“Enero 2–8. Mateo 1; Lucas 1: ‘Maaramid Koma Kaniak Kas iti Saom’” Umaykayo, Sumurot Kaniak—Para Kadagiti Indibidual ken Pamilia: Baro a Tulag 2023 (2022)
“Enero 2–8. Mateo 1; Lucas 1,” Umaykayo, Sumurot Kaniak—Para Kadagiti Indibidual ken Pamilia: 2023
Enero 2–8
Mateo 1; Lucas 1
“Maaramid koma Kaniak kas iti Saom”
Bayat ti panangbasam ken panangutobmo iti Mateo 1 ken Lucas 1, isuratmo dagiti naespirituan nga impresion a maawatmo. Ania dagiti doktrina ti kinapudno a masarakam? Ania dagiti mensahe nga agbalinto a kapatgan kenka ken iti pamiliam? Dagiti kapanunotan kadagitoy a balabala ti mabalin a makatulong kenka a mangtakuat kadagiti nayon a nalawag a pannakaammo ken pannakaawat [insights].
Isuratmo dagiti Impresionmo
Manipud iti mortal a pannirigan, saan a mabalin daytoy. Saan a kabaelan ti maysa a birhen ti aginaw— kasta met a di kabaelan ti maysa a lupes a babai a nabaketanen tapno makapagpasngay iti anak. Ngem adda plano ti Dios para iti pannakayanak ti Anakna ken ti pannakayanak ni Juan Bautista, isu a da Maria ken Elisabet, iti laksid ti amin a tubeng, nagbalinda nga inna. Mabalin a makatulong iti pananglagiptayo kadagiti namilagruan a padasda no maipasangotayo iti maysa a banag a kasla imposible. Maparmektayo kadi dagiti pagkapsutantayo? Masagidtayo ngata ti puso ti awan essemna a dumngeg iti ebanghelio a miembro ti pamilia? Nalaka koma a nakisao kadatayo ni Gabriel idi impalagipna ken ni Maria, “Iti Dios awanto ti di mabalin” (Lucas 1:37). Ket ti sungbat ni Maria ket mabalin met a para kadatayo no ipalgak ti Dios ti pagayatanna: “Maaramid koma kaniak kas iti saom” (Lucas 1:38).
Dagiti Kapanunotan para iti Bukod a Panagadal iti Nasantuan a Kasuratan
Siasino da Mateo ken Lucas?
Maysa a publikano a Judio ni Mateo, wenno agsingsingir iti buis, nga inawagan ni Jesus kas maysa kadagiti Apostolna (kitaen iti Mateo 10:3; kitaen met iti Pangiwanwan iti Nasantuan a Kasuratan, “Agsingsingir iti Buis”). Insurat ni Mateo ti Ebangheliona a kangrunaanna kadagiti padana a Judio; ngarud, pinilina nga inyunay-unay dagiti padto iti Daan a Tulag maipapan iti Mesias a naipatungpal babaen ti biag ken panagministro ni Jesus.
Maysa a Gentil (saan a Judio) a mangngagas ni Lucas a nagbaniaga a kaduana ni Apostol Pablo. Insuratna ti Ebangheliona kalpasan ti ipapatay ti Mangisalakan a kangrunaan a naiturong kadagiti agbasbasa a saan a Judio. Impaneknekna ti maipapan ken ni Jesucristo a kas Mangisalakan kadagiti agpada a Gentil ken Judio. Insuratna dagiti nasaksian a pakaammuan maipapan dagiti pasamak iti biag ti Mangisalakan, ken inramanna dagiti ad-adu pay nga estoria a pakairamanan dagiti babbai a maidilig kadagiti dadduma pay nga Ebanghelio.
Kitaen met iti Pangiwanwan iti Nasantuan a Kasuratan, “Dagiti Ebanghelio,” “Mateo,” “Lucas.”
Naipasngay ni Jesucristo iti maysa a mortal nga ina ken imortal nga Ama.
Iti Mateo 1:18–25 ken Lucas 1:26–35, kitaen no kasano nga inladawan da Mateo ken Lucas ti milagro ti pannakayanak ni Jesus. Kasano a mapatibker dagiti panangiladawanda ti pammatim iti Mangisalakan? Apay a napateg a maammuam nga agpada nga Anak ti Dios ken anak ni Maria ni Jesus?
Inlawlawag ni Presidente Russell M.Nelson a ti Pannubbot ni Jesucristo ket “agkasapulan iti bukod a panagsakripisio ti maysa nga imortal a parsua a saan a makapadas iti ipapatay. Ngem Isu nasken a matay ket isublina manen iti bukodna a bagi. Ti Mangisalakan ti kakaisuna laeng a makaipatungpal iti daytoy. Manipud iti inana tinawidna ti bileg a matay. Manipud Iti Amana nagun-odna ti bileg a mangparmek iti ipapatay” (“Constancy amid Change,” Ensign,, Nob.1993,34).
Umay dagiti bendision ti Dios iti bukodna a panawen.
No matakuatam ti bagim nga agur-uray iti maysa a bendision, wenno kasla saan a dumdumngeg ti Dios kadagiti kararagmo, mabalin a maysa a palagip ti estoria da Elisabet ken Zacarias nga Isu saannaka a nalipatan. Kas iti inkari ni Elder Jeffrey R. Holland: “Kabayatan ti panagtrabaho ken panaguraytayo a sangkamaysa kadagiti sungbat iti sumagmamano a kararagtayo, idiayak kadakayo ti karik kas apostol a nangngegan ida ken nasungbatan ida, nupay nalabit a saan nga iti panawen wenno iti wagas a tinarigagayantayo. Ngem kanayon a masungbatanda iti kanito ken iti wagas a nasken a sungbatan ida ti maysa a mannakaammo iti amin ken awan patinggana a manangngaasi a nagannak” (“Waiting on the Lord,” Liahona, Nob. 2020, 115–16). Kasano a nagtalinaed a napudno da Zacarias ken Elisabet? (kitaen iti Lucas 1:5–25, 57–80). Makitam kadi ti bagim nga agur-uray iti maysa a bendision? Ania ti mariknam a namnamaen ti Apo kenka bayat ti panagur-uraymo?
