsemani” (iti Dagiti Estoria iti Baro a Tulag, 129–32, wenno ti maitutop a video iti ChurchofJesusChrist.org). Ilawlawag a narikna ni Jesus ti amin a saem ken liday a narikna ti tunggal maysa. Kiddawen kadagiti ubbing no ania ti mangaramid iti maysa a tao a makarikna iti liday, sakit, wenno uppapay. Paneknekan a matulongannatayo ni Jesus a makarikna iti nasaysayaat no mariknatayo ti kastoy.

• Ipasa iti lawlaw ti maysa a ladawan ti Mangisalakan iti Getsemani (kas iti maysa iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Bayat ti panangiggem ti tunggal ubing iti ladawan, isaom ti, “nagsagaba ni Jesus gapu ta ay-ayatenna ni [nagan ti ubing].” Awisem dagiti ubbing a mangulit kadagitoy a balikas kenka.

• Makipagkansionka kadagiti ubbing iti maysa a kanta maipapan iti ayat ni Jesucristo para kadatayo, kas iti “I Feel My Savior’s Love” (Children’s Songbook, 74–75). Tulongam ida a mangpanunot kadagiti wagas a nakariknaanda iti ayat ni Jesus.

Lucas 22:41–43

Makapagkararagak no kasapulak ti tulong.

Idi nagkararag ni Jesus iti Getsemani, nagparang ti anghel a nangpapigsa Kenkuana. Kasano a matulongam dagiti ubbing a sursuruam a makapagkararag met iti Nailangitan nga Ama para iti pigsa?

Dagiti Mabalin nga Aktibidad

• Gupgopem ti Lucas 22:41–43 para kadagiti ubbing. Ibinglay ti maysa a padas a nagkararagam para iti tulong ket pinapigsanaka ti Nailangitan nga Ama babaen iti Espiritu Santo wenno babaen iti pannakaibaon ti maysa a tao a nangtulong kenka.

• Kadagiti piraso ti papel, isurat ti sumagmamano a banag a mabalintayo nga isao iti kararag, kas iti “Nailangitan nga Ama,” “Agyamanak kenka,” “Dawatek kenka,” ken “iti nagan ni Jesuscristo, amen.” Ikabil dagiti piraso ti papel iti suelo iti saan a naurnos, ken tulongam dagiti ubbing nga urnosenda dagitoy iti urnos a maisaotayo dagitoy iti kararag. Ania ti mabalin a pagyamanantayo iti Nailangitan nga Ama? Ania pay ti mabalintayo nga isao Kenkuana? Paneknekan a makapagkararag dagiti ubbing iti Nailangitan nga Ama iti sadino man ken iti ania man nga oras.

Ni Cristo nga Agkarkararag iti Minuyongan ti Getsemani, ni Hermann Clementz

Isuro ti Doktrina: In-inauna nga Ubbing

Lucas 22:39–46

Iti Getsemani, inawat ni Jesucristo iti Bagina ti basol ken sakitko.

Ti pannakaammo maipapan iti inaramid ni Jesus para kadatayo iti Getsemani ket makatulong kadagiti ubbing nga agbabawi kadagiti basolda ket umasidegda iti Mangisalakan no mapadasanda dagiti narigat a pannubok.

Dagiti Mabalin nga Aktibidad

• Awisem dagiti ubbing a mangbasa iti Lucas 22:39–46, nga agsapsapul kadagiti balikas wenno ragup ti balikas a mangiladawan no kasano ti narikna ni Jesus iti Getsemani. Ania ti napadpadasan ni Jesus a nakaigapuan ti pannakariknana iti kastoy? (kitaen iti Doktrina ken Katulagan 19:16–19). Ikkam dagiti ubbing iti gundaway a mangibinglay kadagiti riknada maipapan ken ni Jesus ken ti sakripisiona para kadatayo.

• Awisem dagiti ubbing a mangibinglay iti panawen idi naliday wenno nagsakitda. Saludsodem kadakuada no adda maysa nga am-ammoda a nakarikna met iti kastoy. Awisem ida a mangbasa iti Alma 7:11–12. Ania ti isuro kadatayo dagitoy a bersikulo maipapan ken ni Jesucristo ken iti panagsagbana para kadatayo?

