Ni Jesus a magmamagna a kaduana dagiti disipulona a nakabaklay kadagiti basket ti tinapay

Marso 27–Abril 2

Mateo 14; Marcos 6; Juan 5–6

“Dikayo Agbuteng”

Bayat ti panangbasam iti Mateo 14; Marcos 6; ken Juan 5–6; sapulem dagiti kinapudno a napnuan kaipapanan kenka. Mabalinmo a damagen iti bagim dagiti saludsod a kas iti “Kasano a mainaig kaniak dagiti pakaammuan kadagitoy a kapitulo?” “Ania dagiti mensahe a sapulek para iti biagko?” wenno “Ania ti kayatko nga ibinglay iti pamiliak wenno kadagiti dadduma?”

Isuratmo dagiti Impresionmo

Ania koma ti nangparegta ken ni Pedro a mangpanaw iti kinatalged ti bilogna iti tengnga ti Baybay ti Galilea kabayatan ti maysa a narungsot a bagyo? Ania ti nangiturong kenkuana a mamati a no makapagna ni Jesus iti rabaw ti danum, kabaelanna met? Awan duadua a ditayo maammuan, ngem nalabit a naawatan ni Pedro a dimteng ti Anak ti Dios a saan laeng nga agaramid kadagiti nakaskasdaaw a banag para kadagiti tao ngem tapno mapabileg dagiti tao a kas ken Pedro nga agaramid met kadagiti nakaskasdaaw a banag. Awis ni Jesus, kalpasan ti amin, ti “Umayka, surotennak” (Lucas 18:22). Inawat ni Pedro daytoy nga awis iti naminsan, ket natallugod nga umawat manen, uray no kaipapananna ti panangsango kadagiti butengna ken panangaramid iti maysa a banag a kasla imposible. Nalabit a saanto a kiddawen ti Apo a bumabatayo manipud iti bilog iti katengngaan ti bagyo wenno mangyabuloy ti sangsangkabassit nga abastotayo a tinapay no nasken a mangan dagiti riniwriw a tattao, ngem mabalin a kiddawenna kadatayo nga umawat kadagiti panangiturong uray no saantayo naan-anay a maawatan dagitoy. Ania man dagiti mabalin a yawisna kadatayo, no maminsan mabalin a kasla makapasiddaawda wenno nakabutbuteng. Ngem mabalin a mapasamak dagiti milagro no datayo, kas ken ni Pedro, ikkatentayonto dagiti butengtayo, dagiti panagduduatayo, ken ti agkurkurang a pannakaawattayo ket sumurot Kenkuana a sipapammati.

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Juan 5:16–47

Dayawen ni Jesucristo ti Amana.

Ti relasion ti Nailangitan nga Ama ken ti tunggal maysa kadagiti annakna ket kaipapananna a maysa a sagrado. Kadagitoy a bersikulo, inted ni Jesucristo kadatayo ti makaparegta a pagwadan a suroten iti relasiontayo iti Nailangitan nga Ama. Basaen ti Juan 5:17–47, ken markaan wenno suratan ti tunggal pagarigan ti balikas nga Ama. Kasano ti panangdayaw ti Anak iti Ama, ken no kasano a masurotyo ti pagwadanna? Ania ti masursurom maipapan iti no kasano ti rikna ti Ama maipapan iti Anak? Ania ti pakaparegtaam nga aramiden a mangpapigsa iti relasionmo iti Nailangitan nga Amam?

Kitaen met iti Juan 17; Jeffrey R. Holland, “The Grandeur of God,” Liahona, Nob. 2003, 70–73.

dagiti tinapay ken ikan

Namilagruan a pinakan ni Jesus ti lima ribu a tattao iti lima a tinapay ken dua nga ikan.

Mateo 14:16–21; Marcos 6:33–44; Juan 6:5–14

Mapadakkel ti Mangisalakan dagiti nanumo a datonko tapno maipatungpal dagiti panggepna.

Nariknam kadin a nagkurangka a nangipaay iti amin a kasapulan a makitam iti aglawlawmo—iti pagtaenganyo, kadagiti pannakilangenmo, wenno iti gimong? Mabalin a narikna dagiti disipulo ni Jesucristo ti pagkuranganda idi indawatna kadakuada a mangpakan iti nasurok a lima ribu a mabisbisin a tattao idinto nga adda laeng lima a tinapay ken dua nga ikan a sidadaan a magun-od. Bayat ti panangbasam maipapan iti milagro a simmaruno a napasamak, utobem no kasano a mausar ti Dios dagiti nanumo a datonmo iti panagserbi a mangbendision kadagiti adda iti aglawlawmo. Kasano koma a pinadakkelna dagiti panagkagumaanmo bayat ti panagserbim Kenkuana? Ibilangmo daytoy a palawag manipud ken ni Sister Michelle D. Craig: “Maitedtayo ti adda kadatayo ken ni Cristo, ket paaduennanto dagiti aramidtayo. Nasurok nga umdasen ti adda nga idatonyo—uray babaen dagiti kinalupoy ken kinakapsutyo—no agpannuraykayo iti parabur ti Dios”(“Divine Discontent,” Liahona, Nob. 2018, 54).

