“Pebrero 6–12. Juan 2–4: ‘Masapul Kadakayo a Mayanak a Mabaliwan’” Umaykayo, Sumurot Kaniak—Para iti Primary: Baro a Tulag 2023 (2022)
“Pebrero 6–12. Juan 2–4,” Umaykayo, Sumurot Kaniak—Para iti Primary: 2023
Pebrero 6–12
Juan 2–4
“Masapul Kadakayo ti Mayanak a Mabaliwan”
Iti ababa a klase ti Primary, awanto ti panawenmo a mangisuro iti amin a napapateg a pagbatayan iti Juan 2–4. Agkalikagum a maaddaan iti naespirituan a pannarabay maipapan no ania ti yunay-unay tapno maited dagiti kasapulan ken interes dagiti ubbing.
Yawis ti Panagbibinninglay
Tapno maallukoy dagiti ubbing a mangibinglay no ania ti masursuro ken mapadpadasanda, saludsodem kadakuada no ania ti inaramidda itay kallabes tapno agbalin a “dumakdaklis kadagiti tao” (Mateo 4:19). Mabalin a kayatmo nga irebyu kadakuada ti leksion itay napalabas a lawas.
Isuro ti Doktrina: In-inaudi nga Ubbing
Nasken a mabuniagan ken makumpirmaannak tapno makasubliak a makipagnaed iti Nailangitan nga Ama.
Agsagsagana dagiti ubbing a sursuruam a mangala iti napapateg nga addang tapno makipagnaed manen iti Nailangitan nga Ama babaen ti panagpabuniag (mayanak iti danum) ken makumpirmaan (mayanak iti Espiritu). Kasano a matulongam ida a makaawat iti pateg dagitoy dua nga ordinansa?
Dagiti Mabalin nga Aktibidad
-
Gupgopem ti estoria ni Jesus a mangisursuro ken ni Nicodemo (kitaen iti Juan 3:1–10). Ikarim kadagiti ubbing a no mabuniaganda, mangtedto kadakuada ti Nailangitan nga Ama iti sagut ti Espiritu Santo.
-
Ipakitam kadagiti ubbing ti panid ti aktibidad iti daytoy a lawas, ken idawatmo kadakuada a mangiladawan kadagiti drowingda. Basaem ti Juan 3:5, ken paneknekam a kasapulantayo ti mabuniagan ken makumpirmaan tapno makipagnaed manen iti Nailangitan nga Ama.
-
Kiddawen kadagiti ubbing a mangisarita no ania ti aramidenda a mangbuggo kadagiti imada. Ipakitam iti ladawan Ti Babai a Mabumbuniagan ’ (Libro ti Arte ti Ebanghelio,, num.104), ket tulongam dagiti ubbing a mangyarig iti panangbuggo kadagiti imatayo iti danum iti panagbalin a naespirituan a nadalus babaen ti panagbuniag.
Ay-ayatennak ti Nailangitan nga Ama, isu nga inikkannak iti maysa a Mangisalakan.
Kasano a matulongam dagiti ubbing a masursuruan iti daytoy napateg a kinapudno?
Dagiti Mabalin nga Aktibidad
-
Kiddawen kadagiti ubbing a mangileppas kadagiti binatog kas iti daytoy: a “Gapu ta ay-ayatennak dagiti nagannak kaniak, isuda …” Basaen ti Juan 3:16. Kalpasanna tulongam ti tunggal ubing a mangulit iti Juan 3:16, a suksukatam dagiti balikas a “ti lubong” iti bukodna a nagan. Tulongam dagiti ubbing a mangkita no ania ti kuna daytoy a bersikulo nga inaramid ti Nailangitan nga Ama gapu ta ay-ayatennatayo. Awisem dagiti ubbing nga agdrowing iti maysa a ladawan ni Jesus. Paibinglay kadakuada dagiti drowingda iti tunggal maysa ket ipeksa ti ayatda iti Mangisalakan.
