Ti Kakaywan iti Getsemani, ni Derek Hegsted

Hunio 12–18

Lucas 22; Juan 18

“Saan a ti Pagayatak, No Di ti Pagayatam, ti Maaramid”

Maaddaan iti oras a mangbasa iti Lucas 22 ken Juan 18 itoy a lawas. Utobem ken ikararagam maipapan iti basaem. Ti panangaramidmo iti daytoy ti mangted iti Espiritu iti gundaway nga agpaneknek iti pusom a pudno dagiti nasantuan a kasuratan.

Isuratmo dagiti Impresionmo

Adda tallo laeng a mortal a saksi iti panagsagaba ni Jesucristo iti Minuyongan ti Getsemani—ket naturogda iti kaaduanna ditoy. Iti dayta a minuyongan ken iti agangay iti krus, inawat ni Jesus iti bagina dagiti basbasol, saem, ken panagsagaba ti tunggal tao a nagbiag, nupay dumani awan a pulos ti sibibiag iti dayta a kanito ti makaammo no ania ti mapaspasamak. Masansan a mapalabas dagiti kapatgan a pasamak iti kinaagnanayon nga awanan iti adu a nainlubongan a panangikankano. Ngem ammo ti Dios Ama. Nangngegna ti panagpakaasi ti napudno nga Anakna: “Ama, no pagayatam, yadayum kadi daytoy a kopa kaniak: nupay kasta saan koma a maaramid ti pagayatak, no di ti pagayatam. Ket nagparang ti maysa nga anghel kenkuana manipud iti langit, a nangpabileg kenkuana” (Lucas 22:42–43). Idinto a saantayo mismo a nakaimatang a nangsaksi iti daytoy nga aramid ti saan a managimbubukod ken panagtallugod, datayo dagiti saksi ti Pannubbot ni Jesucristo. Tunggal kanito nga agbabawi ken umawattayo iti pannakapakawan dagiti basoltayo, ken tunggal kanito a mariknatayo ti mangpappapigsa a bileg ti Mangisalakan, mapaneknekantayo no ania ti napasamak iti Minuyongan ti Getsemani.

Dagiti Kapanunotan para iti Bukod a Panagadal iti Nasantuan a Kasuratan

Lucas 22:31–34, 54–62; Juan 18:17–27

Ti kumbersion ket maysa nga agtultuloy a proseso.

Panunotem ti maipapan kadagiti padas ni Pedro iti Mangisalakan—dagiti nasaksianna a milagro ken ti doktrina a nasursurona. Apay ngarud a kinuna ti Mangisalakan ken ni Pedro, “Inton makapagbabawikan, pabilgem dagiti kakabsatmo”? (Lucas 22:32; nainayon dagiti nagiray a balikas). Bayat ti panangutobmo daytoy, makatulong a panunoten no ania ti insuro ni Elder David A. Bednar maipapan iti paggidiatan ti kaadda ti pammaneknek ken ti panagbalin a pudno a napasurot (converted) (kitaen iti “Converted unto the Lord,” Liahona, Nob. 2012, 106–9).

Bayat ti panangbasam maipapan kadagiti padas ni Pedro iti Lucas 22:31–34, 54–62 (kitaen iti Juan 18:17–27), panunotem maipapan iti bukodmo a kumbersion. Nariknam kadin a nagkumitka unay, kas ken ni Pedro, “sisasagana a sumurot [iti Mangisalakan], iti pagbaludan, ken iti patay”? (Lucas 22:33). Apay a no dadduma mapukaw dagita a rikna? Adda dagiti inaldaw a gundaway a mangilibak wenno agsaksi iti Mangisalakan; anianto ti aramidem tapno agbalin nga inaldaw a saksi Kenkuana? Ania dagiti dadduma pay nga adalen a masursurom manipud iti padas ni Pedro?

Bayat ti panagtuloymo nga agbasa iti Baro a Tulag, siputam ti pakakitaan ti agtultuloy a kumbersion ni Pedro. Kasta met a kitaen dagiti wagas nga inawatna ti bilin ti Apo a “pabilgen dagiti kakabsatmo” (Lucas 22:32; kitaen iti Dagiti Aramid 3–4).

Kitaen met iti Marcos 14:27–31.

Lucas 22:39–46

Nagsagaba ti Mangisalakan para kaniak idiay Getsemani.

Inawisnatayo ni Presidente Russell M. Nelson a “mangipaay iti oras a mangsursuro maipapan iti Mangisalakan ken ti pangsubbot a sakripisiona” (Drawing the Power of Jesus Christ into Our Lives,” Liahona, Mayo 2017,40).

Ibilangmo no anianto ti aramidem a mangawat iti awis ni Presidente Nelson. Mabalin a rugiam babaen ti nainkararagan a panangutob iti panagsagaba ti Mangisalakan sadiay Getsemani, a kas nailadawan kadagitoy a bersikulo, ken panangisurat kadagiti impresion ken saludsod nga umay iti panunot.

Para iti uray naun-uneg a panagadal maipapan iti Mangisalakan ken ti Pannubbotna, padasem ti panangsukisok iti dadduma pay a nasantuan a kasuratan para iti sungbat kadagiti saludsod kas kadagitoy:

• Apay a kasapulan ti Pannubbot ti Mangisalakan? (Kitaen iti 2 Nephi 2:5–10, 17–26; 9:5–26; Alma 34:8–16; 42:9–26.)

