Disiembre 26–Enero 1

Responsabletayo para iti Bukodtayo a Panagsursuro

Ti panggep dagiti nasantuan a kasuratan ket tapno tulongannaka nga umasideg ken ni Cristo ken agbalin a naun-uneg ti pannakapasurotmo iti ebangheliona. Umaykayo, Sumurot Kaniak—Para kadagiti Indibidual ken Pamilia: 2023 makatulong kenka a mangawat kadagiti nasantuan a kasuratan ken mangsapul kadagitoy ti naespirituan a pigsa a kasapulam ken ti pamiliam. Kalpasanna, kadagiti klasem iti Simbaan, maaddaankanto kadagiti gundaway a mangibinglay kadagiti nalawag a pannakaammo ken pannakaawat (insights) ken mangparegta kadagiti padam a Sasanto kadagiti panagkagumaanda a sumurot ken ni Cristo.

Isuratmo dagiti Impresionmo

“Ania ti sapulenyo?“ Dinamag ni Jesus kadagiti disipulo ni Juan Bautista (Juan 1:38). Mabalin a damagenyo iti bagiyo ti isu met la a saludsod—ta no ania ti naammuanyo iti Baro a Tulag daytoy a tawen ket agpannurayto no ania ti sapsapulenyo. “Agsapulkayo, ket makasarakkayto” ti kari ti Mangisalakan (Mateo 7:7). Kasta met a damagem dagiti saludsod nga umay iti panunotmo bayat ti panagadalmo, ken kalpasanna ikalikagummo a sireregta ti agbirok kadagiti sungbat. Iti Baro a Tulag mabasamto ti maipapan kadagiti nabileg a naespirituan a padas dagiti disipulo ni Jesucristo. Kas napudno a disipulo ti Mangisalakan, mabalin a maaddaanka kadagiti bukodmo a nabileg a naespirituan a padas bayat ti panangawatmo iti awis ti Mangisalakan, a masarakan iti daytoy sagrado a pagbasaan, “Umayka, surotennak” (Lucas 18:22).

Dagiti Kapanunotan para iti Bukod a Panagadal iti Nasantuan a Kasuratan

Tapno napudpudno ti panagsursuro manipud iti Mangisalakan, nasken nga awatek ti awisna nga, “Umayka, surotennak.”

Ti awis ti Mangisalakan, “Umayka, surotennak,” ket mayaplikar iti amin—no nabiit tay pay nga adda iti dana ti kinadisipulo wenno nagnatayon iti daytoy iti unos ti panagbiagtayo. Daytoy ti awisna iti nabaknang nga agtutubo a lalaki a mangikarkarigatan nga agtungpal kadagiti bilin (kitaen iti Mateo 19:16–22; Lucas 18:18–23). No ania ti nasursuro ti agtutubo a lalaki—ken no ania ti nasken a sursuruentayo amin—isu ti kaipapanan ti panagbalin a disipulo ket ti panangted iti sibubukel a kararuatayo iti Nailangitan nga Ama ken ni Jesucristo. Agprogresotayo iti kinadisipulotayo no ammuentayo no ania dagiti pagkurangan, balbaliwan, ken kalikagumantayo nga ad-adda a sumurot a naan-anay Kadakuada.

Mangrugi ti panagsursurotayo manipud iti Mangisalakan no ikarigatantayo a maawatan no ania ti insurona. Kas pagarigan, kasano a mapauneg ti pannakaawatmo maipapan iti pammakawan bayat ti panagsukisokmo iti sumaganad?

• Dagiti pannursuro ti Mangisalakan (kitaen iti Mateo 18:1–5; Lucas 18:9–14)

• Maysa a pagwadan manipud iti biagna (kitaen iti Juan 13:1–15)

No kayatmo a sursuruen ti ad-adu pay, padasem daytoy nga aktibidad iti sabali pay a pagbatayan ti ebanghelio, kas iti ayat wenno panagpakawan.

Responsableak para iti bukodko a panagsursuro.

Kinuna ni Elder David A. Bednar: “Saantayo koma a namnamaen ti Simbaan a kas maysa a gunglo a mangisuro wenno mangibaga kadatayo iti amin a banag a kasapulantayo a maammuan ken aramiden tapno agbalin a napasnek a disipulo ken situtured nga agibtur agingga iti panungpalan. Ketdi, bukodtayo a pagrebbengan ti mangsursuro iti no ania ti nasken a sursuruentayo, agbiag a kas iti ammotayo a nasken a panagbiagtayo, ken agbalin iti kayat ti Maestro a nasken a pagbalinantayo. Ket dagiti pagtaengantayo ti kangrunaan a lugar a pagsursuruan, pagnaedan, ken pagbalinan” (“Prepared to Obtain Every Needful Thing,” Liahona, Mayo 2019, 102).

Ania ti kaipapanan ti umawat iti pagrebbengan para it bukodmo a panagsursuro? Sapulem dagiti mabalin a sungbat iti palawag ni Elder Bednar ken iti sumaganad a nasantuan a kasuratan: Juan 7:17; 1 Taga Tesalonica 5:21; Santiago 1:5–6, 22; 2:17; 1 Nephi 10:17–19; 2 Nephi 4:15; Alma 32:27; ken Doktrina ken Katulagan 18:18; 58:26–28; 88:118. Ania ti mariknam a makaparegta nga aramiden tapno agbalin nga ad-adda nga aktibo iti panangsursuro iti ebanghelio?

