Pakalaglagipan Kaniak, ni Walter Rane

Mayo 29–Hunio 4

Mateo 26; Marcos 14; Juan 13

“Kas Pakalaglagipan”

Bayat ti panangbasam maipapan kadagiti pasamak a nailadawan iti Mateo 26; Marcos 14; Juan 13; ikasom dagiti ania man nga impresion a maawatmo, nangnangruna kadagiti parikna a mangpauneg iti pammatim ken ni Jesucristo ken ti panagkumitmo Kenkuana.

Isuratmo dagiti Impresionmo

Ti aldaw sakbay ti ipapatayna, inikkan ni Jesus dagiti disipulona iti maysa a banag a manglaglagip Kenkuana. Isu ket “nangala iti tinapay, ket binendisionanna daytoy, ket pinirsapirsayna, ket intedna daytoy kadagiti disipulona, ket kinunana, Alaenyo, mangankayo; daytoy ti bagik. Ket nangala iti kopa, ket nagyaman, ket intedna daytoy kadakuada, a kunkunana, Uminumkayo iti daytoy; gapu ta daytoy ti darak” (Mateo 26:26–28).

Napasamak dayta agarup 2,000 a tawen ti napalabasen, iti maysa a lugar a saanto makita iti kaano man ti kaaduanna kadatayo, iti pagsasao a manmano laeng kadatayo ti makaawat. Ngem ita, tunggal Domingo iti bukodtayo a lugar a pagtataripnongan, dagiti priesthood holder, a napusgan nga agtignay iti nagan ni Jesucristo, aramidenda no ania idi ti naminsan nga inaramidna. Alaenda ti tinapay ken danum, bendisionanda daytoy, ket itedda iti tunggal maysa kadatayo, dagiti disipulona. Simple daytoy nga aramid—adda kadi ania man a banag a mabalin a nasimsimple pay, napatpateg pay, ngem iti pannangan iti tinapay ken pananginum iti danum? Ngem sagrado dayta tinapay ken danum kadatayo gapu ta tulongandatayo a manglagip Kenkuana. Isuda ti wagastayo iti panangisao, “Diakto pulos manglipat Kenkuana—saan laeng a, “Diakto kaano man malipatan no ania ti nabasak maipapan kadagiti pannursurona ken ti biagna.” Ketdi, kunkunami, “diakto kaano man maipatan no ania ti inaramidna para kaniak.” “Diakto kaano man malipatan no kasano nga inispalnak idi nagkiddawak iti tulong.” Ken “diakto kaano man malipatan ti panagkumitna kaniak ken ti panagkumitko Kenkuana—ti katulagan nga inaramidmi.”

Dagiti Kapanunotan para iti Bukod a Panagadal iti Nasantuan a Kasuratan

Mateo 26:6–13; Marcos 14:3–9

“Ta iti panangiparukpokna … iti bagik isagananak iti pannakaitanem.”

Iti napakumbaba nga aramid ti panagdaydayaw, impakita ti babai a nailadawan kadagitoy a bersikulo nga ammona no asino ni Jesus ken no ania ti aramidenna (kitaen iti Mateo 26:12). Apay iti panagkunam a napateg unay iti Mangisalakan dagiti tignayna? (kitaen iti bersikulo 13). Ania ti makaawis iti riknam maipapan iti babai ken ti pammatina? Utobem no kasano a masurotmo ti pagwadanna.

Kitaen met iti Juan 12:1–8.

Mateo 26:20–22; Marcos 14:17–19

“Apo, siak kadi?”

Ania ti masursurom maipapan kadagiti disipulo manipud iti saludsodda iti Apo kadagitoy a bersikulo? Apay iti panagkunam a sinaludsodda daytoy? Ibilangmo no kasano a mabalinmo a saludsoden ti Apo ti, “Siak kadi?”

Kitaen met iti Dieter F. Uchtdorf, “Lord, Is It I?,” Liahona, Nob. 2014, 56–59.

Mateo 26:26–29; Marcos 14:22–25

Ti sakramento ket maysa a gundaway a manglaglagip iti Mangisalakan.

Idi inyam-ammo ti Mangisalakan ti sakramento kadagiti disipulona, ania dagiti kapanunotan ken rikna a mapanunotmo nga adda koma kadakuada? Panunotem maipapan daytoy bayat ti panagbasam maipapan iti padasda iti Mateo 26:26–29 ken Marcos 14:22–25. Apay iti panagkunam a pinili ni Jesus daytoy a wagas tapno manglaglagiptayo Kenkuana? Mabalin met nga utobem dagiti adda a padasmo kabayatan ti sakramento. Adda kadi ania man a banag a mabalinmo nga aramiden tapno maaramidmo a nasagsagraduan ken napatpateg ti padasmo?

Kalpasan ti panagbasam ken panangutobmo kadagitoy a bersikulo, mabalinmo nga isurat ti sumagmamano a banag a mariknam a naparegtaka a manglagip maipapan iti Mangisalakan. Mabalinmo nga irebyu dagitoy a banag iti sumaruno a gundaway a yaawatmo iti sakramento. Mabalinmo pay nga irebyu ida iti dadduma a gundaway, kas maysa a wagas a “tapno kanayon a manglaglagip kenkuana” (Moroni 4:3).

