Ni Jesus a Mangisursuro kadagiti Tao iti Igid ti Baybay,, ni James Tissot

Pebrero 20–26

Mateo 6–7

“Insurona Ida kas Maysa nga Addaan iti Turay”

No mabasatayo dagiti nasantuan a kasuratan nga adda saludsod iti panunottayo ken addaan iti napudno a tarigagay a maawatan no ania ti kayat ti Nailangitan nga Ama a maammuantayo, awisentayo ti Espiritu Santo a mangparegta kadatayo. Bayat ti panangbasam iti Mateo 6–7, ikasom dagitoy nga impresion.

Isuratmo dagiti Impresionmo

Ti Kaskasaba iti Bantay ket maysa kadagiti kalalatakan a bitla iti Kristianismo. Nangisuro ti Mangisalakan kadagiti nabaknang nga imahe, kas iti maysa a siudad a naipasdek iti maysa a turod, dagiti lirio iti talon, ken dagiti lobo a nagpammarang a karnero. Ngem ti Kaskasaba iti Bantay ket amang nga ad-adayo ngem iti napintas a bitla. Ti bileg dagiti pannursuro ti Mangisalakan kadagiti disipulona ti makapagbalbaliw iti biagtayo, nangnangruna no agbiagtayo a mayannurot kadagitoy. Kalpasanna agbalin dagiti balikasna a saan laeng a balikas; agbalinda a natibker a pundasion para iti biag, a kas iti balay ti masirib a tao, madaeranna dagiti angin ken layus iti lubong (kitaen iti Mateo 7:24–25).

Dagiti Kapanunotan para iti Bukod a Panagadal iti Nasantuan a Kasuratan

Mateo 6–7

Ti panagbiag kadagiti pannursuro ti mangisalakan makatulong kaniak nga agbalin a kas Kenkuana.

Naglaon ti Kaskasaba idiay Bantay iti adu a pagbatayan ti ebanghelio. Bayat ti panangbasam kadagitoy a kapitulo, damagem iti Apo no ania ti kayatna a sursuruem.

Maysa a pagbatayan a makitam ket ti panagkasapulan nga ipangpangruna dagiti bambanag ti Dios ngem dagiti bambanag ti lubong. Ania kadagiti pannursuro ti Mangisalakan iti Mateo 6–7 ti mangtulong kenka a mangipamaysa kadagiti nailangitan a bambanag? Ania dagiti dadduma pay a kapanunotan wenno impresion nga adda kenka? Ania ti makaparegta nga aramidem? Ibilang ti panangisuratmo kadagiti impresionmo. Kas pagarigan:

Mateo 6:1–4	Kayatko nga ipateg nga ad-adda maipapan ti no ania ti panunoten ti Dios kaniak ngem iti no ania ti panunoten dagiti dadduma.

Maysa pay a pagbatayan iti Mateo 6–7 ti kararag. Maaddaan iti kanito a mangamiris kadagiti kararagmo. Kasano ti riknam iti ar-aramidem a panagkagumaan nga umas-asideg iti Dios babaen ti kararag? Ania dagiti pannursuro iti Mateo 6–7 ti mangparegta kenka a mangpasayaat no kasanoka nga agkararag? Isuratmo dagiti impresion a maawatmo. Kas pagarigan:

Mateo 6:9	No agkararagak, kayatko a tratuen ti nagan ti Nailangitan nga Ama iti panagraem.
Mateo 6:10	No agkararagak, mayebkasko ti tarigagayko a maaramidto iti pagayatan ti Apo.

Mabalin nga ibilangmo ti panangbasa manen iti Kaskasaba iti Bantay, a mangsapsapul iti dadduma pay a maulit-ulit a pagbatayan wenno mensahe a nangnangruna a maibagay kenka. Isuratmo no ania ti makitam iti maysa a study journal, a karagpin dagiti kapanunotam ken impresionmo.

Mayasidegtayo iti Dios babaen ti kararag.

Mateo 6:7

Ania ti kayatna a sawen ti agaramat kadagiti “awan kapapayanna a panangulit-ulit” iti kararag?

Masansan a maawatan dagiti tao ti “awan kapapayanna a panangulit-ulit” a kayatna a sawen ti kanayon a panangdagdagullit kadagiti isu met laeng a balikas. Nupay kasta, ti balikas nga awan kapapayanna mabalin a mangiladawan iti maysa a banag nga awan pategna. Iti panangusar iti “awan kapapayanna a panangulit-ulit” iti kararag ket mangipapanan iti panagkararag nga awanan iti napudno, naimpusuan a rikna (kitaen iti Alma 31:12–23).

Mateo 7:1–5

Mabalinko ti mangukom a sililinteg.

Iti Mateo 7:1, nalabit a kunkuna ti Mangisalakan a nasken a ditayo mangukom, ngem iti dadduma a nasantuan a kasuratan (agraman dagiti dadduma pay a bersikulo iti daytoy a kapitulo), ikkannatayo kadagiti pangiturong maipapan iti no kasano ti mangukom. No kasla makatikaw dayta, makatulong ti Patarus ni Joseph Smith iti daytoy a bersikulo: “Saankayo a mangukom iti kinikillo, tapno saankayo a maukom; ngem mangukomkayo iti nalinteg a panangukom” (iti Mateo 7:1, footnote a). Ania ti masarakam iti Mateo 7:1–5, a kabuyog ti nabati a dadduma pay iti kapitulo, a mangtulong kenka a mangammo no kasano ti “mangukom iti nalinteg a panangukom”?

