Panangisuro kadagiti Inaudi nga Ubbing

No addaanka kadagiti inaudi nga ubbing iti pamiliam, dagitoy ti sumagmamano nga aktibidad a makatulong kadakuada nga agsursuro:

• Agkanta. Dagiti himno ken dagiti kanta manipud iti Children’s Songbook isuroda ti doktrina a sibibileg. Usarem ti topics index iti likud ti Children’s Songbook a mangsapul kadagiti kanta a mainaig kadagiti pagbatayan ti ebanghelio nga isursurom. Tulongam dagiti annakmo a manginaig kadagiti mensahe dagiti kanta iti biagda. (Kitaen met iti “Panangiraman iti Sagrado a Musika iti Panagsursurom iti Ebanghelio” iti daytoy a resource.)

• Dumngeg wenno mangyakem iti estoria. Paggugusto dagiti babassit nga ubbing dagiti estoria—manipud kadagiti nasantuan a kasuratan, manipud iti biagmo, manipud iti pakasaritaan ti Simbaan wenno pakasaritaan ti pamiliam, wenno manipud kadagiti magasin ti Simbaan. Mangsapul kadagiti wagas a mangiraman kadakuada iti panangisarita iti estoria [storytelling]. Mabalinda ti agiggem kadagiti ladawan wenno banag, mangidrowing kadagiti ladawan ti no ania dagiti mangmangngegda, mangyakem ti estoria, wenno uray pay mangtulong a mangisarita iti estoria. Tulongam dagiti annakmo a mangbigbig kadagiti kinapudno ti ebanghelio kadagiti estoria nga ibinglaymo.

• Agbasa iti nasantuan a kasuratan. Mabalin a saan unay a kabaelan dagiti ubbing ti agbasa, ngem mabalinmo latta nga iraman ida iti panagsursuro manipud kadagiti nasantuan a kasuratan. Mabalin a kasapulam ti agpokus iti maysa a bersikulo, kangrunaan a ragup ti balikas, wenno balikas. Mabalin a kabaelan dagiti ubbing ti mangyulo kadagiti ababa a ragup dagiti balikas manipud kadagiti nasantuan a kasuratan no ulitenda dagitoy iti sumagmamano a gundaway. Bayat ti pannakangngegda iti balikas ti Dios, mariknadanto ti Espiritu.

• Kumita iti maysa a ladawan wenno agbuya iti video. No ipakitam kadagiti annakmo ti maysa a ladawan wenno ipabuyam ti video a mainaig iti maysa a pagbatayan ti ebanghelio wenno estoria iti nasantuan a kasuratan, agdamagka kadakuada kadagiti saludsod a mangtulong kadakuada a masursuruan manipud iti no ania dagiti makitkitada. Kas pagarigan, mabalinmo a saludsoden, “Ania ti mapaspasamak iti daytoy a ladawan wenno video? Ania ti iparikna daytoy kenka?” Ti Gospel Media app, GospelMedia.ChurchofJesusChrist.org , ken children.ChurchofJesusChrist.org ket dagiti nasayaat a lugar a pakasarakan kadagiti ladawan ken video.

• Agpartuat. Mabalin dagiti ubbing ti agaramid, agdrowing, wenno agkolor iti maysa a banag a mainaig iti estoria wenno pagbatayan a sursuruenda.

• Makiraman kadagiti adalen a banag [object lesson]. Makatulong ti simple a banag nga adalen [object lesson] kadagiti annakyo tapno maawatanda dagiti pagbatayan ti ebanghelio a narigat a maawatan. No agus-usarka kadagiti banag nga adalen [object lesson], mangsapulka kadagiti wagas a pakapagpartisiparan dagiti annakmo. Ad-adunto ti masursuroda manipud iti padas iti pannakipulapol ngem iti panangbuybuya laeng iti maysa a demonstrasion.

• Mangyakem [role-play]. No mangakem dagiti ubbing ti maysa a situasion nalabit a mapadasandanto iti pudno a biag, nasaysayaat ti pannakaawatda no kasano a mayaplikarda ti pagbatayan ti ebanghelio iti biagda.

• Uliten dagiti aktibidad. Mabalin a kasapulan dagiti babassit nga ubbing ti dumngeg kadagiti konsepto iti mamin-adu a gundaway tapno maawatanda dagitoy. Saanka nga agamak a mangulit a masansan kadagiti estoria wenno aktibidad. Kas pagarigan, mabalinmo nga ibinglay ti maysa nga estoria iti nasantuan a kasuratan iti sumagmamano a daras iti nadumaduma a wagas—babaen iti panagbasa manipud kadagiti nasantuan a kasuratan, pananggupgop iti bukodmo a balikas, panangipabuya iti maysa a video, panagpatulong kadagiti annakmo nga agisalaysay iti estoria, panangawis kadakuada a mangyakem iti estoria, ken dadduma pay.

pamilia nga agad-adal kadagiti nasantuan a kasuratan