Dika Ikondena, ni Eva Koleva Timothy

Abril 24–30

Juan 7–10

“Siak ti Naimbag a Pastor”

Bayat ti panangbasam iti Juan 7–10, mabalinmo a maawat dagiti impresion manipud iti Espiritu Santo maipapan kadagiti pagbatayan a mainaig iti doktrina kadagitoy a kapitulo. Ti panangisuratmo kadagiti impresion makatulong kenka nga agaramid iti plano nga agtignay a mayannurot kadagitoy.

Isuratmo dagiti Impresionmo

Nupay immay ni Jesucristo a mangisangbay iti “talna [ken] naimbag a nakem kadagiti tattao” (Lucas 2:14), adda napataud a “panagsusupadi dagiti adu a tao gapu kenkuana.” (Juan 7:43). Immay dagiti tao a nakasaksi kadagiti isu met laeng a pasamak iti naidumduma unay a panangipapan maipapan iti kinasiasino ni Jesus. Adda dagiti nagkuna, “Isu ket naimbag a tao,” idinto a kinuna met dagiti dadduma, “Inallilawna dagiti tao” (Juan 7:12). Idi pinaimbagna ti maysa a bulsek a lalaki iti Aldaw a Panaginana, adda dagiti nangipapilit, “Saan a naggapu iti Dios daytoy a tao, ta saanna a ngilinen ti aldaw a panaginana,” kinuna met ti dadduma, “Kasano ti pannakabalin ti maysa a managbasol nga agaramid kadagiti kakasta a milagro?” (Juan 9:16.) Ngem iti baet ti amin a pannakatikaw, mailasin dagiti agsapsapul iti kinapudno ti pannakabalin kadagiti balikasna gapu ta, “uray kaano man awan ti tao a nagsao iti kastoy” (Juan 7:46). Idi kiniddaw dagiti Judio ken ni Jesus nga “ibagam kadakami a silalawag” no isu met la ti Cristo, impalgakna ti maysa a prinsipio a makatulong kadatayo a mangilasin iti kinapudno manipud iti biddut: “Denggen dagiti karnerok ti timekko,” kinunana, “ket am-ammok ida, ken surotendak” (Juan 10:24, 27).

Dagiti Kapanunotan para iti Bukod a Panagadal iti Nasantuan a Kasuratan

Juan 7:14–17

Bayat ti panangibiagko kadagiti kinapudno nga insuro ni Jesucristo, maammuakto a pudno dagitoy.

Nasdaaw dagiti Judio iti kaadu unay ti ammo ni Jesus, idinto nga Isu ket saan a nagadal (kitaen iti bersikulo 15)—uray bassit laeng, iti wagas a saan a pamiliar kadakuada. Kas sungbat ni Jesus, insurona ti maysa a sabali a wagas iti panangammo iti kinapudno a sidadaan a gun-oden ti tunggal maysa, ania man ti edukasion wenno nagtaudan. Segun iti Juan 7:14–17, kasano a maammuanyo a pudno ti doktrina nga insuro ni Jesus? Kasano a nakatulong kenka daytoy a proseso a mapadur-as ti pammaneknekmo maipapan iti ebanghelio?

Juan 8:2–11

Sidadaan a gun-oden ti amin ti asi ti Mangisalakan.

Idi agsarsarita maipapan iti pannakipulapol ti Mangisalakan iti babai a naidatag iti pannakiabig, kinuna ni Elder Dale G. Renlund : “Awan duadua a saan a kinanunongan ti Mangisalakan ti pannakiabig. Ngem saanna met a kinondena ti babai. Inallukoyna isuna a mangbalbaliw iti biagna. Naguyugoy isuna nga agbalbaliw gapu iti ayat ken asina. Paneknekan ti Patarus ti Joseph Smith iti Biblia a daytoy ti resulta wenno bunga ti kinadisipulona: ‘Ket dinaydayaw ti babai ti Dios manipud iti dayta nga oras, ken namati iti naganna’ [kitaen iti Juan 8:11, footnote c]” (“Our Good Shepherd,” Liahona, Mayo 2017, 30).

Kaano ti pannakariknam a kas iti babai, nga umaw-awat iti asi imbes a panangkondena manipud iti Mangisalakan? Kaano a nagbalinka a kas kadagiti escriba ken Fariseo, a mangpabpabasol wenno mangkedkedngan kadagiti dadduma uray no awananka iti basol? (kitaen iti Juan 8:7). Ania pay ti masursurom manipud iti wagas a pannakipulapol ti Mangisalakan kadagiti escriba ken Fariseo ken iti babai a naduktalan iti pannakiabig? Ania ti masursurom maipapan iti panangpakawan ti Mangisalakan kabayatan ti panangbasam kadagitoy a bersikulo?

Kitaen met iti “Go and Sin No More” (video), ChurchofJesusChrist.org.

Juan 9

No adda pammatitayo, maiparangarang ti Dios ti Bagina kadagiti panagsagabatayo.