• Ikkam ti maysa nga ubing iti bassit a kayo nga at-atidog ngem iti kaakaba ti ridaw ti siled ti klase, ken kiddawen kenkuana nga iggamanna daytoy iti paidda ken padasenna ti magna a mapan iti ridaw. Ilawlawag nga ibagi ti bassit a kayo dagiti basoltayo, a manglapped kadatayo iti iseserrek iti pagarian ti Dios. Ikkaten ti bassit a kayo tapno mangipakita nga inawat ni Jesus iti Bagina dagiti basoltayo tapno mabalin a mapakawantayo no agbabawitayo.

Lucas 22:39–44

Matuladko ti pagwadan ni Jesus babaen ti panagtulnog iti Nailangitan nga Ama.

Impakita ni Jesus ti kinatulnogna iti Ama idi kinunana ti, “Saan a ti pagayatak, ti maaramid, no di ket ti pagayatam,” (Lucas 22:42). Kasano a matulongam dagiti ubbing a makasursuro manipud iti pagwadan ni Jesus?

Dagiti Mabalin nga Aktibidad

• Tulongam dagiti ubbing a mangyulo iti ragup ti balikas a “Saan a ti pagayatak, ti maaramid, no di ket ti pagayatam,” (Lucas 22:42) ket ilawlawag no ania ti kaipapanan daytoy. Ania ti maaramidtayo tapno agtulnog ti pagayatan ti Nailangitan nga Ama?

• Tulongam dagiti ubbing a mangbigbig iti sumagmamano a gapu no apay a narigat no dadduma nga aramiden no ania ti kayat ti Nailangitan nga Ama. Ania dagiti bendision a naawattayo babaen ti panagtungpal iti Nailangitan nga Ama, uray no narigat daytoy?

Lucas 22:50–51

Inayat ni Jesus dagiti kabusorna.

Saan a nalaka ti panagsursuro no kasano ti agbalin a mamagkappia, nangruna no natangsit dagiti dadduma kadatayo. Kasano a makaparegta ti pakaammuan iti Lucas 22:50–51 kadagiti ubbing a sursuruam nga agbalin a naasi iti amin a kasasaad?

Dagiti Mabalin nga Aktibidad

• Awisem dagiti ubbing a mangbasa iti Lucas 22:50–51. Ania ti masursurotayo maipapan ken ni Jesus manipud iti daytoy a pakaammuan? Kabayatan ti lawas, idawat iti sumagmamano kadagiti nagannak dagiti ubbing a mangisarita kenka maipapan kadagiti panawen idi impakita dagiti annakda ti kinaasi, uray no narigat daytoy. Ibinglaymo dagita nga estoria iti klase. (Palagipam dagiti ubbing a ti panagbalin a naasi saan a kayat a sawen a panangipalubos iti dadduma a dangranda ida; nasken a kasaritada dagiti nagannakda wenno sabali a mapagtalkan a nataengan no adda maysa a tao a mangdangran kadakuada.)

• Agkansion iti maysa a kanta maipapan iti kinaasi, kas iti “Kindness Begins with Me” (Children’s Songbook, 145). Ania ti isuro kadatayo daytoy a kanta maipapan iti kinaasi? Kasano a maipakitatayo ti kinaasi iti dadduma kas iti inaramid ti Mangisalakan?

Yallukoy ti Panagsursuro iti Pagtaengan

Awisem dagiti ubbing a mangibinglay kadagiti pammaneknekda maipapan iti Mangisalakan kadagiti pamiliada. Mabalinda pay nga idawat kadagiti miembro ti pamiliada a mangibinglay kadagiti pammaneknekda maipapan Kenkuana.

Panangpadur-as iti Panangisurotayo

Awisen dagiti Ubbing a mangibinglay no ania ti ammoda. “Idawatmo kadagiti [ubbing] a mangibinglay kenka dagiti pampanunoten, marikrikna, ken padpadasda nga adda pakainaiganna kadagiti pagbatayan nga isursurom. Maammuamto nga addaanda kadagiti nalawag a pannakaammo ken pannakaawat a simple, natarnaw, ken nabileg” (Panangisuro iti Wagas ti Mangisalakan, 26).