Ti Nayaw-awan nga Anak,, ni Liz Lemon Swindle

Mayo 1–7

Lucas 12–17; Juan 11

“Makipagrag-okayo Kaniak; gapu ta Nabirokak ti Napukaw a Karnerok”

Bayat ti panangbasam iti Lucas 12–17 ken Juan 11, nainkararagan a sukisokem no ania ti kayat ti Nailangitan nga Ama nga ammuem ken aramidem. Ti panagadalmo kadagitoy a kapitulo ti mabalin a manglukat iti pusom kadagiti mensahe a nairanta a para laeng kenka.

Isuratmo dagiti Impresionmo

Iti kaaduan a kasasaad, 99 iti 100 ti maibilang a kasayaatan—ngem saan no ibagi dagiti kasta a bilang dagiti maipatpateg nga annak ti Dios (kitaen iti Doktrina ken Katulagan 18:10). Iti dayta a kasasaad, maikari uray ti maymaysa a kararua iti naannad, napasnek a panagsapsapul “agingga [a] masarakan[tayo] daytoy” (Lucas 15:4), kas iti panangisuro ti Mangisalakan iti pangngarig maipapan iti napukaw a karnero. Kalpasanna mabalin nga irugi ti panagragrag-o, ta “ad-addanto ragsak sadi langit gapu iti maysa a managbasol nga agbabawi, ngem kadagiti siam-a-pulo-ket-siam a nasingpet a tao, a dida masapul ti panagbabawi” (Lucas 15:7). No kasla saan a nainkalintegan dayta, makatulong no lagipen nga, iti kinapudno, awan ti saan a “makasapul iti panagbabawi.” Kasapulantayo amin ti pannakaispal. Ken mabalintayo amin ti makiraman iti panagispal, sangkamaysa nga agragrag-o iti tunggal kararua a naisalakan (kitaen ti Doktrina ken Katulagan 18:15–16).

Dagiti Kapanunotan para iti Bukod a Panagadal iti Nasantuan a Kasuratan

Lucas 12; 14–16

Mabendisionannak no ipamaysak ti pusok kadagiti agnanayon a banag.

Apay a kuna ti Dios ti “Nakunengka” iti maysa a nagaget, naballigian a lalaki a nangbangon iti dakkel a kamaligna ken pinunnona daytoy iti bungbunga dagiti nagbannoganna? (Kitaen iti Lucas 12:16–21). Kadagitoy a kapitulo iti Lucas, isuro ti Mangisalakan dagiti sumagmamano a pangngarig a makatulong kadatayo a mangitalimudok iti panagkitatayo iti labes dagiti nailubongan para iti agnanayon. Sumagmamano kadagitoy a pangngarig ti nailista ditoy. Kasano a gupgopem ti mensahe ti tunggal maysa? Ania iti panagkunam nga ibagbaga ti Apo kenka?

• Ti nakuneng a baknang a lalaki (Lucas 12:13–21)

• Ti dakkel a pangrabii (Lucas 14:12–24)

• Ti nayaw-awan nga anak (Lucas 15:11–32)

• Ti di mapagtalkan a mayordomo (Lucas 16:1–12)

• Ti nabaknang a lalaki ken ni Lazaro (Lucas 16:19–31)

Kitaen met iti Mateo 6:19–34; 2 Nephi 9:30; Doktrina ken Katulagan 25:10.

Lucas 15

Agragrag-o ti Nailangitan nga Ama no masarakan dagita a napukaw.

Bayat ti panangbasam kadagiti pangngarig nga insuro ni Jesus iti Lucas 15, maipapan iti marikna ti Nailangitan nga Ama maipapan kadagita a nagbasol wenno “napukaw”? Kasano ti marikna ti maysa a nasepirituan a lider—wenno asino man kadatayo—kadakuada? Panunotem no kasano koma a sinungbatan dagiti Fariseo ken escriba dagitoy a saludsod (kitaen iti Lucas 15:1–2). Masarakan ti sungbat ni Jesus iti tallo a pangngarig iti Lucas 15. Bayat ti panangbasam, panunotem no ania ti insursuro ni Jesus kadagiti escriba ken Fariseo nga inusarna dagitoy a pangngarig.

Mabalin pay nga ibilangmo ti panangilista kadagiti pagpapadaan ken paggigidiatan dagiti pangngarig. Kas pagarigan, mabalinmo a sapulen no ania ti napukaw iti tunggal pangngarig ken apay a napukaw, kasano a nasarakan daytoy, ken kasano ti reaksion dagiti tao idi nasarakan daytoy. Ania dagiti adda a mensahe ni Jesus kadagiti “napukaw”—agraman kadagiti saan a mangipagarup nga isuda ket napukaw? Ania dagiti adda a mensahe ni Jesus kadagiti tao nga agsapsapul kadagiti napukaw?

Kitaen met iti Doktrina ken Katulagan 18:10–16; Jeffrey R. Holland, “The Other Prodigal,” Ensign, Mayo 2002, 62–64.

Ti Napukaw a Pedaso ti Pirak, ni James Tissot

Lucas 16:1–12

Ania ti isursuro ni Cristo iti pangngarig maipapan iti mayordomo a di mapagtalkan?

