“Pebrero 6–12. Juan 2–4: ‘Masapul Kadakayo ti Mayanak a Mabaliwan,’” Umaykayo, Sumurot Kaniak—Para kadagiti Indibidual ken Pamilia: Baro a Tulag 2023 (2022)
“Pebrero 6–12. Juan 2–4,” Umaykayo, Sumurot Kaniak—Para kadagiti Indibidual ken Pamilia: 2023
Pebrero 6–12
Juan 2–4
“Masapul Kadakayo ti Mayanak a Mabaliwan”
Bayat ti panangbasam iti Juan 2–4, isuronto ti Espiritu Santo kenka dagiti banag maipapan iti bukodmo a pannakapasurot wenno kumbersion. Ilistam dagiti pariknana. Mabalin a masarakam dagiti mainayon a naespirituan a nalawag a pannakaammo ken pannakaawat [insights] manipud kadagiti kapanunotan iti panagadal iti daytoy a balabala.
Isuratmo dagiti Impresionmo
Iti maysa a pasken ti kallaysa idiay Cana, pinagbalin ni Cristo ti danum iti arak—maysa a pasamak nga inawagan ni Juan iti “pangrugian dagiti datdatlag nga aramid” (Juan 2:11). Pudno dayta iti ad-adu ngem maysa a kaipapanan. Idinto a daytoy ti immuna a milagro nga inaramid ni Jesus iti kaaduan, daytoy pay ti mabalin a mangisimbolo iti sabali pay a namilagruan a pangrugian—ti proseso ti pannakabalbaliw dagiti pusotayo bayat ti panagbalintayo nga ad-adda pay kas iti Mangisalakantayo. Mangrugi daytoy a milagro iti unos ti panagbiag nga addaan iti pangngeddeng a mangsurot ken ni Jesucristo, tapno agbalbaliw ken agbiag iti nasaysayaat a biag babaen Kenkuana. Daytoy a milagro mabalin a makapagbalbaliw unay iti biag a ti panangbalin a “mayanak a mabaliwan” ket maysa kadagiti kapintasan a wagas a mangiladawan iti daytoy (Juan 3:7). Ngem ti pannakayanak manen ti pangrugian laeng ti dana ti kinadisipulo. Dagiti balikas ni Cristo iti babai a Samaritano iti abay ti bubon ti mangipalagip kadatayo a no agtultuloytayo iti daytoy a dana, iti kamaudiananna agbalinto ti ebanghelio nga “ubbog ti danum” iti kaunggantayo, nga “agburayok a maipaay iti biag nga agnanayon” (Juan 4:14).
Dagiti Kapanunotan para iti Bukod a Panagadal iti Nasantuan a Kasuratan
Dagiti milagro ni Jesucristo “nangiparangarang iti dayagna.”
Bayat ti panangbasam maipapan iti panangbaliw ti Mangisalakan iti danum ti arak iti Juan 2:1–11, mabalinmo a gun-oden dagiti nayon a nalawag a pannakaammo ken pannakaawat babaen iti panangibilang kadagiti pannirigan dagiti nadumaduma a tao nga adda sadiay, agraman ni Maria, dagiti disipulo, ken dadduma pay. No nasaksiam dagiti pasamak a nailadawan ditoy, ania koma dagiti impresionmo ken ni Jesus? Ania iti isuro kenka daytoy a milagro maipapan Kenkuana?
Masapul a mayanakak manen tapno sumrek iti pagarian ti Dios.
Idi immay a nalimed ni Nicodemo ken ni Jesus, naannad ti panagpaliiwna. Nupay kasta, idi agangay, sinalaknibanna ni Jesus iti kaaduan (kitaen iti Juan 7:45–52) ket nakitipon kadagiti mamati iti pannakaitanem ti Mangisalakan (kitaen iti Juan 19:38–40). Ania dagiti pannursuro a masarakam iti Juan 3:1–21 a mabalin a nangparegta ken ni Nicodemo a sumurot ken ni Jesus ket mayanak manen?
Insuro ni Propeta Joseph Smith a,”Ti pannakayanak manen, ket maisangbay babaen ti Espiritu ti Dios babaen kadagiti ordinansa” (Teachings of Presidents of the Church: Joseph Smith [2007],95). Ania ti papel nga akmen ti panagbuniag ken kumpirmasionmo—panagbalin a “mayanak iti danum ken iti Espiritu” (Juan 3:5)—iti pannakayanakmo a mabaliwan? Ania ti ar-aramidem a mangituloy iti daytoy a proseso ti panagbalbaliw? (kitaen iti Alma 5:11–14).
Kitaen met iti Mosiah 5:7; 27:25–26; David A. Bednar, “Ye Must Be Born Again,” Liahona, Mayo 2007, 19–22.
Ipakita ti Nailangitan nga Ama ti ayatna para kaniak babaen ken ni Jesucristo.
Insuro ni Elder Jeffrey R. Holland, “Ti umuna a naindaklan a kinapudno ti amin a kinaagnanayon nga ay-ayatennatayo ti Dios iti amin a puso kabaelan, panunot, ken pigsana” (“Tomorrow the Lord Will Do Wonders among You,” Liahona, Mayo 2016, 127). Kasano ti pannakariknam iti ayat ti Dios babaen ti sagut ti Anakna?
