“Hunio 5–11. Juan 14–17: ‘Agtultuloykayo iti Ayatko’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2023 (2022)
“Hunio 5–11. Juan 14–17,” Umaykayo, Sumurot Kaniak—Para kadagiti Indibidual ken Pamilia: 2023
Ti Maudi a Pangrabii,, ni William Henry Margetson
Hunio 5–11
Juan 14–17
“Agtultuloykayo iti Ayatko”
Bayat ti panangbasam kadagiti pannursuro ti Mangisalakan iti Juan 14–17, tulongannakanto ti Espiritu Santo a mangilasin kadagiti mensahe a para kenka. Isuratmo dagiti impresion a maawatmo.
Isuratmo dagiti Impresionmo
Ita awagantayo daytoy iti “Maudi a Pangrabii,” ngem saantayo nga ammo no naan-anay a naamiris dagiti disipulo ni Jesus, idi naguummongda para iti tinawen a fiesta ti Paskua, a daytoy ti maudi a pannakipanganda iti Maestroda sakbay ti ipapatayna. Nupay kasta, ammo ni Jesus, “a dimtengen ti orasna” (Juan 13:1). Asidegen a mapasarannanto ti panagsagaba iti Getsemani, ti pannakaliput ken panaglibak dagiti kasingedan a gagayyemna, ken ti nakatutuok nga ipapatay iti krus. Ngem iti baet dagitoy nga agur-uray iti sanguananna, impamaysa ni Jesus saan nga iti Bagina no di ket kadagiti disipulona. Ania koma ti kasapulanda a maammuan kadagiti aldaw ken tawen nga agur-uray? Ipakita dagiti nadungngo a pannursuro iti Juan 14–17 no kasano ti riknana maipapan kadagiti disipulona, kalpasanna ken ita. Maibilang iti adu a makapagin-awa a kinapudno nga imbinglayna ket ti naipanamnama nga, iti maysa a kaipapanan, saannanto a panawan ida uray kaano man. “No tungpalenyo dagiti bilbilinko,” inkarina, agtaengkayto iti ayatko” (Juan 15:10).
Dagiti Kapanunotan para iti Bukod a Panagadal iti Nasantuan a Kasuratan
Ipakitak ti ayatko ken ni Jesucristo babaen iti panagtungpal kadagiti bilinna.
Bayat ti panangbasam iti Juan 13–15, mabalinmo nga isurat wenno markaan ti tunggal pakaaramatan ti balikas nga ayat. Mabalin a madlawmo a masansan a naulit ti balikas a bilbilin no maikadua iti balikas nga ayat kadagitoy a kapitulo. Ania ti masursurom maipapan iti pagnaigan ti ayat ken bilbilin manipud kadagiti pannursuro ti Mangisalakan? Ania dagiti dadduma pay a balikas ken ragup ti balikas a masarakam a masansan a maulit a naikadua ti balikas nga ayat kadagitoy a kapitulo?
Utobem no kasano nga inimpluensiaannaka ti ayat ti Mangisalakan.
Kitaen met iti Juan 13:34–35; D. Todd Christofferson, “Abide in My Love,” Liahona, Nob. 2016, 48–51.
Ti Maudi a Pangrabii, ni Clark Kelley Price
Tulongannak ti Espiritu Santo a mangipatungpal iti panggepko kas maysa a disipulo ni Jesucristo.
Nalabit a makapaladingit kadagiti disipulo a mangngeganda a dumanin aggibusen ti panawenda iti Mangisalakan. Nalabit a nagdanagda pay maipapan no kasano nga aglalangenda nga awan Isuna. Bayat ti panangbasam iti Juan 14–16, sapulem no ania ti kinuna ti Mangisalakan a nangipanamnama kadakuada. Kangrunaanna, kitaen mo ania ti insurona kadakuada maipapan iti Espiritu Santo. Ania ti masursurom maipapan iti Espiritu Santo manipud kadagiti balikas ti Mangisalakan kadagiti sumaganad a bersikulo?
Apay a kinasapulan dagiti disipulo ti kastoy a kita ti tulong manipud iti Espiritu Santo? Kasano a naipatungpal ti Espiritu Santo dagitoy nga akem para kenka? Ibilangmo no ania ti maaramidmo tapno agbalinto a napigpigsa ti impluensiana iti biagmo.
Kitaen met iti 3 Nephi 19:9; 27:20; Doktrina ken Katulagan 11:12–14; Moises 6:61; Michelle D. Craig, “Spiritual Capacity,” Liahona, Nob. 2019, 19–21.
Bayat ti panagtalinaedko ken ni Cristo, mangisangbayakto iti nasayaat a bunga.
Ania ti kaipapanan ti “agtalinaed ken ni [Cristo]”? (Juan 15:4). Ania a “bunga” ti mangipakita a naisilpoka iti ubas, a mangibagi ken ni Jesucristo?
Ibabaet ni Jesuscristo dagiti disipulona.
