Dikayo Agbuteng, ni Michael Malm

Marso 13–19

Mateo 11–12; Lucas 11

“Paginanaenkayonto”

Insuro ni Presidente Dallin H. Oaks: “Dagiti nasantuan a kasuratan, a paltiing ti napalabas, saan a maawatan no awan ti kinabatad kadagiti paltiing ti agdama. … Ti panagadal kadagiti nasantuan a kasuratan ti mangpabael kadagiti lallaki ken babbai nga umawat kadagiti paltiing” (“Scripture Reading and Revelation,” Ensign, Ene. 1995, 7).

Isuratmo dagiti Impresionmo

Iti adu a wagas, inaramid dagiti Fariseo ken escriba a narikut ti panagdaydayaw ken ni Jehova. Masansan nga inyunay-unayda dagiti naiget a pagannurotan kadagiti agnanayon a kinapudno. Dagiti pagannurotan maipapan iti aldaw ti Sabbath, a kaipapananna a maysa nga aldaw ti panaginana, ket dakkel a dagensen kadakuada.

Ket kalpasanna, immay ni Jehova Mismo kadagiti taona. Insurona kadakuada a ti pudno a paggep ti relihion saan a tapno mangparnuay kadagiti dagensen no di ketdi tapno mangpagin-awa kadakuada. Insurona kadakuada a mangted kadatayo ti Dios kadagiti bilin, agraman ti maysa a mangdaydayaw iti Sabbath, saan a mangupay no di ketdi mangbendision kadatayo. Wen, nailet ken akikid ti dalan nga agturong iti Dios, ngem immay ti Apo a mangipakaammo a nasken a ditayo pagnaan daytoy nga agmaymaysa. “ Umaykayo kaniak,” impakaasina. Ti awisna, iti amin a makarikna iti “nadagsen nga awit” iti ania man a gapu, ket agtakder iti abayna, ibegkes ti bagbagitayo kenkuana, ken bay-an a makipagbaklay Isuna kadatayo kadagiti dagensentayo. Daytoy ti karina, “Makasarakkayto ti inana a maipaay kadagiti kararuayo.” Maidilig kadagiti alternatibo—a mangpadpadas nga agpatuloy nga agmaymaysa wenno agpannuray kadagiti mortal a solusion— “Nalaka ti sangolna, ken nalag-an ti awitna.” (Mateo 11:28–30.)

Dagiti Kapanunotan para iti Bukod a Panagadal iti Nasantuan a Kasuratan

Mateo 11:28–30

Ikkannakto ni Jesucristo iti inana no agtalekak Kenkuana.

Baklayentayonto amin dagiti dagensen—sumagmamano ket bunga dagiti bukodtayo a basol ken biddut, sumagmamano ket gapuanan dagiti pili ti dadduma, ken sumagmamano ket awan ti akinbiddut no di ket simple laeng a paset ti biag ditoy daga. Ania man ti gapu dagiti panagkarigatantayo, agpakaasi ni Jesus kadatayo nga umasideg Kenkuana tapno matulongannatayo nga agibtur kadagiti dagensentayo ken mabang-aran (kitaen met iti Mosiah 24). Insuro ni Elder David A. Bednar, “Ti panagaramid ken panagtungpal kadagiti sagrado a katulagan ti mangisangol kadatayo iti Apo a ni Jesucristo” (Bear Up Their Burdens with Ease,” Liahona, Mayo 2014, 88). Sipapanunot iti daytoy, utobentayo dagiti saludsod a kas kadagiti sumaganad tapno nasaysayaat ti pannakaawat kadagiti balikas ti Mangisalakan kadagitoy a bersikulo: “Kasano a maisangol kaniak ken iti Mangisalakan dagiti katulagak?” Ania ti nasken nga aramidek nga umasideg ken ni Cristo? Iti ania a kaipapanan a nalaka ti sangol ti Mangisalakan ken nalag-an ti awitna?

Ania dagiti dadduma pay a saludsod nga umay iti panunotmo bayat ti panangbasam? Isuratmo dagitoy, ket sukisokem dagiti sungbat iti daytoy a lawas kadagiti nasantuan a kasuratan ken balikas dagiti propeta. Masarakam dagiti sungbat iti sumagmamano a saludsodmo iti mensahe ni Elder David A. Bednar a naibasar iti ngato.

Kitaen met iti John A. McCune, “Come unto Christ—Living as Latter-day Saints,” Liahona, Mayo 2020, 36–38; Lawrence E. Corbridge, “The Way,” Liahona, Nob. 2008, 34–36.

Mangan dagiti Disipulo iti Trigo iti Sabbath, ni James Tissot

Mateo 12:1–13

“Agaramid iti nasayaat kadagiti aldaw ti sabbath.”

Maigiddiat dagiti pannursuro dagiti Fariseo iti pannursuro ti Mangisalakan iti adu a wagas, ngem nangnangruna iti no kasano ti panangdayaw iti aldaw ti Sabbath. Bayat ti panagbasam iti Mateo 12:1–13, mabalinmo nga ibilang no kasano a nasayaat a maitunosmo dagiti galad ken tignaymo maipanggep iti Sabbath kadagiti pannursuro ti Mangisalakan. Tapno maaramid daytoy, mabalinmo nga utoben dagiti palawag kas kadagitoy:

• “Addanto asik, ken saan a sakripisio” (bersikulo 7; kitaen met iti Hosea 6:6).

