Ni Jesus a Mangikaskasaba iti Sermon iti Bantay, ni Gustave Doré

Pebrero 13–19

Mateo 5; Lucas 6

“Nagasatkayo”

Napateg ti gundaway a mangisuro kadagiti ubbing. Bayat ti panangisaganam iti bagim a naespirituan, tarabayennakanto ti Apo.

Yawis ti Panagbibinninglay

Kiddawen kadagiti ubbing nga agsarita maipapan iti maysa a banag nga inaramidda iti daytoy a lawas a mangibinglay ti silaw ti Apo iti maysa a tao—nalabit babaen iti panagbalin a nasayaat a pagwadan wenno panangipakita iti ayat ken kinaasi.

Isuro ti Doktrina: In-inaudi nga Ubbing

Mateo 5:9

Makapagbalinak a maysa a mamagkappia.

Mabalin a maaddaan iti nabileg nga impluensia ti pagtaengan dagiti ubbing a sursuruam bayat ti panangtratoda kadagiti dadduma iti ayat ken kinasayaat.

Dagiti Mabalin nga Aktibidad

• Ibasam ti Mateo 5:9 kadagiti ubbing, ken ilawlawagmo a dagiti mamagkakappia ket maaramidda iti sadino man a lugar a natalna, sadino man ti yanda. Mangisurat kadagiti akikid a papel iti sumagmamano a pagarigan dagiti narigat a situasion a mabalin a pakaipasanguan dagiti ubbing (kas pagarigan, panaggaapa dagiti agkakabsat iti maysa nga ay-ayam). Awisem iti tunggal ubing a mangala iti maysa nga akikid a papel. Bayat ti panangbasam iti tunggal senario, kiddawem kadagiti ubbing a mangibinglay no kasano a makapagbalinda a mamagkakappia iti dayta a situasion. Mangibinglay iti sumagmamano a di nakappapati a senario, ket tulongam dagiti ubbing a mangilasin kadagiti tao a maseknan no mamagkakappiada met laeng wenno saan.

• Awisem ti sumagmamano a nagannak dagiti ubbing a bumisita iti klasem ket mangibinglay kadagiti pagarigan ti panawen idi namagkakappia dagiti annakda iti pagtaengan.

Mateo 5:14–16

Kayat ni Jesus nga agbalinak a silaw iti dadduma.

Mabalin a maaddaan dagiti babassit nga ubbing iti nabileg nga impluensia para iti pagimbagan dagiti dadduma. Kasano a maparegtam ida a mangparaniag iti silawda?

Dagiti Mabalin nga Aktibidad

• Ipakitam dagiti ubbing ti sumagmamano a banag a mangted iti lawag, ken ipakitam ti maysa a ladawan dagiti ubbing. Basaem ti Mateo 5:14–16, ket ibagam kadagiti ubbing a maipada dagiti nasayaat a pagwadanda iti maysa a silaw a makita dagiti dadduma. Kasano a mausartayo ti silawtayo a mangyasideg kadagiti dadduma iti Dios?

• Pagsilawen ti maysa a flashlight iti siled, ket awisem dagiti ubbing a surotenda ti silaw kadagiti matada. Usarem ti silaw a mangiturong kadagiti matada iti maysa a ladawan ti Mangisalakan. Kasano a tulongannatayo ti silaw? Kasano a makapagbalintayo a silaw iti lubong? Kalubam ti flashlight. Ania ti mapasamak no ditayo ibinglay ti silawtayo wenno no ilemmengtayo daytoy?

• Ilemmengmo ti maysa a flashlight iti siled, ken iddepem dagiti silaw. Pasapulmo kadagiti ubbing daytoy. irebyum ti Mateo 5:15, ket isaritam no apay a nasken a ditayo ilemmeng ti silawtayo.

• Tulongam dagiti ubbing a mangsapul ken mangkolor kadagiti nailemmeng a kandela iti panid ti aktibidad iti daytoy a lawas.

• Makipagkansion kadagiti ubbing iti maysa a kanta maipapan iti panagbalin a maysa a silaw para iti dadduma, kas iti “Jesus Wants Me for a Sunbeam,” “Shine On,” wennoi “I Am like a Star” (Children’s Songbook, 60–61, 144, 163).

Makapagragsaktayo babaen ti panagbiag iti wagas nga insuro ni Jesus.

Mateo 5:44–45

Kayat ni Jesucristo nga ayatek ti tunggal maysa.

Mabalin a rugian dagiti in-inaudi nga ubbing itan a mangsanay a mangipakita iti ayat, uray no madi ti panangtrato kadakuada dagiti kapatada wenno kakabsatda. Bayat ti panangbasam iti Mateo 5:44–45, ibilangmo no kasano a mayaplikar dagiti sursuro ti Mangisalakan kadagiti ubbing a sursuruam.

Dagiti Mabalin nga Aktibidad

• Ilawlawagmo manen ti Mateo 5:44 nga us-usarem dagiti balikas ken situasion a maawatanto dagiti ubbing ken mainaig kadakuada. Kiddawen kadagiti ubbing a mangibinglay kadagiti panawen idi impakitada ti ayat para iti maysa a tao nupay narigat daytoy. Kasano ti riknada kadagitoy a padas?

• Kas maysa a klase, agkansion iti maysa a kanta maipapan iti panagayat iti dadduma, kas iti “Love One Another” (Children’s Songbook, 136–37). Ania ti masursurotayo manipud iti daytoy a kanta maipanggep iti panagayat iti dadduma?