-
Aggigiddan nga agkansion iti maysa a kanta a maipapan ken ni Jesus, kas iti “He Sent His Son” (Children’s Songbook, 34–35). Paigganam kadagiti ubbing ti maysa a ladawan ni Jesus iti tunggal kanito a kantaenda ti maysa a balikas a kas iti “Anak,” “Jesus,” wenno “Mangisalakan.”
Ni Jesucristo ti “nabiag a danumko.”
Makarikna dagiti amin nga ubbing iti klasem iti pannakawaw. Kasano a mausarmo dayta a padas a mangtulong kadakuada a makaawat no kasano a kasapulantayo unay ti nabiag a danum nga idiaya ni Jesucristo?
Dagiti Mabalin nga Aktibidad
-
Usarem ti ladawan iti balabala ita a lawas iti Umaykayo, Sumurot Kaniak—Para kadagiti Indibidual ken Pamilia tapno mangisarita iti estoria maipapan ken ni Jesus ken ti babai iti abay ti bubon (kitaen iti Juan 4:5–15). Kiddawem kadagiti ubbing a mangulit a mangisarita iti estoria.
-
Ipakitam ti maysa a baso ti danum, ket isaritam kadagiti ubbung no apay a kasapulantayo ti danum. Gupgopen biit ti Juan 4:5–15, ket paneknekam a ni Jesucristo ken ti ebangheliona ti mangted iti biag kadagiti espiritutayo, kas met la iti danum a mangted iti biag kadagiti bagitayo.
Isuro ti Doktrina: In-inauna nga Ubbing
Madayawko ni nanangko kas iti inaramid ni Jesus.
Iti kallaysa iti Cana, imbaga ni Maria ken ni Jesus a naibusen ii arak. Segun iti Patarus ni Joseph Smith, sinungbatan ni Jesus ti inana babaen ti panagsaludsodna, “Babai, ania ti paaramidmo kaniak a maipaay kenka? nga aramidekto” (iti Juan 2:4, footnote a). Ni Jesus ti maysa a pagwadan ti no kasano a tratuentayo dagiti innatayo.
Dagiti Mabalin nga Aktibidad
-
Awisem dagiti ubbing a mangbasa iti Juan 2:1–11 ken agsisinnublatda a mangulit a mangisarita kadagiti estoria iti bukodda a balikas.
-
Kiddawen kadagiti ubbing nga agilista kadagiti banag a mabalin a makatulong iti inada. Awisem ida a mangsanay iti no ania ti mabalin nga isaoda kenkuana nga us-usarenda ti sumagmamano a balikas ni Jesus: “Ania ti ipaaramidmo kaniak a maipaay kenka?” (Juan 2:4, footnotea).
-
Awisem ti sumagmamano nga inna a bumisita iti klasem ken ibinglayda no ania ti ar-aramiden dagiti annakda a mangipakita iti panagdayawda kadakuada.
Kinuna ni Jesus iti inana, “Ania ti paaramidmo kaniak a maipaay kenka?” (Patarus ni Joseph Smith, Juan 2:4 [iti Juan 2:4, footnotea]).
Mayarig ti pannakabuniag ken pannakakumpirma iti pannakayanak a mabaliwan.
No mabuniagantayo, nga inawagan ni Jesus iti “pannakayanak iti danum,” awatentayo ti pannakapakawan dagiti basbasoltayo ken mabalintayo ti “sumrek iti pagarian ti Dios” (Juan 3:5). Kasano a matulongam dagiti ubbing a sursuruam a makaawat no ania ti kaipapanan ti pannakayannak a mabaliwan?
Dagiti Mabalin nga Aktibidad
-
Manggetteng kadagiti akikid a papel a mangipakpakita kadagiti balikas ti Mangisalakan iti Juan 3:3, ken paurnosmo kadagiti ubbing dagitoy iti husto nga urnos. Kasano a mayarig ti pannakabuniag ken pannakakumpirma iti pannakayannak manen?