• “Apo ti Anak ti tao uray iti aldaw ti sabbath” (bersikulo 8).

• “Nainkalintegan ti agaramid iti nasayaat kadagiti aldaw ti sabbath” (bersikulo 12).

Kasano a mangimpluensia dagitoy a pannursuro iti wagas a yaasidegmo iti Sabbath?

Kitaen met iti Marcos 2:23–3:5; Gospel Topics, “Sabbath Day,” topics.ChurchofJesusChrist.org.

Mateo 12:34–37; Lucas 11:33–44

Mayanninaw dagiti balikas ken tignayko no ania ti adda iti pusok.

Maysa kadagiti kangrunaan a kritisismo ti Mangisalakan kadagiti Fariseo ket ti panangpadasda nga aginsisingpet ngem saan a natarnaw dagiti panggepda. Bayat ti panangadalmo kadagiti pammallaag ti Mangisalakan kadagiti Fariseo iti Mateo 12:34–37 ken Lucas 11:33–44, utobem dagiti pagnaigan dagiti puso ken tignaytayo. Ania ti kaipapanan kenka ti ragup ti balikas a “nasayaat a gameng ti puso”? (Mateo 16:15). Kasano nga ikalintegan wenno ikondenanatayo dagiti balikastayo? (kitaen iti Mateo 12:37). Ania ti kayat na a sawen ti agbalin a “naitalimudok” iti imatangmo? (Lucas 11:34). Utobem no kasano a makapagbalinka a “naan-anay a silaw” (Lucas 11:36) babaen ti pannakabalin ti Mangisalakan.

Kitaen met iti Alma 12:12–14; Doktrina ken Katulagan 88:67–68.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Mateo 11:28–30Mabalinmo a tulongan ti pamiliam a mangiladawan iti panunotda dagiti pannursuro ti Mangisalakan kadagitoy a bersikulo babaen ti panamagsisinnublatmo kadakuada a mangpadas a mangguyod iti ania man a banag a nadagsen, umuna isuda mismo ket kalpasanna babaen iti tulong ti sabali. Ania dagiti sumagmamano a pakadagsenan nga im-imetentayo? Ania ti kayat a sawen ti panangala iti sangol ni Cristo iti bagbagitayo? Makatulong kenka ti ladawan iti udi daytoy a balabala a mangilawlawag no ania ti sangol.

Mateo 12:10–13.Bayat ti panangbasam maipapan iti panangagas ni Jesus iti maysa a lalaki iti Sabbath, mabalin a pagsasaritaan ti pamiliam no kasano a “paimbagennatayo” ti Mangisalakan. Kasano nga agbalin ti Sabbath a maysa nga aldaw a panangpaimbag kadatayo?

Naparegta iti pagwadan ti Mangisalakan kadagitoy a bersikulo, mabalin nga ilista ti pamiliam dagiti wagas a mabalinyo nga “aramiden a nasayaat iti sabbath” (bersikulo 12). Penkem nga iraman dagiti gundaway a makapagserbi iti dadduma. Mabalin a makatulong a pagtalinaedem ti listaam ket pagibasaram daytoy kadagiti masakbayan a Domingo.

Lucas 11:33–36.Utobem no kasano mabalinmo nga isuro ti pamiliam no ania ti kayat a sawen ti “mapnuan iti silaw” (dagiti bersikulo 34, 36). Makatulong kadi ti maysa a banag nga adalen? Mabalinmo pay nga ilawlawag dagiti wagas a mangyeg iti silaw ti Mangisalakan iti biagtayo, iti pagtaengantayo, ken iti lubong. Para kadagiti kapanunotan, kitaen iti video “The Light That Shineth in Darkness,” ChurchofJesusChrist.org.

Lucas 11:37–44.Nalabit a mabalin a paglilinnawagan ti pamiliam dagitoy a bersikulo bayat ti panagtitinnulong nga agugas kadagiti lunglongan. Mabalinyo a pagsasaritaan no apay a dakes a kapanunotan ti mangugas laeng iti akinruar a paset dagiti banag kas koma dagiti malukong ken tasa. Kalpasanna mabalimo nga isarita daytoy iti panagkasapulan nga agbalin a nalinteg saan laeng kadagiti akinruar nga aramid no di ketdi pay dagiti naun-uneg a pampanunot ken marikrikna.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a himno: “How Gentle God’s Commands,” Hymns, no. 125.

Panangpadur-as iti Bukod a Panagadal

Agtultuloyka nga awan sardayna. Mabalin nga adda dagiti aldawmo a panagadal kadagiti nasantuan a kasuratan a kasla narigrigat wenno saan a nasamsamay ngem iti nimannamam. Saanka a sumuko. Insuro ni Elder David A. Bednar, “Ti agtultuloy nga awan sarday a panagaramidtayo kadagiti kasla babassit a banag makaiturong kadagiti napapateg a naespirituan a resulta” (“More Diligent and Concerned at Home,” Liahona, Nob. 2009, 20).

“Alaenyo ti sangolko kadakayo, ket agsursurokayo kaniak; ta siak naemmaak ken napakumbabaak iti panagpuspusok: ket makasarakkayto iti inana a maipaay kadagiti kararuayo” (Mateo 11:29). Photograph © iStockphoto.com/wbritten