Enero 16–22

Juan 1

Nasarakanmi ti Mesias

Bayat ti panagbasam ken panagutobmo iti Juan 1, isuratmo dagiti impresion a maawatmo. Ania dagiti mensahe a masarakam nga agbalinto a kapapatgan kenka ken ti pamiliam? Ania ti mabalinmo nga ibinglay kadagiti klasem iti Simbaan?

Isuratmo Dagiti Impresionmo

Napanunotmo kadin no nailasinmo koma ni Jesus ti Nazaret kas Anak ti Dios no sibibiagka idin kabayatan ti panagministrona iti daytoy a biag? Iti uneg ti adu a tawen, naguray ken nagkararag dagiti napudno nga Israelita, a pakairamanan da Andres, Pedro, Felipe, ken Natanael, iti yaay ti naikari a Mesias. Idi nakitada Isuna, kasano ti pannakaammoda nga Isu ti Maysa a sinapsapulda? Kas met iti pannakaam-ammotayo amin iti Mangisalakan—babaen ti panangawat ti awisna nga “umay ken mangkita “para iti bagbagitayo (Juan 1:39). Mabasatayo ti maipanggep Kenkuana kadagiti nasantuan a kasuratan. Mangngegantayo ti doktrinana. Mapaliiwtayo ti wagasna iti panagbiag. Mariknatayo ti Espirituna. Iti dalantayo, matakuatantayo, kas iti inaramid ni Natanael, nga am-amonatayo ti Mangisalakan ken ay-ayatennatayo ken kayatna nga isagananatayo nga umawat kadagiti “nain-indaklan a bambanag” (Juan 1:50).

Dagiti Kapanunotan para iti Bukod a Panagadal iti Nasantuan a Kasuratan

Asino ni Juan?

Ni Juan ti maysa a disipulo ni Juan Bautista ken idi agangay nagbalin a maysa kadagiti umuna a pasurot ni Jesucristo ken maysa kadagiti Sangapulo-ket-dua nga Apostolna. Insuratna ti Ebanghelio ni Juan, ti sumagmamano a surat, ken ti libro ti Apocalipsis. Iti Ebangheliona, intudona ti bagina a kas disipulo a “dinungdungngo ni Jesus” ken ti “sabali a disipulo” (Juan 13:23; 20:3). Nalaus unay ti kinapasnek ni Juan iti pannakaikasaba ti ebanghelio ta indawatna pay ti agnaed ditoy daga agingga iti Maikadua a Yaay ti Mangisalakan tapno mayegna pay ti adu a kararua ken Cristo (kitaen iti Doktrina ken Katulagan 7:1–6).

Kitaen met iti Pangiwanwan iti Nasantuan a Kasuratan, “Juan,” ken “Juan, ti Ebanghelio ni.”

Lucas 1:1–5

Addan ni Jesuscristo “idi punganay iti Dios.”

Rinugian ni Juan ti Ebangheliona babaen ti panangiladawanna iti aramid nga impatungpal ni Cristo sakbay ti pannakayanakna: “Idi punganay … ti Balikas [Jesucristo] adda iti Dios.” Ania ti masursurom manipud kadagiti bersikulo 1–5 maipanggep iti Mangisalakan ken ti aramidna? Masarakam dagiti makatulong a panangilawlawag iti Patarus ti Joseph Smith, Juan 1:1–5 (iti Pangiwanwan iti Nasantuan a Kasuratan). Bayat ti panangirugim nga agadal maipapan iti biag ti Mangisalakan, apay a napateg nga ammuen ti maipapan Iti aramidna iti biag sakbay daytoy a biag?

Kitaen met iti Gospel Topics, “Jesus Christ Chosen as Savior,” topics.ChurchofJesusChrist.org.

Juan 1:1–18

Ni Jesucristo ti “pudno a Silaw,” ti Anak ti Dios.

Naparegta ni Juan a mangsapul iti Mangisalakan gapu iti pammaneknek ni Juan Bautista, a nangipakdaar nga “immay tapno mangipaneknek iti … ti pudno a Silaw” (Juan 1:8–9). Nabileg nga impaneknek pay ni Juan mismo maipapan iti biag ken mision ti Mangisalakan.

Mabalin a makaay-ayo ti agaramid iti listaan dagiti kinapudno nga inraman ni Juan iti pangrugi a pammaneknekna maipapan ken Cristo (dagiti bersikulo 1–18; kitaen met iti Patarus ti Joseph Smith, Juan 1:1–19 [iti Pangiwanwan iti Nasantuan a Kasuratan]). Apay iti panagkunam nga inrugi ni Juan ti Ebangheliona kadagitoy a kinapudno? Ibilangmo nga isurat ti pammaneknekmo maipapan ken ni Jesucristo—ania ti kayatmo nga ibinglay? Ania dagiti padas a nakatulong kenka a mangam-ammo ken sumurot iti Mangisalakan? Asino ti mabendisionan iti panagdengngeg iti pammaneknekmo?