Kalpasan ti simamatalek a panaguray, nabendisionan da Elisabet ken Zacarias iti maysa nga anak a lalaki.
Sitatallugod nga agtulnog iti pagayatan ti Dios dagiti napnuan pammati.
Kas ken ni Maria, no dadduma matakuatantayo a dagiti plano ti Dios para iti biagtayo maigidiat iti no ania ti plinanotayo. Ania ti masursuroyo manipud ken Maria maipapan iti panangawat ti pagayatan ti Dios? Kadagti sumaganad a tsart, isuratmo dagiti palawag manipud iti anghel ken ni Maria (kitaen iti Lucas 1:26–38), karagpin dagiti mensahe a masarakam kadagiti palawagda:
|
Dagiti balikas ti anghel ken ni Maria |
Mensahe a para kaniak |
|---|---|
Dagiti balikas ti anghel ken ni Maria “Ti Apo adda kenka” (bersikulo 28). | Mensahe a para kaniak Ammo ti Apo ti kasasaadko ken dagiti panagkarigatak. |
Dagiti balikas ti anghel ken ni Maria
| Mensahe a para kaniak
|
Dagiti balikas ti anghel ken ni Maria
| Mensahe a para kaniak
|
|
Dagiti reaksion ni Maria |
Mensahe a para kaniak |
|---|---|
Dagiti reaksion ni Maria “Kasanonto daytoy?” (bersikulo 34). | Mensahe a para kaniak OK ti agsaludsod tapno nasaysayaat a maawatan ti pagayatan ti Dios. |
Dagiti reaksion ni Maria
| Mensahe a para kaniak
|
Dagiti reaksion ni Maria
| Mensahe a para kaniak
|
Bayat ti panangbasam maipapan iti nalinteg a pagwadan ni Jose iti Mateo 1:18–25, ania ti masursurom maipapan iti panangawat iti pagayatan ti Dios? Ania dagiti nayon a nalawag a pannakaammo ken pannakaawat manipud kadagiti padas da Zacarias ken Elisabet? (kitaen iti Lucas 1?
Kitaen met iti Lucas 22:42: Pangiwanwan iti Nasantuan a Kasuratan, “Gabriel.”
Pinaneknekan ni Maria maipapan ti mision ni Jesucristo.
Dagiti sao ni Maria iti Lucas 1:46–55 ti nangipadles kadagiti aspekto ti mision ti Mangisalakan. Ania ti masursurom maipanggep ken Jesucristo manipud kadagiti palawag ni Maria? Mabalinmo nga idilig dagitoy a bersikulo kadagiti balikas ni Ana iti 1 Samuel 2:1–10 iti Naimbag a Gasat ni Jesus iti Mateo 5:3–12. Ania ti isuro ti Espiritu kenka bayat ti panangutobmo kadagitoy a bersikulo?
Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening
-
Mateo 1:1–17.Bayat ti panangbasa ti pamiliam iti kapupuon ni Jesus, mabalinmo ti mangilawlawag iti bukodmo a pakasaritaan ti pamiliayo ken mangiburay iti sumagmamano nga estoria maipapan kadagiti kapuonanyo. Kasano a ti pannakaammom maipanggep ti pakasaritaan ti pamiliam ket mangbendision iti pamiliam? Para iti ad-adu pay nga aktibidad iti family history, kitaen iti FamilySearch.org/discovery.
-
Mateo 1:20; Lucas 1:11–13,30.Apay a mabalin a nagbuteng dagiti tao kadagitoy a bersikulo? Ania ti makaigapu iti pannakariknatayo iti panagbuteng? Kasano nga awisennatayo ti Dios a “saan nga agbuteng”?
-
Lucas 1:37.Tapno matulongam ti pamiliam a maaddaan iti pammati nga “iti Dios awan ti di mabalin,” aggigiddankayo a mangsukisok iti Lucas 1 ket sapulenyo dagiti banag nga inaramid ti Dios a mabalinna nga imbilang a di mabalin. Ania dagiti dadduma pay nga estoria a maibinglaytayo—manipud kadagiti nasantuan a kasuratan wenno bukodtayo a biag—a nagaramidan ti Dios kadagiti kasla imposible a bambanag? Ti panangsukisok iti Libro ti Arte ti Ebanghelio ket makaipaay iti sumagmamano a kapanunotan.
-
Lucas 1:46–55.Ania ti sumagmamano kadagiti “dadakkel a banag” nga inaramiden ti Dios para kadatayo? Ania ti mabalin a kayatna a sawen para iti kararuatayo ti “padakkelen ti Apo”?
Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary..
Naisingasing a kanta: “He Sent His Son,” Children’s Songbook,, 34–35
Panangpadur-as iti Panangisurotayo
Yaplikarmo dagiti nasantuan a kasuratan iti biagmo. Kalpasan ti panangbasa iti maysa a binatog iti nasantuan a kasuratan, awisem dagiti miembro ti pamilia a mangyaplikar iti daytoy iti biagda (kitaen iti Panangisuro iti Wagas ti Mangisalakan, 21). Kas pagarigan, kasano a mayaplikar dagiti miembro ti pamilia no ania ti nasursuroda manipud iti Mateo 1 ken Lucas 1 maipapan iti isusungbat iti awag ti Apo?
Nagasatka kadagiti Babbai,, ni Walter Rane