“Pebrero 27–Marso 5. Mateo 8; Marcos 2–4; Lucas 7: ‘Pinaimbagnaka ti Pammatim,’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2023 (2022)
“Pebrero 27–Marso 5. Mateo 8; Marcos 2–4; Lucas 7,” Umaykayo, Sumurot Kaniak—Para Kadagiti Indibidual ken Pamilia: 2023
Pebrero 27–Marso 5
Mateo 8; Marcos 2–4; Lucas 7
“Pinaimbagnaka ti Pammatim”
Agannadka a saanka nga agdardaras iti panagadalmo kadagiti nasantuan a kasuratan. Maaddaanka iti oras para iti nainkararagan a panagutob uray no kaipapananna nga awan ti orasmo nga agbasa iti tunggal bersikulo. Dagitoy a kanito ti panagutob ti masansan a mangiturong iti bukod a paltiing.
Isuratmo dagiti Impresionmo
Maysa kadagiti kalawagan a mensahe iti Baro a Tulag ket maysa a mangngagas ni Jesucristo. Adu dagiti pakaammuan maipapan iti panangagas ti Mangisalakan iti masakit ken marigatan—manipud iti maysa a babai nga adda gurigorna agingga iti maysa nga anak a lalaki ti balo a babai a natay. Apay a nayunay-unay iti pisikal a panangagas? Ania dagiti mensahe a mabalin nga adda para kadatayo kadagitoy a milagro? Awan duadua a ti maysa a nalawag a mensahe ket ni Jesucristo ti Anak ti Dios, nga addaan iti pannakabalin iti amin a bambanag, agraman kadagiti saem iti bagi ken pagkurangantayo. Ngem masarakan ti sabali pay a kaipapanan kadagiti balikasna kadagiti agduadua nga escriba: “Tapno maammuanyo a ti Anak ti tao adda pannakabalinna ditoy daga a mamakawan iti basbasol” (Marcos 2:10). Isu a no basaem ti maipapan iti maysa a bulsek a tao wenno ti maysa nga agkukutel a maag-agasan, mabalin a mapanunotmo ti pannakapaagas—agpada a naespirituan ken pisikal—a maawatmo manipud iti Mangisalakan ken mangngegmo ti saona kenka, “Ti pammatim insalakannaka” (Lucas 7:50).
Dagiti Kapanunotan para iti Bukod a Panagadal iti Nasantuan a Kasuratan
Maagasan ti Mangisalakan dagiti sagubanit ken saksakit.
Naisurat kadagitoy sumagmamano a kapitulo ti adu a gundaway iti namilagruan a panangagas nga inaramid ti Mangisalakan. Bayat ti panagadalmo kadagitoy a panagagas, sapulem dagiti mabalin a mensahe a para kenka. Mabalin a saludsodem ti bagim: Ania ti isuro ti pakaammuan maipanggep iti pammati ken ni Jesucristo? Ania ti isuro ti pakaammuan maipanggep iti Mangisalakan? Ania ti kayat ti Dios a sursuruek manipud iti daytoy a milagro? Dagitoy ti sumagmamano a pagarigan, ngem adu pay:
-
Ti agkukutel (Mateo 8:1–4)
-
Ti adipen ti centurion (Mateo 8:5–13; Lucas 7:1–10)
-
Ti katugangan a babai ni Pedro (Mateo 8:14–15)
-
Ti lalaki a saan a makagunay (Marcos 2:1–12)
-
Ti lalaki a nagango ti imana (Marcos 3:1–5)
-
Ti anak a lalaki ti balo ti Nain (Lucas 7:11–16)
Kitaen met iti David A. Bednar, “Accepting the Lord’s Will and Timing,” Liahona, Ago. 2016, 17–23; Neil L. Andersen, “Wounded,” Liahona, Nob. 2018, 83–86.
Immay ni Jesucristo saan a mangkondena kadagiti managbasol ngem tapno mangagas kadakuada.
Bayat ti panagbasam kadagitoy a bersikulo maipapan kadagiti pannakipolapol ni Jesus kadagiti escriba ken Fariseo, mabalinmo nga ibilang no makitam ti bagim kadagitoy a pakaammuan. Kas pagarigan, maipada kadi dagiti kapanunotam ken tignaymo kadagiti kapanunotan ken tignay ni Simon a Fariseo? Kasano nga iladawanmo ti pagdumaan ti wagas a nakita ni Jesus kadagiti managbasol iti wagas a nakita kadakuada dagiti Fariseo a kas ken ni Simon? Ibilang no kasano a mabalin a marikna dagiti nadagsenan iti basol no kaduada ti Mangisalakan. Ania ti mariknada no kaduadaka?
Mabalinmo pay nga utoben no kasano a maipadaka iti babai a nailadawan iti Lucas 7:36–50. Kaano a napadasamon ti kinadungngo ken kinaasi nga impakita ti Mangisalakan kenkuana? Ania ti masursurom manipud iti pagwadanna iti pammati, ayat, ken panagpakumbaba?
Kitaen met iti Juan 3:17; Lucas 9:51–56; Dieter F. Uchtdorf, “The Gift of Grace,” Liahona, Mayo 2015, 107–10.