• Ikkam dagiti ubbing kadagiti sinanpuso a papel nga addaan iti naisurat a balikas nga “Ipakitakto ti ayatko para iti tunggal maysa.” Kiddawem kadakuada nga arkosam dagitoy a puso ket isab-it dagitoy iti pagtaenganda kas panglaglagip nga ayatentayo dagiti dadduma.

Isuro ti Doktrina: In-inauna nga Ubbing

Mateo 5:3–12

Makapagragsakak no agbiagak iti wagas nga insuro ni Jesus.

Bayat ti panangbasam iti Mateo 5:3–12, ania dagiti balikas ken ragup ti balikas a napateg kenka? Kasano a bendisionanto dagioty a pannursuro ti biag dagiti ubbing a sursuruam?

Dagiti Mabalin nga Aktibidad

• Mangparnuay iti maysa a tsart iti pisara nga addaan iti dua a dasig nga addaan iti naisurat a Nagasat … ken Bendision. Awisem dagiti ubbing a mangsukisok iti Mateo 5:3–12 a mangsapsapul kadagiti kababalin dagiti kinuna ni Jesus a nagasat ken dagiti bendision nga inikarina kadakuada. Kalpasanna isuratmo iti tsart no ania ti masarakanda. Ilawlawag kadagiti ubbing no ania ti kaipapanan ti tunggal kababalin ken ti maitutop a bendision.

• Isurat ti tunggal kababalin manipud kadagitoy a bersikulo iti maysa a kard ken ti maitutop a bendision iti maysa a kard. Kas pagarigan, iti maysa a kard maisurat ti “naemma,” ken iti sabali a kard maisurat ti “matawidna ti daga” (bersikulo 5). Paiparismo kadagiti ubbing dagiti kababalin ken dagiti bendision. Pangalaem dagiti ubbing iti maysa kadagiti kababalin kadagitoy a bersikulo a kayatda a padur-asen.

Mateo 5:9, 21–24, 38–47

Makapagbalinak a maysa a mamagkappia.

Insuro ni Jesus a maawaganto dagiti mamagkakappia nga annak ti Dios. Kasano a maparegtam dagiti ubbing nga agbalin a mamagkakappia?

Dagiti Mabalin nga Aktibidad

• Awisem ti maysa nga ubing a mangbasa iti Mateo 5:9 iti napigsa. Ania ti maysa a mamagkakappia? Ania dagiti wagas a pakapagbalinantayo a mamagkakappia kadagiti pamilia ken gagayyemtayo? (Para iti sumagmamano a kapanunotan, kitaen dagiti bersikulo 21–24, 38–47.)

• Kiddawem iti tunggal ubing nga agpanunot iti maysa a kasasaad nga agkasapulan iti tulong ti maysa a mamagkappia. Ania ti aramiden ti maysa a mamagkappia iti daytoy a kasasaad?

• Awisem dagiti ubbing a mangibinglay kadagiti panawen idi nangipakitada iti ayat para iti maysa a tao, uray pay no maigiddiat dayta a tao kadakuada wenno narigat nga ayaten.

Mateo 5:14–16

Ti pagwadak mabalin a mangsilaw iti dalan a suroten dagiti dadduma ni Jesus.

Adu kadagiti ubbing a sursuruam ti nagaramid kadagiti katulagan iti panagbuniag. Panunotem no kasano a mainaig dagiti balikas ti Mangisalakan iti Mateo 5:14–16 kadagiti katulaganda. Ania dagiti mensahe a mabalin nga adda iti Apo iti daytoy a binatog para kadagiti ubbing iti klasem?

Dagiti Mabalin nga Aktibidad

• Tulongam dagiti ubbing a mangyulo iti Mateo 5:16. Isuratmo ti bersikulo iti pisara. Aggigiddankayo a mangbasa iti daytoy iti sumagmamano a gundaway, a mangpugpugas iti sumagmamano a balikas iti tunggal gundaway. Awisem dagiti ubbing a mangidrowing kadagiti banag a mabalinda nga aramiden tapno agbalin a silaw iti dadduma. Isaritam no kasano a mangtulong kadatayo ti panagbalin a silaw iti dadduma tapno maipatungpaltayo dagiti katulagantayo iti panagbuniag (kitaen iti Mosiah 18:8–10).

• Makipagkansion kadagiti ubbing iti maysa a kanta maipapan iti panangibinglay iti silaw iti dadduma, kas iti “Shine On” (Children’s Songbook, 144). Kasano a maibinglaytayo ti silaw ti Mangisalakan?

• Kiddawen kadagiti ubbing nga agdrowing kadagiti banag a mangted kadatayo iti silaw. Basaem ti Mateo 5:14–16. Saludsodem kadakuada no apay a kayat ni Jesus nga agbalintayo a silaw iti lubong.

• Awisem ti dua nga ubbing nga agsinnangoda, ket kiddawem iti maysa a padasenna a pagisemen ti maysa a saanna sagsagiden isuna. Isaritam maipapan iti bileg nga adda kadagiti ubbing a mangyeg iti ragsak kadagiti dadduma.

Yallukoy ti Panagsursuro iti Pagtaengan

Karitem dagiti ubbing a mangsiput iti maysa a tao nga agbalin a mamagkappia itoy a lawas. Iti rugi ti klase ti sumaruno a lawas, awisem ida nga agsarita maipanggep iti no siasino ken no ania ti nakitada.

Panangpadur-as iti Panangisurotayo

Tulongam dagiti ubbing nga agbalin nga aktibo. “Kabayatan ti panangisurom kadagiti ubbing, bay-am ida nga agbangon, agdrowing, agkolor, agsurat, ken agpartuat. Dagitoy a banag ti ad-adda pay ngem dagiti naragsak nga aktibidad—napategda iti panagsursuro” (Panangisuro iti Wagas ti Mangisalakan, 25).