Agturong iti Let-ang, ni Eva Koleva Timothy

Enero 30–Pebrero 5

Mateo 4; Lucas 4–5

“Adda Kaniak ti Espiritu ti Apo”

Rugiam ti panagsaganam para iti daytoy nga adalen babaen ti panangbasa iti Mateo 4 ken Lucas 4–5. Ti Umaykayo, Sumurot Kaniak—Para kadagiti Indibidual ken Pamilia makatulong kenka a makaawat kadagitoy a kapitulo, ken makaited kenka daytoy a balabala kadagiti kapanunotan iti panangisuro.

Yawis ti Panagbibinninglay

Kiddawen kadagiti ubbing a mangipasa iti maysa a ladawan ni Jesus manipud iti maysa nga ubing agingga iti sumaruno. No maiggaman ti tunggal ubing ti ladawan, awisem isuna a mangibinglay iti maysa a banag nga inaramid ni Jesus idi adda Isuna iti daga.

Isuro ti Doktrina: In-inaudi nga Ubbing

Mateo 4:1–11; Lucas 4:1–13

Makapagpiliak iti rumbeng kas ti inaramid ni Jesus.

”Saan a makapagbasol” dagiti babassit nga ubbing (Doktrina ken Katulagan 29:47). Nupay kasta, ti pakaammuan ni Jesus a mangkedkedked kadagiti pannulisog ni Satanas ti mabalin a mangparegta kadagiti ubbing a mangrugi nga agpili iti rumbeng.

Dagiti Mabalin nga Aktibidad

• Isaritam ti estoria maipapan kadagiti sulisog ni Jesus manipud iti Mateo 4:1–11. (Kitaen met iti “Kapitulo 11: Masulisog ni Jesus,” Dagiti Estoria iti Baro a Tulag, 30–31, wenno ti maitutop a video iti ChurchofJesusChrist.org.) Kadagiti maitutop a punto iti estoria, saludsodem ti, “Ania iti panagkunam a nasken nga aramiden ni Jesus?”

• Ipakitam iti maysa a ladawan ni Jesucristo, ken kalpasanna iladawam dagiti mabalin a pilien ti maysa a bassit nga ubing. Idawatmo kadagiti ubbing nga agaddang a mapan iti ladawan iti tunggal kanito nga iladawam ti maysa a nasayaat a pili. Idawatmo kadagiti ubbing nga agaddang nga umadayo iti daytoy iti tunggal kanito nga iladawam ti maysa a dakes a pili.

• Tulongam dagiti ubbing a mangsursuro kadagiti balikas iti maysa a kanta maipapan iti panangaramid kadagiti nasayaat a pili kas iti “Choose the Right Way” (Children’s Songbook, 160–61). Agusar kadagiti ladawan, banag, wenno dadduma pay a visual aid a mainaig kadagiti liriko.

Lucas 4:18–19

Ni Jesucristo ti Mangisalakanko.

TiLucas 4:18–19 mangiladawan iti mision ni Jesus. Kasano a matulongam dagiti ubbing a mangbigbig iti pateg ti inaramidna para kadakuada?

Dagiti Mabalin nga Aktibidad

• Ibasam ti Lucas 4:18–19 kadagiti ubbing, ken ilawlawagmo no ania ti nakaibaonan ni Jesucristo nga aramidenna iti daga (mangisuro, mangliwliwa kadatayo, ken mangagas kadagiti tao). Ibinglay no kasano a naaramidna dagitoy a banag para kenka.

• Awisem ti sumagmamano nga ubbing nga agpammarang a matikaw, naliday, wenno masakit. Kiddawen iti dadduma pay nga ubbing a mangyakem iti no ania ti mabalinda nga aramiden a mangtulong kadakuada. Paneknekam nga immay ni Jesucristo tapno mangisuro, mangliwliwa, ken mangagas kadatayo ken nasken a tuladentayo ti pagwadanna.

• Mangipakita kadagiti ladawan ni Jesus a mangipatpatungpal iti misionna (kitaen iti Libro ti Arte ti Ebanghelio). Kiddawem kadagiti ubbing a mangiladawan no ania ti ar-aramiden ni Jesus iti tunggal ladawan. Mangipakita met kadagiti ladawan dagiti tao a mangpadpadas nga agbalin a kas ken ni Jesus (mabalin a masarakam ti sumagmamano kadagiti magasin ti Simbaan).

