Marso 20–26

Mateo 13; Lucas 8; 13

“Ti Adda Lapayagna a Dumngeg, Dumngeg Koma”

Dagiti pangngarig ket simple nga estoria a mabalin a makaay-ayo para kadagiti ubbing. Daytoy a balabala ken ti Umaykayo, Sumurot Kaniak—Para Kadagiti Indibidual ken Pamilia makatulong kenka a mangusar kadagiti pangngarig ti Mangisalakan a mangisuro kadagiti ubbing iti napapateg a kinapudno.

Yawis ti Panagbibinninglay

Mangitugot iti sumagmamano a banag a makatulong kadagiti ubbing a manglagip iti sumagmamano a pangngarig iti Mateo 13, kas iti maysa a bukel, maysa a perlas, wenno maysa a kahon ti gameng. Awisem dagiti ubbing a mangibinglay iti ania man a malagipda maipanggep kadagiti pangngarig.

Isuro ti Doktrina: In-inaudi nga Ubbing

Mateo 13:1–23

Nasken nga agsaganaak a masursuruan kadagiti pannursuro ni Jesus.

Mabalin a saan a maawatan dagiti in-inaudi nga ubbing dagiti amin a simbolismo iti pangngarig maipapan ti agmulmula, ngem masursuroda dagiti simple a kinapudno ti ebanghelio nga isuro daytoy. Kasano a matulongam ida nga umawat a nasaysayaat no kasano a mainaig kadakuada daytoy a pangngarig?

Dagiti Mabalin nga Aktibidad

• Mangipakita iti nadumaduma a kita ti daga (wenno ladawan ti daga) kabayatan ti pananggupgopmo iti Mateo 13:3–8. Ikkam ti tunggal ubing iti maysa a bukel, ken damagen no ania ti maaramidda a makatulong kadagiti bukel a dumakkel. Ilawlawag a maipada dagiti pammaneknektayo kadagiti bukel. Kasano a tulongantayo dagiti “bukel” ti pammaneknektayo a dumakkel?

• Usarem daytoy a panid ti aktibidad ita a lawas a makatulong a maawatan dagiti ubbing no ania iti tunggal kita ti daga a nailadawan iti Mateo 13 ti mangisuro maipapan iti puspusotayo. Saludsodem kadagiti ubbing no ania a kita ti puso ti kayat ni Jesus nga adda kadakuada tapno maadalda dagiti pannursurona.

• Basaem ti Mateo 13:9, 15, ket awisem dagiti ubbing a mangitudo iti nadumaduma a paset ti bagida no mangngeganda a madakamat dagitoy. Kasano a mausartayo dagitoy a paset iti bagitayo tapno maadaltayo dagiti pannursuro ni Jesus?

Mateo 13:24–30, 36–43, 47–48

Kayat ti Nailangitan nga Ama a pilientayo ti rumbeng.

Isuro ti sumagmamano a pangngarig ni Jesus nga iti maudi nga aldaw, ilasinto ti Dios dagiti nadangkes manipud kadagiti nalinteg. Kasano a mausarmo dagiti pangngarig a mangparegta kadagiti ubbing a pumili iti rumbeng?

Dagiti Mabalin nga Aktibidad

• Payakem kadagiti ubbing ti pangngarig maipapan iti trigo ken ruruot (kitaen iti Mateo 13:24–30). Ilawlawag a dagiti trigo ti mangibagi kadagiti tao nga agpili iti nalinteg, ken dagiti ruruot (makadangran a ruruot) ti mangibagi kadagiti tao a saan nga agpili iti nalinteg. Maysa nga aldaw, ummongento ti Nailangitan nga Ama dagiti nalinteg a tao a makipagnaed Kenkuana.

• Ikkam dagiti ubbing iti sumagmamano a pagarigan dagiti umno ken biddut a pili. Kiddawem kadagiti ubbing a mangisao iti “pili a trigo” no iladawam ti umno a pili ken “pili a ruruot” no iladawam ti biddut a pili.

• Mangitugot kadagiti ladawan ti ungkay ti trigo, ket paidrowing kadagiti ubbing dagiti ladawan ti sumagmamano a wagas a pakapagbalinanda a nalinteg.

Mateo 13:44–46

Ti kinamiembrok iti Ti Simbaan ni Jesucristo dagiti Santo iti Ud-udina nga Aldaw ket maysa a gameng.

Kasano a mausarmo ti ladawan ti gameng ken dagiti napapateg a perlas tapno matulongam a maawatan dagiit ubbing ti kinapateg ti panakaikameng iti Simbaan ni Cristo?

Dagiti Mabalin nga Aktibidad

• Ilemmeng dagiti ladawan ti baul ti gameng ken ti maysa a perlas iti siled, ken pasapulmo dagitoy kadagiti ubbing. Usarem dagiti ladawan a mangisuro maipapan kadagiti pangngarig iti Mateo 13:44–46. Isaritam no apay a mabalin nga isuko ti maysa a tao ti amin a banag nga addan kadakuada para iti napintas a perlas wenno gameng iti talon. Ilawlawag a no dadduma isukotayo ti maysa a banag a nasayaat para iti nasaysayaat pay a maysa a banag. Ibagam kadagiti ubbing no apay a napateg ti ebanghelio kenka.

• Ikabil iti maysa a kahon wenno baul ti sumagmamano a banag wenno ladawan nga mangibagi iti “gameng” iti Ti Simbaan ni Jesucristo dagiti Santo iti Ud-udina nga Aldaw, kas iti Mangisalakan, dagiti templo, wenno ti Libro ni Mormon. Kiddawem iti tunggal ubing a pumili iti maysa a banag wenno ladawan ket isaritam no apay a gameng daytoy.