Dagiti balikas ni Jesus a naisurat iti Juan 17 maam-ammo a kas ti Pangibabaet a Kararag. Iti daytoy a kararag, inkararagan ni Jesus dagiti Apostolna ken “idawdawatanna met dagiti mamati [Kenkuana] gapu iti saoda” (Juan 17:20). Kayatna a sawen nga inkarkararagannakayo. Ania ti indawat ni Jesus manipud iti Amana a para kadakayo ken dagiti amin a dadduma pay a mamati? Ania ti isuro dayta kenka maipapan iti aramid ti Dios?
Isuro pay daytoy a kararag dagiti nauneg, agnanayon a kinapudno. Ania pay dagiti kinapudno a masarakam? Bayat ti panangbasam iti daytoy a kapitulo, ibilangmo ti panangisurat no ania ti masursurom maipapan iti sumaganad:
-
Kararag
-
Ti pakainaigan ti Mangisalakan iti Amana
-
Ti pakainaigan ti Mangisalakan kadagiti disipulona
-
Nasken a maiduma dagiti disipulo manipud iti lubong
-
Dadduma pay a kinapudno a napateg kenka
Ti Nailangitan nga Ama ken ni Jesucristo naan-anay a nagkaykaysa.
Iti kararagna iti Juan 17, inyunay-unay ni Jesus ti pannakikaykaysana iti Ama. Iti ania a wagwagas a “maymaysa” ti Ama ken ti Anak? (Juan 17:11, 21–23). Kitaen a nagkararag ti Mangisalakan tapno agbalin dagiti disipulona a maymaysa “a kas”—wenno iti isu met laeng a wagas nga— Isu ken ti Amana maymaysada (Juan 17:22). Ania ti kaipapanan dayta kenka? Panunotem maipapan kadagiti relasionyo—kas pagarigan, iti asawam ken dadduma pay a miembro ti pamilia, kadagiti miembro ti ward, ken kadagiti pada a Kristiano. Kasano a maitrabahom iti kita ti panagkaykaysa nga adda ken Jesus iti Ama?
Kitaen met iti Quentin L. Cook, “Hearts Knit in Righteousness and Unity,” Liahona, Nob. 2020, 18–22; Sharon Eubank, “By Union of Feeling We Obtain Power with God,” Liahona, Nob. 2020, 55–57.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Juan 14:5–6.Mabalin a magustuan dagiti miembro ti pamilia ti panagsisinnublat a mangidaulo iti pannagna iti maysa a dana. Kasano a ni Jesus “ti dalan”? Sadino ti pangituronganna kadatayo?
-
Juan 14:26–27.Kasano a maigiddiat ti talna ni Jesus iti kita ti “panagited ti lubong”? Mabalin nga ibinglay dagiti miembro ti pamilia dagiti wagas a nakasarakanda iti talna ken gin-awa babaen ti Espiritu Santo.
-
Juan 15:1–8.Mabalin a naragsak ti mangbasa kadagitoy a bersikulo iti ruar nga abay ti maysa nga ubas, maysa a kayo, wenno sabali pay a mula. Ania ti mapasamak iti maysa a sanga no maikkat daytoy manipud iti mula? Mabalinmo nga isarita maipapan no kasano a maipadatayo kadagiti sanga ken no ania ti kayat a sawen ti “agtalinaed” iti Mangisalakan ken “agbunga.”
-
Juan 15:17–27; 16:1–7.Apay iti panagkunam a binallaagan ni Jesucristo dagiti disipulona iti pannakaidadanes? Kasano a maidaddadanes dagiti disipulo ni Jesucristo iti agdama? Kasano a makatulong kadatayo ti balakad ti Mangisalakan kadagitoy a bersikulo no maipasangotayo iti pannakaidadanes?
-
Juan 16:33.Kasano a pinarmek ni Jesucristo ti lubong? Kasano a nangyeg kadatayo ti Pannubbotna iti talna ken pananginanama? (kitaen met iti Doktrina ken Katulagan 68:6).
-
Juan 17:21–23. Ania ti makatulong iti pamiliam nga agsursuro no kasano ti agbalin nga ad-adda a nakaykaysa kas ken ni Jesucristo ken iti Nailangitan nga Ama? Nalabit a mabalinmo nga isarita maipapan kadagiti paggugustom a sports team ken no kasano nga agtitinnulongda iti maysa a gagangay a panggep a tun-oyen. Wenno mabalinmo a denggen ti maysa a koro wenno orchestra ket ilawlawag no kasano nga agkaykaysa dagiti musician a mangparnuay iti napintas a musika.
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “The Holy Ghost,” Children’s Songbook,105.
Panangpadur-as iti Panangisurotayo
Usarem dagiti audio recording. Bayat ti panangisurom iti pamiliam kadagiti nasantuan a kasuratan, ibilangmo ti idedengngeg iti audio a bersion dagiti nasantuan a kasuratan, a masarakan iti ChurchofJesusChrist.org wenno iti Gospel Library app. Ti panagdengngeg iti Juan 14–17 mabalin a naipangpangruna a nabileg gapu ta naglaon dagitoy a kapitulo iti adu a balikas ti Mangisalakan.
Insuro ni Jesus, “Siak ti ubas, dakayo dagiti sanga” (Juan 15:5).