Inlawlawag ni Elder James E. Talmage ti maysa nga adalen a masursurotayo manipud iti pangngarig: “Agbalinkayo a napasnek; agsipud ta asidegen a mapasamak ti aldaw a mabalinyo nga usaren dagiti naindagaan a kinabaknangyo. Agsursurokayo uray manipud kadagiti ulbod ken dakes; no naannadda unay a mangipaay para iti kakaisuna a masakbayan a panunotenda, anianto ket kadakayon, a mamati iti agnanayon a masakbayan, mangipaaykayo ngarud! No saanyo a nasursuro ti kinasirib ken kinaannad a mangusar iti ‘saan a pudno a kinabaknang,’ kasano a mapagtalkanka iti ad-adu pay a manayon a kinabaknang?” (Ni Jesus a Cristo [1916], 464). Ania dagiti dadduma pay nga adalen a masarakam iti daytoy a pangngarig?

Lucas 17:11–19

Ti panagyamanko kadagiti bendision ti mangyasidegto nga ad-adda kaniak iti Dios.

No maysaka koma kadagiti sangapulo nga agkukutel, iti panagkunam agsublika ngata tapno agyaman iti Mangisalakan? Ania dagiti nayon a bendision a naawat ti managyaman nga agkukutel gapu ta nangted iti panagyaman?

Mabalinmo met nga utoben dagiti balikas ti Mangisalakan, “Ti pammatim pinaimbagnaka” (bersikulo 19). Iti opinionmo, kasano nga agkanaig ti panagyaman ken pammati? Kasano a matulongannatayo ti agpada nga agbalin a maimbagan? Ti video ni “Presidente Russell M. Nelson iti Healing Power of Gratitude” (ChurchofJesusChrist.org) makatulong kenka a mangutob kadagitoy a saludsod.

Kitaen met iti Dale G. Renlund, “Consider the Goodness and Greatness of God,” Liahona, Mayo 2020, 41–44.

Juan 11:1–46

Ni Jesucristo ti Panagungar ken ti Biag.

Ti milagro ti panangpagungar ken ni Lazaro manipud kadagiti natay ket maysa a nabileg ken di mailibak a pammaneknek a ni Jesus ti pudno nga ti Anak ti Dios ken ti naikari a Mesias. Ania dagiti balikas, ragup ti balikas, wenno detalye iti Juan 11:1–46 a mangpapigsa iti pammatim a ni Jesucristo “ti panagungar, ken ti biag”? Ania ti kayat a sawen kenka a ni Jesus isu “ti panangungar, ken ti biag”?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Lucas 15:1–10.Maawatan ngata dagiti miembro ti pamiliam no ania ti rikna ti mapukawan iti maysa a banag—wenno mapukaw? No pagsasaritaan ti maipapan kadagiti padasda ket mabalin a mangirugi iti panaglilinnawag maipapan kadagiti pangngarig ti napukaw a karnero ken ti napukaw a sensilio. Wenno mabalinyo ti agay-ayam iti maysa nga ay-ayam a paglemmengen ti maysa a tao ken padasen dagiti dadduma pay a miembro ti pamilia ti mangsapul kenkuana. Kasano a makatulong kadatayo daytoy nga aktibidad a makaawat kadagitoy a pangngarig?

Lucas 15:11–32.Kasano a makapagbalintayo a kas iti ama iti daytoy nga estoria no addaantayo kadagiti ipatpateg a napukaw? Ania ti masursurotayo manipud iti padas ti inauna nga anak a lalaki a makatulong kadatayo nga ad-adda nga agbalin a kas ken Cristo? Iti ania a wagwagas a maipada ti ama iti daytoy a pangngarig iti Nailangitan nga Amatayo?

Lucas 17:11–19Tapno makatulong kadagiti miembro ti pamilia a mangyaplikar iti pakaammuan maipapan iti sangapulo nga agkukutel, mabalinmo nga awisen ida nga agsurat kadagiti nalimed a surat ti panagyaman para iti tunggal maysa. Mabalin pay nga aggigiddan a kantaenyo ti “Count Your Blessings,”” (Hymns, no.241) ket bilangen dagiti bendision a naawat ti pamiliam.

Juan 11:1–46.Mabalin a buyaen dagiti miembro ti pamilia ti video a “Lazarus Is Raised from the Dead” (ChurchofJesusChrist.org) ken ibinglayda dagiti pammaneknekda maipapan ken ni Jesucristo.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a himno: “Dear to the Heart of the Shepherd,” Hymns, no. 221.

Panangpadur-as iti Panangisurotayo

Agusar kadagiti estoria ken pagarigan a mangisuro kadagiti pagbatayan ti ebanghelio. Masansan a mangisuro ti Mangisalakan maipapan kadagiti pagbatayan ti ebanghelio babaen ti panangusar kadagiti estoria ken pangngarig. Mangpanunot kadagiti pagarigan ken estoria manipud iti bukodmo a biag a mamagbalin iti maysa a pagbatayan ti ebanghelio a maar-aramat para iti pamiliam (kitaen iti Panangisuro iti Wagas Mangisalakan, 22).

Sadino ti Ayan dagiti Siam, ni Liz Lemon Swindle