• Aggigiddan a kantaen ti “The Church of Jesus Christ” (Children’s Songbook, 77), ket paisarita kadagiti ubbing dagiti gapu ti panangyamanda iti Simbaan ti Mangisalakan. Paneknekam maipapan kadagiti bendision a napadasamon gapu iti kinamiembrom iti Simbaan.

Isuro ti Doktrina: In-inauna nga Ubbing

Mateo 13:1–23

Masapul nga isaganak ti pusok nga umawat kadagiti pannursuro ni Jesus.

Kasano a matulongam dagiti ubbing a mangbigbig iti kinapateg ti maaddaan iti nalukneng ken natallugod a puso tapno maisuro ida ni Jesus?

Dagiti Mabalin nga Aktibidad

• Tudingam ti tunggal ubing a mangbasa iti maipapan iti maysa kadagiti uppat a kita ti daga iti Mateo 13:4–8. Awisem ida a mangsapul ken mangibinglay no ania ti mapasamak iti bukel iti kita ti daga a nabasada. Kasano a maipada ti puspusotayo iti nadumaduma a kita ti daga? (kitaen iti Mateo 13:19–23).

• Ipakitam kadagiti ubbing ti ladawan ti maysa a minuyongan. Ania ti kasapulan a langa ti daga tapno dumakkel dagiti mula ditoy? Ipakitam ti maysa a ladawan ti nabato wenno nasiit a daga. Apay a narigat a dumakkel dagiti mula iti kastoy a kita ti daga? Kasano a masiguradotayo a maipada ti puspusotayo iti nasayaat a daga tapno maawattayo dagiti pannursuro ti Mangisalakan?

• Awisem dagiti ubbing a mangbasa iti Mateo 13:15–17. Mangidrowing iti maysa a mata, lapayag, ken puso iti pisarra. Kasano a mausartayo ti tunggal maysa kadagitoy a banag nga agsursuro kadagiti pannursuro ni Jesus?

Mateo 13:24–30, 36–43

Makapagpiliak iti rumbeng uray no saan nga agpili iti rumbeng dagiti adda iti aglawlawko.

No basaem dagitoy a bersikulo a sipapanunot kadagiti ubbing, ania dagiti impresion nga umay kenka?

Dagiti Mabalin nga Aktibidad

• Awisem dagiti ubbing a mangidrowing iti nadumaduma a senario manipud iti pangngarig maipapan iti trigo ken dagiti ruruot, a masarakan iti Mateo 13:24–30, ket ibinglayda dagiti drowingda iti klase. Paikkam kadakuada iti label dagiti drowingda nga usaren ti kayulogan ti pangngarig a masarakan iti Mateo 13:36–43. Mabalin a kasapulam nga ilawlawag a makadadael dagiti ruruot.

• No mabalin, i-display ti ladawan dagiti trigo ken ruruot. Ilawlawag a dagiti trigo ken ruruot ket aggigiddan a dumakkel agingga iti panagapit (ti panaggibus ti lubong). Suruannatayo daytoy nga agbiagtayo nga adda dagiti naimbag ken dakes iti aglawlawtayo, ket nasken nga agannadtayo iti panangpili iti rumbeng. Paibinglay kadagiti ubbing no kasano a maibagada ti pagdumaan ti nasayaat ken dakes.

Mateo 13:44–46

Maysa a gameng ti kinamiembrok iti Ti Simbaan ni Jesucristo dagiti Santo iti Ud-udina nga Aldaw.

Makita kadi dagiti ubbing a sursuruam a maysa a napateg a gameng ti kinamiembroda iti Simbaan? Nalabit a ti panangilawlawag kadagiti pangngarig iti Mateo 13:44–46 makatulong kadakuada a mangibinglay iti riknada maipapan iti Simbaan ti Mangisalakan.

Dagiti Mabalin nga Aktibidad

• Awisem dagiti ubbing a mangbasa iti Mateo 13:44–46 iti bagbagida ket mangibinglay kadagiti pangngarig iti bukodda a balikas iti sabali pay a miembro ti klase.

• Manggetteng iti sumagmamano a sirkulo a mangibagi kadaiti sensilio, ket ikabil iti maysa a kahon ti gameng. Awisem dagiti ubbing a mangpidut iti maysa a sensilio ket idrowing wenno isurat iti daytoy ti maysa a banag nga ipatpategda maipapan iti panagbalinda a maysa a miembro ti Simbaan. Paibinglay kadagiti ubbing no ania ti inkabilda iti sensilioda.

• Awisem ti maysa a miembro ti ward a mangibinglay iti estoria maipapan iti kumbersionna kadagiti ubbing ket isaritana no ania ti insakripisiona tapno agkameng iti Ti Simbaan ni Jesucristo dagiti Santo iti Ud-udina nga Aldaw. Wenno kiddawem kadagiti ubbing a mangisarita maipapan kadagiti sakripisio nga aramidenda para iti Apo ken iti Simbaanna.

Yallukoy ti Panagsursuro iti Pagtaengan

Awisem dagiti ubbing a mangisuro iti pamiliada maipapan iti maysa kadagiti pangngarig a nasursuroda iti Primary.

Panangpadur-as iti Panangisurotayo

Kayat dagiti ubbing nga ibinglay no ania ti masursuroda. Nupay ubbingda pay laeng, mapapigsa dagiti ubbing dagiti miembro ti pamiliada. Allukoyem ida a mangibinglay kadagiti pamiliada kadagiti banag a nasursuroda iti Primary. (Kitaen iti Panangisuro iti Wagas ti Mangisalakan, 30.)