-
Idisplay ti maysa a ladawan ti maysa a kayyanak a maladaga ken ti maysa a tao a mabumbuniagan ken makumkumpirmaan (kitaen iti Libro ti Arte ti Ebanghelio, num.104–5). Kasano a maipadatayo iti maysa a kayyanak a maladaga kalpasan a mabuniagan ken makumpirmaantayo? (kitaen iti Juan 3:3–5).
-
Awisem dagiti ubbing a mangibinglay kadagiti lagip iti panagbuniagda. Basaem ti Mosiah 18:8–10 ken Doktrina ken Katulagan 20:37 a mangrebyu iti katulagan iti panagbuniag. Isurom kadagiti ubbing a ti sipapanunot a pannakiranudda iti sakramento iti tunggal lawas ket maysa a wagas tapno agtultuloy ti proseso ti pannakayanak a mabaliwan.
-
Tulongam dagiti ubbing a mangyulo iti Pagannurotan ti Pammati 1:4.
Ay-ayatennak ti Nailangitan nga Ama, isu nga imbaonna ti Anakna.
Kasano a matulongam dagiti ubbing a maammuanda a naibaon iti daga ni Jesucristo kas maysa a panangipeksa iti ayat ti Nailangitan nga Ama?
Dagiti Mabalin nga Aktibidad
-
Kiddawen kadagiti ubbing a mangidrowing iti ladawan ti paggugustoda a sagut ken ti tao a nangted kadakuada iti dayta a sagut. Kalpasanna kiddawem iti maysa nga ubing a mangbasa iti Juan 3:16. Ania ti sagut nga inted ti Nailangitan nga Ama kadatayo? Kasano nga ipakita daytoy a sagut ti ayatna?
-
Kiddawen kadagiti ubbing a mangsapul iti sungbat iti saludsod “Apay nga imbaon ti Nailangitan nga Ama ni Jesucristo kadatayo?” kabayatan ti panangbasada iti Juan 3:16–17 wenno panangkanta wenno panangdenggegda iti “He Sent His Son” (Children’s Songbook, 34–35).
Idiaya kaniak ni Jesucristo ti “nabiag a danum.”
Kas met la iti panangusar ni Jesus iti danum a mangisuro iti babai iti Samaria, mabalinmo nga usaren ti danum a mangisuro kadagiti ubbing no apay a kasapulantayo ti ebanghelio ni Jesucristo.
Dagiti Mabalin nga Aktibidad
-
Iti panangusar iti Juan 4:5–23, mangisurat kadagiti nagupgop a binatog manipud iti estoria ti babai iti bubon. Kiddawen kadagiti ubbing nga agibasar kadagitoy a bersikulo tapno pagsasaganaden dagiti binatog iti husto nga urnos. Ania ti padpadasen nga isuro ni Jesus iti babai?
-
Ikkam dagiti ubbing iti mainum a danum, ken kiddawem kadakuada a mangibinglay kadagiti padasda idi nawawda. Saritaem no kasano ti rikna ti makaala iti mainum iti danum iti kamaudiananna. Awisem dagiti ubbing a mangibaga kadagiti banag a, kas iti maysa a tasa ti danum, a makapennek iti apagkanito kadatayo. Ania dagiti banag a kas iti “nabiag a danum” a mangpakapnek kadatayo iti agnanayon?
-
Isuratmo iti pisara ti Kasano a maipada iti ebanghelio iti danum? Kiddawen kadagiti ubbing a mangpanunot no kasano a sungbatanda daytoy a saludsod bayat iti panangbasada iti Juan 4:5–23.
Yallukoy ti Panagsursuro iti Pagtaengan
Ibilang ti panangidawat kadagiti ubbing a mangtedda kadagiti miembro ti pamiliada iti mainum a danum inton makaawidda. Bayat ti panangaramidda, mabalinda nga ibinglay no anai ti nasursuroda maipapan iti sibibiag a danum.
Panangpadur-as iti Panangisurotayo
Usarem dagiti panid ti aktibidad. Bayat ti panangileppas dagiti ubbing kadagiti panid ti aktibidad, usarem ti oras a mangrebyu kadagiti pagbatayan manipud iti adalen.