Kitaen met iti Gospel Topics, “Judging Others,” topics.ChurchofJesusChrist.org; Lynn G. Robbins, “The Righteous Judge,” Liahona, Nob. 2016, 96–98.

Mateo 7:21–23

Maam-ammok ni Jesucristo babaen ti panagaramidko iti pagayatanna.

Ti ragup ti balikas nga “uray kaano dikayo naam-ammo” iti Mateo 7:23 ket nabalbaliwan iti Patarus ni Joseph Smith nga “Iti kaano man didak naam-ammo” (Mateo 7:23, footnotea). Kasano a mangtulong kenka daytoy a pannakabalbaliw tapno nasaysayaat a maawatam ti insuro ti Apo iti bersikulo 21–22 maipapan iti panagaramid iti pagayatanna? Kasano ti panagriknam nga am-ammom a nasayaat ti Apo? Ania ti maaramidmo tapno maam-ammom Isuna a nasaysayaat?

Kitaen met iti David A. Bednar, “If Ye Had Known Me,” Liahona, Nob. 2016, 102–5.

Mateo 7:24–27

Ti panangtungpal kadagiti pannursuro ti Mangisalakan mangparnuay iti natibker a pundasion para iti biagko.

Ti panangbiag iti ebanghelio saan a mangikkat iti rigat iti biagtayo. Agpada a nakapadas dagiti balay iti pangngarig ti Mangisalakan iti Mateo 7:24–27 ti maymaysa a bagyo. Ngem maysa kadagiti balay ti nakabael a nangsarked iti daytoy. Kasano a ti panagtungpal kadagiti pannursuro ti Mangisalakan ket nangparnuay iti natibker a pundasion para kenka? Ania ti mariknam a makaparegta nga aramidem tapno maituloymo ti panangbangon iti “balaymo iti rabaw ti bato”? (kitaen iti bersikulo 24).

Kitaen met iti Helaman 5:12.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Matteo 6–7.Maysa a wagas tapno masursuruan manipud iti Mateo 6–7 kas sangapamiliaan ket mangbuya kadagiti video “Sermon on the Mount: The Lord’s Prayer” ken “Sermon on the Mount: Treasures in Heaven” (ChurchofJesusChrist.org). Mabalin a suroten dagiti miembro ti pamilia kadagiti nasantuan a kasuratanda ken pagsardengen dagiti video no adda mangngegda a maysa a banag a kayatda a paglilinnawagan. Mabalin nga agtalinaed daytoy nga aktibidad iti sumagmamano nga aldaw, no kasapulan.

Mateo 6:5–13.Ania ti masursurotayo maipanggep iti kararag manipud iti wagas a panagkararag ti Mangisalakan? Kasano a mausartayo a kas modelo ti kararagna tapno mapasayaat ti bukod ken sangapamiliaan a panagkararagtayo? (Kitaen met iti Lucas 11:1–13.) No addaanka iti in-inaudi nga ubbing, mabalin a sanayenyo ti aggigiddan a panagkararag.

Mateo 6:33.Ania ti kayat a sawen ti “birokenyo nga … umuna ti pagarian ti Dios”? Kasano nga ar-aramidentayo daytoy nga agmaymaysa ken sangapamiliaan?

Mateo 7:1–5.Tapno mailadawan iti panunot dagiti pannursuro kadagitoy a bersikulo, mabalin a mangsapul ti pamiliam iti maysa a puling (bassit-usit a maregmeg ti kayo) ken maysa a sigkat (dakkel a pedaso ti kayo). Kasano a ti panangidilig iti dua ket mangisuro kadatayo maipapan iti panangukom iti dadduma? No kayatmo a sukisoken ti ad-adu pay iti daytoy a topiko, mabalinmo nga usaren ti sumagmamano kadagiti resources iti “Judging Others” (Gospel Topics, topics.ChurchofJesusChrist.org).

Mateo 7:24–27.Tapno matulongam ti pamiliam a maawatan a nasaysayaat ti pangngarig ti Mangisalakan maipapan iti masirib a lalaki ken ti maag a lalaki, mabalin a paibuyatmo kadakuada ti danum iti darat ket kalpasanna iti maysa a bato. Kasano a mabangontayo dagiti naespirituan a pundasiontayo iti rabaw ti bato?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Aggigiddan a kantaen ti “The Wise Man and The Foolish Man,” Children’s Songbook, 281).

Panangpadur-as iti Bukod a Panagadal

Ibinglay dagiti nalawag a pannakaammo ken pannakaawat. Ti panangilawlawag kadagiti pagbatayan a masursurom manipud iti bukodmo a panagadal ket saan laeng a nasayaat a wagas iti panangisuro iti dadduma; makatulong pay daytoy a mangpapigsa iti bukodmo a pannakaawat. Padasem ti mangibinglay iti maysa a pagbatayan a nasursurom manipud itoy a lawas iti maysa a miembro ti pamilia wenno kadagiti klasem iti Simbaan.

Nagkararagak para Kenka,, ni Del Parson