Ni Jesus a Mangisursuro kadagiti Tao iti Igid ti Baybay, ni James Tissot

Pebrero 20–26

Mateo 6–7

“Insurona Ida kas Maysa nga Addaan iti Turay”

Irugi babaen ti panangbasa iti Mateo 6–7, bayat ti panangpanunotmo maipapan kadagiti ubbing a sursuruam. Ania dagiti mensahe manipud kadagitoy a kapitulo a nasken a denggenda? Ti Umaykayo, Sumurot Kaniak—Para Kadagiti Indibidual ken Pamilia ken daytoy a balabala makaited kadagiti kapanunotan iti panangisuro no kasapulan.

Yawis ti Panagbibinninglay

Kiddawem kadagiti ubbing nga ibinglayda no ania ti inaramidda kabayatan ti napalabas a lawas tapno agbalinda a silaw wenno pagwadan para iti maysa a tao

Isuro ti Doktrina: In-inaudi nga Ubbing

Mateo 6:5–13

Makapagkararagak iti Nailangitan nga Amak kas iti inaramid ni Jesus.

Makasursuro dagiti ubbing ti agkararag babaen iti panangdenggegda iti panangkararag dagiti dadduma. Kasano a matulongam ida a masursuruan iti kararag ni Jesucristo kadagitoy a bersikulo?

Dagiti Mabalin nga Aktibidad

• Irebyum dagiti pannursuro ni Jesus maipapan iti kararag a masarakan iti Mateo 6:5–13. Mabalinmo nga usaren ti “Kapitulo 20: Isuro ni Jesus maipapan iti Kararag” (iti Dagiti Estoria iti Baro a Tulag, 51–52, 51–52, wenno ti maitutop a video iti ChurchofJesusChrist.org).

• Usarem daytoy a panid iti aktibidad iti daytoy a lawas tapno matulongan dagiti ubbing a manglagip iti nadumaduma a paset ti kararag.

• Patugotam ti ima iti tunggal ubbing iti maysa a papel. Isaritam maipapan iti no ania ti nasken nga aramidentayo kadagiti ima ken takiagtayo bayat ti panagkararagtayo. Iti tunggal panangtugot, isurat ti maysa a banag nga aramidentayo a mangipakita iti panagraem no agkararagtayo (kas pagarigan, idumog ti ulotayo, ikidem ti matatayo, ken dadduma pay).

• Makipagkanta maipapan iti kararag kadagiti ubbing (kas iti “We Bow Our Heads” (Children’s Songbook, 25), ken iburaymo ti pammaneknekmo maipapan iti bileg ti kararag. Awisem met dagiti ubbing a mangibinglay kadagiti padasda iti kararag.

Makapagkararagak iti Nailangitan nga Amak kas iti inaramid ni Jesus.

Mateo 7:12

Nasken a tratuek dagiti dadduma iti wagas a kayatko a pannakatratok.

Ti pannursuro ni Jesus iti Mateo 7:12—a maawagan pay iti Nabalitokan a Pagannurotan—mangted iti simple a pangiwanwan para iti no kasano ti panangtrato kadagiti dadduma. Ania ti mangtulongto kadagiti ubbing a sursuruam tapno agbiag babaen iti daytoy a pagbatayan?

Dagiti Mabalin nga Aktibidad

• Basaem Mateo 7:12, ket baliwam ti pannakaisaona daytoy iti simple a balikas a maawatan dagiti ubbing. Tulongam dagiti ubbing a mangpanunot iti sumagmamano a wagas a mangileppas iti maysa a binatog a kas iti sumaganad: “Kayatko daytoy no dagiti dadduma para kaniak.” Kalpasan ti tunggal binatog, awisem ida a mangulit iti daytoy kenka, “Isu a naskenak a para kadagiti dadduma.”