Ania ti isuro ti Juan 9:1–3 maipapan kadagiti karit ken panagsagaba iti biag? Bayat ti panangbasam iti Juan 9, utobem no kasano a “naiparangarang dagiti aramid ti Dios” iti biag ti lalaki a nayanak a bulsek. Kasano ti pannakaiparangarang dagitoy iti biagmo—agraman dagiti panagsagabam?

Juan 10:1–30

Ni Jesucristo ti Naimbag a Pastor.

Uray no saanka a pamiliar iti karnero wenno panangpastor, ti panagbasa iti Juan 10, a nagkunaan ti Mangisalakan, “Siak ti naimbag a pastor,” makaisuro kenka kadagiti napapateg a kinapudno maipapan Kenkuana. Tapno masarakan dagitoy a kinapudno, sapulen dagiti ragup ti balikas a mangiladawan no ania kayarigan ti naimbag a pastor ket kalpasanna ibilang no kasano a mayaplikar dagita a ragup ti balikas iti Mangisalakan. Iti baba dagiti sumagmamano a pagarigan:

• Bersikulo 3: “Inawaganna dagiti bukodna a karnero iti nagan, ket inturongna ida.”

• Bersikulo 11: Isu “ipaayna ti biagna para kadagiti karnero.”

• Bersikulo 16: “Addanto maymaysa nga ikub, ken maysa a pastor.”

Adtoy ti sumagmamano a nayon a saludsod a mangtulong kenka a mangutob iti daytoy a kapitulo: Kasano a maipada iti maysa a ridaw ni Jesus? (kitaen dagiti bersikulo 7–9). Kasano nga inikkannaka iti “biag … a nawadwadwad”? (bersikulo 10). Kaano a nariknam nga am-ammonaka a personal? (kitaen iti bersikulo 14). Kasano a mabigbigmo ti timek ti Naimbag a Pastor? (kitaen iti bersikulo 27?

Kitaen met iti Salmo 23; Ezequiel 34; Alma 5:37–39; 3 Nephi 15:21–16:5; Gerrit W. Gong, “Good Shepherd, Lamb of God,” Liahona, Mayo 2019, 97–101.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Juan 7:24.Tapno matulongan ti pamiliam a makaawat iti pannursuro ni Jesus iti Juan 7:24, mabalinmo nga ipakita kadakuada ti maysa a banag a makita nga agpada iti ruarna ngem sabali iti unegna. Nalabit a mabalin nga ibinglay dagiti miembro ti pamilia dagiti padas a mangisuro kadakuada a saan a manghusga babaen dagiti akinruar a langa. Mabalinmo pay nga ilista dagiti kababalin ti tunggal miembro ti pamilia a saan a makita ti mata (kitaen met iti 1 Samuel 16:7; Thomas S. Monson, “See Others as They May Become,” Liahona, Nob. 2012, 68–71).

Juan 8:31–36.Ania ti kaipapanan ti agbalin a maysa nga “adipen ti basol”? (kitaen met iti Moroni 7:11). Ania dagiti kinapudno nga insuro ni Jesus a makapagbalin kadatayo a nawaya?

Ni Jesus a Mangag-agas iti Bulsek, ni Carl Heinrich Bloch

Juan 9.Kasano a matulongam ti pamiliam a mangiladawan iti panunotda ti pakaammuan maipapan iti panangagas ni Jesus iti bulsek a lalaki iti Juan 9 Mabalinyo a yakem ti estoria wenno ipakita ti video “Jesus Heals a Man Born Blind” (ChurchofJesusChrist.org). Isardeng sagpaminsan ti estoria tapno mabasa dagiti miembro ti pamilia dagiti maitutop a bersikulo manipud iti Juan 9. Awisem ida a mangisurat kadagiti uray ania nga adalen a masursuroda manipud iti pakaammuan, a kas iti no ania ti kaipapanan ti agbalin a napasurot iti ebanghelio ni Jesucristo.

Juan 10:1–18, 27–29.Tapno mairaman dagiti miembro ti pamilia iti panagsursuro manipud iti pangngarig maipapan iti naimbag a pastor, idawatmo iti tunggal maysa kadakuada a mangidrowing iti ladawan ti maysa kadagiti sumaganad: maysa a mannanakaw, maysa a ridaw, maysa a pastor, maysa a babaonen (matangdanan a trabahador), maysa a lobo, ken maysa a karnero. Awisem ida a mangbasa iti Juan 10:1–18, 27–29, ket kalpasanna paglilinnawagan kas maysa a pamilia no ania ti insuro ti Mangisalakan maipapan kadagiti banag nga indrowingda.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a himno: “The Lord Is My Shepherd,” Hymns, no. 108

Panangpadur-as iti Bukod a Panagadal

Sapulem dagiti makaparegta a balikas ken ragup ti balikas. Bayat ti panangbasam, mabalin a mangisangbay ti Espiritu iti sumagmamano a balikas wenno ragup ti balikas iti imatangmo tapno mangparegta ken mangguyugoy kenka wenno kasla maisurat a para laeng kenka. Ibilangmo ti panangisurat kadagiti ania man a balikas wenno ragup ti balikas a mangparegta kenka iti Juan 7–10.

Saanton a Mapukaw,, ni Greg K. Olsen