Ti stained-glass a tawa iti Templo ti Nauvoo Illinois, ni Tom Holdman

Enero 23–29

Mateo 3; Marcos 1; Lucas 3

“Isaganayo ti Dalan ti Apo”

Rugian babaen ti panangbasa iti Mateo 3; Marcos 1; ken Lucas 3. Bayat ti panagkararagmo para iti Espiritu Santo tapno tulongannaka a makaawat kadagitoy a kapitulo, itednanto kenka dagiti nalawag a pannakaammo ken pannakaawat a nangnangruna para kenka. Isuratmo dagitoy nga impresion, ket agaramid kadagiti plano nga agtignay kadagitoy.

Isuratmo dagiti Impresionmo

Makapagbalbaliw kenka ni Jesucristo ken ti ebangheliona. Inadaw ni Lucas ti nagkauna a padto ni Isaias a nailadawan iti mision ni Juan Bautista ken ti adda nga epekto ti yaay ti Mangisalakan: “Amin a baet ti bambantay mapnonto, ket maipababanto amin a bantay ken turod; ket ti nakillo malintegto, ket dagiti dalan a dakes mapalanasdanto” (Lucas 3:5; kitaen met iti Isaias 40:4). Daytoy ti maysa a mensahe a para kadatayo amin, agraman dagiti mangipagarup a saanda makapagbalbaliw. No mabalin a mapatag ti maysa a banag a permanente kas iti bantay, ngarud awan duadua a matulongannatayo ti Apo a mangilinteg kadagiti nakillo a dalantayo (kitaen iti Lucas 3:4–5). No awatentayo ti awis ni Juan Bautista nga agbabawi ken agbalbaliw, maisaganatayo dagiti pampanunot ken puspusotayo nga umawat ken ni Jesucristo tapno “makita[tayo met] ti panangisalakan ti Dios” (Lucas 3:6).

Dagiti Kapanunotan para iti Bukod a Panagadal iti Nasantuan a Kasuratan

Asino ni Marcos?

Maibilang kadagiti awtor dagiti Ebanghelio, kabassitan ti ammotayo maipapan ken ni Marcos. Ammotayo nga isu ti misionario a kadua da Pablo, Pedro, ken ti sumagmamano a dadduma pay a misionario. Adu nga iskolar ti biblia ti mamati a ni Pedro ti nangbilin ken ni Marcos a mangisurat kadagiti pasamak iti biag ti Mangisalakan. Nalabit a naisurat ti Ebanghelio ni Marcos sakbay dagiti dadduma pay a tallo.

Kitaen met iti Pangiwanwan iti Nasantuan a Kasuratan, “Marcos.”

Mateo 3:1–12; Macos 1:1–8; Lucas 3:2–18

Ti panagbabawi ket naisangsangayan a panagbalbaliw ti panunot ken puso.

Mision ni Juan Bautista ti mangisagana iti puspuso dagiti tao nga umawat iti Mangisalakan ken agbalin nga ad-adda pay a kas Kenkuana. Kasano nga inaramidna daytoy? Impakdaarna ti, “Agbabawikayo” (Mateo 3:2). Inusarna dagiti ladawan kas iti bunga ken trigo a mangisuro maipapan iti panagbabawi (kitaen iti Lucas 3:9,17).

Ania dagiti dadduma pay a ladawan a masarakam kadagiti pakaammuan ti panagministro ni Juan Bautista? (kitaen iti Mateo 3:1–12; Marcos 1:1–8; Lucas 3:2–18). Ibilang ti panangmarkam kadagitoy kadagiti nasantuan a kasuratam wenno panangidrowing kadagiti ladawanda. Ania ti maisuro dagitoy a ladawan maipanggep iti doktrina ken kasapulan ti panagbabawi?

Ti napudno a panagbabawi ket “panagbalbaliw iti panunot, napabaro a pannirigan maipanggep iti Dios, maipanggep iti bukod a bagi, ken maipanggep iti lubong. … [Kayatna a sawen] ti panangiturong iti puso ken pagayatan iti Dios” (Pangiwanwan iti Nasantuan a Kasuratan, “Agbabawi, Panagbabawi”). Iti Lucas 3:7–14, ania dagiti panagbalbaliw nga inyawis ni Juan nga aramiden dagiti tao tapno agsagana nga umawat ken ni Cristo? Kasano a mayaplikar kenka daytoy a pammagbaga? Kasano a maipakitam a pudno a nagbabawikan? (Kitaen iti Lucas 3:8).

Kitaen met iti Russell M. Nelson, “We Can Do Better and Be Better,” Liahona,, Mayo 2019, 67–69; Dallin H. Oaks, “Cleansed by Repentance,” Liahona, Mayo 2019, 91–94.

Mateo 3:7; Lucas 3:7

Asino dagiti Fariseo ken Saducio?

Dagiti Fariseo ket miembro ti maysa a gunglo dagiti Judio a mainaig iti relihion a nagpannakkel iti bagbagida iti naiget a panagtungpal iti linteg ni Moises ken dagiti ritualna. Dagiti Saducio ket babaknang a klase ti Judio nga addaan iti dakkel nga impluensia a mainaig iti relihion ken politika, saanda a mamati iti doktrina ti panagungar. Kimmayakay ti agpada a grupo manipud iti orihinal a panggep dagiti linteg ti Dios.

