Ti Maikadua a Yaay, ni Harry Anderson

Mayo 22–28

Joseph Smith—Mateo 1; Mateo 24–25; Marcos 12–13; Lucas 21

“Umayto ti Anak ti Tao”

Bayat ti panangibasam iti Joseph Smith—Mateo 1; Mateo 24–25; Marcos 12–13; ken Lucas 21; mabalin a saludsodem, “Ania dagiti mensahe kadagitoy a kapitulo a para kaniak? para iti pamiliak? para iti takemko?”

Isuratmo dagiti Impresionmo

Mabalin a nakita dagiti disipulo ni Jesus a nakaddadanag ti padtona: ti nabisked a templo ti Jerusalem, ti sentro ti espiritual ken kultura dagiti tattao a Judio, ket naan-anay a madadaelto nga “awan[to]” ti mabati . …uray ti bato a naituon ti maysa a bato.” Gagangay a tinarigagayan dagiti disipulo ti mangammo iti ad-adu pay. “Inton kaano a mapasamak dagitoy a banag?”dinamagda. “Ket ania ti pagilasinan ti yaaymo?” (Joseph Smith—Mateo 1:2–4). Naipalgak dagiti sungbat ti Mangisalakan a ti dakkel a pannakadadael nga umay iti Jerusalem—maysa a padto a naipatungpal idi AD 70—ket bassit laeng no maidasig kadagiti pagilasinan ti yaayna kadagiti maudi nga aldaw. Dagiti banag a kasla natibtibker ngem iti templo iti Jerusalem ti mangipaneknekto a temporario—ti init, ti bulan, dagiti bituen, dagiti pagilian, ken ti baybay. Uray pay “madayyegto dagiti bileg ti langit” (Joseph Smith—Mateo 1:33). No naespirituan nga ammotayo, matulongannatayo daytoy a pannakaburibor nga agtalek iti maysa a banag a pudno a manayon. Kas inkari ni Jesus, “mapukawto ti langit ken ti daga; ngem saanto pay la a mapukaw dagiti balikasko. … Ket asino man a mangipateg iti balikasko, saanto a maallilaw” (Joseph Smith—Mateo 1:35,37).

Dagiti Kapanunotan para iti Bukod a Panagadal iti Nasantuan a Kasuratan

Ania ti Joseph Smith—Mateo?

Ti Joseph Smith—Mateo, a masarakan iti perlas a kapatgan, ket ti patarus ni Joseph Smith ti maudi a bersikulo ti Mateo 23 ken amin ti Mateo 24. Dagiti naparegta a rebision ni Joseph Smith ti mangisubli kadagiti napapateg a kinapudno a napukaw. Dagiti bersikulo 12–21 maibasar iti pannakadadael ti Jerusalem idi un-unana; dagiti bersikulo 21–55 naglaon kadagiti padto maipapan kadagiti maudi nga aldaw.

Joseph Smith—Mateo 1:21–37; Marcos 13:21–37; Lucas 21:25–38

Dagiti padto maipapan iti Maikadua a Yaay ti Mangisalakan ti makatulong kaniak a mangsango iti masakbayan nga addaan iti pammati.

Mabalin a nakaddadanag ti mangbasa iti maipapan kadagiti paspasamak a maiturong iti Maikadua a Yaay ti Mangisalakan. Ngem idi impadto ni Jesus dagitoy a pasamak, imbagana kadagiti disipulona a “saankayo a mariribukan” (Joseph Smith—Mateo 1:23). Kasano a mabalin a “saan[ka] a mariribukan” no mangngegyo ti maipapan kadagiti ginggined, gubat, pangallilaw, ken panagbisin? Panunotem maipapan iti daytoy a saludsod bayat ti panangbasam kadagitoy a bersikulo. Markaam wenno isuratmo ti ania man a makapanamnama a balakad a masarakam.

Kitaen met iti Gospel Topics, “Second Coming of Jesus Christ,” topics.ChurchofJesusChrist.org.

Joseph Smith—Mateo 1:26–27, 38–55; Mateo 25:1–13; Lucas 21:29–36

Nasken a nakasaganaak a kanayon para iti Maikadua a Yaay ti Mangisalakan

Saan nga impalgak ti Dios “ti aldaw wenno oras a yaay ti Anak ti tao” (Mateo 25:13). Ngem dina kayat dayta nga aldaw nga umay kadatayo a “kellaat” (Lucas 21:34), isu a nangted kadatayo iti balakad maipapan iti no kasano ti agsagana.

Bayat ti panangbasam kadagitoy a bersikulo, mangilasin kadagiti pangngarig ken dadduma pay a panangidilig nga inusar ti Mangisalakan a pangisuro kadatayo a kanayon a nakasagana para iti Maikadua a Yaayna. Ania ti masursurom manipud kadakuada? Ania ti nakaparegtaam nga aramidem?