Mangipaay ti sakramento iti oras a mangutob iti ayat ti Dios ken ti sagut ti Anakna. Ania dagiti himno ti sakramento a makatulong kenka a makarikna iti daytoy nga ayat? Ania ti mabalin nga aramidem tapno mapagbalin a napatpateg ti sakramento?
Bayat ti panangtultuloymo a mangbasa maipapan kadagiti pannursuro ken ministro ti Mangisalakan, saludsodem iti bagim no kasano a mangtulong kenka a makaawat ken mangrikna iti ayat ti Dios dagiti banag a nabasam.
Maysa kadi nga espiritu ti Dios?
Mabalin nga adda dagiti matikaw iti palawag ni Jesus a ti Dios ket maysa nga espiritu. Ti Patarus ni Joseph Smith iti daytoy a bersikulo ti mangipaay iti napateg a pannakailawlawag: “Ta adda nangikarian ti Dios iti Espirituna” (in Juan 4:24, footnote a). Isuro met ti kabaruanan a paltiing a ti Dios addaan iti bagi a nagtagilasag ken nagtagitulang (kitaen iti Doktrina ken Katulagan 130:22–23; kitaen met iti Genesis 5:1–3; Hebreo 1:1–3).
Indiaya ni Cristo kaniak ti nabiag a danumna.
Ania ti mabalin a kayat a sawen ni Jesus idi imbagana iti Samaritano a babai a siasino man nga uminom iti danum nga idiayana ket dinto pulos mawaw? Kasano a maipada ti ebanghelio iti nabiag a danum?
Ti ebanghelio ni Cristo ti nabiag a danum a mangtaraon kadagiti kararuatayo.
Maysa kadagiti mensahe ti Mangisalakan iti babai a Samaritano ket ti no kasano ti panagdaydayawtayo ket napatpateg ngem iti no sadino ti pagdaydayawantayo (kitaen iti Juan 4:21–24). Ania dagiti ar-aramidem tapno “agdaydayaw iti Ama iti espiritu ken iti kinapudno”? (Juan 4:23).
Kitaen met iti Pangiwanwan iti Nasantuan a Kasuratan, “Agdaydayaw,” scriptures.ChurchofJesusChrist.org; Dean M. Davies, “The Blessings of Worship,” Liahona, Nob. 2016, 93–95.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Juan 2–4.Bayat ti panangbasa ti pamiliam kadagitoy a kapitulo ita a lawas, nangnangruna nga ikasom no kasano nga inusar ti Mangisalakan dagiti inaldaw a banag—pannakayanak, angin, danum, ken taraon—a mangisuro kadagiti naespirituan a kinapudno. Ania dagiti bambanag iti pagtaenganyo ti mabalinmo nga usaren a mangisuro kadagiti naespirituan a kinapudno?
Bayat ti panagadalmo kadagitoy a kapitulo, ibilang ti aggigiddan a panangbuya kadagiti video a mangiladawan kadagitoy a pasamak: “Jesus Turns Water into Wine,” “Jesus Cleanses the Temple,” “Jesus Teaches of Being Born Again,” and “Jesus Teaches a Samaritan Woman” (ChurchofJesusChrist.org).
-
Juan 2:13–17.Ania dagiti narugit nga impluensia a nasken a saan a pagtalinaeden ti pamiliam iti pagtaenganyo tapno agbalin daytoy a sagrado a lugar—kas iti templo? Ania ti aramidem tapno saan a mapagtalinaed dagitoy a banag?
-
Juan 3:1–6.Kasaom ti pamiliam maipanggep iti milagro ti panagsikog ken panagpasngay—ti proseso ti panagparsua iti maysa a sibibiag, nasaririt a tao. Insuro ni Jesus a masapul a mayanaktayo manen sakbay ti iseserrek iti pagarian ti Dios. Apay a ti pannakayanak manen ket napintas a pangiladawan iti panagbalbaliw a kasapulantayo sakbay a makastrektayo iti pagarian ti Dios? Kasano a mapadasantayo ti proseso ti naespirituan a pannakayanak manen?
-
Juan 3:16–17.Awisem dagiti miembro ti pamilia a mangisao manen kadagitoy a bersikulo iti bukodda a balikas a kasla ilawlawagda dagitoy iti maysa a gayyem. Kasano a nakatulong ni Cristo kadatayo a mangrikna iti ayat ti Dios?
-
Juan 4:5–15.Ania ti insursuro kadatayo ti Mangisalakan idi indiligna ti ebangheliona iti nabiag a danum? Nalabit a mabalin a sapulen ti pamiliam ti sumagmamano nga agay-ayus a danum ket mangilawlawag kadagiti kalidad ti danum. Apay a kasapulantayo ti uminom iti danum iti inaldaw? Iti ania a wagwagas a maidasig ti ebanghelio ni Jesucristo iti “ubbog ti danum nga agburayok a maipaay iti biag nga agnanayon”? (Juan 4:14).
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Naisingasing a kanta: “God’s Love,” Children’s Songbook, 97.
Panangpadur-as iti Bukod a Panagadal
Agsapul kadagiti simbolo. Masansan nga usaren dagiti nasantuan a kasuratan dagiti banag, pasamak, wenno tignay a mangibagi kadagiti naespirituan a kinapudno. Mapabaknang dagitoy a simbolo ti pannakaawatmo iti doktrina a maisursuro. Kas pagarigan, inyarig ti Mangisalakan ti pannakapasurot wenno kumbersion iti pannakayanak manen.
Nabiag a Danum, ni Simon Dewey