Kitaen met iti Mateo 23:23–28; Pangiwanwan iti Nasantuan a Kasuratan, “Fariseo,” “Saducio.”

Mateo 3:11, 13–17; Marcos 1:9–11; Lucas 3:15–16, 21–22

Nabuniagan ni Jesucristo tapno “ipatungpal ti amin a kinalinteg.”

Idi nabuniaganka, sinurotmo dagiti pagwadan ti Mangisalakan. Idilig no ania ti masursurom manipud kadagitoy a pakaammuan maipapan ti panagbuniag ti Mangisalakan iti no ania ti napasamak kabayatan ti panagbuniagmo.

Ti Panagbuniag ti Mangisalakan	Ti Panagbuniagko
Ti Panagbuniag ti Mangisalakan Asino ti nangbuniag ken ni Jesus, ken ania ti turay nga iggemna?	Ti Panagbuniagko Asino ti nangbuniag kenka, ken ania ti turay nga iggemna?
Ti Panagbuniag ti Mangisalakan Sadino ti nagbuniagan ni Jesus?	Ti Panagbuniagko Sadino ti nagbuniagam?
Ti Panagbuniag ti Mangisalakan Kasano ti pannakabuniag ni Jesus?	Ti Panagbuniagko Kasano ti pannakabuniagmo?
Ti Panagbuniag ti Mangisalakan Apay a nabuniagan ni Jesus?	Ti Panagbuniagko Apay a nabuniaganka?
Ti Panagbuniag ti Mangisalakan Kasano nga impakita ti Nailangitan nga Ama a naragsakan Isuna ken ni Jesus?	Ti Panagbuniagko Kasano nga impakita ti Nailangitan nga Ama a naragsakan Isuna idi nagpabuniagka? Kasano nga impakitana iti yaanamongna manipud idin?

Kitaen met iti 2 Nephi 31; Mosiah 18:8–11; Doktrina ken Katulagan 20:37, 68–74; “The Baptism of Jesus” (video), ChurchofJesusChrist.org.

Mateo 3:16–17; Marcos 1:9–11; Lucas 3:21–22

Tallo a nagsisina a kinatao dagiti miembro ti Kinadios.

Aglaon ti Biblia iti adu a pakapaneknekan a tallo a nagsisina a kinatao dagiti miembro ti Kinadios. Maysa a pagarigan dagiti pakaammuan ti panagbuniag ti Mangisalakan. Bayat ti panangbasam kadagitoy a pakaammuan, utobem no ania ti nasursurom maipapan iti kinadios. Apay a napateg kenka dagitoy a doktrina?

Kitaen met iti Genesis 1:26; Mateo 17:1–5; Juan 17:1–3; Dagiti Aramid 7:55–56; Doktrina ken Katulagan 130:22.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Mateo 3.Iggem ni Juan Bautista ti Aaronic Priesthood. Ania ti masursurotayo manipud iti pagwadan ni Juan maipapan kadagiti panggep ti Aaronic Priesthood? Ania dagiti bendision nga awatentayo gapu iti Aaronic Priesthood? No addaankayo iti maysa a barito iti pamiliayo, mabalin a bubosem ti oras a mangtulong kenkuana a makaawat no kasano a mausarna ti Aaronic Priesthood a mangbendision iti dadduma. (Kitaen met iti Doktrina ken Katulagan 13:1; 20:46–60.)

No nabuniagantayon, naugasanen dagiti basoltayo.

Mateo 3:11–17; Marcos 1:9–11; Lucas 3:21–22.Nakita kadin dagiti miembro ti pamiliam iti maysa a tao a mabumbuniagan wenno makumkumpirmaan a miembro ti Simbaan? Ania ti narikna dagiti miembro ti pamilia? Nalabit a maisurom ida maipapan iti simbolismo ti panagbuniag ken kumpirmasion. Kasano a mayarig ti pannakabuniag ken pannakakumpirma iti baro a pannakayanak? Apay a naan-anay a mairaremtayo iti danum no agbuniagtayo? Apay nga agkawestayo iti puraw no agbuniagtayo? Apay a nailadawan ti sagut ti Espiritu Santo a kas “panagbuniag iti apuy”? (Doktrina ken Katulagan 20:41; kitaen met iti Pangiwanwan iti Nasantuan a Kasuratan, “Panagbuniag,” “Espiritu Santo”).

Mateo 3:17; Macos 1:11; Lucas 3:22.Kaano ti pannakariknatayo a naragsakan ti Dios kadatayo? Ania ti mabalintayo nga aramiden kas maysa a pamilia a mangparagsak iti Dios?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a kanta: “Baptism,” Children’s Songbook, 100–101.

Panangpadur-as iti Bukod a Panagadal

Agpatulongka iti Apo. Naited dagiti nasantuan a kasuratan babaen ti paltiing, ket tapno pudno a maawatan dagitoy, kasapulantayo ti bukod a paltiing. Inkari ti Apo, “Agdawatkayo, ket maikkankayto, agsapulkayo, ket makasarakkayto; umawagkayo, ket mailukatankayto” (Mateo 7:7).

Ni Juan Bautista a Mangbumbuniag ken ni Jesus, ni Greg K. Olsen