Mabalin a kayatmo pay nga ibilang no kasano a kayat ti Mangisalakan ti panangtulongmo a mangisagana iti lubong para iti Maikadua a Yaayna. Ania ti mariknam a kayat a sawen ti agbalin a nakasagana nga umawat iti Mangisalakan no umay? Ti mensahe ni Elder D. Todd Christofferson “Preparing for the Lord’s Return” (Liahona, Mayo 2019, 81–84) ti makatulong kenka a mangutob iti daytoy.

Kitaen met iti Russell M. Nelson, “Embrace the Future with Faith,” Liahona, Nob. 2020, 73–76.

Mateo 25:14–30

Namnamaen ti Nailangitan nga Ama nga usarek a nainsiriban dagiti sagutna.

Iti pangngarig ti Mangisalakan, ti maysa a “talento” ket maitudo iti kuarta. Ngem mabalin a guyugoyennatayo ti pangngarig dagiti talento a mangutob no kasano ti panangusartayo iti ania man kadagiti bendisiontayo, saan laeng a kuarta. Bayat ti panangbasam iti daytoy a pangngarig, mabalinmo nga ilista ti sumagmamano kadagiti bendision ken pagrebbengan nga intalek ti Nailangitan nga Ama kenka. Ania ti namnamaenna kenka a mangaramid kadagitoy a bendision? Kasano a mausarmo dagitoy a sagut nga ad-adda a nainsiriban?

Mateo 25:31–46

No agserbiak kadagiti dadduma, agserserbiak iti Dios.

No pinanunotmon no kasano a kednganto ti Apo ti biagmo, basaem ti pangngarig maipapan iti karnero ken dagiti kalding. Apay iti panagkunam a ti panangaywan kadagiti agkasapulan mangtulong a mangisagana kenka nga “agtawid iti pagarian” ti Dios?

Kasano a maipada daytoy a pangngarig iti dadduma pay a dua iti Mateo 25? Ania dagiti mensahe nga agpapada nga adda iti tallo?

(Kitaen met iti Mosiah 9:17; 5:13.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Joseph Smith—Mateo.Tapno matulongan ti pamiliam nga agsukisok iti daytoy a kapitulo, awisem ida a mangsapul kadagiti pannursuro ti Mangisalakan maipapan iti no kasano a makapagsaganatayo para iti Maikadua a Yaayna (kitaen, kas pagarigan, dagiti bersikulo 22–23, 29–30, 37, 46–48). Ania ti maaramidtayo tapno masurot daytoy a balakad? Mabalin a magustuan ti pamiliam ti panangkanta iti “When He Comes Again” (Children’s Songbook, 82–83) ken panagdrowing kadagiti ladawan ti no ania ti maarapaapda a kayarigan ti Maikadua a Yaay ti Mangisalakan.

Joseph Smith—Mateo 1:22, 37.Ania ti kayat a sawen ti mangipateg iti balikas ti Dios? Kasano a maaramidtayo daytoy a bukod ken kas maysa a pamilia? Kasano a ti panangaramid iti kasta ket makatulong kadatayo a mangliklik iti pannakaallilaw?

Mateo 25:1–13.Mabalinmo nga usaren ti ladawan dagiti sangapulo a babbalasang a nairagpin iti daytoy a balabala a mangilawlawag iti Mateo 25:1–13. Ania dagiti detalye a makitatayo iti ladawan a nailadawan kadagitoy a bersikulo?

Mabalinmo ti manggetteng iti papel iti sukog ti tedted ti lana ket ilemmengmo dagiti tedted iti lawlaw ti pagtaenganyo. Mabalinmo nga isingdan dagiti tedted iti banag kas iti nasantuan a kasuratan wenno ladawan ti templo. No masarakan ti pamilia dagiti tedted, mabalinmo nga ilawlawag no kasano a matulongannatayo dagitoy a banag nga agsagana para iti Maikadua a Yaay.

Marcos 12:38–44; Lucas 21:1–4.Ania ti isuro dagitoy a bersikulo maipapan iti no kasano ti panangkita ti Mangisalakan kadagiti datontayo? Ipakitam iti pamiliam no kasano ti agbayad iti apagkapullo ken daton iti Apo. Kasano a makatulong dagitoy a daton a mangbangon iti pagarian ti Dios? Ania dagiti dadduma pay a wagas a mabalintayo nga idaton ti “amin nga [adda kadatayo]” iti Apo? (Marcos 12:44).

Ti Sentimo ti Balo a Babai, ni Sandra Rast

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “When He Comes Again,” Children’s Songbook, 82–83.

Panangpadur-as iti Bukod a Panagadal

Isaganam dagiti aglawlawmo. “Nalaus a makaapekto dagiti aglawlawtayo iti kabaelantayo nga agsursuro ken mangrikna iti kinapudno” (Panangisuro iti Wagas ti Mangisalakan,15). Padasem ti mangsapul iti maysa a lugar a pagadalan kadagiti nasantuan a kasuratan a mangawisto iti impluensia ti Espiritu Santo. Mabalin pay a mangawis iti Espiritu ti makaparegta a musika ken dagiti ladawan.

Lima Kadakuada ti Masirib, ni Walter Rane