• Ania ti napadasan ti Mangisalakan bayat ti panagsagabana? (Kitaen iti Isaias 53:3–5; Mosiah 3:7; Alma 7:11–13; Doktrina ken Katulagan 19:16–19.)

• Kasano nga apektuan ti panagsagaba ni Cristo ti biagko? (Kitaen iti Juan 10:10–11; Hebreo 4:14–16; 1 John 1:7; Alma 34:31; Moroni 10:32–33; Dallin H. Oaks, “Strengthened by the Atonement of Jesus Christ,” Liahona, Nob. 2015, 61–64.)

• Dagiti dadduma pay a saludsodko:

Bayat ti panagsursurom maipapan iti no ania ti napasamak iti Getsemani, mabalin a makaay-ayo a maammuan a ti Getsemani ket maysa a minuyongan dagiti kayo ti olibo ken addaan iti pagdapilan ti olibo, a nausar a panglebbek kadagiti olibo ken mapespes tapno maikkat ti lana nga usaren iti pagsilawan ken taraon kasta met a pagagas (kitaen iti Lucas 10:34). Kasano a ti proseso ti panangikkat iti lana ti olibo mangisimbolo iti no ania iti inaramid ti Mangisalakan para kadatayo iti Getsemani? Para iti sumagmamano a kapanunotan, kitaen iti mensahe ni Elder D. Todd Christofferson “Abide in My Love” (Liahona, Nob. 2016, 50–51).

Kitaen met iti Mateo 26: 36-46; Marcos 14:32–42.

Juan 18:28–38

Ti “pagarian [ti Mangisalakan] saan a ditoy lubong.”

Kas maysa a lider iti politika, ammo ni Ponsio Pilato ti bileg ken dagiti pagarian ditoy lubong. Ngem insao ni Jesus ti maigiddiat unay a kita ti pagarian. Iti pananglagip iti no ania ti nabasam maipapan iti biag ti Mangisalakan, ania ti pakakitaan a makitam a ti “pagarian[na] saan a ditoy lubong”? (Juan 18:36). Apay a nasken a maammuam daytoy? Ania pay ti napateg kenka maipapan kadagiti balikas ni Pilato?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Lucas 22:31–32.Kasano koma ti mabalin a narikna ni Pedro a maammuanna a nagkararag ni Jesus para kenkuana ken ti pammatina? Asino ti maikararagantayo, “tapno ti pammati[da] saan a mapukaw”? (bersikulo 32).

Lucas 22:39–46.Ti panagsursuro maipapan iti panagsagaba ti Mangisalakan iti Getsemani mabalin a maysa a sagrado a padas para iti pamiliam. Panunotem no ania ti maaramidmo tapno mangparnuay iti naraem ken narukbab nga espiritu bayat ti panangadalmo iti Lucas 22:39–46. Mabalin nga aggigiddankayo nga agkanta iti sumagmamano a paborito a himno ken ti pamiliam wenno kanta dagiti ubbing maipapan iti Mangisalakan. Mabalinyo a kitaen ti mainaig nga artwork wenno buyaen ti maysa a video kas iti “The Savior Suffers in Gethsemane” (ChurchofJesusChrist.org). Bayat ti panagbasam kadagiti bersikulo, mabalin nga ibinglay dagiti miembro ti pamilia dagiti binatog a naisangsangayan ti kaipapanan kadakuada—nalabit a maysa a binatog a mangtulong kadakuada a makarikna iti ayat ti Mangisalakan (kitaen met iti Mateo 26:36–46; Marcos 14:32–42). Mabalinmo met nga awisen ida a mangibinglay kadagiti pammaneknekda maipapan ken ni Jesucristo ken ti Pannubbotna.

Lucas 22:42.Mabalin nga ibinglay dagiti miembro ti pamilia no nasursuroda nga isao ti “Saan koma a maaramid ti pagayatak, no di ti pagayatam.”

Lucas 22:50–51; Juan 18:10–11.Ania ti masursurotayo maipapan ken ni Jesus manipud kadagitoy a bersikulo?

Diyo Ipalubos a Kasta ti Kapautna, ni Walter Rane

Juan 18:37–38.Kasano a sungbatantayo ti saludsod ni Pilato “Ania ti pudno?” (bersikulo 38). Para iti sumagmamano a kapanunotan, kitaen iti Juan 8:32; Doktrina ken Katulagan 84:45; 93:23–28; and “Oh Say, What Is Truth?,” Hymns, no. 272.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary..

Naisingasing a kanta: “I Stand All Amazed,” Hymns, no. 193.

Panangpadur-as iti Bukod a Panagadal

Adalem dagiti balikas dagiti propeta ken apostol iti ud-udina nga aldaw. Basaen no ania ti insuro dagiti propeta ken apostol iti ud-udina nga aldaw maipapan kadagiti kinapudno a masarakam kadagiti nasantuan a kasuratan. Kas pagarigan, iti isyu ti kaudian unay a sapasap a komperensia ti Liahona, mabalinmo a sukisoken ti topic index para iti “Atonement” (kitaen iti Panangisuro iti Wagas ti Mangisalakan, 21).

Saan a ti Pagayatak, no di ket ti Pagayatam, ni Walter Rane