“Abril 17–23. Mateo 18; Lucas 10: ‘Anianto ti Aramidek Tapno Matawidko ti Biag nga Agnanayon?,’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2023 (2022)
“Abril 17–23. Mateo 18; Lucas 10,” Umaykayo, Sumurot Kaniak—Para kadagiti Indibidual ken Pamilia: 2023
Ti Naimbag a Samaritano,, ni Dan Burr
Abril 17–23
Mateo 18; Lucas 10
“Anianto ti Aramidek Tapno Matawidko ti Biag nga Agnanayon?”
Bayat ti sikakararag a panagbasam ken panagutobmo iti Mateo 18 ken Lucas 10, ikasom dagiti naalumamay a parikna ti Espiritu Santo. Ibagananto kenka no kasano a mayaplikar dagitoy a pannursuro ken estoria kenka. Isuratmo dagiti impresion a maawatmo.
Isuratmo dagiti Impresionmo
No agdamagka iti Apo iti maysa a saludsod, mabalin a makaawatka iti sungbat a dimo ninamnama. Asino ti kaarrubak? Asino man nga agkasapulan iti tulong ken ayatmo. Asino ti kadakkelan idiay pagarian ti langit? Maysa nga ubing. Umdas kadin a pakawanen ti nakabasol iti maminpito a daras? Saan, nasken a mamakawanka iti maminpitopulo-ket-pito a daras. (Kitaen iti Lucas 10:29–37; Mateo 18:4, 21–22.) Dagiti di ninamnama a sungbat manipud iti Apo ti mabalin a mangawis kadatayo a mangbalbaliw iti wagas a panagpanunot, panagrikna, ken panagtignaytayo. No kalikagumamto a gun-oden ti pagayatan ti Apo gapu ta talaga a kayatmo ti makasursuro manipud Kenkuana, isuronakanto ti Apo no kasano ti agbiag iti maysa a wagas a mangiturong iti agnanayon a biag Kenkuana.
Dagiti Kapanunotan para iti Bukod a Panagadal iti Nasantuan a Kasuratan
Masapulko ti mangpakawan kadagiti dadduma no nasken nga umawatak iti pammakawan manipud iti Apo.
Ti singasing ni Pedro a mabalinna a pakawanen ti maysa a tao iti maminpito ket mabalin a kasla managparabur unay, ngem insuro ni Jesus ti maysa a nangatngato a linteg. Ti sungbatna, “Saanko a kuna kadakayo, Agingga iti mamimpito: ngem, Agingga iti mamimpitupulo-ket-pito” (bersikulo 22), ket mangisursuro saan a maipapan kadagiti numero ngem ketdi maipapan iti panangpadur-as iiti galad a kas ken ni Cristo maipapan iti panagpakawan. Bayat ti panangbasam iti pangngarig ti awan asina nga adipen, utobem dagiti panawen idi nariknam ti panangngaasi ken pannakipagrikna ti Dios. Adda kadi maysa a tao nga agkasapulan ti pannakarikna ti asi ken pannakipagrikna manipud kenka?
Inted ni Elder David E. Sorensen daytoy napateg a pammallaag: “Nupay nasken a pakawanentayo ti maysa a kaarruba a nangdangran kadatayo, nasken nga agtrabahotayo latta a nasayyat tapno maliklikan dayta a pannakadangran iti pannakaulit. … Ti panangpakawan saan nga agkasapulan nga awaten wenno kanunongantayo ti dakes. … Ngem no lumabantayo a maibusor iti basol, nasken a ditayo palugodan ti gura wenno pungtot a mangkontrol kadagiti pampanunot wenno tignaytayo” (“Forgiveness Will Change Bitterness to Love,” Liahona, Mayo 2003, 12).
Asino dagiti Pitupulo?
Ti panangsurot iti maysa a pagtuladan a naipasdek kadagiti panawen ti Daan a Tulag (kitaen iti Exodo 24:1; Dagiti Numero 11:16), ni Jesucristo “nangtuding iti sabali pay a pitopulo,” kas nayon iti Sangapulo-ket-dua nga Apostolna, tapno mangsaksi Kenkuana, mangikasaba Iti ebangheliona, ken tumulong Kenkuana iti aramidna. Agtultuloy daytoy a pagtuladan iti naisubli a Simbaan. Maawagan dagiti Pitopulo a mangtarabay iti Sangapulo-ket-dua iti misionda kas naisangsangayan a saksi ni Jesucristo iti intero a lubong.
Kitaen met iti Doktrina ken Katulagan 107:25–26, 33–34, 97.
Tapno magun-od ti agnanayon a biag, nasken nga ayatek ti Dios ken ayatek ti kaarrubak a kas iti bagik.
Makatulong a manglagip a ti pangngarig maipapan iti naimbag a Samaritano ket ti wagas a panangsungbat ni Jesus iti dua a saludsod: “Ania ti aramidek tapno matawidko ti biag nga agnanayon?” ken ti “Asino ti kaarrubak?” (Lucas 10:25, 29). Bayat ti panangbasam iti daytoy a pangngarig, laglapipem dagitoy a saludsod. Ania dagiti sungbat a masarakam?
