Agturong iti Let-ang, ni Eva Koleva Timothy

Enero 30–Pebrero 5

Mateo 4; Lucas 4–5

“Adda Kaniak ti Espiritu ti Apo”

Inusar ti Mangisalakan dagiti nasantuan a kasuratan nga agpada a mangkedked kadagiti sulisog ni Satanas ken mangipaneknek iti bukodna a nadiosan a misionna (kitaen iti Lucas 4:1–21). Utoben no kasano a makabukel iti pammatim ken pangngeddengmo a mangkedked iti sulisog dagiti nasantuan a kasuratan.

Isuratmo dagiti Impresionmo

Manipud iti kinaagtutubona, kasla ammo ni Jesus nga adda maysa a naidumduma, sagrado a misionna. Ngem bayat ti panagsagana ni Jesus nga irugi ti panagministrona iti daga, ginandat ti kabusor ti mangimula iti panagduadua iti panunot ti Mangisalakan. “No sika ti Anak ti Dios,” kinuna ni Satanas (Lucas 4:3, nainayon ti nagiray a balikas). Ngem nakiuman ti Mangisalakan iti Amana iti Langit. Ammona dagiti nasantuan a kasuratan, ken ammona no asino Isuna. Para Kenkuana, ti diaya ni Satanas—“Amin dagitoy a pannakabalin itedkonto kenka” (Lucas 4:6)—ket maysa nga awan kaes-eskanna, ta ti tungpal biag a panagsagana ti Mangisalakan ti nangpalugod Kenkuana nga umawat iti “pannakabalin ti Espiritu” (Lucas 4:14). Isu nga iti baet ti pannakasulisog, pannakasubok, ken pannakasupring, di kaano man nagduadua ni Jesucristo Iti naituding nga aramidna: “Nasken nga ikasabak ti pagarian ti Dios … ta daytoy ti panggep a nakaibaonak” (Lucas 4:43).

Dagiti Kapanunotan para iti Bukod a Panagadal iti Nasantuan a Kasuratan

Mateo 4:1–2

Ti pannakiumanko iti Dios ti mangisagana Kaniak nga agserbi Kenkuana.

Tapno agsagana para iti misionna, napan ni Jesus iti let-ang “tapno makapagnaed iti Dios” (Patarus ni Joseph Smith, Mateo 4:1 [iti Mateo 4:1, footnote b]). Panunotem no ania ti aramidem tapno mariknam ti mayasideg iti Dios. Kasano daytoy a mangisagana kenka para iti aramid a kayatna nga aramidem?

Mateo 4:1–11; Lucas 4:1–13

Intuding ni Cristo ti pagwadan para kaniak babaen ti panagkedked iti sulisog.

No dadduma ket makonsiensia ti tao no masulisogda nga agbasol. Ngem nasulisog uray pay ti Mangisalakan, a nagbiag a “saan a nagbasol” (Hebreo 4:15). Ammo ni Jesucristo a dagiti pannulisog a pakaipasanguantayo ti mangtulong kadatayo a mangparmek kadagitoy (kitaen iti Hebreo 2:18; Alma 7:11–12).

Bayat ti panangbasam iti Mateo 4:1–11 ken Lucas 4:1–13, ania ti masursurom a makatulong kenka no maipasangoka kadagiti sulisog? Mabalin a maurnosmo dagiti kapanunotam iti maysa a listaan a kas daytoy:

Jesucristo	Siak
Jesucristo Ania ti pinangsulisog ni Satanas nga aramiden ni Cristo?	Siak Ania ti pannulisog a kayat ni Satanas nga aramidek?
Jesucristo Kasano a nagsagana ni Cristo a mangkedked iti sulisog?	Siak Kasano a makapagsaganaak a mangkedked iti sulisog?
Jesucristo	Siak

Ania dagiti nayon a nalawag a pannakaammo ken pannakaawat a magun-odmo manipud iti Patarus ni Joseph Smith iti Mateo 4? (Kitaen iti footnotes iti intero a Mateo 4).

Kitaen met iti 1 TagaCorinto 10:13; Alma 13:28; Moises 1:10–22; Gospel Topics, “Temptation,” topics.ChurchofJesusChrist.org.

Lucas 4:16–32

Ni Jesucristo ti naipadto a Mesias.

No maidawat kenka a mangiladawan iti no ania ti nakaibaonan ni Jesucristo nga aramiden ditoy daga, ania koma ti isaom? Babaen ti panangadawna iti maysa kadagiti padto ni Isaias maipapan iti Mesias, inladawan ti Mangisalakan dagiti aspekto ti bukodna a mision (kitaen iti Lucas 4:18–19; Isaias 61:1–2). Ania ti masursurom maipanggep ti misionna bayat ti panangbasam kadagitoy a bersikulo?

Ania dagiti sumagmamano a wagas a pangyawisan ti Mangisalakan a pakiramanam iti aramidna?

Nupay naguray iti adu a siglo dagiti Judio tapno matungpal dagiti padto ni Isaias, adu ti saan a nakaawat a ni Jesus ti Mesias idi impakdaarna, “Ita nga aldaw naidanon kadagiti lapayagyo daytoy a natungpal ti nasantuan a kasuratan” (Lucas 4:21). Bayat ti panangbasam iti Lucas 4:20–30 (kitaen met iti Marcos 6:1–6), padasem ti mangikabil iti bagim iti kasta met la a kasasaad a kas kadagiti tao ti Nazaret. Adda kadi ania man a banag a makalapped kenka iti naan-anay a panangawat ken ni Cristo a kas personal a Mangisalakanmo?

