Marso 20–26

Mateo 13; Lucas 8; 13

“Ti Adda Lapayagna a Dumngeg, Dumngeg Koma”

Bayat ti panangbasam iti Mateo 13 ken Lucas 8; 13, panunotem no kasano nga isaganamto ti bagim a “dumngeg” ken mangbigbig iti pateg dagiti pannursuro ti Mangisalakan kadagitoy a pangngarig. Anianto ti aramidem a mangyaplikar kadagitoy a pannursuro iti biagmo?

Isuratmo dagiti Impresionmo

Sumagmamano kadagiti nakallalagip unay a pannursuro ti Mangisalakan ket iti porma dagiti simple nga estoria a maawagan kadagiti pangngarig. Dagitoy dagiti ad-adda pay ngem kadagiti makaay-ayo a pagsasao maipanggep kadagiti gagangay a banag wenno pasamak. Naglaon dagitoy kadagiti nauneg a kinapudno maipapan iti pagarian ti Dios para kadagiti nakasagana a naespirituan. Maysa kadagiti umuna a pangngarig a naisurat iti Baro a Tulag—ti pangngarig ti agmulmula (kitaen iti Mateo 13:3–23)—awisennatayo a mangamiris iti kinamanagsaganatayo nga umawat iti balikas ti Dios. “Agsipud ta siasino man nga umawat,” impakdaar ni Jesus, “maitedto kenkuana, ket maaddaanto iti ad-adu a kinabaknang” (Patarus ni Joseph Smith, Mateo 13:10 [iti Mateo 13:12, footnote a]). Iti kasta bayat ti panagsaganatayo a mangadal kadagiti pangngarig ti Mangisalakan—wenno ti ania man kadagiti pannursurona—ti nasayaat a lugar a pangrugian ket mangamiris iti puspusotayo ken mangikeddeng no ik-ikkantayo met laeng iti “nasayaat a daga” (Mateo 13:8) dagiti balikas ti Dios tapno dumakkel, agbukar, rumang-ay, ken mangted iti bunga a mangbendisionto kadatayo ken dagiti pamiliatayo iti kinawadwad.

Dagiti Kapanunotan para iti Bukod a Panagadal iti Nasantuan a Kasuratan

Mateo 13:3–23; Lucas 8:4–15; 13:6–9

Nasken a maisagana ti pusok a mangawat iti balikas ti Dios.

Apay a no dadduma sidadaan nga umawat dagiti pusotayo iti kinapudno, idinto nga iti dadduma a gundaway masulisogtayo a pagkedkedan daytoy? Ti panangbasa iti pangngarig ti agmulmula ti makaited iti nasayaat a gundaway a mangpanunot no kasano nga umawatka iti kinapudno manipud iti Apo. Mabalin a makatulong nga iparis dagiti bersikulo 3–8 ti Mateo 13 kadagiti pannakayulog a naited kadagiti bersikulo 18–23. Ania ti mabalinmo nga aramiden a mangtaripato iti “nasayaat a daga” iti bagim? Ania dagiti mabalin a sumagmamano a “sisiit” a manglapped kenka manipud iti sipupudno a panangdengngeg ken panangsurot iti balikas ti Dios? Kasano a maparmekmo dagitoy a “sisiit”?

Ti panagadalmo iti daytoy a pangngarig makaimpluensia pay no kasano a basaem ti pangngarig iti Lucas 13:6–9. Ania ti “bunga” a kalikaguman ti Apo kadatayo? Kasano nga aywanantayo ti dagatayo tapno “agbungatayo”?

Kitaen met iti Mosiah 2:9; Alma 12:10–11; 32:28–43; Dallin H. Oaks, “The Parable of the Sower,” Liahona, Mayo 2015, 32–35.

Mateo 13:24–35, 44–52; Lucas 13:18–21

Dagiti pangngarig ni Jesus ti mangtulong kaniak a mangawat ti panagdur-as ken pagtungpalan ti Simbaanna.

Insuro ni Propeta Joseph Smith a dagiti pangngarig iti Mateo 13 ti mangiladawan iti panagdur-as ken pagtungpalan ti Simbaan kadagiti ud-udina nga aldaw. Mabalimo nga irebyu dagiti balikas ti propeta iti Teachings of Presidents of the Church: Joseph Smith (2007), 293–303, bayat ti panangibilangmo no ania ti isuro kenka dagiti sumaganad a pangngarig maipapan iti Simbaan ti Apo:

• Naggiddan a dimmakkel dagiti trigo ken ruot (13:24–30, 36–43)

• Ti bukel ti mustasa (13:31–32)

• Ti lebadura (13:33)

• Ti nailemmeng a gameng ken ti perlas a kapatgan (13:44–46)

• Ti iket (13:47–50)

• Ti ama ti sangakabbalayan (13:52)

Kalpasan ti panangutobmo kadagitoy a pangngarig, ania ti mariknam a makaparegta nga aramiden tapno naan-anay a makiraman iti aramid ti Simbaan ni Cristo iti ud-udina nga aldaw?

Kitaen met iti Pangiwanwan iti Nasantuan a Kasuratan, “pagarian ti Dios wenno Pagarian ti Langit,” “Pangngarig,” scriptures.ChurchofJesusChrist.org.

