Panangiraman iti Sagrado a Musika iti Panagsursurom iti Ebanghelio

Makatulong ti panagkansion kadagiti kanta ti Primary ken himno a mangbendision kenka ken ti pamiliam iti adu a wagas. Dagitoy a kapanunotan ti makatulong kenka a mangusar iti sagrado a musika bayat ti panagkagumaam nga agsursuro ken agbiag iti ebanghelio.

• Adalem dagiti pagbatayan a mainaig iti doktrina. Sapulem dagiti kinapudno a maisursuro kadagiti kanta a kansionen wenno denggenyo. Mabalin a daytoy ti mangiturong iti panaglilinnawag iti ebanghelio maipapan kadagitoy a kinapudno iti agmalem. Kansionen wenno denggen dagiti kanta ti Primary wenno himno a mangisuro maipapan ken ni Jesucristo ken ti ebangheliona. Ikasom dagiti wagas a pangipaneknekan ti Espiritu Santo iti Mangisalakan ken dagiti pannursurona.

• Bigbigem ti bileg ti musika. Ti panagkansion wenno panagdengngeg kadagiti kanta ti Primary ken himno ket mabalin a bendision kadagiti panawen ti panagkasapulan. Kas pagarigan, mabalin a ti panagkansion iti kanta ti mangpatalna iti maysa nga ubing iti pannaturog, mangparnuay iiti rag-o kas pamilia bayat ti panagtitinnulong ti pamiliam, mangitag-ay iti kaarrubam a masakit, wenno mangliwliwa iti maysa a tao a maburburiboran.

• Ibinglaymo dagiti padas. Ibinglaymo dagiti bukod ken sangapamiliaan a padas a mainaig kadagiti mensahe dagiti kanta. Mabalinmo pay nga ibinglay dagiti estoria a mainaig iti nasantuan a kasuratan.

• Iramanmo ti pamiliam. Ad-adunto ti masursuro ti pamiliam manipud kadagiti kanta no sigaganetgetda iti pannakiraman. Tapno mairaman dagiti miembro ti pamilia, mabalinmo nga awisen ti in-inauna nga ubbing a tumulong a mangisuro iti maysa a kanta kadagiti inaudi a kakabsatda wenno awisem dagiti ubbing a mangisuro iti pamilia iti kanta a nasursuroda iti Primary. Mabalinmo pay a pagsisinnublaten dagiti miembro ti pamilia a mangidaulo iti maysa a kanta.

• Agbalinka a managpartuat. Agusar iti nadumaduma a wagas a pakasursuruan iti sagrado a musika kas maysa a pamilia. Kas pagarigan, mabalinmo nga aramiden dagiti tignay a maigiddan kadagiti balikas ken ragup ti balikas iti maysa a kanta. Wenno mabalinmo a pagsisinnublaten ti panangyakem kadagiti paset ti maysa a kanta idinto a padasen a pugtuan dagiti dadduma pay a miembro ti pamilia ti kanta. Mabalin a magustuan ti pamiliam ti panangkansion kadagiti kanta iti agduduma kadaras wenno kapigsa. Addaan ti Gospel Library app ken ti Gospel for Kids app kadagiti audio recording ken video a makatulong kenka a mangsursuro kadagiti kanta. Mabalinmo met ti agaramid iti playlists ti sagrado a musika a denggenyo.

Para iti ad-adu pay a kapanunotan, kitaen dagiti benneg a “Panangusar iti Musika a Mangisuro iti Doktrina” ken “Panangtulong kadagiti Ubbing nga Agsursuro ken Manglagip kadagiti Kanta iti Primary ken Himno,” a masarakan iti “Dagiti Pangiturong para iti Oras ti Panagkanta ken Pabuya dagiti Ubbing iti Miting iti Sakramento” iti Umaykayo, Sumurot Kaniak—Para iti Primary.