Dikayo agbuteng, ni Michael Malm

Marso 13–19

Mateo 11–12; Lucas 11

“Paginanaenkayto”

Nairanta dagiti kapanunotan iti panangisuro iti daytoy a balabala tapno makatulong a mangparegta iti bukodmo a kinamanagpartuat. Nawayaka a mangibagay kadagitoy kadagiti kasapulan dagiti ubbing a sursuruam.

Yawis ti Panagbibinninglay

Allukoyem dagiti ubbing a mangibinglay no ania ti mabalinda nga aramiden nga agdaydayaw iti Apo iti aldaw ti Sabbath.

Isuro ti Doktrina: In-inaudi nga Ubbing

Mateo 11:28–30

Tulongannakto ni Jesus no umasidegak Kenkuana.

Marikna dagiti ubbing ti liwliwa iti pannakaammoda a tulonganto ida ni Jesus kadagiti a pakadagsenanda no umasidegda Kenkuana.

Dagiti Mabalin nga Aktibidad

• Basaem ti Mateo 11:28–30, ket ipakitam ti ladawan dagiti nakasangol a baka iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia. Awisem dagiti ubbing a mangitudo kadagiti baka ken ti sangol. Ilawlawag a makaguyod dagiti nakasangol a baka iti nadagdagsen a timbang ngem no saggaysada a mangguyod. Paneknekam a no malidayan, mariribukan, wenno mabutbutengtayo, mabalintayo a sapulen ni Jesus ket tulongannatayonto.

• Kiddawem iti maysa nga ubing a mangbagkat iti nadagsen a banag. No marigatan, idiayam ti tulong. Kasano a tumulong ni Jesus kadatayo nga agaramid kadagiti naririgat a banag? Mangibinglay iti maysa a padas idi nariknam a tinulongannaka ni Jesus nga agaramid iti narigat a banag, ket kiddawem kadagiti ubbing a mangibinglay iti bukodda a padas.

Mateo 12:1–13

Mangilinko a nasantuan ti aldaw ti Sabbath.

Ania dagiti sumagmamano a naragsak a wagas a mabalinmo nga isuro kadagiti ubbing maipapan ti aldaw ti Sabbath ken no apay a ngilinentayo a nasantuan daytoy?

Dagiti Mabalin nga Aktibidad

• Basaem ti Mateo 12:10–13 iti napigsa. Awisem dagiti ubbing a tumakder ken agtugaw iti tunggal kanito nga isaom ti “Sabbath,” ket ulitem kadakuada ti ragup ti balikas nga “[Umno] ti agaramid iti naimbag kadagiti aldaw ti sabbath” (Mateo 12:12). Ania iti panagkunada ti kaipapanan dayta?

• Ipakitam ti maysa a kalendario kadagiti ubbing ket ugedam ti aldaw ti Sabbath para kadakuada. Ania ti aramidentayo iti dadduma pay nga aldaw ti lawas? Ania ti mabalintayo nga aramiden iti Sabbath tapno aramiden a maisabsabali daytoy iti dadduma pay nga aldaw? (kitaen iti Isaias 58:13–14).

• Kiddawen kadagiti ubbing nga agdrowing kadagiti nasayaat a banag a mabalinda nga aramiden iti aldaw ti Sabbath (kitaen iti panid ti aktibidad iti daytoy a lawas).

• Awisem dagiti ubbing nga umay nga addaan kadagiti tignay a makatulong kadakuada a manglagip kadagiti wagas a pakapagsaganaantayo para iti Sabbath bayat ti panagkansionda iti kanta a “Saturday,” (Children’s Songbook, 196).

• Mangidrowing kadagiti mata, lapayag, ngiwat, ken ima iti pisarra. Paibagam kadagiti ubbing kenka no ania ti maaramid ti tunggal maysa kadagitoy a paset dagiti bagitayo tapno mangilintayo a nasantuan ti aldaw ti Sabbath.

Lucas 11:11–13

Mangted kaniak ti Nailangitan nga Ama kadagiti nasayaat a sagut.

Makatulong dagiti pannursuro ti Mangisalakan iti Lucas 11:11–13 kadagiti ubbing a sursuruam a makaawat nga ay-ayaten ti Nailangitan nga Ama ida ken kayatna a bendisionan ida.

Dagiti Mabalin nga Aktibidad

• Mangusar iti maysa nga adalen a banag [object lesson] a mangipakita kadagiti pannursuro ti Mangisalakan iti Lucas 11:11–13. Kas pagarigan, mabalinmo ti mangikabil iti maysa a bato iti uneg ti supot ti tinapay wenno mangikabil iti ladawan ti maysa a manggagamma iti uneg ti kahon ti itlog. Papugtuam kadagiti ubbing no ania ti naguneg, ket kalpasanna ipakitam kadakuada. Pasukatam kadakuada ti bato wenno ladawan iti maysa a tinapay wenno maysa nga itlog. Basaem ti Lucas 11:11–13, ket ibinglaymo ti pammaneknekmo nga ay-ayatennatayo ti Nailangitaan nga Ama, sungbatanna dagiti kararagtayo, ken ikkannatayo iti adu a bendision babaen iti Espirituna.