• Makipagkanta kadagiti ubbing iti maysa a kanta a mariknam a mangpabileg iti Mateo 7:12, kas iti “Jesus Said Love Everyone” (Children’s Songbook, 61). Agaramid kadagiti simple a tignay a maigiddan iti kanta. Saludsodem dagiti ubbing no ania ti nasursuroda maipapan iti no kasano ti nasken a panangtrato iti dadduma manipud iti pagwadan ti Mangisalakan.

• Awisem dagiti ubbing a mangilista kadagiti nasayaat a banag nga aramiden dagiti nagannakda wenno dagiti dadduma pay a miembro ti pamiliada para kadakuada. Basaem ti Mateo 7:12, ken awisem dagiti ubbing a manginagan kadagiti nasayaat a banag a mabalinda nga aramiden para kadagiti pamiliada.

Mateo 7:24–27

Makaaramidak ti napigsa a pundasion babaen ti panangsurot ken ni Jesus.

Iti panangusar iti pangngarig ti Mangisalakan maipapan iti panangbangon iti balay iti rabaw ti darat wenno iti rabaw ti bato ket mabalin a nakallalagip a wagas a mangisuro kadagiti ubbing maipapan iti kinapateg ti panagtignay iti no ania ti masursurotayo.

Dagiti Mabalin nga Aktibidad

• Makipagkanta kadagiti ubbing iti “The Wise Man and the Foolish Man” (Children’s Songbook, 281), ket usaren dagiti tignay a maigiddan kadagiti balikas.

• Usarem ti Mateo 7:24–27 a mangisuro maipapan iti paggidiatan ti masirib a lalaki ken ti maag a lalaki. Awisem dagiti ubbing nga agpammarang nga agbangbangonda iti balay. Kasano a makapagbalintayo a kas iti masirib a lalaki?

• Pagdrowingem dagiti ubbing iti ladawan ti pangngarig maipapan iti masirib a lalaki ken maag a lalaki.

Isuro ti Doktrina: In-inauna nga Ubbing

Mateo 6–7

Naglaon ti Kaskasaba idiay Bantay kadagiti mensahe para kaniak.

Addaan dagitoy a kapitulo iti adu a mensahe a mabalin a maaramat kadagiti ubbing a sursuruam. Basaem dagitoy a pampanunotem dagiti ubbing. Ania dagiti makitam a napateg kenka?

Dagiti Mabalin nga Aktibidad

• Ipalagip kadagiti ubbing nga agsursuroda maipapan iti no ania ti insuro ni Jesus kabayatan ti Kaskasaba idiay Bantay. Ania dagiti kinapudno a malagipda a nasursuroda itay napalabas a lawas?

• Isuratmo iti pisarra ti sumagmamano a ragup ti balikas manipud iti Kaskasaba idiay Bantay ken sumagmamano a dadduma pay a ragup ti balikas nga awan kadagiti nasantuan a kasuratan. Awisem dagiti ubbing a mangilasin no ania kadagiti a ragup ti balikas ti naggapu iti Kaskasaba idiay Bantay. Awisem ida a mangibinglay no ania ti masursuroda manipud kadagitoy a pannursuro.

• Pumilika iti sumagmamano a bersikulo manipud iti Mateo 6–7 a mariknam a napategto kadagiti ubbing. Mangisurat kadagiti reperensia iti nasantuan a kasuratan kadagiti card, ket ilemmeng dagitoy iti intero a siled. Pasapulmo kadagiti ubbing dagitoy, basaem dagiti bersikulo, ken ilawlawagmo no apay a napateg kadakuada dagitoy a pannursuro.

• Mangibinglay iti paggugustom a binatog manipud iti Mateo 6–7, ket ilawlawagmo no apay a magustuam daytoy. No addaan dagiti ubbing iti maysa a binatog a magustuanda, awisem ida a mangibinglay no apay a magustuanda daytoy ken no ania ti nasursuroda manipud iti daytoy.

