Ni Jesus a mangisursuro iti bantay

Ni Jesus a Mangisursuro iti Kaskasaba iti Bantay, ni Gustave Doré

Pebrero 13–19

Mateo 5; Lucas 6

“Nagasatkayo”

Ikasom dagiti impresion a maawatmo bayat ti panangbasam iti Mateo 5 ken Lucas 6, ken isuratmo dagitoy iti maysa a study journal wenno iti sabali pay a wagas. Matulongannaka daytoy a balabala a mangilasin iti sumagmamano a napateg a pagbatayan kadagitoy a kapitulo, ngem agbalinka a nakasagana iti dadduma pay a matakuatam iti panagadalmo.

Isuratmo dagiti Impresionmo

Iti daytoy a punto iti panagministrona, nalawag a dagiti pannursuro ni Jesus saan a maipada kadagiti nakairuaman a mangmangngeg dagiti tao iti panawenna. Awatento dagiti napanglaw ti pagarian ti Dios? Tawidento dagiti naemma ti daga? Nagasat dagiti mairurumen? Saan nga isursuro dagiti escriba ken Fariseo dagiti kasta a banag. Ngem kadagiti pudno a nakaawat iti linteg ti Dios nabigbigda ti kinapudno kadagiti balikas ti Mangisalakan. “Mata supapakan iti mata” ken “guraem ti kabusormo” ket dagiti nababbaba a linteg (Mateo 5:38, 43). Ngem immay ni Jesucristo tapno mangisuro iti nangatngato a linteg (kitaen iti 3 Nephi 15:2–10), naisangrat a mangtulong kadatayo nga iti maysa nga aldaw agbalintayo nga “awan pagkuranganna, a kas ken Ama[tayo] a nailangitan nga awan pagkuranganna” (Mateo 5:48).

icon iti bukod a panagadal

Dagiti Kapanunotan para iti Bukod a Panagadal iti Nasantuan a Kasuratan

Mateo 5:1–12; Lucas 6:20–26, 46–49

Sumangbay ti manayon a ragsak manipud iti panagbiag iti wagas nga insuro ni Jesucristo.

Kayat ti tunggal maysa ti agbalin a naragsak, ngem saan nga agsapsapul amin iti kinaragsak kadagiti agpapada a lugar. Adda dagiti agsapsapul iti daytoy nailubongan a bileg ken posision, adda pay dagiti dadduma nga agsapsapul iti kinabaknang wenno panangpennek kadagiti pagganasan ti bagi. Immay ni Jesucristo a mangisuro iti dalan iti manayon a kinaragsak, tapno mangisuro no ania ti pudno a kaipapanan ti maparaburan. Ania ti masursurom maipapan iti pananggun-od iti manayon a kinaragsak manipud iti Mateo 5:1–12 ken Lucas 6:20–26? Kasano a maigiddiat daytoy iti pannirigan iti lubong ti kinaragsak?

Ania ti isuro kenka dagitoy a bersikulo, agramant ti Lucas 6:46–49, maipapan iti panagbalin a maysa a disipulo ni Jesucristo? Ania ti mariknam a makaparegta nga aramidem tapno mapasayaat dagiti kababalin a nailadawan kadagitoy a bersikulo?

Kitaen met iti Pangiwanwan iti Nasantuan a Kasuratan, “Pammaregta,” scriptures.ChurchofJesusChrist.org; “Sermon on the Mount: The Beatitudes” (video), ChurchofJesusChrist.org.

Mateo 5:13

“Dakayo ti asin ti daga.”

Nabayagen a maar-aramat ti asin a mangtaginayon, mangparaman, ken mangpatarnaw. Adda met kaipapanan ti asin iti relihion para kadagiti Israelita. Adda pakainaiganna iti nagkauna a kannawidan ti panagisakripisio iti ayup iti babaen ti linteg ni Moises (kitaen iti Levitico 2:13; Dagiti Numero 18:19). No mapukaw ti raman ti asin, agbalin daytoy a natamnayen wenno “awanen ti kapapaayanna” (Mateo 5:13). Daytoy ti mapasamak no mailaok daytoy wenno marugitan kadagiti dadduma pay nga elemento.

Laglagipem daytoy bayat ti panangutobmo iti Mateo 5:13. Kasano a mapagtalinaedmonto ti ramanmo kas maysa a disipulo ni Jesucristo? Kasano a maipatungpalmonto ti mangtagtaginayon ken mangpatpatarnaw nga aramidmo kas asin ti daga?

Kitaen met iti Doktrina Ken Katulagan 103:9–10.

asin

“Dakayo ti asin ti daga” (Mateo 5:13).

Mateo 5:17–48; Lucas 6:27–35

Ti linteg ni Jesucristo ti nangsukat iti linteg ni Moises.

Nasdaaw dagiti disipulo a nakangngeg iti kinuna ni Jesus a dakdakkel koma ti kinalintegda ngem iti kinalinteg dagiti escriba ken Fariseo (kitaen iti Mateo 5:20), a nangipannakkel iti bagbagida no kasano ti kinaanepda a nagtulnog iti linteg ni Moises.