• Aggigiddan a kansionen ti maysa a kanta maipapan iti ayat ti Dios, kas iti “My Heavenly Father Loves Me” (Children’s Songbook, 228–29). Ania dagiti sumagmamano kadagiti nasayaat a sagut nga intedna kadatayo? Paidrowingmo kadagiti ubbing dagiti ladawan dagiti bendision manipud iti Nailangitan nga Ama a pagyamyamananda.

Isuro ti Doktrina: In-inauna nga Ubbing

Mateo 11:28–30

Tulongannakto ni Jesus no umasidegak Kenkuana.

Kasano a matulongam dagiti ubbing a makaawat a mangtedto ti Mangisalakan kadakuada iti inana manipud kadagiti pannubokda bayat ti yaasidegda Kenkuana?

Dagiti Mabalin nga Aktibidad

• Awisem dagiti ubbing a mangibinglay iti maysa a panawen idi nariribukan wenno nagdanagda maipapan iti maysa a banag. Awisem ida a mangsukisok iti Mateo 11:28–30 para iti balakad a makatulong kadakuada iti maipada a kasasaad. Kasano a “mangted [kadatayo] iti inana” ti Mangisalakan? (bersikulo 28).

• Awisem dagiti ubbing a mangidrowing kadagiti ladawan dagiti banag nga ar-aramidenda tapno umasidegda ken ni Jesus ken masursuruan iti maipapan Kenkuana.

• Tulongam dagiti ubbing a mangyulo ti maikapat a pagannurotan ti pammati. Kasaritam ida maipapan no kasano a matulongannatayo ti tunggal maysa dagiti umuna a pagbatayan ken ordinansa ti ebanghelio nga umawat iti awis ni Jesus nga, “Umaykayo kaniak” (Mateo 11:28).

Mateo 12:1–13

Ti Sabbath ti maysa nga aldaw a panagaramid kadagiti nasayaat a banag tapno ad-adda a mayasidegak iti Dios.

Mapapigsanto dagiti ubbing a sursuruam bayat ti panangyunay-unaymo kadagiti panggep ken bendision ti panangngilin a nasantuan iti aldaw ti Sabbath.

Dagiti Mabalin nga Aktibidad

• Mangawis iti maysa nga ubing a mangipapan nga isu ti lalaki nga inagasan ti Mangisalakan ti imana (kitaen iti Mateo 12:10–13). Mabalin a saludsoden ti sabali nga ubing kenkuana maipapan iti padasna.

• Aggigiddan a basaen ti Mateo 12:12. Ania dagiti sumagmamano a nasayaat a banag a mabalintayo nga aramiden iti Sabbath? Paidrowing kadagiti ubbing dagiti kapanunotanda iti panid ti aktibidad iti daytoy a lawas, gettengen iti babassit a pedaso, ken agsisinnublat a pagkakamangen dagiti pedaso ti puzzle ti tunggal maysa.

• Ilemmeng dagiti sumagmamano a ladawan dagiti tao nga agar-aramid kadagiti banag a mangipakita iti ayat para iti Nailangitan nga Ama iti aldaw ti Sabbath. Pasapul kadagiti ubbing dagiti ladawan ken paibinglay no kasano a mangipakita iti panagayattayo iti Dios ti panangaramid kadagiti banag nga adda iti ladawan.

Mangan dagiti Dipsipulo iti Trigo iti Sabbath, ni James Tissot

Lucas 11:37–42

Nasken nga agbalin a natarnaw ti agpada a tignayko ken ti pusok.

Insuro ti Mangisalakan a saan nga umdas ti agparang a nalinteg kadagiti dadduma. Nasken pay nga agbalin a natarnaw dagiti panunotko, riknak, ken bukodko a tignay.

Dagiti Mabalin nga Aktibidad

• Tapno maipakita no ania ti isuro dagitoy a bersikulo, ipakitam kadagiti ubbing ti maysa a tasa wenno sabali pay a pagikkan a nadalus iti ruarna ngem narugit iti unegna. Tulongam ida a mangpanunot maipapan iti no ania ti mabalin nga ibagi ti “ruar ti tasa.” Ania ti ibagi ti “uneg a paset”? Apay a napateg a dalusantayo nga agpada ti ruar ken uneg?

• Aggigiddan a basaen ti sumagmamano a dadduma pay a nasantuan a kasuratan a mangyunay-unay iti kinalinteg iti agpada a puspusotayo ken tignaytayo—kas pagarigan, Salmo 24:3–5; Mateo 15:7–8; Moroni 7:6–9. Ilawlawag no apay a kayat ti Mangisalakan a naespirituan a nadalus ti puspusotayo ken bukod a tignaytayo.

Yallukoy ti Panagsursuro iti Pagtaengan

Awisem dagiti ubbing a mangibinglay iti pamiliada kadagiti kapanunotan tapno mangilin a nasantuan ti aldaw ti Sabbath.

Panangpadur-as iti Panangisurotayo

Panagdamag kadagiti saludsod. Ti maysa a saludsod a maawis kadagiti agad-adal a mangibaga iti maysa a pagbatayan ti ebanghelio iti bukodda a balikas—nangnangruna no masaludsod iti rugi ti klase—ket makatulong kenka a mangamiris no mano nga oras ti kasapulam a bubosen iti panagadal iti dayta a pagbatayan iti klase” (Panangisuro iti Wagas ti Mangisalakan, 32).