Ti panagbalin a maysa a disipulo ni Jesucristo kayatna a sawen nga umuna nga ipangpangrunak Isuna iti biagko.
Kadagitoy a bersikulo, insuro ni Jesus a ti panagbalin a disipulona agkasapulan nga umuna nga ipangrunatayo Isuna iti biagtayo, uray no dadduma kaipapananna a masapul nga isakripisiotayo dagiti dadduma a banag nga ipategtayo. Bayat ti panagadalmo kadagitoy a binatog, utobem ti bukodmo a kinadisipulo. Apay a nasken nga agtallugod dagiti disipulo a mangipangpangruna nga umuna iti Mangisalakan? Ania ti mabalin a nasken nga isukom tapno umuna a maipangpangrunam ni Jesus? (Kitaen met iti Lucas 9:57–62.)
Ni Jesucristo addaan iti pannakabalin a mangisangbay iti kappia iti baet dagiti bagyo ti biag.
Nariknam kadi ti wagas nga inaramid dagiti disipulo ni Jesus iti bagyo iti baybay—a mangbuybuya kadagiti dalluyon ti danum a nangpunno iti bilog ket nagsalsaludsod, “Mannursuro, awan kadi ti aniamanna kenka no mapukawtayo?”
Iti Marcos 4:35–41, masarakamto ti uppat a saludsod. Ilistam ti tunggal maysa, ket utobem no ania ti isuro daytoy kenka maipapan iti panangsango kadagiti karit ti biag nga addaan iti pammati ken ni Jesucristo. Kasano a mangisangbay iti talna ti Mangisalakan kadagiti bagyo iti biagmo?
Kitaen met iti Lisa L. Harkness, “Peace, Be Still,” Liahona, Nob. 2020, 80–82.
Manipud iti Panagbuteng agingga iti Pammati, ni Howard Lyon
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Mateo 8; Marcos 2–4; Lucas 7.Ibilangmo ti panangparnuay iti maysa a listaan dagiti milagro a nailadawan kadagitoy a kapitulo. Padasen ti panagsapul wenno panangidrowing kadagiti ladawan ti sumagmamano kadagitoy (kitaen iti Libro ti Arte ti Ebanghelio wenno ChurchofJesusChrist.org). Mabalin nga usaren ti tunggal miembro ti pamilia dagiti ladawan tapno mangisarita maipapan iti maysa kadagiti milagro ket ibinglayda no ania ti masursuroda manipud iti daytoy. Mabalin a mangibinglayka iti sumagmamano a pagarigan dagiti milagro a nakitam wenno nabasam maipapan iti aldawtayo.
Kitaen met dagiti video “Widow of Nain” and “Calming the Tempest” (ChurchofJesusChrist.org).
-
Mateo 8:5–13; Lucas 7:1–10.Ania ti maipapan iti pammati ti centurion a nakaawisan ti rikna ni Jesus? Kasano a maipakitatayo ti isu met la a pammati ken ni Jesucristo?
-
Marcos 2:1–12.“Kapitulo 23: Ti Lalaki a Saan a Makapagna” (iti Dagiti Estoria iti Baro a Tulag, 57–58, wenno ti maitutop a video on ChurchofJesusChrist.org) makatulong iti pamiliam a mangilawlawag iti Marcos 2:1–12. (Kitaen met iti video “Jesus Forgives Sins and Heals a Man Stricken with Palsy,” iti ChurchofJesusChrist.org.) Kasano a makapagbalintayo a kas kadagiti gagayyem ti lalaki a saan a makapagna? Asino dayta a kita ti gayyem kadatayo?
-
Marcos 4:35–41.Makatulong kadi daytoy a pakaammuan kadagiti miembro ti pamilia no mariknada ti agbuteng? Nalabit a mabalinda a basaen ti bersikulo 39 ken mangibinglay kadagiti padas idi tinulongan ida ti Mangisalakan a makarikna iti talna.
Mabalin a magustuan dagiti ubbing a mangipapan nga addada iti maysa a bilog iti nadawel a baybay idinto a basaen ti maysa ti Marcos 4:35–38. Kalpasanna no basaen ti maysa ti bersikulo 39, mabalinda nga ipapan nga addada iti maysa a bilog iti nalinak a baybay. Mabalinyo pay nga aggigiddan nga agkantaa maipapan iti panangsarak iti talna iti Mangisalakan, kas iti “Master, the Tempest Is Raging” (Hymns, no. 105). Ania ti isuro kadatayo dagiti ragup ti balikas maipapan iti talna nga idiaya ni Jesus?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a himno: “Master, the Tempest Is Raging,” Hymns, no. 105.
Panangpadur-as iti Panangisurotayo
Agbalin a sidadaan a magun-od ken maasitgan. Sumagmamano kadagiti kapintasan a kanito iti panangisuro ket mangrugi kadagiti saludsod wenno pakaseknan iti puso dagiti miembro ti pamilia. Ipakaammom kadagiti miembro ti pamilia babaen kadagiti balikas ken tignaymo a magagaranka a dumngeg kadakuada. (Kitaen iti Panangisuro iti Wagas ti Mangisalakan16.)
Ni Cristo ken ti Lalaki a Di Makagunay, ni J. Kirk Richards