Mateo 4:18–22; Lucas 5:1–11

Awisennatayo ni Jesucristo nga agbalin a “dumadaklis kadagiti tao.”

Ti awag ti Mangisalakan a, “Surotendak, ket pagpabalinenkayto a dumakdaklis kadagiti tao” (Mateo 4:19), maaramat iti tunggal maysa, agraman dagiti ubbing.

Dagiti Mabalin nga Aktibidad

• Awisem ti dua nga ubbing nga agpammarang a kas Simon Pedro ken Andres bayat ti panangbasam iti Mateo 4:18–22. Tulongam dagiti ubbing a mangilasin no ania ti insuko dagitoy a lallaki tapno surotenda ni Jesus.

• Pagsisinnublatem dagiti ubbing a mangisarita iti estoria manipud kadagitoy a bersikulo nga us-usaren ti ladawan iti baba ken iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia.

• Aggigiddan nga agkansion iti maysa a kanta maipapan iti panangsurot ken ni Jesucristo, kas iti “I Will Follow God’s Plan” (Children’s Songbook, 164). Tulongam dagiti ubbing a mangsapul kadagiti banag a nadakamat iti kanta a mabalinda nga aramiden tapno mangsurot ken ni Jesus.

• Usarem ti panid ti aktibidad daytoya lawas tapno ilawlawag kadagiti ubbing no kasano a makapagbalinda a “dumadaklis kadagiti tao” babaen ti panangsurot ken ni Jesus. Mabalinyo pay ti agay-ayam iti parisparis iti panid ti aktibidad. Gumetteng iti dua a kopia ti tunggal sinan-ikan, ikabil ida a nakapakleb, ken awisem dagiti ubbing a mangbaliktad kadagitoy a saggaysa ti maminsan tapno makaaramid iti parisparis.

Ni Cristo a mangaw-awag iti Dua a Disipulo, ni Gary Ernest Smith

Isuro ti Doktrina: In-inauna nga Ubbing

Mateo 4:1–11; Lucas 4:1–13

Impakita ni Jesus ti pagwadan kaniak babaen iti panangkedkedna iti sulisog.

Sinulisog ni Satanas uray pay ni Jesucristo, ngem saan a nagpasulisog. Kasano a matulongam dagiti ubbing a mangtulad iti pagwadanna?

Dagiti Mabalin nga Aktibidad

• Agaramid iti maysa a tsart iti pisarra nga nakasurat ti Dagiti Sulisog ni Satanas ken Dagiti Sungbat ni Jesus. Tulongam dagiti ubbing a mangpunno iti tsart nga us-usaren ti Mateo 4:1–11 ken Lucas 4:1–13. Saludsodem dagiti ubbing no kasano a matuladda ti pagwadan ni Jesus.

• Isuratmo ti sumagmamano a senario a mabalin a pakasulisogan ti maysa nga ubing nga agaramid iti dakes a pili. Pagpiliem ti maysa nga ubing ti maysa a basaenna, ken idawat kadagiti ubbing a mangisarita no kasano a mapagkedkedanda ti sulisog iti dayta a situasion.

Mateo 4:1–2

Makatulong kaniak ti panagayuno a makarikna nga asidegak iti Nailangitan nga Ama.

Sakbay ti panangrugi ti panagministrona, nagayuno ken “nakisarita iti Dios” ni Jesus (Patarus ni Joseph Smith, Mateo 4:2 [iti Matthew 4:2, footnote c]). Tulongam dagiti ubbing a mangkita no kasano a makaited kadakuada iti naespirituan a pigsa ken makatulong kadakuada a makarikna nga asidegda iti Nailangitan nga Ama.

Dagiti Mabalin nga Aktibidad

• Awisem ti maysa nga ubing a mangbasa iti napigsa iti Mateo 4:1–2 nga us-usaren ti nabalbaliwan a Patarus ti Joseph Smith a masarakan kadagiti footnote. Ania ti inaramid ni Jesus tapno “makitipon iti Dios”? Ibinglay no kasano a nakatulong kenka ti panagayuno a makarikna nga as-asidegka iti Nailangitan nga Ama.