• Aggigiddan nga agkansion iti maysa a kanta maipapan iti Mangisalakan ken dagiti pannursurona, kas iti “I’m Trying to Be like Jesus” (Children’s Songbook, 78–78). Isardeng ti kanta no madanonmo ti ragup ti balikas a mainaig iti maysa a pagbatayan a naisuro iti Mateo 6–7. Tulongam dagiti ubbing a mangaramid kadagiti koneksion kadagiti banag a sursuruenda manipud kadagitoy a kapitulo.

Mateo 6:5–13; 7:7–11.

Denggen ken sungbatannakto ti Nailangitan nga Ama no agkararagak.

Bayat ti panangadalmo iti Mateo 6:5–13; 7:7–11, ania ti mariknam a nasken a maawatan dagiti ubbing maipapan iti kararag?

Dagiti Mabalin nga Aktibidad

• Awisem dagiti ubbing a mangbasa iti Mateo 6:9–13 iti napigsa ken kalpasanna ilistada dagiti banag a kinuna ti Mangisalakan iti kararagna. Kasano a matuladtayo ti pagwadanna no agkararagtayo?

• Makipagkansion kadagiti ubbing iti maysa a kanta maipapan iti kararag, a kas iti “Did You Think to Pray?” (Hymns, no. 140). Tulongam dagiti ubbing a mangsukisok kadagiti balikas ti kanta tapno mangsarak kadagiti gapu no apay nga agkararagtayo ken dagiti bendision a sumangbay manipud iti kararag.

• Tulongam dagiti ubbing a mangyulo iti Mateo 7:7 babaen ti panagay-ayam kas iti sumaganad: Isao ti maysa nga ubing ti umuna a balikas wenno ragup ti balikas manipud iti bersikulo ket kalpasanna ipasana ti maysa a bola iti sabali pay nga ubing, a kalpasanna isaona ti sumaruno a balikas wenno ragup ti balikas.

• Yakem ti Mateo 7:9–10 a kaduam dagiti ubbing nga usaren dagiti simple a props. Kiddawen kadagiti ubbing a mangibinglay no ania ti isuro kadakuada dayoy maipapan iti kararag.

• Iburaymo iti maysa a padas a nakasungbatan dagiti kararagmo.

Mateo 6:19–21

Mabalinko a kalikaguman a gun-oden dagiti agnanayon a gameng imbes a dagiti gameng iti daga.

Kasano a matulongamto dagiti ubbing a sursuruam a mangipateg nga ad-adda pay kadagiti agnanayon a banag ngem dagiti nainlubongan a banag?

Dagiti Mabalin nga Aktibidad

• Mangitugot iti kahon ti “gameng” a napno kadagiti banag wenno ladawan a mangibagi kadagiti banag nga ipatpateg ti lubong—kas pagarigan, dagiti kuarta wenno ay-ayam. Basaenyo ti Mateo 6:19–21 nga aggigiddan, ket kalpasanna saludsodem kadagiti ubbing a tulongandaka a mangpanunot kadagiti nailangitan a gameng a mabalin a mangsukat kadagiti nainlubongan a banag iti kahon.

• Awisem dagiti ubbing a manginagan wenno mangidrowing iti sumagmamano a banag a mabalinda nga aramiden tapno “agurnong … iti gameng sadi langit” (Mateo 6:20).

Yallukoy ti Panagsursuro iti Pagtaengan

Awisem dagiti ubbing a mangibinglay kadagiti pamiliada iti paggugustoda a pannursuro manipud ti Kaskasaba idiay Bantay.

Panangpadur-as iti Panangisurotayo

Ikalikagum a maawatam dagiti miembro ti klasem. Am-ammom dagiti ubbing a sursuruam. Mabalin a mabalbaliwan dagiti kapanunotan kadagitoy a balabala tapno kasayaatan a maipaay dagiti kasapulan ti klasem. Mabalin a kayatmo nga irebyu amin dagiti aktibidad a nakalista iti daytoy a balabala, saan laeng dagiti aktibidad a naidutok para iti tawen dagiti ubbing a sursuruam, tapno masarakam dagiti kapanunotan para iti klasem. (Kitaen iti Panangisuro iti Wagas ti Mangisalakan, 7.)