Kitaen met iti Mosiah 3:5–12; “Jesus Declares He Is the Messiah” (video), ChurchofJesusChrist.org.

Mateo 4:18–22; Lucas 5:1–11

No agtalekak iti Apo, matulongannak a mangragpat iti nadiosan a potensialko.

Insuro ni Presidente Ezra Taft Benson, “Matakuatanto dagiti lallaki ken babbai a mangiturong iti biagda iti Dios nga Isu ad-adu pay ti maaramidna iti biagda ngem iti maaramidda” (Teachings of Presidents of the Church: Ezra Taft Benson [2014], 42). Kitaen no kasano a napasamak daytoy ken ni Simon Pedro ken dagiti padana a dumadaklis. Nakita ni Jesus ti maysa a dakdakkel a banag kadakuada ngem iti nakitada iti bagbagida. Kayatna nga aramiden ida a “dumakdaklis dagiti tao” (Mateoi 4:19; kitaen met iti Lucas 5:10).

Bayat ti panangbasam iti Mateo 4:18–22 ken Lucas 5:1–11, utobem no ania ti itultulong ni Jesucristo kenka a pagbalinam. Kaano a nariknam nga aw-awisennaka ti Mangisalakan a sumurot Kenkuana? Kasano a maipakitam iti Apo a natallugodka a mangpanaw iti amin tapno sumurot Kenkuana? (kitaen iti Lucas 5:11).

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Mateo 4:1–2; Lucas 4:1–2.Ania dagiti nalawag a pannakaammo ken pannakaawat a magun-odtayo manipud iti daytoy a pakaammuan maipanggep iti bileg ti panagayuno? Tapno matulongam ti pamiliam a masursuruan maipapan iti panagayuno, mabalinmo nga usaren ti “Fasting and Fast Offerings” iti Gospel Topics (topics.ChurchofJesusChrist.org). Mabalin nga ibinglay dagiti miembro ti pamilia dagiti padasda iti panagayuno. Nalabit a nainkararagan a makaaramidka kadagiti plano nga aggigiddan nga agayuno a para iti maysa a naipangruna a panggep.

Mateo 4:3–4; Lucas 4:3–4.Idi sinulisog ni Satanas ni Cristo tapno pagbalinenna ti bato a tinapay, kinaritna ti nadiosan a kinasiasino ni Cristo babaen ti panagkunana, “No sika ti Anak ti Dios” (Mateo 4:3, nainayon ti nagiray a balikas). Apay a padasen ni Satanas a pagduaduaennatayo kadagiti nadiosan a kinasiasinotayo—ken ti kinasiasino ti Mangisalakan? Kasano ti panangpadasna nga aramiden daytoy? (Kitaen met iti Moises 1:10–23.)

Patarus ni Joseph Smith, Mateo 4:11.Kalpasan ti pisikal ken naespirituan a pannakasubok ni Jesus, naiturong dagiti panunotna kadagiti kasapulan ni Juan Bautista, nga adda iti pagbaludan: “Ket ita naammuan ni Jesus a naibalud ni Juan, ket nangibaon kadagiti anghel, ket, imutektekan, dimtengda ken nagserbida kenkuana [Juan]” (Patarus ni Joseph Smith, Mateo 4:11 [iti Mateo 4:11, footnote a). Kasano a mabendisionantayo bayat ti panangsurottayo iti pagwadan ni Cristo a mangpampanunot kadagiti dadduma?

Lucas 4:16–21.Adda kadi maysa nga am-ammotayo a maladladingitan wenno agkasapulan iti “pannakawayawaya”? (Lucas 4:18). Kasano a matulongantayo dagiti dadduma nga umawat iti panangpaimbag ken panangwayawaya ti Mangisalakan? Mabalinmo pay nga ilawlawag no kasano a ti panangannong kadagiti ordinansa ti templo ket makatulong iti “pannakawayawaya dagiti balud” (Lucas 4:18).

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary..

Naisingasing a himno: “Come, Follow Me,” Hymns, no. 116.

Panangpadur-as iti Panangisurotayo

Agbiag iti ebanghelio ni Jesucristo. “Nalabit a ti kapatgan a banag a mabalinmo nga aramiden [kas maysa a naganak wenno mannursuro] ket … agbiagka a mayannurot iti ebanghelio iti amin a pusom. … Daytoy ti kangrunaan a wagas tapno maikari iti panangkadkadua ti Espiritu Santo. Saanmo a kasapulan ti agbalin a perpekto, sipapasnek laeng nga ikarigatam—ken agkiddaw iti pammakawan no nagbiddutka babaen ti Pannubbot ti Mangisalakan” (Panangisuro iti Wagas ti Mangisalakan, 13).

Ni Cristo nga Umaw-awag kada Apostol Santiago ken Juan, Edward Armitage (1817–96)/Sheffield Galleries and Museums Trust, UK/© Museums Sheffield/The Bridgeman Art Library International