Idi panawen ni Jesus, ti sinnupanget iti nagbaetan dagiti Judio ken Samaritano ket nagpaut iti adu a siglo. Dagiti Samaritano ket kaputotan dagiti Judio nga agnanaed iti Samaria a nakiasawa kadagiti Gentil. Narikna dagiti Judio a nagbalin a dakes dagiti Samaritano gapu iti pannakipulapolda kadagiti Gentil ken timmallikudda iti kinapudno. Nagbaniaga dagiti Judio iti adu a milia iti ruar ti dalanda tapno maliklikanda ti pananglabas iti Samaria. (Kitaen met iti Lucas 9:52–54; 17:11–18; Juan 4:9; 8:48.)
Apay iti panagkunam a pinili ti Mangisalakan ti maysa a Samaritano, maysa a tao a kagurgura dagiti Judio, kas maysa a pagwadan ti panangngaasi ken panagayat iti kaarruba ti maysa a tao? Ania ti iparegta nga aramidem daytoy a pangngarig?
Kitaen met iti Mosiah 2:17; “Parable of the Good Samaritan” ken “A Good Samaritan” (videos), ChurchofJesusChrist.org.
Pilientayo “dayta nasayaat a paset” babaen ti panagaramid kadagiti inaldaw a pili a mangiturong iti agnanayon a biag.
Iti Lucas 10:38–42, sidudungngo nga inawis ni Jesus ni Marta a mangpanunot iti sabali maipapan iti wagas a panangbubosna iti orasna. Kalpasan ti panangadawna kadagitoy a bersikulo, insuro ni Sister Carol F. McConkie: “No agbalintayo a nasantuan, nasken a sursuruentayo ti agtugaw iti sakaanana ti maysa a Nasantuan ti Israel ket mangted iti oras iti kinasantuan. Ipaknitayo kadi ti telepono, ti awan gibusna a listaan ti aramiden, ken dagiti pakaseknan ti kinainlubongan? Ti panagkararag, panagadal, ken panagtungpal iti balikas ti Dios ti mangyawis iti pangdalus ken pangpaimbag nga ayatna iti kararuatayo. Maaddaantayo koma iti panawen nga agbalin a nasantuan, tapno mapunnotayo iti sagrado ken mangpaspasanto nga Espirituna” (“The Beauty of Holiness,” Liahona, Mayo 2017, 11). Mabalin a kayatmo nga amirisen no kasano a bubosem ti orasmo—uray kadagiti nasayaat a banag. Adda kadi maysa a banag nga ad-adda a “kasapulan” (bersikulo 42) nga ad-adda a maikari iti atensionmo?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Mateo 18:1–11.Apay a kayat ni Jesus nga agbalintayo a kas maysa a bassit nga ubing? Ania dagiti kababalin nga adda kadagiti ubbing a mabalintayo a padur-asen tapno agbalin nga ad-adda a kas ken ni Cristo? (kitaen iti Mosiah 3:19).
Kayat ni Jesus nga agbalin dagiti disipulona a kas babassit nga ubbing.
-
Mateo 18:15.Kasano a mayaplikartayo ti balakad iti Mateo 18:15 kadagiti pannakipulapoltayo kas sangapamiliaan? Kasano a mangbendision iti pamiliatayo ti panangaramid iti daytoy?
-
Mateo 18:21–35.Ania ti isuro kadatayo daytoy a pangngarig maipapan ken ni Jesucristo? Ania ti isuro kadatayo daytoy maipapan ti no kasano ti mangtrato kadagiti dadduma?
-
Lucas 10:25–37.Mabalin a magustuan dagiti miembro ti pamilia ti agaruat iti costume ket mangyakem iti daytoy a pangngarig? Kasano a maipadatayo no dadduma kadagiti nadumaduma a tattao iti pangngarig? Kasano a maipada ti Mangisalakan iti naimbag a Samaritano? Kasano a makapagbalintayo a kas iti naimbag a Samaritano?
Mabalinmo nga ibilang ti aggigiddan a panangkanta iti maysa a himno wenno kanta dagiti ubbing a mangsuporta kadagiti kinapudno iti daytoy a pangngarig. Maysa a pagarigan ti “Lord, I Would Follow Thee” (Hymns, no. 220), ngem adu dagiti dadduma pay. Mabalin a magustuan dagiti miembro ti pamilia ti panangsapul iti maysa a himno wenno kanta ken panangilawlawag no kasano a mainaig daytoy iti pangngarig.
-
Lucas 10:38–42.Narigat kadi latta nga iraman dagiti naespirituan a bambanag iti iskediul ti pamiliam? Maparegta ti estoria da Maria ken Marta ti maysa a family council wenno home evening maipapan iti no kasano nga aramiden daytoy a nasaysayaat. Kas maysa a pamilia, mabalin nga agaramidkayo iti listaan dagiti wagas a pagpilian iti “dayta nasayaat a paset” (Lucas 10:42).
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “Jesus Said Love Everyone,” Children’s Songbook, 61.
Panangpadur-as iti Panangisurotayo
Mangpatanor iti maysa a naayat nga aglawlaw. Ti wagas a pakariknaan ken pakatratuan dagiti miembro ti pamilia ket nalaus a makaimpluensia iti espiritu iti pagtaenganyo. Tulongam amin dagiti miembro ti pamilia nga aramidenda ti pagrebbenganda a mangipasdek iti naayat, madaydayaw a pagtaengan tapno mariknanto ti tunggal maysa a natalged a mangibinglay kadagiti padas, saludsod, ken pammaneknek. (Kitaen iti Panangisuro iti Wagas ti Mangisalakan, 15.)
Ni Cristo iti Pagtaengan da Maria ken Marta,, ni Walter Rane