Bayat ti panangbasam iti Mateo 5:21–48 ken Lucas 6:27–35, ibilangmo ti panangmarka iti agpada a dagiti galad a kasapulan iti linteg ni Moises (“Nangngegyo a …”) ken no ania ti insuro ni Jesus a nangitag-ay kadagitoy a galad. Apay iti panagkunam a maysa a nangatngato a linteg ti wagas ti Mangisalakan?

Kas pagarigan, ania ti insuro ni Jesus iti Mateo 5:27–28 maipapan ti pagrebbengantayo iti pampanunottayo? Kasano a magun-odmo ti ad-adda a panangtiped kadagiti pampanunot ken rikna nga umay iti panunotmo ken pusom? (Kitaen iti Doktrina ken Katulagan 121:45).

Kitaen met iti “Sermon on the Mount: The Higher Law” (video), ChurchofJesusChrist.org.

Mateo 5:48

Pudno kadi a namnamaen ti Nailangitan nga Ama nga agbalinak a perpekto wenno awan pagkuranganna?

Insuro ni Presidente Russell M. Nelson:

“Ti balikas a naan-anay ket naipatarus manipud iti Griego teleios,; a kayatna a sawen ti ‘kumpleto.’ … Ti infinitive a porma ti verbo ket teleiono,, a kayatna a sawen ti ‘mangdanon iti adayo a pagpatinggaan, naan-anay a mapadur-as, pagbalinen a kumpleto, wenno mangileppas.’ Laglagipen a saan a mangipapanan ti balikas iti ‘pannakawayawaya manipud iti biddut’; kaipapananna ti ‘pananggun-od iti adayo a panggep.’ …

“… Insuro ti Apo, ‘Diyo kabaelan ti agibtur iti sango ti Dios ita … ; gapuna, ituloyyo a siaanus agingga nga agbalinkayo a naan-anay’ [Doktrina ken Katulagan 67:13].

“Nasken a ditayo maupay no dagiti napasnek a panagkagumaantayo nga agturong iti kinaan-anay ket kasla narigat ken awan patinggana. Ti kinaan-anay ket maur-uray a makumpleto. Mabalin laeng a makumpleto daytoy kalpasan ti Panagungar ken babaen laeng iti Apo. Urayen daytoy ti amin a mangipateg kenkuana ken mangtungpal kadagiti bilinna” (Perfection Pending,”,” Ensign, Nob. 1995, 86, 88).

Kitaen met iti 2 Pedro 1:3–11; Moroni 10:32–33; Doktrina ken Katulagan 76:69; Jeffrey R. Holland, “Be Ye Therefore Perfect—Eventually,” Liahona, Nob. 2017, 40–42.

icon iti sangapamiliaan a panagadal

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Mateo 5:1–9.Ania kadagiti pagbatayan a naisuro iti Mateo 5:1–9 ti makatulong iti pagtaenganyo nga agbalin a naragragsak pay a lugar? Mabalinmo a pilien ti maysa wenno dua a kasla nangnangruna a napateg iti pamiliam. Kas pagarigan, ania dagiti pannursuro a makitatayo a makatulong kadatayo nga agbalin a mamagkappia? (kitaen iti Mateo 5:21–25, 38–44). Ania dagiti panggep a tun-oyen a maitudingtayo? Kasano ti panangsurnadtayonto?

Mateo 5:13.Aggigiddan a mangan iti sumagmamano a taraon a nalaokan iti asin ken mangan iti isu met la a taraon nga awan ti asinna. Ania ti pagdumaan a madlawtayo? Ania ti kayat a sawen ti maaddaan iti “asin ti daga”? Kasano a maaramidtayo daytoy?

Mateo 5:14–16.Tapno matulongam ti pamiliam a makaawat no ania ti kaipapanan ti agbalin a “silaw ti lubong,” mabalinmo ti agsukisok iti sumagmamano a paggapuan ti lawag iti pagtaenganyo, iti kaarrubayo, ken iti lubong. Mabalin a makatulong ti panangipakita no ania ti mapasamak no ilemmengmo ti maysa a silaw. Ania ti kayat a sawen ni Jesus idi kinunana, “Dakayo ti silaw ti lubong”? (Mateo 5:14). Asino ti nagbalin a kas maysa a silaw para iti pamiliatayo? Kasano a makapagbalintayo a maysa a silaw iti dadduma? (kitaen iti 3 Nephi 18:16, 24–25).

Mateo 5:43–45.Bayat ti panagbasa ti pamiliam kadagiti balikas ti Mangisalakan kadagitoy a bersikulo, mabalinmo nga isarita no asino, kangrunaanna, ti mariknam a mabalinmo nga ayaten, bendisionan, ken ikararagan. Kasano a mapadur-astayo ti ayattayo para kadakuada?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Shine On,” Children’s Songbook, 144.

Panangpadur-as iti Panangisurotayo

Agbalin a managpaliiw. Kabayatan ti panangikasom iti no ania ti mapaspasamak iti biag dagiti [annakmo], masarakamto dagiti nasayaat a gundaway iti panangisuro. … Dagiti masao nga aramiden[da] wenno dagiti saludsod a damagenda ti mabalin a mangiturong kadagiti kanito iti panangisuro” (Panangisuro iti Wagas ti Mangisalakan, 16).

kandela

“Dakayo ti silaw ti lubong” (Mateo 5:14).