Kitaen met iti Lucas 22:7–39; 3 Nephi 18:1–13; Doktrina ken Katulagan 20:76–79; Gospel Topics, “Sacrament,” topics.ChurchofJesusChrist.org; “Always Remember Him” (video), ChurchofJesusChrist.org.

Juan 13:1–17

Ti Mangisalakan ti pagwadantayo iti napakumbaba a panagserbi iti dadduma.

Iti panawen ni Jesus, ti panangbuggo iti saka ti sabali a tao ket maysa nga aramid para kadagiti katulongan, saan a dagiti lider. Ngem kayat ni Jesus a sabali ti panunoten dagiti disipulona maipapan iti no ania ti kayat a sawen ti mangidaulo ken agserbi. Ania dagiti mensahe a masarakam kadagiti balikas ken tignay ti Mangisalakan iti Juan 13:1–17? Iti kulturayo, mabalin a saan a nakaugalian a wagas iti panagserbi ti panangbuggo iti saka dagiti sabali. Ibilangmo no ania ti maaramidmo tapno masurot ti pagwadan ti Mangisalakan iti napakumbaba a panagserbi.

Mabalin pay a makaay-ayo a makita dagiti banag nga ammo ken narikna ni Jesus kabayatan daytoy sagrado nga oras a kaduana dagiti Apostolna (kitaen dagiti bersikulo 1 ken 3). Ania ti maitulong dagitoy a nalawag a pannakaammo ken pannakaawat tapno maawatam maipapan iti Mangisalakan?

Kitaen met iti Lucas 22:24–27.

Juan 13:34–35

Ti ayatko para iti dadduma ket maysa a pagilasinan a maysaak a pudno a disipulo ni Jesucristo.

Iti nasapsapa, nangted ni Jesus iti maysa a bilin nga “ayatem ti kaarrubam kas iti bagim” (Mateo 22:39). Ita nangted iti “maysa a baro a bilin.” Ania iti panagkunam ti kayat a sawen ti ayatenyo dagiti sabali kas iti panagayat ni Jesus kadakayo? (kitaen iti Juan 13:34).

Mabalinmo pay nga utoben no kasano nga ammo dagiti dadduma a tao a maysaka a disipulo ni Jesucristo. Kasano a masiguradom a ti ayat ti naipangpangruna a kababalinmo kas maysa a Kristiano?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Mateo 26:36–39; Marcos 14:22–25.Ania ti padas ti pamiliam kabayatan ti sakramento iti tunggal lawas? Ti panagbasa maipapan iti umuna a sakramento ket makaparegta iti panaglilinnawag maipapan iti kinapateg ti sakramento ken dagiti wagas a mangpapintas iti padasyo. Ibilang ti panangipakita iti ladawan a Panangiwaras iti Sakramento (Libro ti Arte ti Ebanghelio, num.108) ken panagbibinninglay kadagiti kapanunotan iti tunggal maysa maipapan iti no ania ti maaramidyo kasakbayan, kabayatan, ken kalpasan ti sakramento.

Tulongannatayo ti sakramento a manglagip ken ni Jesucristo.

Mateo 26:30.Ibilangmo iti panangkanta iti maysa a himno, kas iti inaramid ni Jesus ken dagiti Apostolna—nalabit a maysa a himno ti sakramento. Kasano a nagbalin a maysa a bendision ken ni Jesus ken dagiti Apostlona ti panagkanta iti himno iti dayta a panawen? Kasano a bendision dagiti himno kadatayo?

Juan 13:1–17.Mabalin a kayatmo nga ipakita iti pamiliam ti ladawan iti gibus daytoy a balabala bayat ti panagbasam kadagitoy a bersikulo. Ania dagiti kinapudno nga insuro ti Mangisalakan babaen dagiti tignayna? Ania dagiti detalye iti ladawan a mangtulong kadatayo a makaawat kadagitoy a kinapudno? Nalabit a makaibinglay dagiti miembro ti pamilia no kasano a nangyeg kadakuada iti ragsak ti panagbiag kadagitoy a kinapudno (kitaen iti Juan 13:17).

Juan 13:34–35.Kalpasan ti panagbasam kadagitoy a bersikulo, mabalin a pagsasaritaanyo no kasano nga ammo dagiti dadduma a tao a dakayo dagiti disipulo ni Jesucristo. Kasano ti kayat ti Mangisalakan a pannakaam-ammo kadagiti pasurotna? Mabalinmo nga idawat kadagiti miembro ti pamilia a pagsasaritaanda dagiti tao a ti ayatda para iti dadduma mangipakita nga isuda dagiti pudno a disipulo ni Jesucristo. Mabalin a kayatyo pay a paglilinnawagan dagiti wagas a maipakitayo ti ad-adda nga ayat kas maysa a pamilia.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary..

Naisingasing a kanta: “Love One Another,” Children’s Songbook, 136.

Panangpadur-as iti Bukod a Panagadal

Agutob. Addaan dagiti nasantuan a kasuratan kadagiti naespirituan a kaipapanan a mabalin a malibtawantayo no gagangay laeng a basaentayo, kas iti panangbasatayo iti sabali a babasaen a material. Saanka nga agdardaras a mangileppas iti maysa a kapitulo. Maaddaan iti oras nga agpanunot iti nauneg maipapan iti no ania ti basbasaem.

Kaindaklan iti Pagarian, ni J. Kirk Richards