Ti ebanghelio ni Jesucristo ti maysa a “perlas a kapatgan” (Mateo 13:46).

Mateo 13:24–30, 36–43

Nasken a dumakkel dagiti nalinteg a kagiddan dagiti nadangkes agingga iti panungpalan ti lubong.

Maysa a wagas tapno maamiris daytoy a pangngarig ket mangidrowing iti maysa a ladawan daytoy ken isurat ditoy dagiti kayulogan iti Mateo 13:36–43 ken Doktrina ken Katulagan 86:1–7. Ti zizana ket “makasabidong a ruot, nga, agingga nga agdawa daytoy, maipada ti langana iti trigo” (Pangiwanwan iti Nasantuan a Kasuratan, “Ruruot”). Ania dagiti kinapudno iti daytoy a pangngarig a mangparegta kenka tapno agtalinaed a napudno iti pammati iti baet ti kinadangkes iti lubong?

Lucas 8:1–3

Iti ania a wagas a nakapagministro dagiti “dadduma a babbai” iti Mangisalakan?

“Nakipagdaliasat dagiti babbai a disipulo ken ni Jesus ken ti Sangapulo-ket dua, a nagsursuro a naespirituan manipud ken [Jesus] ken nagserbida Kenkuana a di nagpaut. … Kas nayon iti panangawat iti panagministro ni Jesus—dagiti naimbag a damag ti ebangheliona ken dagiti bendision ti bileg ti panagagasna —nagministro dagitoy a babbai Kenkuana, a nangibingbingay iti kinabaknang ken debosionda” (Daughters in My Kingdom [2017], 4). Dagiti babbai a simmurot iti Mangisalakan ket nangiburay pay iti nabileg a pammaneknekda maipapan Kenkuana (kitaen iti Linda K. Burton, “Certain Women,” Liahona, Mayo 2017, 12–15).

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Mateo 13.Kabayatan ti panangbasa dagiti miembro ti pamiliam kadagiti pangngarig ti Mangisalakan, mabalin a maragsakanda a mangpampanunot kadagiti bukodda a pangngarig a mangisuro kadagiti isu met la a kinapudno maipapan iti pagarian ti langit (ti Simbaan), babaen ti panangusar kadagiti banag wenno kasasaad a pamiliar kadakuada.

Mateo 13:3–23; Lucas 8:4–15.Kalpasan ti aggigiddan a panagbasa iti pangngarig ti agmulmula, mabalin a paglilinnawagan ti pamiliam dagiti saludsod kas kadagitoy: Ania ti mangaramid iti “dagatayo” (puspusotayo) a “nabato” wenno “mangleppes” iti balikas? Kasano a masiguradotayo a nasayaat ken nabunga ti daga?

No addaankayo iti babassit nga ubbing iti pamiliayo, pakaragsakan ti mangawis kadagiti miembro ti pamilia a mangakem iti nadumaduma a wagas a mangisagana kadagiti pusotayo a dumngeg iti balikas ti Dios idinto a pugtuan dagiti dadduma pay a miembro ti pamilia no ania ti ar-aramidenda.

Mateo 13:13–16.Kasano a matulongam dagiti miembro ti pamiliam tapno maawatanda ti kinapateg ti natallugod a panangawat iti balikas ni Cristo? Tapno ipakita dagiti “lapayag [a] narigat a makangngeg,” mabalin nga abbongam dagiti lapayag ti maysa a miembro ti pamiliam bayat iti naulimek a panagbasam iti Mateo 13:13–16. Kasano ti kadakkel ti pannakaawat dayta a miembro ti pamilia manipud kadagiti bersikulo? Ania dagiti wagas a mabalintayo a luktan dagiti mata, lapayag, ken puspusotayo iti balikas ti Dios?

Mateo 13:44–46.Ania ti nagpadaan ti dua a lallaki kadagitoy a pangngarig? Adda kadi dagiti mainayon a bambanag a nasken nga aramidentayo a kas indibidual ken kas pamilia tapno umuna nga ipangpangrunatayo ti pagarian ti Dios iti biagtayo?

Lucas 13:11–17.Adda kadi dagiti miembro ti pamilia nga addaan padas a pakaigapuanda a makarikna a saanda a “maitag-ay ti [bagbagida]”? Adda kadi am-ammotayo a maysa a makarikna iti kastoy? Kasano a makatulongtayo? Kasano a “ruk-atannatayo” ti Mangisalakan manipud kadagiti rigattayo?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a himno: “We Are Sowing,” Hymns, no. 216.

Panangpadur-as iti Panangisurotayo

Mangyulo iti maysa a nasantuan a kasuratan. Pumilika iti maysa a binatog iti nasantuan a kasuratan a nangnangruna a napnuan kaipapanan iti pamiliam, ken mangawis kadagiti miembro ti pamilia a mangyulo iti daytoy. Insuro ni Elder Richard G. Scott, “Ti maysa a nayulo a nasantuan a kasuratan ket agbalin a napaut ken naibtur a gayyem a saan nga agkapsut iti panaglabas ti panawen” (The Power of Scripture,” Liahona, Nob. 2011, 6).

Ti Pangngarig ti Agmulmula, ni George Soper