Nasken a maammuak ti kinapudno para iti bagik.

Nalabit nga am-ammom dagiti tao a kasla saan a pulos mapukaw ti pammatida, uray no ania ti mapasamak iti biagda. Mabalin nga ipalagipda kenka ti lima a manakem a babbalasang iti pangngarig ti Mangisalakan (kitaen iti Mateo 25:1–13). Mabalin a saanmo a makita dagiti napasnek a panagkagumaanda a mangpapigsa kadagiti pammaneknekda maipapan iti kinapudno.

Kasano a magun-od ken mataraonantayo dagiti bukodtayo a pammaneknek? Isuratmo dagiti kapanunotam bayat ti panangutobmo kadagiti sumaganad a nasantuan a kasuratan: Lucas 11:9–13; Juan 5:39; 7:14–17; Dagiti Aramid 17:10–12; 1 Taga Corinto 2:9–11; ken Alma 5:45–46. (Kitaen met iti Gospel Topics, “Testimony,” topics.ChurchofJesusChrist.org.)

Nasken a manggun-od ti tunggal maysa kadatayo iti pammaneknek para iti bagbagitayo.

Ania ti nasken nga aramidek no addaanak kadagiti saludsod?

Bayat ti panagkalikagummo a manggun-od iti naespirituan a pannakaammo, sumangbayto dagiti saludsod iti panunotmo. Makatulong kenka dagiti sumaganad a pagbatayan a mangsungbat kadagiti saludsod kadagiti wagas a mangpabileg iti pammati ken pammaneknek:

• Agkiddaw iti pannakaawat manipud iti Dios. Ti Dios ti pagtaudan ti amin a kinapudno, ket ipalgakna ti kinapudno babaen ti Espiritu Santo, dagiti nasantuan a kasuratan, ken dagiti propeta ken apostolna.

• Agtignay iti pammati. No saan a dagus nga umay dagiti sungbat, agtalekka nga ipalgakto ti Apo dagiti sungbat iti umisu a panawen. Iti kabayatanna, pagtalinaedem ti panagbiagmo babaen ti kinapudno nga ammomon.

• Agtungpal iti agnanayon a pannirigan. Padasem a kitaen dagiti banag a kas iti panangkita ti Apo kadakuada, saan a kas iti panangkita ti lubong. Kitaem dagiti saludsodmo iti konteksto ti plano ti pannakaisalakan ti Nailangitan nga Amatayo.

Dagiti Kapanunotan para iti Sangapamiliaan a Panagadal iti Nasantuan a Kasuratan ken Home Evening

Mateo 13:1–23.Tapno matulongam ti pamiliam nga agsagana a masursuruan manipud iti Baro a Tulag iti daytoy a tawen, mabalinmo a basaen ti pangngarig ti agmulmula. Mabalin a maay-ayo ti pamiliam a rummuar ket mangbuya kadagiti nadumaduma a kita ti daga a nailadawan iti pangngarig. Kasano a maaramidtayo dagiti puspusotayo kas iti “nasayaat a daga” nga inladawan ni Jesus? (Mateo 13:8).

Taga Galacia 5:22–23; Taga Filipos 4:8.Inawisnakayo ni Presidente Russell M. Nelson a “mamagbalin iti pagtaengan[yo] a santuario ti pammati” ken “mangbalbaliw iti pagtaenganyo a maysa a sentro a pagsursuruan iti ebanghelio.” Kadagiti mangaramid kadagitoy a banag, inkarina: “Dagiti annakyo aggagardanto nga agsursuro ken agbiag kadagiti pannursuro ti Mangisalakan, ken bumassitto ti impluensia ti kabusor iti biagyo ken iti pagtaenganyo . Nagagar ken agtultuloyto dagiti panagbalbaliw iti pamiliayo” (“Becoming Exemplary Latter-day Saints,” Liahona, Nob. 2018, 113).

Iti rugi ti baro a tawen ti maysa a napintas a panawen a mangangay iti family council maipanggep iti panangaramidyo iti pagtaenganyo a “maysa a santuario ti pammati” ken “maysa a sentro a pagsursuruan iti ebanghelio. Ania dagiti kapanunotan maipapan iti no kasano nga aramiden daytoy bayat ti panangbasatayo iti Taga Galacia 5:22–23 ken Taga Filipos 4:8? Nalabit a mabalin nga ituding ti pamiliam dagiti bukod ken sangapamiliaan a panggep a tun-oyen a mangadal iti Baro a Tulag iti daytoiy nga umay a tawen. Ania ti maaramidtayo a mangipalagip iti bagbagitayo dagiti panggeptayo a tun-oyen?

Para iti ad-adu pay a kapanunotan para iti panangisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—For Primary.

Naisingasing a kanta: “Teach Me to Walk in the Light,” Children’s Songbook,, 177.

Panangpadur-as iti Bukod a Panagadal

Sapulen ti doktrina. Agnanayon, saan nga agbalbaliw a kinapudno ti maysa a doktrina. Impakdaar ni Presidente Boyd K. Packer a ti “pudno a doktrina, no maawatan, mangbalbaliw kadagiti galad ken tignay” (“Little Children,” Ensign, Nob. 1986, 17). Bayat ti panagadalmo ken panagadal ti pamiliam kadagiti nasantuan a kasuratan, sarakenyo dagiti kinapudno a makatulong kadakayo nga agbiag nga ad-adda a kas iti Mangisalakan.

Silaw iti Lubong,, ni Brent Borup