Juan 1:11–13

Ikkannatayo ni Jesucristo iti “bileg nga agbalin” nga annak a lallaki ken annak a babbai ti Dios.

Nupay espiritutayo amin nga annak a lallaki ken babbai ti Dios Ama, no agbasoltayo agbalintayo a ganggannaet, wenno naisina, manipud Kenkuana. Indiayaannatayo ni Jesucristo iti maysa a wagas a makasubli babaen ti pangsubbot a sakripisiona. Utoben no ania ti isuro ti Juan 1:11–13 maipapan iti panangbalin nga annak a babbai ken annak a lallaki ti Dios. Panunoten pay no ania ti isuro dagitoy a nasantuan a kasuratan maipapan no kasano nga awatentayo daytoy a sagut: Taga Roma 8:14–18; Mosiah 5:7–9; Doktrina ken Katulagan 25:1. Ania ti kayat na a sawen kenka ti maaddaan iti “bileg nga agbalin” nga anak a babai wenno anak a lalaki ti Dios?

Juan 1:18

Nagpaneknek ti Ama a maipapan iti Anakna.

Juan 1:18 dakamatenna nga awan ti nakakita iti Dios. Nupay kasta, ilawlawag ti Patarus ni Joseph Smith daytoy a bersikulo nga “awan tao a nakakita iti Dios iti kaano man, malaksid no impaneknekna ti Anak”(kitaen iti Juan 1:18, footnote c). Ibilang ti panangrebyu kadagiti sumaganad a pagarigan a nakangngegan iti Dios Ama nga agpampaneknek iti Anak: Mateo 3:17; 17:5; 3 Nephi 11:6–7; Joseph Smith—Pakasaritaan 1:17.

Apay a maysa a bendision ti maaddaan kadagitoy a pakaammuan? Ania ti isuroda kenka maipapan iti pakainaigan ni Jesucristo iti Amana?

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Bayat ti panagadaltayo kadagiti nasantuan a kasuratan, umawattayto iti inspirasion para iti biagtayo.

Juan 1:4–10.Kasano a matulongam ti pamiliam a mangiladawan iti panunotda iti no ania ti nabasada maipanggep iti silaw kadagitoy a bersikulo? Mabalinmo a pagsisinnublaten dagiti miembro ti pamilia a mangparaniag iti silaw iti nasipnget a siled ken mangibinglayda ti no kasano a Silaw ti Mangisalakan iti biagda. Kalpasanna, bayat ti panangbasam iti Juan 1:4–10, mabalin nga adda inayon dagiti miembro ti pamilia a nalawag a pannakaammo ken pannakaawat [insight] iti pammaneknek ni Juan maipapan ken ni Jesucristo, ti Silaw ti Lubong.

Juan 1:35–36.Apay a mabalin nga inawagan ni Juan Bautista ni Jesus a “ti Kordero ti Dios”? Ania ti masursurotayo maipapan iti daytoy a paulo manipud iti mensahe ni Elder Jeffrey R. Holland “Adtoy ti Kordero ti Dios” wenno ti mensahe ni Elder Gerrit W. Gong “Naimbag a Pastor, Kordero ti Dios”? (Liahona, Mayo 2019, 44–46, 97–101)

Juan 1:35–46.Ania dagiti bunga ti pammaneknek ni Juan? Ania ti masursuro ti pamiliam manipud kadagiti tao a nailadawan kadagitoy a bersikulo maipapan iti no kasano nga ibinglay ti ebanghelio? Kitaen met iti video “Inviting Others to ‘Come and See’” (ChurchofJesusChrist.org).

Juan 1:45–51.Ania ti inaramid ni Natanael a nakatulong kenkuana a nakagun-od iti pammaneknek maipapan iti Mangisalakan? Awisem dagiti miembro ti pamilia nga agsarita maipapan no kasano a nagun-odda dagiti pammaneknekda.

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.

Naisingasing a himno: “The Lord Is My Light,” Hymns, no. 89.

Panangpadur-as iti Panangisurotayo

Ibinglay dagiti adalen a banag [object lesson]. Awisem dagiti miembro ti pamilia a mangsapul kadagiti banag a mabalinda nga usaren a makatulong kadakuada a makaawat kadagiti pagbatayan a masarakan kadagiti nasantuan a kasuratan a basbasaenyo kas maysa a pamilia. Kas pagarigan, mabalinda nga usaren ti maysa a kandela a mangibagi iti Silaw ni Cristo (kitaen iti Juan 1:4).

Parsuaen ni Jehova ti Lubong, ni Walter Rane