• Awisem dagiti ubbing a nakapagayuno idin tapno mangibinglay kadagiti padasda. Kasano nga ilawlawagda ti panagayuno iti maysa a tao a saan pay pulos a nagayuno idi?

• Isurat dagiti saludsod maipapan iti panagayuno (kas iti apay, kaano, wenno kasano nga agayunotayo) kadagiti papel, ken ikabil dagitoy iti maysa a malukong. Awisem dagiti ubbing a mangala iti maysa a saludsod ken padasenna a sungbatan daytoy. Ania dagiti padas a mabalinmo ken dagiti ubbing nga ibinglay maipapan iti panagayuno?

Lucas 4:16–22, 28–30

Ni Jesucristo ti Mangisalakanko.

Panunotem no kasano a binendisionan ti Mangisalakan ti biagmo. Kasano a matulongam dagiti ubbing a nasaysayaat a mangbigbig iti pateg ti impluensiana iti biagda?

Dagiti Mabalin nga Aktibidad

• Awisem ti maysa nga ubing nga umay iti klase a nakasagana a mangibinglay iti pakaammuan iti Lucas 4:16–30. Mabalinmo nga usaren ti “Kapitulo 17: Dagiti Makagura a Tao iti Nasaret” (iti Dagiti Estoria iti Baro a Tulag, 42-43, wenno ti maitutop a video iti ChurchofJesusChrist.org). Mabalinmo pay nga ipabuya ti video a “Jesus Declares He Is the Messiah” (ChurchofJesusChrist.org).

• Basaem ti Lucas 4:18 idinto a sumursurot dagiti ubbing. Kiddawem kadakuada a mangparnuay iti listaan dagiti banag a kinuna ti Mangisalakan nga immayanna nga aramiden. Kiddawem kadagiti ubbing a mangibinglay kadagiti pagarigan dagiti panawen idi inaramid ni Cristo dagitoy a banag, iti man nasantuan a kasuratan wenno iti biagda.

• Isuratmo kadagiti akikid a papel dagiti balikas “Gapu ken ni Jesucristo …” Ikkam iti maysa a papel ti tunggal ubing, ket awisem ida a mangisurat no kasano a leppasenda ti ragup ti balikas. Paibinglay kadakuada no ania ti insuratda.

Mateo 4:18–22; Lucas 5:1–11

Awisennatayo ni Jesucristo a sumurot Kenkuana ken agbalintayo a “dumadaklis kadagiti tao.”

Adu dagiti wagas a pakasurotan dagiti ubbing iti Mangisalakan ken agbalinda a “dumakdaklis kadagiti tao” (Mateo 4:19). Kasano a matulongam ida a makitada a makapagbalinda a nasayaat nga impluensia iti dadduma?

Dagiti Mabalin nga Aktibidad

• Awisem dagiti ubbing a mangbasa iti Mateo 4:18–22 ken Lucas 5:1–11. Kasano a simmungbat dagiti disipulo ni Jesus iti awagna a sumurot Kenkuana? Ania ti maaramidtayo a mangsurot iti pagwadanda?

• Ipakitam kadagiti ubbing ti sumagmamano a ramit a pagkalap iti ikan wenno ladawan ti maysa a mangngalap wenno agdakdaklis. Ania ti kayat a sawen ti agbalin a “dumadakllis kadagiti tao”? Ania dagiti ramit nga adda kadatayo a makatulong kadatayo nga agbalin a dumadaklis kadagiti tao?

Yallukoy ti Panagsursuro iti Pagtaengan

Awisem dagiti ubbing a mangibinglay kadagiti pamiliada iti nasursuroda maipapan iti panagbalin a dumadaklis kadagiti tao.

Panangpadur-as iti Panangisurotayo

Mabigbig dagiti ubbing ti impluensia ti Espiritu. Isurom kadagiti ubbing a dagiti mariknada a talna, ayat, ken bara no agsarita wenno agkantada maipapan ken ni Jesucristo ken ti ebangheliona ket aggapu iti Espiritu Santo. Dagitoy a rikna ti mabalin a mangbukel iti pammaneknekda.