Mateo 14:22–33; Marcos 6:45–52; 6:15–21

Awisennak ni Jesucristo nga ikkatek dagiti butengko ken duduak ket aramatek ti pammatik Kenkuana.

Iladawam iti panunotmo dagiti detalye ti buya a nailadawan iti Mateo 14:22–33; Marcos 6:45–52; ken Juan 6:15–21. Panunotem ti mabalin a narikna da Pedro ken dadduma pay a disipulo. Ania ti masursurom maipapan iti kinadisipulo manipud kadagiti balikas ken tignay ti Mangisalakan kadagitoy a bersikulo? Ania ti masursurom manipud kadagiti balikas ken tignay ni Pedro? (Kitaen met iti 1 Nephi 3:7.) Ania ti yaw-awis ti Apo nga aramidem a mabalin a kasla bumabbabaka a rummuar iti bilog? Ania ti masarakam kadagitoy a bersikulo a mangted kenka iti tured a mangaramat iti pammatim ken ni Jesucristo?

Juan 6:22–71

Kas disipulo ni Jesucristo, nasken a natallugodak a mamati ken umawat ti kinapudno, uray no narigat nga aramiden.

Idi intudo ni Jesus ti Bagina a kas ti “tinapay ti biag” (Juan 6:48), adu ti nakakita iti daytoy a maysa a “narigat a pagsasao” (Juan 6:60). Kasano a natulongannaka dagiti balikas ni Pedro iti Juan 6:68–69 kabayatan dagiti panawen a kasla narigat nga awaten wenno suroten ti doktrina ti Mangisalakan? Ania ti makaawis iti riknam maipapan iti pammaneknek ni Pedro? Ania dagiti sumagmamano a “sao ti biag nga agnanayon” (Juan 6:68) a mangtulong kenka nga agtalinaed a naikumit iti panangsurot iti Mangisalakan?

Kitaen met iti M. Russell Ballard, “To Whom Shall We Go?”,” Liahona, Nob. 2016, 90–92.

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Mateo 14:15–21.Ibilangmo no kasano a mabalinmo a tulongan ti pamiliam a mangpanunot no kasano ti kaadu ti tinapay ken ikan nga umdas nga ipakan iti lima ribu a tattao. Ania ti isuro kadatayo ti milagro iti Mateo 14:15–21 maipanggep iti Mangisalakan? Ibilangmo ti panangibinglay iti maysa a padas idi nariknam nga awananka iti umdas nga idaton ket pinaadu ti Mangisalakan dagiti panagkagumaanmo.

Mateo 14:22–33.Mabalin a magustuan ti pamiliam ti mangyakem manen iti estoria kadagitoy a bersikulo. Apay ngata a nagbuteng dagiti disipulo? Apay a kinabaelan ni Pedro a nangparmek iti butengna ket pimmanaw iti bilog? Kasano nga impakitana ti pammatina uray idi mangrugin a lumned daytoy? Kasano a no dadduma maipadatayo ken ni Pedro?

Juan 5:1–16.Awisem dagiti miembro ti pamilia a mangisurat kadagiti pagarigan ti ragup ti balikas a “pinaimbag” kadagitoy a bersikulo. Iti ania a wagwagas a mapaimbag ni Jesucristo dagiti tattao? Kaano ken kasano ti panangpaimbagna kadatayo?

Juan 6:28–58.Mangted iti tunggal miembro ti pamilia iti maysa a piraso ti tinapay a kanen, ken paglilinnawagan dagiti pagsayaatan a maawattayo manipud iti tinapay ken dadduma pay a makapasalun-at a taraon. Kalpasanna aggiddan a sukisokenyo dagitoy a bersikulo, a mangsapsapul no apay nga inawagan ni Jesucristo ti Bagina iti “tinapay ti biag” (Juan 6:35) Ania ti mabalin a kaipapanan ti “mangan” iti tinapay ti biag? (Kitaen iti D. Todd Christofferson, “The Living Bread Which Came Down from Heaven,” Liahona, Nob. 2017, 36–39).

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a himno: “How Great the Wisdom and the Love,” Hymns, no. 195.

Panangpadur-as iti Bukod a Panagadal

Kalikagumam a sapulen dagiti bukodmo a naespirituan a pannakammo ken pannakaawat. Iti bukod ken sangapamiliaan a panagadalyo, saanmo a limitaran ti bagim kadagiti binatog ti nasantuan a kasuratan a naipaay kadagitoy a balabala. Nalabit nga adda dagiti mensahe ti Apo a para kenka kadagitoy a kapitulo a saan a nailawlawag ditoy. Sikakararag a kalikagumam a sapulen dagitoy.

Nii Jesus a mangilunglung-aw ken ni Pedro iti danum.

Panangsurngi iti Angin, ni Liz Lemon Swindle